Šëkri Aqtaš: ܐܘ ܥܶܕ݂ܐ ܕܘ ܣܘܒܳܪܐ / U ceḏo du Suboro

U ceḏo du Suboro

ܐܘ ܥܶܕ݂ܐ ܕܘ ܣܘܒܳܪܐ، ܚܰܐ ܡܰܥ ܥܶܕ݂ܶܐ ܡܳܪܳܢܳܝܶܐ ܘܪܰܒܶܐ ܕܝ ܡܫܝܚܳܝܘܬ݂ܐ ܝܐ. ܐܝ ܥܝܬܐ ܣܘܪܝܰـܝܬܐ ܟܳܡܥܰܝܕ݂ܐ ܐܘ ܥܶܕ݂ܰܢܐ ܒܟܘܠ ܫܰܬܐ ܚܰܡܫܐ ܥܷܣܪܝ ܒܘ ܝܰܪܚܐ ܕܳܐܕ݂ܳܪ. ܟܳܢܳܦܰܠ ܒܘ ܨܰܘܡܐ ܪܰܒܐ ܐܶܠܐ ܟܳܡܝܩܰܪܰܘ ܐܶܒܶܗ. ܠܓܳܪܰܢ ܕܝ ܡܰܫܶܠܡܳܢܘܬ݂ܐ ܕܝ ܥܝܬܐ، ܒܘ ܨܰܘܡܐ ܪܰܒܐ ܩܶܪܳܘܐ ܒܓܰܘܰܗ ܕܝ ܫܰܒܬ݂ܐ ܠܐ ܟܳܘܶܐ ܔܓ݂ܘܪ ܡܘ ܥܶܕ݂ܐ ܕܘ ܣܘܒܳܪܐ ܘܝܰܘܡܶܗ ܕܰܐܪܒܥܐ ܕܦܰܠܓܶܗ ܕܘ ܨܰܘܡܐ ܘܐܝ ܥܪܷܦܬܐ ܕܰܐܢ ܐܰܪܒܥܝ. ܒܟܘܠ ܥܝܬܐ، ܨܰܦܪܰܝܬܐ ܚܶܠܳܝܐ ܟܳܡܝܨܰܠܝܐ ܐܝ ܨܠܘܬ݂ܐ ܘܒܷܬ݂ܷܪ ܟܳܘܶܐ ܩܶܪܳܘܐ ܠܘ ܕܘܟ݂ܪܳܢܐ ܕܘ ܥܶܕ݂ܐ. ܠܓܳܪܰܢ ܕܘ ܛܶܟܣܐ ܕܝ ܥܝܬܐ، ܐܘ ܥܶܕ݂ܐ ܕܘ ܣܘܒܳܪܐ ܒܰܝܢ ܐܰܥ ܥܶܕ݂ܶܐ ܡܳܪܳܢܳܝܶܐ ܕܰܐܢ ܐܰܪܒܥܐ ܝܐ ܘܒܝ ܩܝܢܬܐ ܪܒܝܥܰܝܬܐ ܟܳܡܝܥܰܝܷܕ݂. ܐܶܠܐ ܒܝ ܡܕܰܒܪܳܢܘܬ݂ܐ ܐܘ ܥܶܕ݂ܐ ܩܰܡܳܝܐ ܝܐ ܘܟܳܡܒܰܫܰܪ ܥܰܠ ܐܝ ܡܶܬ݂ܰܝܬܐ ܕܷܡܫܝܚܐ ܠܘ ܥܳܠܡܐ. ܕܠܐ ܡܘ ܣܘܒܳܪܐ ܕܘ ܡܰܠܰܐܟ݂ܐ ܠܝ ܝܳܠܕܰܬ݂ ܐܰܠܳܗܐ ܡܰܪܝܰܡ، ܠܐ ܟܳܘܶܐ ܠܐ ܐܘ ܥܶܕ݂ܐ ܕܘ ܡܰܘܠܳܕ݂ܐ ܘܠܐ ܕܝ ܩܝܰܡܬܐ ܘܠܐ ܕܘ ܐܘܫܰܥܢܐ ܘܠܐ ܐܰܥ ܥܶܕ݂ܶܐ ܡܳܪܳܢܳܝܶܐ ܚܪܶܢܶܐ. ܒܘ ܠܶܫܳܢܐ ܟܬ݂ܳܒܳܢܳܝܐ ܟܳܡܝܬܰܘܡܰܪ ܣܘܒܳܪܐ. ܐܶܠܐ ܒܘ ܛܘܪܳܝܐ ܟܷܡܡܝܢܰܐ ܣܝܒܳܪܐ ܐܰܘ ܒܷܫܪܰܐ. ܐܰܢ ܐܝܙܝܕܳܝܶܐ ܘܰܐܡ ܡܚܰܠܡܳܝܶܐ ܣܬܶܐ ܟܷܡܡܝ ܒܰܣܷܡܒܰܪ. ܝܰܢܝ ܐܘ ܡܰܠܰܐܟ݂ܐ ܡܒܰܫܰܪܠܶܗ ܡܰܪܝܰܡ ܥܰܠ ܐܘ ܒܰܛܢܐ ܕܷܡܫܝـܚܐ. ܒܠܰܠܝܶܗ ܕܘ ܥܶܕ݂ܰܢܐ ܒܟܘܠ ܒܰܝܬܐ ܕܰܣ ܣܘܪܝܳـܝܶܐ ܟܳܡܝܣܰܡ ܚܰܕ݂ܝܪܝܝܰܬ. ܩܰܡܰܝܬܐ ܚܕ݂ܐ ܥܠܰܝܡܬ݂ܐ ܒܬ݂ܘܠܬܐ ܟܳܠܰܝܫܐ ܠܰܝܫܐ ܕܠܐ ܚܡܝܪܐ ܒܰܣ ܒܝ ܡܰܠܚܐ. ܐܝܢܰܩܠܰܐ ܕܟܳܠܰܝܫܐ ܟܳܙܷܡܪܐ ܐܘ ܩܳܠܰܢܐ ܒܝ ܩܝܢܬܐ ܕܩܘܩܳܝܐ: «ܐܶܢܐ ܐ̱ܢܐ ܠܰܚܡܐ ܕܚܰܝ̈ܐ ܐܶܡܰܪ ܡܳܪܰܢ. ܡܶܢ ܪܰܘܡܳܐ ܠܥܘܡܩܐ ܢܶܚܬܶܬ ܬܘܪܣܳܝܐ ܠܥܳܠܡܐ. ܫܰܠܚܰܢܝ ܐܰܒܐ ܡܶܠܬ݂ܐ ܕܠܳܐ ܒܶܣܪܐ. ܘܰܐܝܟ ܐܰܟܳܪܐ ܙܰܪܥܰܢܝ ܓܰܒܪܺܐܝܶܠ. ܩܰܒܶܠܬܰܢܝ ܟܰܪܣܐ ܕܡܰܪܝܰܡ، ܐܰܝܟ ܐܰܪܥܐ ܛܳܒܬܐ. ܘܗܳܐ ܡܙܰܝـܚـܝܢ ܠܝ ܒܺܐܝܕ̈ܰܝܗܘܢ ܟܳܗܢ̈ܐ ܥܰܠ ܡܰܕܒܚܐ ܗܰܠܶܠܘܝܰܗ ܒܛܘܦܣܐ ܕܡܰܠܰܐܟ̈ܐ». ܗܰܟܟܰܐ ܟܝܬܐ ܛܰܘܥܘܢܐ ܒܘ ܒܰܝܬܐ، ܟܳܣܰܝܡܝ ܐܘ ܠܰܝܫܐ ܒܘ ܫܷܟܷܠ ܕܰܛ ܛܰܘܥܶܐ. ܘܒܷܬ݂ܷܪ ܟܳܡܰܚܬܝ ܚܘܛܐ ܚܶܘܳܪܐ ܕܟܳܡܰܕܷܠ ܥܰܠ ܐܝ ܐܰܠܳܗܘܬ݂ܐ ܕܷܡܫܝـܚܐ. ܘܚܘܛܐ ܚܪܶܢܐ ܣܶܡܳܩܐ ܕܟܳܡܰܕܷܠ ܥܰܠ ܐܝ ܢܳܫܘܬ݂ܐ. ܟܳܡܰܚܬܝ ܣܬܶܐ ܫܰܘܥܐ ܫܷܟܠܰܬ ܕܘ ܙܰܕ ܒܣܶܦܳܩܶܐ ܢܰܥܝܡܶܐ ܥܰܠ ܡܰܪܛܰܒܰܢ. ܟܳܢܷܦܩܝ ܐܰܢ ܢܳܫܶܐ ܕܘ ܒܰܝܬܐ ܥܰܡ ܚܕ݂ܳܕ݂ܶܐ ܥܰܠ ܐܝ ܓܳܪܐ ܬܰܚܬܶܗ ܕܰܟ ܟܷܟܘܶܐ ܕܟܳܡܰܒܰܗܪܝ ܒܝ ܫܡܰܝܐ. ܒܷܬܷ݂ܪܟܶܐ ܩܰܡܰܝܬܐ ܟܷܐܡܡܝ ܐܝ ܐܰܒܘܢ ܕܒܰܫܡܰܝܐ ܘܒܷܬ݂ܷܪ ܬܷܫܡܷܫܬܐ ܕܝ ܝܳܠܕܰܬ݂ ܐܰܠܳܗܐ. ܟܳܡܨܰܠܷܢ ܠܰܫܰܢ ܕܡܝܒܰܪܟ݂ܝ ܐܰܒ ܒܳܬܶܐ ܘܐܘ ܙܰܕ. ܨܰܦܪܰܝܬܐ ܣܬܶܐ ܩܰܡܰܝܬܐ ܟܳܡܰܦܰܛܪܝ ܥܰܠ ܐܘ ܠܰܚܡܐ ܕܣܝܡ ܕܠܐ ܚܡܝܪܐ. ܘܒܷܬܷ݂ܪ ܟܳܡܰܚܬܝ ܐܘ ܣܝܒܳܪܐ ܥܰܠ ܕܪܘܥܰܝܝܶܗ ܐܰܘ ܒܷܩܕ݂ܳܠܰܝـܝܶܗ ܐܰܘ ܒܘ ܒܰܝܬܰܬ݂ܬ݂ܶܗ ܐܰܘ ܒܝ ܪܰܕ݂ܳܝܬܰܬ݂ܬ݂ܶܗ. ܟܳܡܚܬܝܠܶܗ ܣܬܶܐ ܒܰܟ ܟܰܪܡܶܐ ܘܒܰܝܢ ܕܰܐܢ ܐܰܪܥܳܬ݂ܶܐ. ܒܗܷܢ ܕܘܟܟܳܬ݂ܶܐ ܣܬܶܐ ܬܠܳܬ݂ܐ ܚܘܛܶܐ ܟܳܣܰܝܡܝ ܐܘ ܣܝܒܳܪܐ ܘܟܳܓܘܕ݂ܠܷܢܢܶܗ ܥܰܠ ܚܕ݂ܳܕ݂ܶܐ. ܘܟܳܡܰܚܬܝ ܥܰܡ ܚܶܘܳܪܐ ܘܣܶܡܳܩܐ، ܟܳܡܐ ܣܬܶܐ. ܠܓܳܪܰܢ ܕܘ ܦܬܰܟܰܪ ܚܪܶܢܐ، ܐܰܬ ܬܠܳܬ݂ܐ ܟܳܡܰܕܝܠܝ ܥܰܠ ܐܝ ܬܠܝܬ݂ܳܝܘܬ݂ܐ ܘܐܘ ܟܳܡܐ ܣܬܶܐ ܟܳܡܰܕܷܠ ܥܰܠ ܐܘ ܚܰܫܐ ܘܥܰܠ ܐܘ ܡܰܘܬܐ ܕܷܡܫܝـܚܐ. ܐܘ ܣܝܒܳܪܐ ܟܳܦܳܝܰܫ ܥܰܠ ܕܪܘܥܶܗ ܕܰܢ ܢܳܫܶܐ ܐܰܘ ܒܘ ܩܕ݂ܳܠܐ ܐܰܘ ܒܰܨ ܨܰܘܥܳܬ݂ܶܐ، ܗܘܠ ܠܘ ܝܰܘܡܐ ܕܰܬܪܶܐ ܕܥܶܕ݂ܐ ܪܰܒܐ. ܕܟܷܬܝܐ ܐܘ ܝܰܘܡܐ ܕܝ ܬ݂ܢܰܚܬܐ ܕܰܥ ܥܰܢܝܕ݂ܶܐ. ܒܘ ܝܰܘܡܐ ܕܝ ܬ݂ܢܰܚܬܐ، ܐܰܢ ܢܳܫܶܐ ܟܳܡܷܦܩܝܠܶܗ ܘܠܘ ܐܝܩܳܪܰܝܕ݂ܶܗ، ܠܐ ܟܳܡܚܰܠܩܝܠܶܗ ܥܰܠ ܐܝ ܐܰܪܥܐ. ܐܶܠܐ ܟܳܡܰܚܬܝܠܶܗ ܒܢܰܩܘܐ ܕܟܶܦܐ ܕܘ ܫܘܪܐ ܕܝ ܥܝܬܐ ܐܰܘ ܒܕܘܟܬ݂ܐ ܥܶܠܰܝܬܐ ܕܠܐ ܡܝܕܰܫ. ܐܰܘ ܣܬܶܐ ܟܳܡܰܘܩܕ݂ܝܠܶܗ ܒܝ ܢܘܪܐ ܕܟܳܣܰܝܡܝ ܐܰܥܠܰܗ ܐܝ ܕܰܫܷܫܬܐ ܕܘ ܥܶܕ݂ܐ ܪܰܒܐ. ܐܘ ܥܶܕ݂ܐ ܕܝ ܣܝܒܳܪܐ ܡܷܕ ܟܳܬ݂ܶܐ؛ ܐܘ ܥܰܡܐ ܟܳܘܶܐ ܠܶܗ ܣܰܒܪܐ ܕܗܰܘ ܟܳܬ݂ܶܐ ܬܰܠܓܐ ܝܰܩܘܪܐ. ܟܳܒܳܕܷܢ ܐܘ ܣܰܘܰܠܶܗ ܣܬܶܐ ܕܡܷܦܩܷܢܢܶܗ ܠܘ ܛܘܪܐ. ܡܠܦܢܐ ܫܟܪܝ ܐܩܛܫ 465 ܡ̈ܠܐ