Šëkri Aqtaš: ܡܳܪܝ̱ ܛܝܡܳܬܶܐܘܣ ܫܡܘܐܝܶܠ ܐܰܩܛܰܫ ܐܘ ܚܰܣܝܐ ܕܛܘܪܥܰܒܕܝܢ ܘܐܘ ܪܝܫ ܕܰܝܪܐ ܕܡܳܪܝ̱ ܓܰܒܪܐܝܶܠ / Mor Ṭimoṯeos Šmuyel Aqṭaš u ḥasyo d Ṭurcabdin w u rišdayro d Mor Gabriel

Mor Ṭimoṯeos Šmuyel Aqṭaš u ḥasyo d Ṭurcabdin w u rišdayro d Mor Gabriel

ܡܳܪܝ̱ ܛܝܡܳܬ݂ܶܐܘܣ ܫܡܘܐܝܶܠ ܐܰܩܛܰܫ، ܡܰܘܠܰܕ ܚܰܐ ܒܘ ܝܰܪܚܐ ܩܰܡܳܝܐ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܚܰܡܷܫ ܘܰܐܪܒܥܝ ܒܝ ܩܪܝܬ݂ܐ ܕܒܶܩܘܣܝܳܢܶܐ ܕܛܘܪܥܰܒܕܝܢ. ܡܶܐ ܐܰܒܳܗܶܐ ܡܗܰܝܡܢܶܐ ܡܰܠܟܶܐ ܘܡܰܪܝܰܡ. ܟܷܬܠܶܗ ܐܷܫܬܐ ܐܰܚܘܢܳܢܶܐ ܘܚܕ݂ܐ ܚܳܬ݂ܐ. ܝܰܠܷܦ ܐܘ ܝܘܠܦܳܢܰܝܕ݂ܶܗ ܐܘ ܩܰܡܳܝܐ ܒܝ ܡܰܕܪܰܫܬܐ ܕܝ ܥܝܬܐ ܕܡܳܪܝ̱ ܐܶܠܝـܝܐ ܕܝ ܩܪܝܬ݂ܐ. ܒܷܬ݂ܷܪܟܶܐ ܡܫܰܡܰܫܠܶܗ ܟ݂ܘܕ ܫܰܡܳܫܐ ܘܡܰܠܦܳܢܐ ܒܝ ܥܝܬܐ ܕܡܳܪܝ ܐܶܠܝـܝܐ. ܠܰܫܰܢ ܕܥܳܡܰܩ ܒܘ ܝܘܠܦܳܢܰܝܕ݂ܶܗ ܘܡܰܩܘܶܠܶܗ، ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܚܕ݂ܐ ܘܷܐܫܬܝ، ܐܰܙܙܶܐ ܡܝ ܩܪܝܬ݂ܐ ܠܝ ܕܰܝܪܐ ܕܡܳܪܝ̱ ܓܰܒܪܐܝܶܠ. ܒܷܬ݂ܷܪ ܡܘ ܝܘܠܦܳܢܐ ܕܒܝ ܡܰܕܪܰܫܬܐ ܟܳܗܢܳܝܬܐ ܕܡܳܪܝ̱ ܓܰܒܪܐܝܶܠ، ܗܘܠܶܗ ܩܰܪܰܪ ܕܥܳܒܰܪ ܬܰܚܬܘ ܢܝܪܐ ܕܝ ܕܰܝܪܳܝܘܬ݂ܐ ܘܕܗܳܘܶܐ ܕܰܝܪܳܝܐ ܒܝ ܕܰܝܪܐ. ܡܰܣܪܰܚ ܕܰܝܪܳܝܐ ܫܰܪܘܳܝܐ ܡܶܐ ܐܝܕ݂ܶܗ ܕܘ ܐܶܦܷܣܩܘܦܐ ܕܛܘܪܥܰܒܕܝܢ ܡܳܪܝ̱ ܐܝܘܰܢܢܝܣ ܐܰܦܪܶܝܡ ܒܝܠܓܝܔ، ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܰܐܪܒܰܥ ܘܷܐܫܬܝ. ܘܒܷܬ݂ܷܪ ܐܰܪܒܰܥ ܐܷܫܢܶܐ، ܝܰܢܝ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܡܳܢܶܐ ܘܷܐܫܬܝ، ܡܰܣܪܰܚ ܡܶܐ ܐܝܕ݂ܶܗ ܕܡܳܪܝ̱ ܐܝܘܰܢܢܝܣ، ܕܰܝܪܳܝܐ ܟܳܗܢܐ ܠܝ ܕܰܝܪܐ ܕܡܳܪܝ̱ ܓܰܒܪܐܝܶܠ. ܒܷܬ݂ܷܪ ܡܶܕ ܕܗܰܘܝ ܕܰܝܪܳܝܐ ܡܰܩܪܶܠܶܗ ܟܡܐ ܐܷܫܢܶܐ ܟ݂ܘܕ ܡܰܠܦܳܢܐ ܒܝ ܡܰܕܪܰܫܬܐ ܟܳܗܢܳܝܬܐ ܕܡܳܪܝ̱ ܓܰܒܪܐܝܶܠ. ܒܷܬ݂ܷܪ ܐܰܙܙܶܐ ܠܰܐܡܶܪܝܟܰܐ ܠܰܫܰܢ ܕܝܳܠܰܦ ܐܝܢܓܠܝܫܳܝܐ، ܡܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܫ̰ܰܥ ܘܐܷܫܬܝ ܗܘܠ ܠܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܰܪܬܶܐ ܘܫܰܘܥܝ ܦܰܐܝܷܫ ܒܰܐܡܶܪܝܟܰܐ. ܐܝܢܰܩܠܰܐ ܕܕܰܥܷܪ ܡܶܐ ܐܰܡܶܪܝܟܰܐ، ܡܕܰܘܰܡܠܶܗ ܒܝ ܬܷܫܡܷܫܬܰܝܕ݂ܶܗ ܒܝ ܕܰܝܪܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܠܰܬ݂ ܘܫܰܘܥܝ، ܐܘ ܪܝܫ ܕܰܝܪܐ ܕܝ ܕܰܝܪܐ ܕܡܳܪܝ̱ ܓܰܒܪܐܝܶܠ ܕܰܝܪܳܝܐ ܝܶܫܘܥ ܔܝܔܰܟ ܦܪܝܫ ܡܝ ܕܰܝܪܐ. ܥܰܠ ܗܰܬ݂ܶܐ، ܕܰܝܪܳܝܐ ܫܡܘܐܝܶܠ ܐܰܩܛܰܫ ܒܥܰܝܢܝ ܫܰܬܐ ܗܰܘܝ ܪܝܫܕܰܝܪܐ ܕܝ ܕܰܝܪܐ ܕܡܳܪܝ̱ ܓܰܒܪܐܝܶܠ. ܡܶܐ ܟܘܠܶܗ ܠܶܒܶܗ ܟ݂ܕܷܡܠܶܗ ܐܝ ܕܰܝܪܐ. ܡܰܘܟ݂ܰܐ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܡܳܢܝ، ܐܘ ܦܰܛܷܪܝܰܪܟ݂ܐ ܕܝ ܥܝܬܐ ܣܘܪܝܳܝܬܐ ܡܳܪܰܢ ܡܳܪܝ ܐܝܓ݂ܢܰܐܛܝܘܣ ܙܰܟܰܝ ܩܰܕܡܳܝܐ ܕܒܶܐ ܥܝܘܰܨ، ܡܰܠܘܰܫܠܶܠܶܗ ܨܠܝܒܐ ܦܳܪܘܩܳܝܐ ܟ݂ܘܕ ܕܳܫܢܐ ܠܘ ܐܝܩܳܪܐ ܕܝ ܬܷܫܡܷܫܬܰܝܕ݂ܶܗ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܰܐܪܒܰܥ ܘܬܡܳܢܝ، ܐܘ ܚܰܣܝܐ ܕܛܘܪܥܰܒܕܝܢ ܡܳܪܝ̱ ܦܝܠܘܟܣܝܢܘܣ ܐܰܠܝܰܐܣ ܫ̰ܰܢܩܰܝܰܐ ܡܰܥܒܰܪܠܶܗ ܓܶܕܫܐ ܕܝ ܪܰܕ݂ܳܝܬܐ ܒܗܳܠܠܰܢܕܰܐ ܘܡܫܰܢܶܠܶܗ. ܒܷܬ݂ܷܪ ܫܰܬܐ، ܝܰܢܝ ܥܷܣܪܐ ܒܘ ܝܰܪܚܐ ܕܷܫܘܷܛ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܚܰܡܷܫ ܬܡܳܢܝ، ܡܰܣܪܰܚ ܡܶܐ ܐܝܕ݂ܳܬ݂ܶܗ ܕܘ ܦܰܛܷܪܝܰܪܟ݂ܐ ܡܳܪܰܢ ܡܳܪܝ̱ ܐܝܓ݂ܢܰܐܛܝܘܣ ܙܰܟܰܝ ܩܰܕܡܳܝܐ، ܒܝ ܥܝܬܐ ܕܡܳܪܝ̱ ܓܶܘܰܪܓܝܣ ܕܝ ܦܰܛܷܪܝܰܪܟ݂ܘܬ݂ܐ، ܚܰܣܝܐ ܠܝ ܡܰܪܥܝܬ݂ܐ ܕܛܘܪܥܰܒܕܝܢ ܒܘ ܟܘܢܳܝܐ ܕܛܝܡܳܬ݂ܶܐܘܣ. ܥܰܠ ܕܒܷܬ݂ܷܪ ܡܘ ܣܰܝܦܐ ܐܝ ܡܰܪܥܝܬ݂ܐ ܕܛܘܪܥܰܒܕܝܢ ܡܚܰܝܕ݂ܳܐ ܘܗܰܘܝܐ ܚܕ݂ܐ ܡܰܪܥܝܬ݂ܐ. ܘܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܠܰܬ݂ ܥܷܣܪܝ ܡܰܣܪܰܚ ܐܶܠܶܗ ܡܳܪܝ̱ ܛܝܡܳܬ݂ܶܐܘܳܣ ܬܐܘܡܰܐ ܐܰܪܰܙ. ܡܰܘܟ݂ܰܐ ܗܝܘ ܐܶܠܶܗ ܣܬܶܐ ܐܘ ܟܘܢܳܝܐ ܕܛܝܡܳܬ݂ܶܐܘܳܣ. ܒܘ ܝܰܘܡܐ ܕܝ ܪܰܣܰܡܰܝܕ݂ܶܗ، ܐܘ ܦܰܛܷܪܝܰܪܟ݂ܐ ܡܷܪܠܶܠܶܗ: ܡܰܣܪܰܚܠܰܢܠܘܟ݂ ܚܰܣܝܐ ܠܐ ܕܷܡܟܰܝܦܰܬ ܒܛܘܪܥܰܒܕܝܢ ܐܶܠܐ ܠܰܫܰܢ ܕܡܷܨܠܳܘܰܬ ܩܷܡ ܛܘܥܒܰܕܝܢ. ܡܳܪܝ̱ ܛܝܡܳܬ݂ܶܐܘܣ ܫܡܘܐܝܶܠ ܐܰܩܛܰܫ، ܒܘ ܙܰܒܢܐ ܕܡܰܣܪܰܚ ܚܰܣܝܐ، ܐܘ ܥܰܡܐ ܣܘܪܝܳܝܐ ܡܰܪܦܶܘܰܐ ܐܘ ܐܰܬ݂ܪܐ ܕܰܐܢ ܐܰܒܳܗܳܬ݂ܶܐ ܘܐܝ ܩܰܠܥܐ ܕܝ ܣܘܪܝܳܝܘܬ݂ܐ ܛܘܪܥܰܒܕܝܢ، ܘܒܰܩ ܩܰܦܠܰܬ ܐܷܙܙܷܢܘܰܐ ܩܰܡܰܝܬܐ ܠܷܣܛܰܢܒܷܠ ܘܒܷܬ݂ܷܪ ܠܰܐܢ ܐܰܬ݂ܪܰܘܳܬ݂ܶܐ ܕܰܐܘܪܘܦ݁ܰܐ. ܐܘ ܚܰܣܝܐ ܣܬܶܐ ܟܘܠ ܝܰܘܡܐ ܙܳܝܰܪܘܰܐ ܐܰܩ ܩܷܪܝܰܘܳܬ݂ܶܐ ܕܛܘܪܥܰܒܕܝܢ. ܐܳܡܰܪܘܰܐ ܠܘ ܥܰܡܐ؛ ܗܰܢܝ ܫܰܠܩܰܬܢܶܐ ܟܳܐܬ݂ܷܢ ܐܰܥܠܰܝܢܰܐ ܟܠܰܘܘ ܘܡܣܰܝܒܶܪܘ ܓܫܷܦܥܝ. ܠܐ ܛܳܪܘܬܘ ܐܘ ܐܰܬ݂ܪܰܢܐ ܕܛܘܪܥܰܒܕܝܢ ܕܟܷܬܝܐ ܐܰܬ݂ܪܐ ܡܩܰܕܫܐ ܘܐܘ ܥܰܦܪܰܝܕ݂ܶܗ ܠܝܫܐ ܒܘ ܐܰܕܡܐ ܙܰܟܳܝܐ ܕܰܣ ܣܳܗܕܶܐ ܘܕܰܡ ܡܚܰܣܝܶܐ. ܘܡܳܨܶܘܰܐ ܐܰܟ ܟܳܗܢܶܐ ܣܬܶܐ ܕܠܐ ܡܰܪܦܷܢ ܐܰܥ ܥܝܕܳܬ݂ܶܐ ܘܕܠܐ ܥܘܪܩܝ. ܐܶܠܐ ܥܰܡ ܚܒܳܠ ܐܘ ܥܰܡܐ ܘܰܐܟ ܟܳܗܢܶܐ ܠܐ ܡܰܨܝܬ݂ܝܘܰܐ. ܝܰܘܡܐ ܒܝܰܘܡܐ ܢܳܩܰܨܘܰܐ ܐܘ ܡܷܢܝܳܢܐ ܕܘ ܥܰܡܐ ܒܛܘܪܥܰܒܕܝܢ. ܐܰܕ ܕܰܝܪܶܐ ܘܰܐܥ ܥܝܕܳܬ݂ܶܐ ܡܷܣܟ݂ܳܪܝܘܰܐ. ܘܰܐܩ ܩܷܪܝܰܘܳܬ݂ܶܐ، ܚܕ݂ܐ ܒܷܬ݂ܪܝ ܚܪܶܬܐ ܟ݂ܘܠܝܳܘܰܐ. ܐܶܠܐ ܐܘ ܚܰܣܝܐ، ܩܰܝܷܡ ܡܩܰܒܷܠ ܕܟܘܠ ܫܷܟܷܠ ܕܥܰܣܩܘܬ݂ܐ ܘܙܘܥܬ݂ܐ. ܘܠܐ ܟܷܦܠܶܗ ܪܝܫܶܗ ܠܢܳܫܐ. ܘܠܐ ܡܰܩܒܶܠܶܗ ܐܝ ܙܷܠܡܝܝܶܗ ܕܡܝܣܳܡܳܘܰܐ ܥܰܠ ܐܘ ܥܰܡܰܝܕ݂ܶܗ ܐܘ ܣܘܪܝܳܝܐ. ܘܡܣܰܝܒܰܪܠܶܗ ܟܘܠ ܫܷܟܷܠ ܕܡܰܥܝܩܘܬ݂ܐ. ܕܠܐ ܟܠܳܝܐ ܫܓ݂ܝܠܶܗ ܒܝ ܕܰܝܪܐ ܕܡܳܪܝ̱ ܓܰܒܪܐܝܶܠ ܘܡܰܥܰܡܪܳܠܶܗ ܡܶܐ ܚܰܬ݂ܐ. ܠܐ ܩܛܷܥܠܶܗ ܐܘ ܣܰܒܪܰܝܕ݂ܶܗ ܡܶܐ ܐܰܠܳܗܐ ܘܡܰܩ ܩܰܕܝܫܶܐ ܕܟܷܬܢܶܗ ܒܝ ܕܰܝܪܐ. ܒܰܦ ܦܘܠܚܳܢܶܐ ܕܣܷܡܠܶܗ ܐܶܒܰܗ، ܗܰܘܝܐ ܩܰܠܥܐ ܩܘܝܬ݂ܐ ܕܠܐ ܟܳܡܝܕܳܫܐ ܗܰܡ ܠܘ ܥܰܡܐ ܣܘܪܝܳܝܐ ܕܒܘ ܐܰܬ݂ܪܐ ܗܰܡ ܣܬܶܐ ܕܒܰܐܘܪܘܦ݁ܰܐ. ܒܘ ܙܰܒܢܐ ܕܝ ܪܝܫܳܢܘܬ݂ܰܝܕ݂ܶܗ، ܐܝ ܕܰܝܪܐ ܗܰܘܝܐ ܩܶܢܐ ܕܘ ܝܘܠܦܳܢܐ ܘܕܝ ܡܰܪܕܘܬ݂ܐ ܣܘܪܝܳܝܬܐ. ܘܥܰܡܝܪܐ ܘܕܰܥܝܪܐ ܠܘ ܫܘܒܚܰܝܕ݂ܰܗ ܐܘ ܩܰܡܳܝܐ ܒܰܒ ܒܶܢܝܳܢܶܐ ܘܒܰܚ ܚܘܕܳܬ݂ܶܐ ܕܗܰܘܷܢ ܐܶܒܰܗ. ܡܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܡܳܢܶܐ ܫܰܘܥܝ ܗܘܠ ܠܰܕܝܰܘܡܰܐ، ܟ݂ܠܷܩܠܶܗ ܡܟܳܢܘܳܬ݂ܶܐ ܕܰܐܝ ܝܳܠܘܦܶܐ ܕܝ ܡܰܕܪܰܫܬܐ ܥܰܡ ܐܘ ܣܘܪܝܳܝܐ ܕܩܳܪܷܢ ܠܶܫܳܢܐ ܬܘܪܟܳܝܐ ܣܬܶܐ ܒܰܡ ܡܰܟܶܬܷܦ݁ ܕܝ ܕܰܘܠܰܐ ܒܡܷܕ݂ܝܰܕ݂. ܒܘ ܫܷܟܠܰܢܐ، ܓ݂ܰܠܰܒܶܐ ܝܳܠܘܦܶܐ ܒܷܬ݂ܷܪ ܡܶܐ ܕܷܡܟܰܡܰܠܶܗ ܐܘ ܝܘܠܦܳܢܰܬ݂ܬ݂ܶܗ، ܩܪܰܠܠܶܗ ܒܶܝܬ݂ܨܰܘܒܐ ܘܝܰܠܝܦܝ ܨܷܢܥܰܬ ܘܝܘܠܦܳܢܶܐ ܥܶܠܳܝܶܐ ܘܡܫܰܚܠܦܶܐ. ܘܟܘܠ ܚܰܐ ܡܷܢܢܶܗ ܐܰܕܝܰܘܡܰܐ ܟܳܟ݂ܳܕܰܡ ܐܘ ܥܰܡܐ ܣܘܪܝܳܝܐ. ܐܰܒ ܒܷܢܝܳܢܶܐ ܥܰܬܝܩܶܐ ܕܛܘܥܢܝܘܰܐ ܐܘ ܝܘܩܪܐ ܕܘ ܙܰܒܢܐ ܥܰܠ ܚܰܨܰܝܝܶܗ ܘܗܰܘ ܡܝܬܷܣܬܰܥܡܠܝܘܰܐ، ܡܚܰܕܬ݂ܝܠܶܗ ܘܦܬܝܝܝܝܠܶܗ ܡܶܐ ܚܰܬ݂ܐ ܠܘ ܣܬܰܥܡܰܠ ܕܰܥ ܥܳܡܘܪܶܐ ܘܕܰܕ݂ܰܝܦܶܐ. ܡܰܢܕ݂ܰܦܠܶܗ ܚܶܕ݂ܰܪ ܕܝ ܕܰܝܪܐ ܘܙܪܷܥܠܶܗ ܐܝܠܳܢܶܐ ܓ݂ܰܠܰܒܶܐ. ܢܩܝܠܶܗ ܥܰܦܪܐ ܡܶܐ ܕܘܟܟܳܬ݂ܶܐ ܪܰܚܘܩܶܐ ܘܣܷܡܠܶܗ ܚܰܩܠܳܬ݂ܶܐ ܘܓܰܢܶܐ ܘܙܪܷܥܠܶܗ ܟܘܠ ܫܷܟܷܠ ܕܐܝܠܳܢܶܐ ܐܰܦ݁ܦ݁ܶܗ. ܕܰܐܕܝܰܘܡܐ ܐܰܥ ܥܳܡܘܪܶܐ ܕܝ ܕܰܝܪܐ ܟܳܩܘܛܦܝ ܘܟܘܟ݂ܠܷܢܢܶܗ. ܚܦܷܪܠܶܗ ܬܠܰܬ݂ ܥܰܝܢܳܬ݂ܶܐ ܘܡܰܢܕܰܦܠܶܗ ܐܰܓ ܓܘܒܶܐ ܕܰܡ ܡܰܝܶܐ ܘܡܳܦܰܩܠܶܗ ܡܰܝܶܐ ܡܶܐ ܬܰܚܬܝ ܐܰܪܥܐ. ܓܪܷܫܠܶܗ ܐܰܟ݂ܛܘܛܶܐ ܕܰܡ ܡܰܝܶܐ ܔܰܡܘܕܶܐ ܘܕܰܫ ܫܰܚܝܢܶܐ ܠܝ ܕܰܝܪܐ ܟܘܠܰܗ. ܣܷܡܠܶܗ ܟܰܢܰܠܝܙܰܣܝܳܘܢ ܠܰܡ ܡܰܝܶܐ ܥܔܝܩܶܐ ܘܡܷܦܩܝܠܶܗ ܠܰܪܘܰܠ ܠܕܘܟܬ݂ܐ ܪܰܚܘܩܬܐ ܡܝ ܕܰܝܪܐ. ܒܘ ܫܷܟܠܰܢܐ، ܒܝ ܡܰܕܪܰܫܬܐ ܕܡܰܥܡܰܪܠܶܗ ܘܒܰܩ ܩܶܠܳܝܳܬ݂ܶܐ ܕܷܒܢܶܠܶܗ، ܘܒܰܡ ܡܰܝܶܐ ܕܷܓܪܷܫܠܶܗ، ܡܟܰܡܶܠܶܗ ܐܰܣ ܣܢܝܩܘܳܬ݂ܶܐ ܕܰܥ ܥܳܡܘܪܶܐ ܕܝ ܕܰܝܪܐ ܟܘܠܠܶܗ. ܡܩܰܕܰܡ ܠܝ ܡܥܰܠܝܘܬ݂ܐ ܕܡܳܪܝ̱ ܛܝܡܳܬ݂ܶܐܘܳܣ ܫܡܘܐܝܶܠ ܐܰܩܛܰܫ، ܣܳܗܕܘܳܬ݂ܳܐ ܡܰܒ ܒܶܝܬ݂ܨܰܘܒܶܐ ܠܘ ܐܝܩܳܪܐ ܕܝ ܬܷܫܡܷܫܬܰܝܕ݂ܶܗ ܐܝ ܡܩܰܠܰܣܬܐ. ܐܘ ܒܶܝܬ݂ܨܰܘܒܐ ܕܟܳܠܠܶܔܝܘܡ ܣܰܢܟܬܝ ܣܦܝܪܝܬܘܣ ܘܐܘ ܒܶܝܬ݂ܨܰܘܒܐ ܕܕܝܐܰܢܕܪܰܐ، ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܠܰܬ݂ ܬܷܫܥܝ ܡܩܰܕܰܡܡܰܠܶܗ ܕܳܟܬܳܪܰܐ. ܒܝ ܫܰܬܐ ܕܰܬܪܰܠܦܐ ܘܫܘܰܥ ܣܬܶܐ، ܐܘ ܒܶܝܬ݂ܨܰܘܒܐ ܕܐܰܘܣܬܘܪܝܰܐ ܥܰܡ ܡܰܕܪܰܫܬܐ ܚܪܶܬܐ ܡܩܰܕܰܡܰܠܠܶܗ ܣܳܗܕܘܬ݂ܐ ܕܐܘ ܦ݁ܪܳܦܶܣܳܘܪ ܥܰܡ ܨܠܝܒܐ. ܐܘ ܚܰܣܝܐ ܕܛܘܪܥܰܒܕܝܢ ܡܳܪܝ̱ ܛܝܡܳܬ݂ܶܐܘܳܣ ܫܡܘܐܝܶܠ ܐܰܩܛܰܫ، ܠܰܫܰܢ ܐܘ ܫܪܳܝܐ ܕܰܩ ܩܰܛܪܶܐ ܕܘ ܥܰܡܐ ܣܘܪܝܳܝܐ ܕܛܘܪܥܰܒܕܝܢ، ܟܘܠ ܢܰܩܩܰܐ ܣܷܡܠܶܗ ܘܟܳܣܳܝܰܡ ܐܶܣܳܪܶܐ ܩܰܘܝܶܐ ܘܫܰܪܝܪܶܐ ܗܰܡ ܥܰܡ ܐܰܪ ܪܝܫܳܢܶܐ ܕܝ ܕܰܘܠܰܐ ܕܬܘܪܟܝܝܰܐ ܗܰܡ ܣܬܶܐ ܥܰܡ ܐܰܪ ܪܝܫܳܢܶܐ ܕܝ ܕܘܟܬ݂ܐ. ܢܰܩܩܰܘܰܬ ܓ݂ܰܠܰܒܶܐ ܣܷܡܠܶܗ ܣܳܥܘܪܘܳܬ݂ܳܐ ܠܘ ܪܝܫ ܩܘܛܢܐ ܕܬܘܪܟܝܝܰܐ ܘܠܘ ܪܝܫܐ ܕܰܘ ܘܰܙܝܪܶܐ. ܒܟܘܠ ܥܶܕ݂ܐ ܕܰܛ ܛܰܝܶܐ ܣܬܶܐ، ܟܳܙܳܝܰܪ ܒܡܷܕ݂ܝܰܕ݂ ܐܘ ܩܰܝܡܰܩܰܡ ܘܐܘ ܪܝܫܐ ܕܝ ܒܰܠܰܕܝܝܶܐ ܘܰܐܪ ܪܝܫܳܢܶܐ ܚܪܶܢܶܐ. ܒܷܬ݂ܷܪ ܟܳܙܳܝܰܪ ܐܰܪ ܪܝܫܳܢܶܐ ܕܰܥ ܥܰܫܷܪܝܳܬ݂ܶܐ ܘܰܐܢ ܐܰܓ݂ܰܘܝܢ. ܒܝ ܪܝܫܳܢܘܬܰܝܕ݂ܶܗ ܐܝ ܫܰܪܝܪܬܐ ܘܒܝ ܡܕܰܒܪܳܢܘܬ݂ܰܝܕ݂ܶܗ ܐܝ ܚܰܟܝܡܬܐ، ܓ݂ܰܠܰܒܶܐ ܡܰܥ ܥܝܕܳܬ݂ܶܐ ܘܡܰܕ ܕܰܝܪܶܐ ܕܒܝ ܡܰܪܥܝܬ݂ܐ ܕܛܘܪܥܰܒܕܝܢ، ܡܚܰܕܬ݂ܝ ܘܢܰܕ݂ܝܦܝ. ܘܒܷܬ݂ܷܪ ܡܶܐ ܐܷܫܢܶܐ ܝܰܪܝܟ݂ܶܐ ܣܝܡ ܨܠܰܘܳܬ݂ܶܐ ܘܩܶܪܳܘܶܐ ܐܰܒܒܶܗ. ܥܰܡܝܪܝ ܒܳܬܶܐ ܚܰܬ݂ܶܐ ܘܫܰܦܝܪܶܐ ܒܰܩ ܩܷܪܝܰܘܳܬ݂ܶܐ. ܘܗܷܢ ܡܰܣ ܣܘܪܝܳܝܶܐ ܕܰܐܙܙܷܢܘܰܐ ܠܰܐܘܪܘܦ݁ܰܐ، ܕܰܥܝܪܝ ܘܡܰܥܡܰܪܪܶܗ ܒܳܬܶܐ ܘܩܷܪܝܰܘܳܬ݂ܶܐ. ܐܝ ܕܰܝܪܐ ܕܡܳܪܝ̱ ܐܰܘܓܝܢ ܕܟܷܬܝܐ ܒܘ ܛܘܪܐ ܕܐܝܙܠܐ ܒܰܫ ܫܰܘܥܝܝܰܬ ܟ݂ܰܠܝܳܘܰܐ. ܠܰܦ ܐܰܪܒܥܝ ܐܷܫܢܶܐ ܦܰܐܝܫܐ ܟ݂ܠܝܬܐ. ܒܝ ܫܰܬܐ ܕܰܬܪܰܠܦܐ ܦܬܝܚܐ ܘܡܰܚܰܬ ܐܶܒܰܗ ܕܰܝܪܳܝܐ ܝܳܩܷܢ ܐܘܢܦܰܠ. ܒܷܬ݂ܷܪ ܡܝܢܰܗ، ܐܝ ܕܰܝܪܐ ܕܡܳܪܝ ܝܰܥܩܘܒ ܕܟܳܡܝܕ݂ܳܥܐ ܐܝ ܕܶܪܓ݂ܷܙܰܠܟܶܐ ܒܝ ܩܪܝܬ݂ܐ ܕܒܰܕܷܒܶܐ ܣܬܶܐ، ܦܬܝܚܐ ܘܰܐܕܝܰܘܡܰܐ ܟܝܬܐ ܕܰܝܪܳܝܐ ܐܶܒܰܗ. ܐܰܫ ܫܘܓ݂ܠܳܢܶܐ ܘܰܐܫ ܫܘܫܳܛܶܐ ܕܗܰܘܷܢ ܒܝ ܕܰܝܪܐ ܕܡܳܪܝ̱ ܓܰܒܪܐܝܶܠ ܒܝ ܪܝܫܳܢܘܬ݂ܐ ܕܡܳܪܝ̱ ܛܝܡܳܬ݂ܶܐܘܣ ܫܡܘܐܝܶܠ ܐܰܩܛܰܫ؛ ܟ݂ܘܕ ܡܷܪܠܰܢ ܡܶܐ ܠܰܠܥܰܠ، ܩܰܡܰܝܬܐ ܐܝ ܓܳܠܘܬ݂ܐ ܒܕܶܠܰܗ ܒܰܢ ܐܷܫܢܶܐ ܕܰܢ ܐܷܫܬܝܝܰܬ. ܒܷܬ݂ܷܪ ܡܕܰܘܰܡܠܰܗ ܘܙܰܐܝܕܐ ܒܰܫ ܫܰܘܥܝܝܰܬ. ܒܰܬܡܳܢܝܝܰܬ ܣܬܶܐ ܐܘ ܡܷܢܝܳܢܐ ܕܘ ܥܰܡܐ ܢܳܩܰܨܘܰܐ ܓ݂ܰܠܰܒܶܐ ܒܛܘܪܥܰܒܕܝܢ. ܟ݂ܘܕ ܟܷܬܝܐ ܐܝܕ݂ܝܥܐ، ܒܷܬ݂ܷܪ ܡܰܬ ܬܡܳܢܝܝܰܬ ܒܝ ܦܢܝܬ݂ܐ ܕܘ ܡܰܕܢܚܐ ܕܬܘܪܟܝܝܰܐ ܒܕܶܠܶܗ ܩܪܳܒܐ ܩܰܫܝܐ ܒܰܝܢ ܕܝ ܕܰܘܠܰܐ ܕܬܘܪܟܝܝܰܐ ܘܠܘ ܓܰܒܐ ܕܰܟ ܟܘܪܕܳܝܶܐ. ܘܒܘ ܙܰܒܢܰܢܐ ܐܘ ܩܰܫܝܐ ܘܡܰܠܝܐ ܩܰܛܪܶܐ، ܡܳܪܝ̱ ܛܝܡܳܬ݂ܶܐܘܣ ܫܡܘܐܝܶܠ ܐܰܩܛܰܫ ܡܰܣܪܰܚ ܚܰܣܝܐ ܠܛܘܪܥܰܒܕܝܢ. ܐܶܠܐ ܒܝ ܗܰܝܡܳܢܘܬ݂ܰܝܕ݂ܶܗ ܘܒܝ ܚܰܟܝܡܘܬ݂ܰܝܕ݂ܶܗ ܘܒܝ ܓܰܒܳܪܘܬ݂ܰܝܕ݂ܶܗ، ܡܣܰܝܒܰܪܠܶܗ ܡܩܰܒܷܠ ܕܰܐܢ ܢܶܣܝܘܢܶܐ ܘܕܟܘܠ ܫܷܟܷܠ ܕܩܰܛܪܶܐ. ܒܘ ܫܷܟܠܰܢܐ ܢܛܷܪܠܶܗ ܐܝ ܕܰܝܪܐ ܕܡܳܪܝ̱ ܓܰܒܪܐܝܶܠ ܘܐܝ ܡܰܪܥܝܬܐ ܕܛܘܪܥܰܒܕܝܢ ܕܠܐ ܟ݂ܘܠܝܐ ܒܢܰܩܠܰܐ ܚܕ݂ܐ. ܡܰܘܟ݂ܰܐ ܐܰܕܝܰܘܡܰܐ ܐܘ ܥܰܡܐ ܣܘܪܝܳܝܐ، ܐܰܝܟܐ ܕܟܷܬܝܐ ܟܳܡܰܘܕܶܐ ܘܟܳܡܰܩܒܰܠ، ܕܒܝ ܝܰܨܝܦܘܬ݂ܐ ܘܒܝ ܓܰܒܳܪܘܬ݂ܐ ܕܘ ܚܰܣܝܐ ܦܰܐܝܫܐ ܛܘܪܥܰܒܕܝܢ ܥܰܡܷܪܬܐ ܘܠܐ ܟ݂ܰܠܝܐ. ܒܝ ܪܝܫܳܢܘܬ݂ܐ ܘܒܝ ܡܕܰܒܪܳܢܘܬ݂ܰܝܕ݂ܶܗ ܕܝܠܳܢܳܐܝܬ݂ ܐܝ ܕܰܝܪܐ ܕܡܳܪܝ̱ ܓܰܒܪܐܝܶܠ ܟܳܥܰܝܫܐ ܐܘ ܙܰܒܢܐ ܕܰܗܒܳܢܳܝܐ ܕܘ ܡܰܟܬܰܒܙܰܒܢܰܝܕ݂ܰܗ. ܗܰܡ ܠܰܘܓ݂ܷܠ ܗܰܡ ܣܬܶܐ ܠܰܪܘܰܠ ܕܝ ܕܰܝܪܐ ܣܷܡܠܶܗ ܫܘܓ݂ܠܳܢܶܐ ܕܟܳܫܳܘܷܢ ܠܘ ܩܘܠܳܣܐ ܘܠܝ ܚܙܰܝܬܐ. ܐܰܒ ܒܷܢܝܳܢܶܐ ܥܰܬܝܩܶܐ ܕܟܝܬܐ ܒܝ ܕܰܝܪܐ، ܟ݂ܘܕ ܝܳܪܬܘܬ݂ܐ ܘܡܰܟܬܰܒܙܰܒܢܐ ܡܰܛܷܢ ܠܘ ܙܰܒܢܰܝܕ݂ܰܢ. ܘܟܝܒܰܢ ܕܷܐܡܡܝܢܰܐ ܠܐ ܠܰܣ ܣܘܪܝܳܝܶܐ ܬܰܢܢܶܐ ܐܶܠܐ ܗܰܡ ܠܘ ܡܰܟܬܰܒܙܰܒܢܐ ܕܝ ܦܢܝܬ݂ܐ ܘܗܰܡ ܣܬܶܐ ܠܘ ܡܰܟܬܰܒܙܰܒܢܐ ܕܬܘܪܟܝܝܰܐ ܙܰܢܓܰܢܰܐ ܪܰܒܬ݂ܳܢܶܐ. ܚܰܣܝܐ ܫܡܘܐܝܶܠ ܣܬܶܐ ܒܘ ܦܬܰܟܰܪܰܢܐ، ܢܰܦܷܩܩܶܗ ܡܳܪܐ ܘܡܚܰܕܬ݂ܝܠܶܗ ܘܦܬܝܚܝܠܶܗ ܠܘ ܣܬܰܥܡܰܠ ܘܠܘ ܟܪܳܟ݂ܐ ܕܰܕ݂ ܕ݂ܰܝܦܶܐ ܕܡܶܐ ܟܘܠ ܐܰܬ݂ܪܐ ܟܳܐܬ݂ܷܢ ܕܙܰܝܪܝ ܐܝ ܕܰܝܪܐ ܘܝܘܠܦܝ ܐܘ ܡܰܟܬܰܒܙܰܒܢܰܝܕ݂ܰܗ. ܛܰܒܥܰܢ ܟܳܠܳܙܰܡ ܕܠܐ ܛܳܥܝܢܰܐ ܐܝ ܚܘܒܐ ܘܐܝ ܗܰܝܡܳܢܘܬ݂ܐ ܕܘ ܥܰܡܐ ܣܘܪܝܳܝܐ ܕܠܰܦ ܐܝ ܕܰܝܪܐ ܕܡܳܪܝ̱ ܓܰܒܪܐܝܶܠ. ܥܰܠ ܕܟܘܠ ܫܘܓ݂ܠܐ ܕܣܝܡ ܒܝ ܕܰܝܪܐ، ܒܝ ܥܰܘܰܢܰܐ ܘܒܝ ܚܘܒܐ ܕܘ ܥܰܡܐ ܣܝܡ. ܒܘ ܙܰܒܢܰܝܕ݂ܶܗ، ܡܚܰܕ݂ܬ݂ܳܐ ܘܢܰܕ݂ܝܦܐ ܐܝ ܣܰܗܪܷܢܔ ܕܰܡ ܡܰܝܶܐ ܕܟܷܬܝܐ ܒܷܢܝܳܢܐ ܥܰܬܝܩܐ ܘܟܳܦܰܝܫܐ ܓܰܒ ܐܝ ܣܰܚܰܐ ܕܘ ܦܘܛܒܳܠ. ܗܘܠ ܐܰܕܝܰܘܡܰܐ ܟܳܡܝܬܷܣܬܰܥܡܠܐ ܠܰܫܰܢ ܐܰܡ ܡܰܝܶܐ ܕܝ ܕܰܝܪܐ ܘܕܝ ܓܰܢܬ݂ܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܡܳܢܶܐ ܬܡܳܢܝ ܡܚܰܕܰܬ݂ܠܶܗ ܘܩܛܷܪܠܶܗ ܐܘ ܩܛܳܪܐ ܕܝ ܥܝܬܐ ܕܡܳܪܝ̱ ܫܷܡܥܘܢ ܕܟܳܦܰܝܫܐ ܒܰܝܢ ܠܝ ܕܰܝܪܐ ܘܠܝ ܣܰܚܰܐ ܕܘ ܦܘܛܒܳܠ. ܟܷܬܘܰܐ ܒܷܢܝܳܢܶܐ ܥܰܬܝܩܶܐ ܒܘ ܓܰܒܐ ܕܘ ܡܰܕܢܚܐ ܕܝ ܕܰܝܪܐ. ܩܛܷܪܠܶܗ ܐܰܩ ܩܛܳܪܰܬ݂ܬ݂ܶܗ ܘܡܰܢܕ݂ܰܦܠܶܗ ܓܰܘܰܝܝܶܗ. ܐܰܕܝܰܘܡܰܐ ܟܳܡܝܬܷܣܬܰܥܡܠܝ ܟ݂ܘܕ ܓܰܪܰܙ̰ ܠܰܪ ܪܰܕ݂ܳܝܳܬ݂ܶܐ ܘܕܶܦ݁ܐ ܠܰܣ ܣܶܦܳܩܶܐ. ܩܠܷܦܠܶܗ ܐܝ ܫ̰ܝܡܰܢܬܐ ܕܝ ܥܝܬܐ ܪܰܒܬ݂ܐ ܕܡܷܚܝܳܘܰܠܠܶܗ ܒܝ ܫܰܬܐ ܕܰܐܢ ܐܰܠܦܐ ܬܡܳܢܶܡܐ ܘܫܘܰܥ ܘܷܐܫܬܝ ܥܰܠ ܐܰܫ ܫܘܪܳܢܰܝܕ݂ܰܗ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܫܘܰܥ ܬܷܫܥܝ، ܡܰܢܕ݂ܰܦܠܶܗ ܐܰܫ ܫܘܪܳܢܶܐ ܘܡܚܰܕܰܬ݂ܠܶܗ ܐܘ ܩܛܳܪܰܝܕ݂ܰܗ. ܦܬܷܚܠܶܗ ܐܰܟ ܟܰܘܶܐ ܘܰܐܬ ܬܰܪܥܶܐ ܕܷܣܟ݂ܝܪܝܘܰܐ ܡܶܐ ܡܶܩܷܡ. ܒܝ ܫܰܬܐ ܕܰܬܪܰܠܦܐ ܘܚܰܡܷܫ، ܡܰܢܕ݂ܰܦܠܶܗ ܐܝ ܩܘܒܐ ܕܬܶܐܘܳܕܳܘܪܰܐ ܘܐܘ ܡܘܬܦܰܩ ܥܰܬܝܩܐ ܕܥܰܡ ܓܰܒܶܗ. ܣܷܡܠܶܗ ܐܝ ܐܰܪܥܰܬ݂ܬ݂ܶܗ ܡܰܟ ܟܶܦܶܐ ܢܰܚܝܬ ܕܡܷܕ݂ܝܰܕ݂. ܘܦܬܷܚܠܶܗ ܟܰܘܶܐ ܒܰܓ ܓܰܒܰܬ݂ܬ݂ܶܗ ܠܰܫܰܢ ܕܠܐ ܓܘܪܫܝ ܪܬܘܒܶܐ. ܡܰܢܕܰܦܠܶܗ ܐܝ ܐܰܪܥܐ ܕܘ ܙܰܪܝܒ ܘܕܝ ܕܷܪܬܐ ܕܝ ܥܝܬܐ ܘܕܰܕ ܕܳܪܳܬ݂ܶܐ ܚܪܶܢܶܐ ܟܘܠܠܶܗ. ܡܰܥܡܰܪܠܶܗ ܐܰܫ ܫܘܪܳܢܶܐ ܢܰܦܝܠܶܐ ܘܣܟ݂ܷܪܠܶܗ ܐܰܕ ܕܰܦܰܪܰܬ. ܘܣܷܡܠܶܗ ܐܰܫ ܫܘܪܳܢܰܬ݂ܬ݂ܶܗ ܟܘܠܠܶܗ ܕܰܪܙ. ܚܰܐ ܡܰܒ ܒܶܢܝܳܢܶܐ ܪܰܒܶܐ ܘܥܰܬܝܩܶܐ ܕܝ ܕܰܝܪܐ، ܐܝ ܥܝܬܐ ܕܝ ܝܳܠܕܰܬ݂ ܐܰܠܳܗܐ ܝܐ. ܩܰܡܰܝܬܐ ܒܝ ܫܰܬܐ ܕܰܚܕ݂ܐ ܘܬܷܫܥܝ ܣܝܡܘܰܐ ܐܶܒܰܗ ܚܘܕܳܬ݂ܐ. ܒܷܬ݂ܷܪ ܒܝ ܫܰܬܐ ܕܰܬܪܰܠܦܐ ܘܫܶܬ ܣܬܶܐ ܐܘ ܚܰܣܝܐ ܩܠܷܦܠܶܗ ܐܝ ܫ̰ܝܡܰܢܬܐ ܕܥܰܠ ܐܰܫ ܫܘܪܳܢܶܐ ܘܡܳܦܰܩܠܶܗ ܐܰܟ ܟܶܦܶܐ ܥܰܬܝܩܶܐ ܩܘܡ ܐܝ ܥܰܝܢܐ. ܘܡܰܟ݂ܠܶܠܶܗ ܐܘ ܥܰܦܪܐ ܕܘ ܓܰܒܐ ܕܷܛܘܳܥܶܐ ܕܝܰܘܡܐ ܕܝ ܥܝܬܐ ܕܠܐ ܡܰܝܕܐ ܪܬܘܒܶܐ. ܘܦܬܷܚܠܶܗ ܐܘ ܬܰܪܥܐ ܥܰܬܝܩܐ ܕܢܳܦܰܩܘܰܐ ܠܘ ܡܰܥܪܒܐ ܕܝ ܥܝܬܐ. ܣܷܡܠܶܗ ܐܶܒܰܗ ܡܰܕܒܚܐ ܚܰܬ݂ܐ. ܘܐܝ ܐܰܪܥܰܝܕ݂ܰܗ ܣܬܶܐ ܣܝܡܐ ܟܶܦܶܐ. ܐܝܢܰܩܠܰܐ ܕܟܳܘܶܐ ܣܢܝܩܘܬ݂ܐ ܐܰܥ ܥܳܡܘܪܶܐ ܕܝ ܕܰܝܪܐ ܟܳܡܨܰܠܷܢ ܐܶܒܰܗ. ܒܝ ܫܰܬܐ ܕܰܬܪܰܠܦܐ ܘܫܶܬ، ܣܷܡܠܶܗ ܚܘܕܳܬ݂ܐ ܘܢܰܕ݂ܰܦܰܐ ܒܰܒ ܒܶܝܬ݂ܩܰܕܝܫܶܐ ܕܟܷܬܢܶܐ ܥܰܬܝܩܶܐ. ܣܷܡܠܶܗ ܒܰܝܢ ܕܰܫ ܫܘܪܳܢܶܐ ܕܰܪܙ ܘܡܰܠܘܰܫܠܶܗ ܐܝ ܐܰܪܥܰܬ݂ܬ݂ܶܗ ܟܶܦܶܐ ܢܚܝܬܶܐ. ܒܝ ܫܰܬܐ ܕܰܬܪܰܠܦܐ ܘܚܰܡܷܫ، ܡܚܰܕܰܬ݂ܠܶܗ ܐܝ ܩܘܒܐ ܕܰܡ ܡܶܨܪܳܝܶܐ ܘܕܰܥ ܥܰܢܝܕ݂ܶܐ. ܐܰܬ ܬܰܪܬܶܐ ܩܘܒܰܢܝ ܟܳܦܰܝܫܝ ܠܰܦ ܛܘܳܥܶܗ ܕܝܰܘܡܐ ܒܝ ܓܰܢܬ݂ܐ ܕܝ ܕܰܝܪܐ. ܒܝ ܫܰܬܐ ܕܰܬܪܰܠܦܐ ܘܫܶܬ، ܡܚܰܕܰܬ݂ܠܶܗ ܘܡܰܩܷܡܠܶܗ ܐܰܫ ܫܘܪܳܢܶܐ ܘܩܛܷܪܠܶܗ ܐܘ ܩܛܳܪܐ ܕܘ ܚܶܒܝܣ ܕܟܳܦܳܝܰܫ ܠܰܦ ܬܠܰܬ݂ܡܐ ܡܷܬܪܘܘܰܬ ܠܰܦ ܛܘܳܥܶܗ ܕܝܰܘܡܐ ܕܝ ܕܰܝܪܐ. ܘܡܰܟ݂ܠܰܨܠܶܗ ܡܘ ܢܦܳܠܐ. ܐܰܢ ܢܝܓܳܪܶܐ ܕܝ ܕܰܝܪܐ ܟܘܠܠܶܗ ܕܷܠܦܝܘܰܐ. ܡܷܩܩܰܐ ܕܷܡܔܰܪܰܒ ܡܶܕܳܢܶܐ ܠܰܫܰܢ ܕܡܷܩܛܰܥ ܐܘ ܕܠܳܦܐ، ܠܐ ܚܙܶܐ ܫ̰ܰܪܰܐ. ܒܷܬ݂ܷܪ ܣܝܡܝܠܶܗ ܟܘܠܠܶܗ ܐܝܙܳܠܰܨܝܳܘܢ. ܐܰܕܝܰܘܡܐ ܗܰܘ ܟܳܕܷܠܦܝ. ܐܰܒ ܒܶܢܝܳܢܶܐ ܥܰܬܝܩܶܐ ܕܷܡܩܰܒܷܠ ܕܝ ܥܝܬܐ، ܙܰܒܢܐ ܝܰܪܝܟ݂ܐ ܡܷܣܬܰܥܡܠܝ ܟ݂ܘܕ ܤܛܰܒܝܠܶܐ ܠܰܬ ܬܰܘܪܳܬ݂ܶܐ. ܒܝ ܫܰܬܐ ܕܰܬܪܰܠܦܐ ܘܫܶܬ݂، ܡܚܰܕܬ݂ܝܠܶܗ ܘܩܛܷܪܠܶܗ ܐܰܩ ܩܛܳܪܰܬ݂ܬ݂ܶܗ ܘܣܷܡܠܶܗ ܐܰܫ ܫܘܪܳܢܰܬ݂ܬ݂ܶܗ ܕܰܪܙ ܫܰܦܝܪܐ. ܐܰܕܝܰܘܡܰܐ ܟܳܡܝܬܷܣܬܰܥܡܠܝ ܟ݂ܘܕ ܦܳܬ݂ܘܪܶܐ ܐܰܘ ܟ݂ܘܕ ܨܰܠܳܘܢ ܠܘ ܐܝܬܳܘܐ. ܡܚܰܕܰܬ ܐܘ ܦܳܬ݂ܘܪܐ ܕܝ ܕܰܝܪܐ. ܣܝܡܝ ܐܰܫ ܫܘܪܳܢܰܝܕ݂ܶܗ ܘܐܝ ܐܰܪܥܰܝܕ݂ܶܗ ܡܰܪܡܰܪ. ܐܰܕܝܰܘܡܰܐ ܐܰܥ ܥܳܡܘܪܶܐ ܘܰܐܕ݂ ܕ݂ܰܝܦܶܐ ܕܝ ܕܰܝܪܐ ܒܰܣܷܡܬܷܪ ܘܪܰܚܰܬܬܷܪ ܟܳܡܷܣܬܰܥܡܠܝܠܶܗ. ܒܘ ܫܷܟܠܰܢܐ ܟܝܒܰܢ ܕܷܐܡܡܝܢܰܐ، ܟܘܠ ܟܶܦܐ ܘܟܘܠ ܫܘܪܐ ܘܟܘܠ ܒܷܢܝܳܢܐ ܡܚܰܕܰܬ݂ ܘܢܰܕ݂ܷܦ ܒܘ ܙܰܒܢܐ ܕܡܳܪܝ̱ ܛܝܡܳܬ݂ܶܐܘܣ ܫܡܘܐܝܶܠ ܐܰܩܛܰܫ. ܔܓ݂ܘܪ ܡܰܒ ܒܷܢܝܳܢܶܐ ܥܰܬܝܩܶܐ، ܡܰܥܡܰܪܠܶܗ ܒܷܢܝܳܢܶܐ ܚܰܬ݂ܶܐ ܠܝ ܣܢܝܩܘܬ݂ܐ ܕܰܥ ܥܳܡܘܪܶܐ ܕܝ ܕܰܝܪܐ ܘܕܰܕ݂ ܕ݂ܰܝܦܶܐ ܕܟܳܙܰܝܪܝ ܐܝ ܕܰܝܪܐ. ܐܝ ܕܰܝܪܐ ܕܡܳܪܝ̱ ܓܰܒܪܐܝܶܠ ܒܘ ܕܳܪܐ ܕܰܚ ܚܰܐ ܘܥܷܣܪܝ، ܕܰܝܪܐ ܡܩܰܕܰܫܬܐ ܝܐ ܕܟܳܙܰܝܪܝܠܰܗ ܐܰܣ ܣܘܪܝܳܝܶܐ ܘܰܐܡ ܡܫܝܚܳܝܶܐ ܘܰܐܫ̰ ܫ̰ܰܠܟܳܝܶܐ ܠܰܫܰܢ ܕܡܝܒܰܪܟ݂ܝ ܡܝܢܰܗ ܘܡܨܰܠܷܢ ܐܶܒܰܗ. ܡܰܕܪܰܫܬܐ ܘܩܶܢܐ ܕܘ ܝܘܠܦܳܢܐ ܝܐ ܕܟܳܩܳܪܷܢ ܘܝܘܠܦܝ ܐܶܒܰܗ ܝܳܠܘܦܶܐ ܣܘܪܝܳܝܶܐ ܡܶܐ ܛܘܪܥܰܒܕܝܢ ܘܡܶܐ ܐܰܘܪܘܦ݁ܰܐ. ܒܥܰܝܢܝ ܙܰܒܢܐ ܐܘ ܒܶܝܬ݂ ܡܩܳܡܐ ܕܘ ܚܰܣܝܐ ܕܛܘܪܥܰܒܕܝܢ ܝܐ. ܕܰܝܪܐ ܥܰܬܷܩܬܐ ܝܐ ܕܟܘܠ ܫܰܬܐ ܟܳܙܰܝܪܝܠܰܗ ܐܰܠܦܰܝܐ ܕܢܳܫܶܐ ܡܶܐ ܬܘܪܟܝܝܰܐ ܘܡܰܢ ܐܰܬ݂ܪܰܘܳܬ݂ܐ ܡܫܰܚܠܦܶܐ ܕܷܒܪܝܬ݂ܐ. ܥܰܠ ܗܰܘܟ݂ܰܐ، ܒܟܘܠ ܫܰܬܐ ܟܳܘܶܐ ܣܢܝܩܘܬ݂ܐ ܠܒܷܢܝܳܢܶܐ ܕܘ ܐܝܬܳܘܐ ܘܩܶܠܳܝܳܬ݂ܶܐ ܕܘ ܕܡܳܟ݂ܐ ܘܒܶܝܬ݂ܣܷܠܝܶܐ ܘܒܶܝܬ݂ܚܰܘܦܶܐ ܚܰܬ݂ܶܐ. ܐܰܒ ܒܷܢܝܳܢܶܐ ܕܷܡܚܰܕܬ݂ܝ ܘܕܥܰܡܝܪܝ ܚܰܬ݂ܶܐ ܟܘܠܠܶܗ ܬܰܚܬܘ ܟܳܢܛܪܳܠ ܕܘ ܚܰܣܝܐ ܗܰܘܷܢ ܘܟܳܘܷܢ. ܗܰܘܷܠܠܶܗ ܓ݂ܰܠܰܒܶܐ ܡܳܪܐ ܠܰܫܰܢ ܕܡܰܠܝܩܝ ܠܝ ܕܰܝܪܐ ܘܠܘ ܡܰܟܬܰܒܙܰܒܢܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܫܘܰܥ ܬܷܫܥܝ، ܡܰܥܡܰܪܠܶܗ ܠܰܦ ܦܰܠܓܶܗ ܕܝܰܘܡܐ ܕܝ ܥܝܬܐ، ܬܡܳܢܶܐ ܩܶܠܳܝܳܬ݂ܶܐ ܚܰܬ݂ܶܐ ܠܘ ܕܡܳܟ݂ܐ ܕܰܕ݂ ܕ݂ܰܝܦܶܐ ܣܘܪܝܳܝܶܐ. ܕܟܳܐܬ݂ܷܢ ܡܨܰܠܷܢ ܐܰܘ ܕܡܰܥܰܡܕ݂ܝ ܐܰܢ ܢܰܥܝܡܰܬ݂ܬ݂ܶܗ ܒܝ ܕܰܝܪܐ ܐܘ ܕܟܷܬܬܶܗ ܢܰܕ݂ܪܶܐ. ܒܷܬ݂ܷܪ ܡܰܢܝ ܡܰܥܡܰܪܠܶܗ ܣܬܶܐ ܓܰܒ ܐܘ ܤܛܰܒܷܠ ܕܰܩ ܩܰܢܝܳܢܶܐ، ܫܶܬ ܩܶܠܳܝܳܬ݂ܶܐ ܚܪܶܢܶܐ ܠܘ ܦܝܳܫܐ ܕܰܕ݂ ܕ݂ܰܝܦܶܐ. ܗܘܠ ܠܰܬ ܬܷܫܥܝܝܰܬ، ܚܶܕ݂ܰܪ ܐܝ ܕܰܝܪܐ ܚܰܪܒܳܬ݂ܶܘܰܐ ܘܠܰܬܘܰܐ ܓܰܢܬ݂ܐ. ܒܷܬ݂ܷܪ ܒܝ ܡܥܰܕܪܳܢܘܬ݂ܐ ܕܰܥ ܥܳܡܘܪܶܐ ܕܝ ܕܰܝܪܐ ܢܩܝܠܶܗ ܥܰܦܪܐ ܘܣܷܡܠܶܗ ܓܰܢܬ݂ܐ ܠܝ ܕܰܝܪܐ. ܙܪܷܥܠܶܗ ܐܝܠܳܢܶܐ ܕܰܦ ܦܝܪܶܐ. ܘܐܝܠܳܢܶܐ ܕܘ ܦܷܣܬܰܩ ܘܕܰܙ ܙܰܝܬܘܢܶܐ ܘܕܰܬ ܬܶܢܶܐ ܘܕܰܪ ܪܶܡܘܢܶܐ. ܘܚܰܩܠܳܬ݂ܶܐ ܠܘ ܙܰܕ ܟ݂ܘܕ ܚܶܛܶܐ ܘܣܥܳܪܶܐ ܘܚܷܡܨܶܐ. ܘܟܳܡܷܙܪܰܥ ܘܰܪܙܶܐ ܕܰܦ ܦܘܔܶܐ ܘܕܰܙ̰ ܙ̰ܰܒܰܫܰܬ ܘܕܰܒ ܒܳܨܝܢܶܐ. ܐܰܕܝܰܘܡܰܐ ܒܰܐܢ ܐܰܪܒܰܥ ܟ݂ܰܣܰܘܷܪ ܕܝ ܕܰܝܪܐ ܟܝܬܐ ܓܰܢܳܬ݂ܶܐ ܘܰܐܪܥܳܬ݂ܶܐ. ܘܕܰܪܒܳܢܶܐ ܠܘ ܗܰܠܟܐ ܘܠܘ ܟܪܳܟ݂ܐ. ܣܷܡܠܶܗ ܣܰܚܰܐ ܠܘ ܬܷܫܬܥܷܢܝܐ ܕܘ ܦܘܛܒܳܠ ܒܘ ܓܰܒܐ ܕܷܛܘܳܥܶܐ ܕܝܰܘܡܐ ܕܝ ܕܰܝܪܐ. ܐܰܝ ܝܳܠܘܦܶܐ ܟܳܡܷܫܬܰܥܷܢ ܒܘ ܦܘܛܒܳܠ ܐܶܒܰܗ. ܘܢܰܩܠܰܘܰܬ ܓ݂ܰܠܰܒܶܐ ܣܝܡܝ ܐܰܬ ܬܘܪܢܘܘܰܬ ܕܘ ܦܘܛܒܳܠ ܕܛܘܪܥܰܒܕܝܢ ܗܰܪܟܶܐ. ܥܰܡܝܪܐ ܥܡܰܪܰܐ ܡܶܐ ܬܠܳܬ݂ܐ ܬܰܒܳܩܶܐ ܒܘ ܙܰܒܢܰܝܕ݂ܶܗ. ܟܝܬܐ ܐܶܒܰܗ ܩܶܠܳܝܳܬ݂ܶܐ ܠܘ ܕܡܳܟ݂ܐ ܕܘ ܚܰܣܝܐ ܘܠܘ ܫܘܓ݂ܠܐ ܕܰܕ ܕܰܝܪܳܝܶܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܰܪܬܶܐ ܬܷܫܥܝ، ܡܰܥܡܰܪܠܶܗ ܬܰܪܥܐ ܒܰܪܳܝܐ ܒܝ ܥܒܰܪܬܐ ܕܝ ܕܰܝܪܐ. ܘܒܷܬ݂ܷܪ ܡܝܢܶܗ ܒܘ ܓܰܒܐ ܚܪܶܢܐ ܬܰܪܥܐ ܚܪܶܢܐ ܕܪܰܒ ܡܘ ܩܰܡܳܝܐ. ܟܝܬܐ ܥܰܠ ܐܰܬܪܶܐ ܓܰܒܶܐ ܕܘ ܬܰܪܥܐ ܬܪܶܐ ܐܰܪܝܶܐ ܪܰܒܶܐ ܕܟܷܬܝܐ ܐܝ ܬܰܫܥܝܬ݂ܰܬ݂ܬ݂ܶܗ ܒܘ ܡܰܟܬܰܒܙܰܒܢܐ ܗܰܘܟ݂ܰܐ؛ ܒܚܰܐ ܡܰܙ ܙܰܒܢܶܐ ܐܰܕ ܕܰܝܪܳܝܶܐ ܕܝ ܕܰܝܪܐ ܥܰܪܝܩܝ ܡܝ ܕܰܝܪܐ ܡܰܚ ܚܰܪܒܰܬ ܘܡܰܐ ܗܔܳܡܶܐ ܕܗܳܘܷܢܘܰܐ ܐܰܥܠܰܝܝܶܗ. ܒܷܬ݂ܷܪ ܡܶܐ ܕܢܰܦܝܩܝ ܐܰܕ ܕܰܝܪܳܝܶܐ ܡܝ ܕܰܝܪܐ، ܐܰܬ݂ܷܢ ܬܪܶܐ ܐܰܪܝܶܐ ܘܟܰܠܷܢ ܩܘܡ ܐܘ ܬܰܪܥܐ ܕܝ ܕܰܝܪܐ ܟ݂ܘܕ ܢܳܛܘܪܶܐ. ܘܠܐ ܛܳܪܷܢܘܰܐ ܕܢܳܫܐ ܡܰܚܰܪܘܳܢܶܐ ܕܥܳܒܰܪ ܠܝ ܕܰܝܪܐ. ܒܷܬ݂ܷܪ ܒܷܟܡܐ ܐܷܫܢܐ ܕܕܰܥܝܪܝ ܐܰܕ ܕܰܝܪܳܝܶܐ ܠܝ ܕܰܝܪܐ، ܐܰܢ ܐܰܪܝܶܐ ܢܰܦܝܩܝ ܡܝ ܕܰܝܪܐ ܘܡܰܣܰܠܡܰܠܠܶܗ ܠܰܕ ܕܰܝܪܳܝܶܐ. ܥܰܠ ܐܝ ܬܰܫܥܝܬ݂ܰܬ݂ܶܗ، ܟܳܡܝܨܰܘܪܐ ܘܟܳܡܷܢܩܳܫܐ ܐܝ ܨܘܪܬܐ ܕܰܐܢ ܐܰܪܝܰܘܳܬ݂ܐ ܥܰܠ ܐܰܬ ܬܰܪܥܶܐ ܪܰܒܶܐ ܕܝ ܕܰܝܪܐ. ܣܝܡܝ ܤܛܰܒܝܠܶܐ ܠܰܬ ܬܰܘܪܳܬ݂ܶܐ ܠܰܪܘܰܠ ܡܝ ܕܰܝܪܐ. ܘܒܰܝܬܐ ܣܬܶܐ ܠܰܓܝܳܬ݂ܶܐ. ܣܷܡܠܶܗ ܘܡܰܩܷܡܠܶܗ ܫܘܪܐ ܚܶܕ݂ܰܪ ܐܝ ܕܰܝܪܐ ܕܟܳܡܳܛܶܐ ܐܘ ܝܘܪܟ݂ܰܝܕ݂ܶܗ ܠܰܦ ܐܰܪܒܥܐ ܟܝܠܳܡܰܬܪܰܬ. ܟܳܒܳܕܶܐ ܘܟܳܬܳܝܰܡ ܒܘ ܬܰܪܥܐ ܒܰܪܳܝܐ ܕܝ ܕܰܝܪܐ. ܒܝ ܘܰܨܝܛܰܐ ܕܘ ܫܘܪܰܢܐ ܗܰܡ ܐܰܥ ܥܳܡܘܪܶܐ ܕܝ ܕܰܝܪܐ ܘܗܰܡ ܐܰܢ ܐܝܠܳܢܶܐ ܕܝ ܓܰܢܬ݂ܐ ܘܗܰܡ ܣܬܶܐ ܐܰܚ ܚܰܝܶܘܷܢ ܟܳܣܷܬܪܝ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܠܰܬ݂ ܬܡܳܢܝ، ܡܰܥܡܰܪܠܶܗ ܒܷܢܝܳܢܐ ܒܷܬܠܳܬ݂ܐ ܬܰܒܳܩܶܐ ܠܰܫܰܢ ܐܰܕ ܕܰܝܪܳܝܳܬ݂ܶܐ. ܟܳܡܝܬܷܣܬܰܥܡܰܠ ܗܰܡ ܟ݂ܘܕ ܡܘܬܦܰܩ ܘܬܶܫܝܓ݂ܐ ܕܰܔ ܔܘܠܶܐ. ܘܟܝܬܐ ܣܬܶܐ ܩܶܠܳܝܳܬ݂ܶܐ ܗܰܡ ܠܰܕ ܕܰܝܪܳܝܳܬ݂ܶܐ ܘܗܰܡ ܣܬܶܐ ܠܰܢ ܢܝܫܶܐ ܕܟܳܦܰܝܫܝ ܒܝ ܕܰܝܪܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܰܪܬܶܐ ܬܷܫܥܝ، ܡܰܥܡܰܪܠܶܗ ܡܰܕܪܰܫܬܐ ܒܷܬܠܳܬ݂ܐ ܬܰܒܳܩܶܐ. ܐܘ ܬܰܒܳܩܐ ܬܰܚܬܳܝܐ، ܠܰܣ ܣܶܦܳܩܶܐ. ܘܕܘ ܦܰܠܓܐ ܩܶܠܳܝܳܬ݂ܶܐ ܠܘ ܕܡܳܟ݂ܐ ܕܰܝ ܝܳܠܘܦܶܐ. ܘܐܘ ܥܶܠܳܝܐ ܣܶܕܪܶܐ ܠܰܗ ܗܶܪܓܶܐ ܘܒܶܝܬ݂ܐܰܪܟܶܐ ܠܰܟܬ݂ܳܘܶܐ. ܕܳܪܐ ܒܷܬ݂ܪܶܗ ܕܳܪܐ ܕܠܐ ܪܰܚܡܶܐ ܫܰܦܝܥܝ. ܘܰܐܢ ܐܷܫܢܶܐ ܟ݂ܘܕ ܐܰܝ ܝܰܘܡܶܐ ܥܰܒܝܪܝ. ܐܰܙ ܙܳܠܘܡܶܐ ܘܰܐܚ ܚܰܢܦܶܐ ܕܠܐ ܪܰܚܡܶܐ ܗܔܷܡܡܶܗ ܘܡܰܚܪܰܘܘܶܗ ܘܩܛܷܠܠܶܗ. ܡܰܘܟ݂ܰܐ ܐܝ ܕܰܝܪܐ ܕܡܳܪܝ̱ ܓܰܒܪܐܝܶܠ ܡܰܛܝܐ ܠܘ ܕܳܪܐ ܕܰܚ ܚܰܐ ܘܥܷܣܪܝ، ܒܰܛܷܠܬܐ ܘܚܰܪܘܬܐ. ܐܶܠܐ ܟ݂ܘܕ ܡܳܕ݂ܰܥܠܰܢ ܡܶܐ ܠܰܠܥܰܠ، ܒܝ ܝܰܨܝܦܘܬ݂ܐ ܕܝ ܡܥܰܠܝܘܬ݂ܐ ܕܡܳܪܝ̱ ܛܝܡܳܬ݂ܶܐܘܣ ܫܡܘܐܝܶܠ ܐܰܩܛܰܫ، ܡܶܐ ܚܰܬ݂ܐ ܢܰܗܝܪܝ ܦܳܬ݂ܰܐ ܘܦܨܝܚܐ. ܘܫܰܬܐ ܒܷܬ݂ܪܶܗ ܫܰܬܐ ܢܰܕ݂ܝܦܐ ܘܥܰܡܝܪܐ ܘܡܟ݂ܰܡܠܐ ܒܰܕ ܕܰܝܪܳܝܶܐ ܘܒܰܡ ܡܰܠܦܳܢܶܐ ܘܒܰܕ ܕܰܝܪܳܝܳܬ݂ܶܐ ܘܒܰܝ ܝܳܠܘܦܶܐ ܘܒܰܫ ܫܰܓ݂ܳܠܶܐ. ܒܘ ܫܷܟܠܰܢܰܐ ܕܰܥܝܪܐ ܠܘ ܫܘܒܚܰܝܕ݂ܰܗ ܐܘ ܩܰܡܳܝܐ ܘܟܳܡܫܰܡܫܐ ܟܘܠܰܗ ܐܝ ܢܳܫܘܬ݂ܐ ܕܠܐ ܦܘܪܫܳܢܐ ܕܕܝܢܐ ܘܕܓܰܘܢܐ ܘܕܰܪܓ݂ܐ. ܡܰܠܦܳܢܐ ܫܷܟܪܝ ܐܰܩܛܰܫ 2143 ܡ̈ܠܐ.