Šëkri Aqtaš: ܐܘ ܒܘܝܳܢܐ ܬܝܒܶܠܳܝܐ ܕܰܐܙ ܙܶܕܩܶܐ ܢܳܫܳܝܶܐ / U buyono tibeloyo daz zëdqe nošoye

U buyono tibeloyo daz zëdqe nošoye

ܒܟܘܠ ܫܰܬܐ، ܥܷܣܪܐ ܒܘ ܝܰܪܚܐ ܕܰܬܪܰܥܣܰܪ ܟܳܡܝܥܰܝܕ݂ܳܐ ܐܝ ܫܰܒܬ݂ܐ ܕܰܐܙ ܙܶܕܩܶܐ ܢܳܫܳܝܶܐ. ܐܘ ܢܝܫܐ ܕܰܐܙ ܙܶܕܩܶܐ ܢܳܫܳܝܶܐ، ܕܠܐ ܡܝܣܰܡ ܦܘܪܫܳܢܐ ܕܐܝ ܐܘܡܬ݂ܳܢܳܝܘܬ݂ܐ ܘܕܘ ܕܝܢܐ ܕܘ ܓܰܘܢܐ ܕܘ ܥܘܡܪܐ ܘܕܝ ܓܶܢܣܳܝܘܬ݂ܐ ܒܰܝܢ ܕܰܢ ܢܳܫܶܐ ܝܐ. ܘܕܡܝܫܰܘܫܛܝ ܐܰܢ ܐܶܣܳܪܶܐ ܕܝ ܚܘܒܐ ܕܘ ܐܝܩܳܪܐ ܕܝ ܚܰܘܪܘܬ݂ܐ ܒܷܒܪܝܬ݂ܐ. ܐܰܙ ܙܶܕܩܐ ܕܟܳܢܷܛܪܝ ܐܘ ܐܝܩܳܪܐ ܕܘ ܒܰܪܢܳܫܐ، ܘܕܟܳܠܳܙܰܡ ܡܝܬܰܗܘܷܠܠܶܗ ܒܰܚ ܚܰـܝܰـܝܕ݂ܶܗ، ܒܘ ܥܳܠܡܐ ܟܘܠܶܗ ܟܳܡܝܬܰܘܡܰܪܪܶܗ ܙܶܕܩܶܐ ܢܳܫܳܝܶܐ. ܐܰܙ ܙܶܕܩܶܐ ܢܳܫܳܝܶܐ܆ ܩܳܢܘܢܶܐ ܢܶܐ ܕܟܳܡܰܥܝܫܝ ܐܘ ܒܰܪܢܳܫܐ ܟ݂ܘܕ ܟܷܬܝܐ ܕܠܐ ܫܘܚܠܳܦܐ. ܐܝ ܙܷܠܡܝـܝܶܗ ܕܟܳܡܝܣܳܡܐ ܥܰܠ ܐܘ ܒܰܪܢܳܫܐ ܘܐܝ ܚܰܩܰܪܰܐ ܕܰܐܥܠܶܗ، ܠܐ ܟܳܡܰܠܝܩܐ ܘܠܐ ܟܳܡܝܬܰܩܰܒܠܐ. ܒܰܐܢ ܐܰܬ݂ܪܰܘܳܬ݂ܶܐ ܕܟܝܬܐ ܙܷܠܡܝـܝܶܗ ܘܕܝܳܫܐ ܕܥܰܠ ܐܘ ܒܰܪܢܳܫܐ، ܠܐ ܟܳܬܰܝܡܐ ܠܐ ܐܝ ܩܰܠܶܐ ܘܠܐ ܐܘ ܚܰܪܒ ܘܠܐ ܐܰܦ݁ܪܳܬܶܣܬܳܘܰܬ. ܟܘܠܢܰܩܩܰܐ ܐܘ ܥܰܡܐ ܟܳܩܳܝܰܡ ܥܰܠ ܐܝ ܪܰܓ݂ܠܐ ܡܩܰܒܷܠ ܕܝ ܙܷܠܡܝـܝܶܗ ܘܟܳܘܷܢ ܫܓ݂ܘܫܝܶܐ ܒܘ ܐܰܬ݂ܪܐ. ܐܝܢܰܩܩܰܐ ܣܬܶܐ ܕܟܳܩܳܘܷܢ ܒܰܝܢ ܕܰܐܢ ܢܳܫܶܐ ܐܝ ܟܝܢܘܬ݂ܐ ܐܝ ܐܰܘܝܘܬ݂ܐ، ܐܰܙ ܙܶܕܩܶܐ ܢܳܫܳܝܶܐ ܘܐܝ ܚܝܪܘܬ݂ܐ، ܐܘ ܥܰܡܐ ܟܳܡܝܫܰܘܫܰܛ ܘܐܝ ܕܰܘܠܰܐ ܟܳܡܩܰܝܙܢܐ ܐܝܩܳܪܐ ܪܰܒܐ ܒܥܰܝܢܶܗ ܕܰܕ ܕܰܘܠܰܬ ܚܪܶܢܶܐ. ܐܘ ܣܝܣܬܰܢ ܕܟܳܢܳܛܰܪ ܘܕܟܳܡܰܥܷܫ ܐܰܙ ܙܶܕܩܶܐ ܢܳܫܳܝܶܐ، ܐܘ ܣܝܣܬܰܢ ܕܘ ܕܶܡܳܩܪܰܣܝ ܝܐ. ܒܰܕ ܕܰܘܠܰܬ ܕܟܳܡܝܕܰܒܪܝ ܒܘ ܕܶܡܳܩܪܰܣܝ، ܐܘ ܕܰܪܓ݂ܐ ܕܟܳܡܝـܝܰܩܰܪ ܙܷܬ ܡܶܐ ܟܘܠ ܡܶܕܶܐ ܘܕܟܷܬܝܐ ܥܠܶܬܷܪ ܡܶܐ ܟܘܠ، ܐܝ ܟܝܢܘܬ݂ܐ ܝܐ. ܒܘ ܕܶܡܳܩܪܰܣܝ، ܐܰܢ ܢܳܫܶܐ ܟܘܠܠܶܗ ܕܠܐ ܦܘܪܫܳܢܐ، ܟ݂ܘܕ ܚܕ݂ܳܕ݂ܶܐ ܢܶܐ ܩܘܡ ܐܘ ܩܳܢܘܢܐ. ܠܰܝܬ ܐܰܬ݂ܬܐ ܘܠܐ ܓܰܘܪܐ ܘܠܐ ܚܶܘܳܪܐ ܐܘ ܟܳܡܐ ܘܠܐ ܥܰܬܝܪܐ ܐܰܘ ܡܶܣܟܝܢܐ ܘܠܐ ܡܫܝـܚܳـܝܐ ܐܰܘ ܛܰܝܐ. ܟܘܠ ܚܰܐ ܠܓܳܪܰܢ ܕܘ ܦܰܘܕܐ ܘܕܝ ܚܛܝܬ݂ܐ ܕܣܷܡܠܶܗ، ܓܡܝܔܰܙܶܗ. ܐܘ ܦܬܰܟܰܪ ܕܰܐܙ ܙܶܕܩܶܐ ܢܳܫܳܝܶܐ، ܒܝ ܩܰܡܰܝܬܐ ܒܘ ܐܰܬ݂ܪܐ ܕܐܝܢܓܝܠܬܶܪܶܐ ܢܰܦܷܩ ܠܝ ܚܳܠܐ. ܒܘ ܕܳܪܐ ܕܰܬܫ̰ܰܥܣܰܪ ܣܬܶܐ ܒܰܐܡܶܪܝܟܰܐ ܘܒܰܢ ܐܰܬ݂ܪܰܘܳܬ݂ܶܐ ܕܰܐܘܪܘܦ݁ܰܐ ܦܪܝܣ. ܐܘ ܙܰܘܥܐ ܕܰܦܪܰܢܣܰܐ ܕܗܰܘܝ ܒܝ ܫܰܬܐ ܕܰܐܢ ܐܰܠܦܐ ܘܫܘܰܥܡܐ ܘܫ̰ܰܥ ܘܬܡܳܢܝ، ܛܪܶܠܶܗ ܕܡܝܬܰܩܒܠܝ ܘܕܡܝܣܳܡܝ ܐܰܙ ܙܶܕܩܶܐ ܢܳܫܳܝܶܐ. ܒܝ ܐܰܘܝܘܬ݂ܐ ܕܰܐܬܠܰܢܬܝܟ ܕܷܡܕ݂ܰܠܠܶܗ ܬܰܚܬܰܗ ܐܘ ܪܝܫ ܩܘܛܢܐ ܕܰܐܡܶܪܝܟܰܐ ܪܳܣܘܶܠܬ ܘܐܘ ܪܝܫܐ ܕܰܘ ܘܰܙܝܪܶܐ ܕܐܝܢܓܝܠܬܶܪܶܐ ܫ̰ܳܪܫ̰ܝܠ܆ ܡܰܪܘܰܚܚܶܗ ܐܘ ܒܘܝܳܢܐ ܕܰܐܙ ܙܶܕܩܶܐ ܢܳܫܳܝܶܐ. ܒܘ ܒܘܝܳܢܰܐ ܢܐ، ܡܳܦܰܩܩܶܗ ܩܳܢܘܢܐ ܠܘ ܢܛܳܪܐ ܕܰܐܙ ܙܶܕܩܶܐ ܢܳܫܳܝܶܐ، ܠܰܫܰܢ ܕܠܐ ܡܝܣܰܡ ܦܘܪܫܳܢܐ ܒܰܝܢ ܕܝ ܐܘܡܬ݂ܳܢܳܝܘܬ݂ܐ ܘܕܝ ܗܰܝܡܳܢܘܬ݂ܐ ܘܕܝ ܗܝـܝܘܬ݂ܐ ܕܰܐܢ ܢܳܫܶܐ. ܐܘ ܢܝܫܐ ܩܰܡܳܝܐ ܕܘ ܛܘܟܳܣܐ ܕܶܐܡܘܳܬ݂ܐ ܡܚܰܝܕܳܬ݂ܐ ܕܷܡܫܰܬܰܣ ܐܰܪܒܥܐ ܘܥܷܣܪܝ ܒܘ ܝܰܪܚܐ ܕܰܥ ܥܷܣܪܐ ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܚܰܡܷܫ ܘܰܐܪܒܥܝ܆ ܐܘ ܢܛܳܪܐ ܕܘ ܫܰܝܢܐ ܘܕܘ ܫܠܳܡܐ ܕܒܰܝܢ ܕܰܥ ܥܰܡܶܐ ܝܐ. ܥܰܝܢܝ ܛܘܟܳܣܐ܆ ܥܷܣܪܐ ܒܘ ܝܰܪܚܐ ܕܰܬܪܰܥܣܰܪ ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܬܡܳܢܶܐ ܘܰܐܪܒܥܝ، ܡܰܩܒܶܠܶܗ ܘܦܪܷܣܠܶܗ ܐܘ ܒܘܝܳܢܐ ܬܝܒܶܠܳܝܐ ܕܰܐܙ ܙܶܕܩܶܐ ܢܳܫܳܝܶܐ. ܟܝܬܐ ܒܘ ܒܘܝܳܢܰܐ ܢܐ ܬܠܶܬ݂ܝ ܩܳܢܘܢܶܐ ܕܟܳܡܝܰܩܪܝ ܐܘ ܒܰܪܢܳܫܐ ܥܰܡ ܐܝ ܚܝܪܘܬ݂ܰܝܕ݂ܶܗ ܘܐܝ ܐܰܘܝܘܬ݂ܰܝܕ݂ܶܗ. ܐܘ ܒܘܝܳܢܐ ܬܝܒܶܠܳܝܐ ܕܰܐܙ ܙܶܕܩܶܐ ܢܳܫܳܝܶܐ، ܚܰܕ݂ܷܪ ܒܢܝܫܐ ܟܰܡܝܠܐ ܕܰܐܙ ܙܶܕܩܶܐ. ܐܶܠܐ ܐܘ ܢܝܫܰܝܕ݂ܶܗ ܐܘ ܥܶܠܳܝܐ، ܠܐ ܕܡܝܬܰܩܪܷܢ ܘܕܡܝܬܰܘܠܦܝ ܬܰܢܢܶܗ، ܐܶܠܐ ܕܠܐ ܢܘܩܨܰܢܝـܝܶܗ ܘܕܠܐ ܦܘܪܫܳܢܐ ܡܝܬܰܦܝܬܝ ܠܰܚ ܚܰܝܶܐ ܝܐ. ܐܰܩ ܩܳܢܘܢܶܐ ܕܘ ܒܘܝܳܢܐ ܬܝܒܶܠܳܝܐ ܕܰܐܙ ܙܶܕܩܶܐ ܢܳܫܳܝܶܐ: 1. ܟܘܠܠܶܗ ܐܰܢ ܢܳܫܶܐ ܟ݂ܘܕ ܚܕ݂ܳܕ݂ܶܐ ܘܚܝܪܶܐ ܟܳܡܝܬܰܘܠܕ݂ܝ. ܟܷܬܬܶܗ ܗܰܘܢܐ ܘܳܐܙ̰ܕܰܢ. ܟܳܠܳܙܰܡ ܟ݂ܘܕ ܐܰܚܘܢܳܢܶܐ ܐܳܒܷܢ ܘܫܘܩܠܝ ܥܰܡ ܚܕ݂ܳܕ݂ܶܐ. 2. ܟܘܠ ܢܳܫܐ ܟܷܬܠܶܗ ܙܶܕܩܐ ܕܡܷܣܬܰܦܰܕ ܡܰܩ ܩܳܢܘܢܶܐ ܕܟܷܬܢܶܐ ܟܬ݂ܝܘܶܐ ܒܘ ܒܘܝܳܢܐ ܕܠܐ ܦܘܪܫܳܢܐ ܕܛܘܗܡܐ ܐܰܘ ܕܓܰܘܢܐ ܐܰܘ ܓܶܢܣܐ ܐܘ ܕܝܢܐ ܐܘ ܦ݁ܳܠܝܛܝܩܰܐ ܐܰܘ ܒܡܶܕܶܐ ܚܪܶܢܐ. 3. ܟܘܠ ܒܰܪܢܳܫܐ ܟܷܬܠܶܗ ܚܰܩ ܕܥܳܝܰܫ، ܘܕܗܳܘܶܐ ܚܝܪܐ ܘܕܗܳܘܷܢܠܶܗ ܚܰܝܶܐ ܡܫܰܝܢܶܐ. 4. ܟܳܠܳܙܰܡ ܕܠܐ ܡܝܬܰܗܘܶܐ ܠܬܷܢ ܢܳܫܶܐ ܔܷܙܙܰܬ ܝܰܩܘܪܶܐ ܕܟܳܬܰܘܪܝ ܐܘ ܐܝܩܳܪܐ ܘܐܘ ܢܶܨܚܳܢܐ ܕܘ ܒܰܪܢܳܫܐ. 5. ܟܘܠ ܢܳܫܐ ܩܘܡ ܐܰܩ ܩܳܢܘܢܶܐ ܟ݂ܘܕ ܚܕ݂ܳܕ݂ܶܐ ܝܐ. 6. ܠܐ ܟܳܘܶܐ ܕܬܷܢ ܢܳܫܐ ܡܩܰܒܷܠ ܕܰܩ ܩܳܢܘܢܶܐ ܡܷܙܒܰܛ ܐܰܘ ܕܡܝܬܰܚܰܬ ܒܘ ܚܰܦܷ݁ܣ ܐܘ ܣܬܶܐ ܕܡܝܬܰܘܦܰܩ ܡܘ ܐܰܬ݂ܪܰܝܕ݂ܶܗ ܘܡܶܐ ܕܘܟܬ݂ܶܗ. 7. ܟܘܠ ܢܳܫܐ ܟܷܬܠܶܗ ܚܰܩ ܕܡܷܚܟܰܡ ܒܒܶܝܬ݂ ܕܝܢܐ ܚܝܪܐ. 8. ܟܳܠܳܙܰܡ ܕܪܘܫܡܳܐܝܬ݂ ܡܷܢܛܳܪܝ ܐܰܚ ܚܰܝܶܐ ܕܝܠܳܢܳܝܶܐ ܕܟܘܠ ܢܳܫܐ. ܘܡܷܢܛܳܪܐ ܐܝ ܐܝܩܰܪܬ݂ܰܝܕ݂ܶܗ ܘܐܘ ܒܰܝܬܰܝܕ݂ܶܗ ܘܐܝ ܫܬܰܓ݂ܰܠܝـܝܰـܝܕ݂ܶܗ ܣܬܶܐ. 9. ܟܘܠ ܥܠܰܝܡܐ ܐܰܘ ܥܠܰܝܡܬ݂ܐ ܕܡܳܛܷܢ ܠܘ ܙܰܒܢܐ ܕܘ ܙܘܘܳܓ݂ܐ، ܟܷܦ݁ܦ݁ܶܗ ܡܝܙܰܘܓ݂ܝ ܥܰܡ ܚܕ݂ܳܕ݂ܶܐ ܕܠܐ ܦܘܪܫܳܢܐ ܕܛܘܗܡܐ ܘܓܰܘܢܐ ܘܕܝܢܐ. ܘܕܗܳܘܷܢ ܐܝܩܰܪܬ݂ܐ. ܐܝ ܐܝܩܰܪܬ݂ܐ ܣܬܶܐ، ܐܝ ܫܶܬܶܣܬܐ ܕܘ ܥܰܡܐ ܝܐ، ܡܰܘܟ݂ܰܐ ܟܳܠܳܙܰܡ ܕܡܷܢܛܳܪܐ ܗܰܡ ܡܘ ܥܰܡܐ ܘܗܰܡ ܡܝ ܕܰܘܠܰܐ. 10. ܟܘܠ ܢܳܫܐ ܟܷܬܠܶܗ ܚܰܩ ܕܙܳܘܰܢ ܘܕܷܡܙܰܒܰܢ ܘܕܗܳܘܶܠܶܗ ܡܰܠ ܘܡܷܠܟ. 11. ܟܘܠ ܢܳܫܐ ܟܷܬܠܶܗ ܚܝܪܘܬ݂ܐ ܕܘ ܦܬܰܟܰܪ ܘܕܘ ܐܳܙ̰ܕܰܢ ܘܕܝ ܗܰܝܡܳܢܘܬ݂ܐ. 12. ܟܘܠ ܢܳܫܐ ܟܷܬܠܶܗ ܚܰܩ ܕܫܳܓ݂ܰܠ ܘܕܷܡܢܰܩܶܠܶܗ ܫܘܓ݂ܠܐ ܟ݂ܘܕ ܟܳܒܰܥ ܘܕܟ݂ܳܠܰܨ ܡܘ ܫܘܓ݂ܠܐ. 13. ܟܘܠ ܢܳܫܐ ܟܷܬܠܶܗ ܚܰܩ ܕܘ ܝܘܠܦܳܢܐ. ܐܘ ܝܘܠܦܳܢܐ ܩܰܡܳܝܐ ܟܳܠܳܙܰܡ ܕܗܳܘܶܐ ܕܠܐ ܟܰܠܰܘܰܬ. 14. ܠܰܝܬܐ ܕܰܤܛܷܪ ܠܐ ܠܝ ܓܪܰܥܝܘܬ݂ܐ ܘܠܐ ܠܝ ܥܰܒܕܘܬ݂ܐ. 15. ܟܘܠ ܢܳܫܐ ܐܰܝܟܐ ܕܟܷܬܝܐ ܟܳܠܳܙܰܡ ܕܡܷܢܛܰܪ ܒܰܩ ܩܳܢܘܢܶܐ. 16. ܟܘܠܠܶܗ ܐܰܢ ܢܳܫܶܐ ܠܓܳܪܰܢ ܕܰܩ ܩܳܢܘܢܶܐ ܕܘ ܢܳܡܘܣܐ ܐܶܣܳܢܳܝܐ ܟܷܬܬܶܗ ܚܰܩ ܕܷܐܙܙܷܢ ܠܘ ܒܶܝܬ݂ܕܝܢܐ. 17. ܐܘ ܚܰܐ ܕܟܳܡܷܚܟܰܡ ܡܶܐ ܚܛܝܬ݂ܐ ܡܶܕܶܐ ܕܣܷܡܠܶܗ، ܟܳܠܳܙܰܡ ܕܡܝܬܰܗܘܶܠܶܗ ܐܝܡܟܰܢ ܘܚܰܩ ܠܰܫܰܢ ܕܷܡܕܰܦܰܥ ܪܘܚܶܗ. 18. ܟܘܠ ܚܰܐ ܒܰܐܝܢܰܐ ܐܰܬ݂ܪܐ ܕܳܐܒܰܥ، ܟܝܒܶܗ ܕܥܳܝܰܫ. ܘܶܐܡܰܐ ܕܳܐܒܰܥ ܟܝܒܶܗ ܕܢܳܦܰܩ ܡܝܢܶܗ ܐܰܘ ܕܳܥܰܪ ܠܘ ܐܰܬ݂ܪܰܝܕ݂ܶܗ. 19. ܡܩܰܒܷܠ ܕܝ ܙܷܠܡܝـܝܶܗ، ܟܘܠ ܢܳܫܐ ܟܝܒܶܗ ܕܥܳܪܰܩ ܠܰܐܬ݂ܪܐ ܢܘܟ݂ܪܳܝܐ. ܐܝ ܕܰܘܠܰܐ ܕܷܐܙܙܶܠܰܗ ܣܬܶܐ، ܟܳܠܳܙܰܡ ܟ݂ܘܕ ܓܰܠܘܳܝܐ ܡܝܰܩܪܳܠܶܗ ܘܢܷܛܪܳܠܶܗ. 20. ܟܘܠ ܒܰܪܢܳܫܐ، ܟܷܬܠܶܗ ܚܰܩ ܕܗܳܘܶܐ ܡܳܬ݂ܳܢܳܝܐ. 21. ܟܘܠ ܒܰܪܢܳܫܐ ܟܷܬܠܶܗ ܚܝܪܘܬ݂ܐ ܕܘ ܦܬܰܟܰܪ، ܕܝ ܗܰܝܡܳܢܘܬ݂ܐ ܘܕܘ ܕܝܢܐ. 22. ܠܐ ܟܳܘܶܐ ܕܬܷܢ ܢܳܫܶܐ ܡܷܚܟܰܡ ܡܘ ܦܬܰܟܰܪܰܝܕ݂ܶܗ ܐܰܘ ܡܝ ܫܬܰܓ݂ܰܠܝـܝܰـܝܕ݂ܶܗ. 23. ܟܘܠ ܢܳܫܐ ܟܷܬܠܶܗ ܚܰܩ ܕܠܳܬܰܡ ܐܰܘ ܕܷܡܫܰܬܰܣ ܚܘܕ݂ܪܐ. ܠܐ ܟܳܘܶܐ ܕܡܝܣܰܡ ܙܳܪܝـܝܶܗ ܥܰܠ ܢܳܫܐ ܕܥܳܒܰܪ ܠܚܘܕ݂ܪܐ ܐܰܘ ܠܫܘܬܳܣܐ. 24. ܟܘܠ ܢܳܫܐ ܟܷܬܠܶܗ ܚܰܩ ܒܪܘܚܶܗ ܕܥܳܒܰܪ ܠܝ ܡܕܰܒܪܳܢܘܬ݂ܐ ܐܰܘ ܕܚܝܪܳܐܝܬ݂ ܡܢܰܩܶܐ ܠܰܪ ܪܝܫܳܢܶܐ ܘܠܰܡ ܡܕܰܒܪܳܢܰܝܕ݂ܶܗ ܒܰܓ ܓܘܒܳܝܶܐ. 25. ܟܳܠܳܙܰܡ ܕܐܝ ܡܫܰܝܢܘܬ݂ܐ ܕܘ ܚܘܠܡܳܢܐ (ܣܝܓܳܪܬܰܐ) ܕܘ ܒܰܪܢܳܫܐ، ܕܗܘܝܐ ܒܰܐܢ ܐܶܣܳܪܶܐ ܕܒܰܝܢ ܕܰܕ ܕܰܘܠܰܬ ܐܰܘ ܡܰܙ ܙܘܙܶܐ ܕܝ ܕܰܘܠܰܐ ܕܟܳܥܳܝܰܫ ܐܶܒܰܗ. 26. ܟܘܠ ܢܳܫܐ ܟܷܬܠܶܗ ܚܰܩ ܕܡܷܬ݂ܢܰܚ ܘܕܡܷܦܨܰܚ. ܘܒܷܬ݂ܷܪ ܡܘ ܫܘܓ݂ܠܐ ܣܬܶܐ ܟܷܬܠܶܗ ܚܰܩ ܠܘ ܒܶܛܠܳܢܐ ܘܠܘ ܟܪܳܟ݂ܐ. 27. ܟܘܠ ܢܳܫܐ ܟܷܬܠܶܗ ܚܰܩ ܕܫܳܓ݂ܰܠ ܒܟܘܠ ܫܷܟܷܠ ܕܰܦ ܦܶܪܥܶܐ ܕܰܨ ܨܷܢܥܰܬ ܫܰܦܝܪܶܐ. ܘܩܳܕܰܪ ܕܡܝܫܰܪܰܟ ܠܰܨ ܨܷܢܥܰܢܝ. 28. ܐܰܢ ܢܳܫܶܐ ܟܘܠܠܶܗ ܟܷܬܬܶܗ ܚܰܩ ܕܥܰܝܫܝ ܒܣܝܣܬܰܡ ܕܷܡܛܰܟܰܣ ܠܓܳܪܰܢ ܕܰܩ ܩܳܢܘܢܶܐ ܘܕܰܚ ܚܰܩܩܰܬ ܕܷܟܬ݂ܝܘܝ ܒܘ ܒܘܝܳܢܰܐ ܢܐ. 29. ܟܳܠܳܙܰܡ ܕܟܘܠ ܢܳܫܐ ܡܰܩܒܰܠ ܐܰܩ ܩܳܢܘܢܶܐ ܕܷܟܬ݂ܝܘܝ ܒܘ ܒܘܝܳܢܰܐ ܢܐ. 30. ܠܐ ܕܰܘܠܰܐ ܘܠܐ ܥܰܡܐ ܘܠܐ ܢܳܫܐ، ܠܐ ܟܳܘܶܐ ܕܫܳܓ݂ܰܠ ܠܰܫܰܢ ܕܠܳܚܶܐ ܐܰܘ ܕܡܰܚܪܰܘ ܩܳܢܘܢܐ ܡܰܢܝ. ܡܠܦܢܐ ܫܟܪܝ ܐܩܛܫ 874 ܡ̈ܠܐ.