Šëkri Aqtaš: ܐܘ ܥܒܳܪܐ ܕܘ ܬܶܟܢܳܠܳܘܙ̰ܝ ܠܰܚ ܚܰܝܶܐ ܕܘ ܒܰܪܢܳܫܐ / U cboro du teknoloži laḥ ḥaye du barnošo
U cboro du teknoloži laḥ ḥaye du barnošo
ܐܘ ܒܰܪܢܳܫܐ ܡܘ ܝܰܘܡܐ ܕܷܟ݂ܠܝܩ ܥܰܠ ܦܳܬ݂ܶܐ ܕܷܒܪܝܬ݂ܐ، ܠܐ ܟܰܠܝ ܡܘ ܫܘܓ݂ܠܐ. ܘܟܘܠ ܢܰܩܩܰܐ ܫܓ݂ܝܠܶܗ ܠܰܫܰܢ ܕܷܡܒܰܣܰܡ ܐܰܚ ܚܰـܝܰـܝܕ݂ܶܗ ܡܘ ܓܰܒܐ ܕܝ ܥܡܰܪܰܐ ܘܕܘ ܡܘܟܠܐ ܘܕܘ ܠܘܳܫܐ. ܒܘ ܗܰܘܢܐ ܕܗܘܠܶܠܶܗ ܐܰܠܳܗܐ ܫܓ݂ܝܠܶܗ ܕܠܐ ܩܛܳܥܐ ܠܰܫܰܢ ܕܡܳܦܰܩ ܡܶܕܳܢܶܐ ܚܰܬ݂ܶܐ ܕܟܳܡܒܰܣܡܝ ܐܰܚ ܚܰـܝܰـܝܕ݂ܶܗ ܘܟܳܡܰܢܦܥܝ ܗܰܡ ܐܶܠܶܗ ܗܰܡ ܠܝ ܢܳܫܘܬ݂ܐ ܟܘܠܰܗ. ܡܷܩܩܰܐ ܕܷܚܙܶܠܶܗ ܡܶܕܳܢܶܐ، ܡܔܰܪܰܒܠܶܗ ܕܡܳܙܰܕ ܐܰܥܠܰܝـܝܶܗ. ܗܶܫ ܡܘ ܙܰܒܢܐ ܕܥܳܝܰܫܘܰܐ ܒܰܡ ܡܥܰܪܶܐ ܘܒܰܛ ܛܘܪܳܢܶܐ، ܘܣܳܝܰܡܘܰܐ ܪܳܥܝܘܬ݂ܐ ܘܙܳܪܰܥܘܰܐ ܐܘ ܙܰܕ ܒܰܢ ܐܰܪܥܳܬ݂ܶܐ، ܔܒܝܪ ܕܝܳܠܰܦ ܐܘ ܣܝܳܡܐ ܕܰܣ ܣܶܦܳܩܶܐ ܕܝ ܦܰܕܳܢܐ ܠܘ ܕܘܳܪܐ. ܘܐܘ ܣܝܳܡܐ ܕܰܩ ܩܳܡܘܣܚܶܐ ܠܰܫܰܢ ܕܥܳܝܰܫ ܐܰܦ݁ܦ݁ܶܗ ܘܕܢܳܛܰܪ ܐܘ ܙܰܪܥܰܝܕ݂ܶܗ ܘܐܟ ܟܰܪܡܰܝܕ݂ܶܗ ܡܰܓ ܓܰܢܳܘܶܐ. ܘܝܰܠܷܦ ܣܬܶܐ ܐܘ ܨܰܝܕܐ ܠܰܫܰܢ ܕܙܳܒܰܛ ܢܘܢܶܐ ܡܰܝ ܝܰܡܶܐ ܘܚܰܝܶܘܷܢ ܡܰܛ ܛܘܪܳܢܶܐ. ܥܰܡ ܗܰܢܝ ܣܬܶܐ ܝܰܠܷܦ ܐܝ ܨܷܢܥܰܐ ܕܝ ܢܰܓܳܪܘܬ݂ܐ ܠܰܫܰܢ ܕܡܰܥܡܰܪܠܶܗ ܒܰܝܬܐ ܢܰܥܝܡܐ ܡܰܩ ܩܰܝܣܶܐ ܘܡܘ ܛܝܢܐ. ܒܘ ܫܷܟܠܰܢܐ ܝܰܠܷܦ ܟܘܠ ܨܷܢܥܰܐ ܕܟܷܬܘܰܐ ܣܢܝܩܳܝܐ ܐܰܥܠܰܗ. ܝܰܘܡܐ ܒܝܰܘܡܐ ܐܘ ܡܶܢܝܳܢܐ ܕܰܢ ܢܳܫܶܐ ܣܬܶܐ ܙܳܝܰܕܘܰܐ. ܡܰܘܟ݂ܰܐ ܐܰܣ ܣܶܦܳܩܰܢܷܟ ܗܰܘ ܡܰܟܦܷܢܘܰܐ ܕܷܡܕܰܒܪܝ ܘܕܡܰܥܝܫܝ ܐܰܢ ܢܳܫܶܐ. ܐܶܠܐ ܐܘ ܒܰܪܢܳܫܐ ܐܷܫܢܶܐ ܘܕܳܪܶܐ ܝܰܪܝܟ݂ܶܐ ܒܘ ܫܷܟܠܰܢܐ ܡܕܰܒܰܪܠܶܗ ܪܘܚܶܗ ܗܘܠ ܕܡܰܛܝ ܠܘ ܕܳܪܐ ܕܰܥ ܥܷܣܪܝ ܕܟܳܡܝܕ݂ܰܥ ܐܘ ܕܳܪܐ ܕܘ ܬܶܟܢܳܠܳܘܙ̰ܝ ܘܕܘ ܫܘܫܳܛܐ ܕܰܝ ܝܘܠܦܳܢܶܐ ܒܷܒܪܝܬ݂ܐ. ܡܰܝܟܐ ܠܰܢ ܐܰܚ ܚܰܝܶܐ ܒܰܣܝܡܰܢܝ، ܕܠܐ ܡܝ ܟܰܫܝܪܘܬ݂ܐ ܕܘ ܒܰܪܢܳܫܰܘܐ ܐܘ ܩܰܡܳܝܐ ܕܟܷܬܘܐ ܦܫܝܛܐ ܘܡܰܟܝܟ݂ܐ ܕܟܘܠ ܝܰܘܡܐ ܥܰܡ ܐܘ ܢܦܳܩܐ ܕܝ ܫܷܡܫܐ ܛܳܥܰܢܘܰܐ ܐܝ ܐܰܠܶܗ ܒܐܝܕ݂ܶܗ ܘܐܘ ܢܝܪܐ ܐܰܥܡܶܗ ܘܐܘ ܙܰܕ ܥܰܠ ܚܰܨܶܗ، ܒܳܕ݂ܰܪܘܰܐ ܘܙܳܪܰܥܘܰܐ ܘܡܰܚܰܬܘܰܐ ܐܘ ܬܘܟ݂ܠܳܢܰܝܕ݂ܶܗ ܟܘܠܶܗ ܥܰܠ ܐܰܠܳܗܐ. ܐܝܢܰܩܠܰܐ ܕܳܐܬ݂ܶܘܰܐ ܡܰܛܪܐ ܚܳܝܰܪܘܰܐ ܒܝ ܫܡܰܝܐ ܘܡܰܥ ܥܘܡܩܶܐ ܕܠܶܒܶܗ ܐܳܡܰܪܘܰܐ؛ ܝܰܐ ܪܰܒ ܡܝܒܰܪܰܟ݂ ܐܷܫܡܘܟ݂ ܕܒܘ ܡܰܛܪܰܝܕ݂ܘܟ݂ ܟܳܡܰܫܬܰܬ ܐܘ ܙܰܪܥܰܝܕ݂ܝ. ܒܪܝܬ݂ܐ ܒܘ ܕܳܪܐ ܕܰܥ ܥܷܣܪܝ ܡܫܰܘܫܛܐ ܓ݂ܰܠܰܒܶܐ. ܐܘ ܒܰܪܢܳܫܐ ܣܬܶܐ ܢܰܗܷܪ ܗܰܘܢܶܗ ܘܝܰܠܷܦ. ܘܡܳܙܰܕܠܶܗ ܥܰܠ ܐܰܨ ܨܷܢܥܰܬ ܥܰܬܝܩܶܐ ܕܙܰܒܢܐ ܝܰܪܝܟ݂ܐ ܐܰܥܠܰܝـܝܶܗ ܡܕܰܒܰܪܘܰܐ ܐܰܚ ܚܰـܝܰـܝܕ݂ܶܗ. ܡܶܩܷܡ ܡܘ ܬܶܟܢܳܠܳܘܙ̰ܝ ܕܢܳܦܰܩ، ܠܰܬܘܰܐ ܠܐ ܐܰܡ ܡܰܟܝܢܰܬ ܕܐܘ ܐܶܠܶܟܬܪܳܢܝܟ ܟ݂ܘܕ ܬܶܠܶܦܙܝܳܘܢ ܘܬܶܠܶܦܘܢ ܟܳܡܦ݁ܝܘܬܶܪ ܘܠܐ ܪܰܕ݂ܰܝܬܐ ܟ݂ܘܕ ܐܰܕܝܰܘܡܐ، ܘܠܐ ܓܰܡܝܝܰܬ ܘܠܐ ܛܰܝܳܣܬܐ. ܘܠܐ ܡܰܟܝܢܰܬ ܪܰܒܶܐ ܕܘ ܕܘܳܪܐ ܘܕܘ ܚܨܳܕܐ. ܘܠܐ ܡܰܛܒܰܥܰܬ ܕܛܷܒܥܝ ܟܬ݂ܳܘܶܐ. ܐܘ ܬܶܟܢܳܠܳܘܙ̰ܝ ܡܘ ܝܰܘܡܐ ܕܡܳܦܰܩܩܶܗ ܐܰܝ ܝܰܕ݂ܘܥܬ݂ܳܢܶܐ ܗܘܠ ܠܰܕܝܰܘܡܰܐ ܟܳܡܝܫܰܘܫܰܛ ܘܟܳܡܫܰܡܰܫ ܐܝ ܢܳܫܘܬ݂ܐ. ܐܘ ܒܰܪܢܳܫܐ ܒܘ ܬܶܟܢܳܠܳܘܙ̰ܝ ܟܳܚܳܟܰܡ ܥܠ ܐܘ ܟܝܳܢܐ ܘܥܰܠ ܐܰܛ ܛܘܪܳܢܶܐ ܘܟܳܡܷܣܬܰܦܰܕ ܡܷܢܢܶܗ، ܘܥܰܠ ܒܪܝܬ݂ܐ ܟܘܠܰܗ ܓܰܘܳܢܳܐܝܬ݂. ܐܶܠܐ ܐܝܢܰܩܩܰܐ ܕܠܐ ܡܝܬܷܣܬܰܥܡܰܠ ܡܰܢ ܢܳܫܶܐ ܠܝ ܦܰܝܕܰܐ ܕܝ ܢܳܫܘܬ݂ܐ، ܟܳܡܰܕ݂ܷܪ ܗܰܡ ܐܰܢ ܢܳܫܶܐ ܗܰܡ ܐܰܚ ܚܰܝܶܘܷܢ ܗܰܡ ܐܘ ܟܝܳܢܐ. ܟ݂ܘܕ ܡܷܪܠܰܢ، ܐܰܝ ܝܘܬ݂ܪܳܢܶܐ ܕܘ ܬܶܟܢܳܠܳܘܙ̰ܝ ܠܝ ܢܳܫܘܬ݂ܐ ܘܠܷܒܪܝܬ݂ܐ، ܓ݂ܰܠܰܒܶܐ ܢܶܐ. ܒܝ ܘܰܣܝܛܰܐ ܕܘ ܐܝܢܬܶܪܢܶܬ ܗܷܢܢܷܟ ܝܰܬܝܘܶܐ ܥܰܠ ܐܘ ܟܘܪܣܝ ܟܷܦ݁ܦ݁ܶܗ ܕܡܳܛܷܢ ܘܕܝܘܠܦܝ ܟܘܠ ܫܷܟܷܠ ܕܝܘܠܦܳܢܶܐ، ܕܠܐ ܬܰܥܒܐ ܘܕܠܐ ܡܰܣܪܰܦ. ܒܘ ܝܘܠܦܳܢܰܐ ܢܐ، ܟܳܡܒܰܣܡܝ ܐܰܚ ܚܰܝܰܬ݂ܬ݂ܶܗ. ܒܘ ܬܶܠܶܦܘܢ ܟܳܡܕܰܒܪܝ ܐܰܫ ܫܘܓ݂ܠܳܢܰܬ݂ܬ݂ܶܗ ܘܐܝ ܬܰܓܳܪܘܬ݂ܰܬ݂ܬ݂ܶܗ. ܟܳܡܷܔܓ݂ܳܠܝ ܥܰܡ ܐܰܢ ܢܳܫܰܬ݂ܬ݂ܶܗ ܘܟܳܡܫܰܕܪܷܢܢܶܗ ܒܰܝ ܝܰܘܡܳܬ݂ܶܐ ܐܝܕ݂ܝܥܶܐ ܐܶܓܰܪܬ݂ܐ ܕܘ ܝܰܘܡܐ ܕܘ ܡܰܘܠܳܕ݂ܐ ܐܰܘ ܕܘ ܒܶܪܳܟ݂ܐ ܐܰܘ ܕܘ ܥܘܦܳܝܐ. ܟܳܟܘܬ݂ܘܝ ܐܰܟ ܟܬ݂ܳܘܰܬ݂ܬ݂ܶܗ ܘܰܐܟ ܟܬ݂ܰܘܝܳܬ݂ܰܬ݂ܬ݂ܶܗ ܒܘ ܟܳܡܦ݁ܝܘܬܶܪ. ܘܐܝܢܰܩܩܰܐ ܕܟܳܡܷܣܢܳܩܝ ܟܳܛܷܒܥܷܢܢܶܗ ܒܝ ܟܰܬ݂ܰܘܬܐ. ܘܟܳܡܫܰܕܪܝ ܐܝܡܶܝܠ ܠܷܚܕ݂ܳܕ݂ܶܐ. ܟܳܓܘܪܫܝ ܨܷܪܬܳܬ݂ܶܐ ܒܰܡ ܡܰܟܝܢܰܬ ܘܟܳܡܩܰܝܕܝ ܥܘܗܕܳܢܶܐ ܓ݂ܰܠܰܒܶܐ ܒܘ ܒ݂ܝܕܝܐ ܘܒܝ ܟܰܡܶܪܰܐ. ܐܰܕܝܰܘܡܰܐ ܟܝܬܐ ܒܟܝܣܶܗ ܕܟܘܠ ܢܳܫܐ ܡܘ ܪܰܒܐ ܠܘ ܢܰܥܝܡܐ، ܬܶܠܶܦܘܢ. ܐܶܒܶܗ ܟܳܡܷܔܓ݂ܰܠ ܘܟܳܡܩܰܝܰܕ ܐܘ ܩܳܠܐ. ܘܟܳܥܳܒܰܪ ܠܘ ܦܰܝܣܒܘܟ ܘܠܘ ܬܘܝܬܬܶܪ ܘܠܘ ܐܝܢܣܬܰܓܪܰܡ. ܟܳܩܳܪܶܐ ܐܶܒܶܗ ܐܰܛ ܛܶܒܶܐ ܘܟܳܝܳܠܰܦ ܡܷܢ ܗܰܘܝ ܒܷܒܪܝܬ݂ܐ. ܘܟܳܘܶܐ ܚܰܘܪܐ ܥܰܡ ܓ݂ܰܠܰܒܶܐ ܢܳܫܶܐ ܡܶܟܘܠ ܐܰܬ݂ܪܐ ܕܷܒܪܝܬ݂ܐ. ܕܠܐ ܡܘ ܬܶܟܢܳܠܳܘܙ̰ܝ ܡܰܝܟܳܠܰܢ ܐܰܢ ܐܝܡܟܰܢܰܢܝ؟ ܐܘ ܐܝܢܬܶܪܢܶܬ ܡܰܢܦܰܥܠܶܗ ܠܝ ܢܳܫܘܬ݂ܐ ܒܟܘܠܠܶܗ ܐܰܨ ܨܷܢܥܰܬ. ܒܝ ܐܳܣܝܘܬ݂ܐ ܘܒܝ ܬܰܓܳܪܘܬ݂ܐ ܘܒܝ ܢܰܓܳܪܘܬ݂ܐ ܘܒܘ ܝܘܠܦܳܢܐ ܘܒܘ ܙܰܪܳܥܘܬ݂ܐ ܘܒܝ ܥܡܰܪܰܐ ܕܰܒ ܒܳܬܶܐ. ܒܰܙ ܙܰܒܢܶܐ ܕܡܶܩܷܡ ܠܰܬܘܰܐ ܬܰܟ݂ܶܬܷܪ ܓ݂ܰܠܰܒܶܐ، ܘܠܐ ܕܰܪܡܳܢܶܐ ܘܠܐ ܒܶܝܬ݂ܟܪܝܗܶܐ. ܡܰܘܟ݂ܰܐ ܓ݂ܰܠܰܒܶܐ ܢܳܫܶܐ ܡܰܟ ܟܶܘܶܐ ܡܫܰܚܠܦܶܐ ܡܰܝܬ݂ܝܘܰܐ. ܐܘܚܰܐ ܕܠܳܙܰܡܘܰܐ ܕܗܳܘܶܐ ܥܰܡܰܠܝـܝܶܗ، ܠܳܙܰܡܘܰܐ ܕܒܰܫ ܫܰܠܦܶܐ ܡܝܣܰܡ. ܘܰܐܕ ܕܰܪܡܳܢܶܐ ܢܳܩܘܨܶܘܰܝܢܶܗ. ܐܶܠܐ ܐܘܥܕܐ ܟܳܚܳܙܝܢܰܐ ܢܰܩܩܰܘܰܬ ܕܰܐܢ ܐܳܣܰܘܳܬ݂ܐ ܥܰܠ ܐܘ ܐܝܢܬܶܪܢܶܬ ܟܳܣܰܝܡܝ ܐܰܥ ܥܰܡܰܠܝܝܰܬ. ܟܳܡܰܥܰܒܪܝ ܐܰܟ ܟܰܡܶܪܰܬ ܒܘ ܓܘܫܡܐ ܕܘ ܟܰܐܝܘܐ ܘܟܳܝܘܠܦܝ ܐܘ ܟܶܘܰܝܕ݂ܶܗ. ܒܙܰܒܢܐ ܟܰܪܝܐ ܟܳܣܰܝܡܝܠܶܗ ܥܰܡܰܠܝـܝܶܗ ܘܟܳܡܰܢܝـܚـܝܠܶܗ. ܫܰܡܝܥܝܢܰܐ ܕܒܰܩ ܩܷܪܝܰܘܳܬ݂ܶܐ ܣܰܝܡܝܘܰܐ ܦܰ݁ܠܘܬܰܐ ܠܰܫܰܢ ܕܷܡܥܰܘܢܝ ܚܕ݂ܳܕ݂ܶܐ ܒܫܘܓ݂ܠܶܐ ܡܶܕܶܐ. ܗܰܟܟܰܐ ܚܨܳܕܐ ܐܰܘ ܥܡܰܪܰܐ ܕܒܰܝܬܐ ܐܘ ܒܘ ܬܰܘܩܝܕ݂ܳܐ ܕܘ ܐܰܬܘܢܐ ܐܰܘ ܒܰܦܬܝܠܶܐ. ܒܝ ܩܰܡܰܝܬܐ ܡܰܥܰܡܪܝܘܰܐ ܐܰܒ ܒܳܬܰܬ݂ܬ݂ܶܗ ܡܰܠ ܠܘܚܶܐ ܕܘ ܛܝܢܐ. ܘܒܷܬ݂ܷܪ ܡܰܘܩܕ݂ܝܘܰܐ ܐܰܬܘܢܐ ܠܰܫܰܢ ܕܣܰܝܡܝ ܟܰܠܫܐ ܘܶܐܒܶܗ ܡܰܥܰܡܪܝ ܐܰܒ ܒܳܬܶܐ. ܘܒܰܢ ܐܷܫܢܶܐ ܚܰܪܳܝܰܢܝ ܢܰܦܝܩܐ ܐܝ ܫ̰ܝܡܰܢܬܐ. ܐܰܥ ܥܠܰܝܡܶܐ ܕܝ ܩܪܝܬ݂ܐ ܟܘܠܠܶܗ ܠܷܬܡܝܘܰܐ ܕܰܡܥܰܘܢܝ ܚܕ݂ܳܕ݂ܶܐ ܠܰܫܰܢ ܕܡܰܥܰܡܪܝ ܒܰܝܬܐ ܒܝ ܩܪܝܬ݂ܐ. ܗܷܢ ܡܷܢܢܶܗ ܩܘܛܥܝܘܰܐ ܟܶܦܶܐ ܘܗܷܢ ܢܘܩܠܝܘܰܐ ܢܩܘܪܬܐ ܘܗܷܢ ܣܰܝܡܝܘܰܐ ܛܝܢܐ ܠܘ ܩܛܳܪܐ ܘܗܷܢ ܒܰܪ ܪܰܦܫܶܐ ܡܟ݂ܰܠܛܝܘܰܐ ܐܝ ܢܩܘܪܬܐ ܘܐܘ ܟܰܠܫܐ. ܗܰܘܟ݂ܰܐ ܒܬܰܥܒܐ ܓ݂ܰܠܰܒܶܐ ܘܙܰܒܢܐ ܝܰܪܝܟ݂ܐ ܗܘܠ ܕܡܰܥܰܡܪܝܘܰܐ ܒܰܝܬܐ ܢܰܥܝܡܐ ܡܐ ܬܰܪܬܶܐ ܩܶܠܰܝܳܬ݂ܶܐ ܕܠܐ ܒܶܝܬ݂ܒܘܫܳܠܐ ܘܕܠܐ ܒܶܝܬ݂ܚܰܘܦܶܐ ܘܕܠܐ ܒܶܝܬ݂ܣܶܠܝܶܐ. ܐܶܠܐ ܐܰܕܝܰܘܡܰܐ ܒܰܢ ܐܝܡܟܰܢܰܬ ܕܘ ܬܶܟܢܳܠܳܘܙ̰ܝ، ܐܘ ܫܘܓ݂ܠܰܢܐ ܟܘܠܶܗ ܟܡܐ ܥܠܰܝܡܶܐ ܬܰܢܢܶܗ ܟܳܣܰܝܡܝܠܶܗ. ܒܙܰܒܢܐ ܟܪܶܬܷܪ ܘܡܰܨܪܰܦ ܐܷܫܡܐ ܘܫܘܓ݂ܠܐ ܓ݂ܰܠܰܒܶܐ. ܒܥܰܝܢܝ ܫܷܟܷܠ܆ ܒܰܩ ܩܷܪܝܰܘܳܬ݂ܶܐ ܕܛܘܪܥܰܒܕܝܢ ܕܝܠܳܢܳܐܝ݂ܬ ܐܘ ܕܘܳܪܐ ܘܐܘ ܚܨܳܕܐ ܫܘܓ݂ܠܐ ܝܰܩܘܪܐ ܢܶܐ. ܒܰܝ ܝܰܪܚܶܐ ܕܰܬ ܬܷܫܪܳܝܳܬ݂ܐ، ܒܘ ܡܰܛܪܐ ܘܒܘ ܛܝܢܐ ܕܰܘܪܝܘܰܐ. ܘܢܘܛܪܝܘܰܐ ܒܘ ܩܰܝܛܐ ܠܘ ܚܨܳܕܐ. ܒܘ ܩܰܝܛܐ ܐܘ ܕܰܪܓܐ ܕܝ ܚܰܡܝܡܘܬ݂ܐ ܕܝ ܫܶܡܫܐ، ܢܰܩܩܰܘܰܬ ܟܳܣܳܠܰܩ ܗܘܠ ܚܰܡܷܫ ܘܰܐܪܒܥܝ. ܒܘ ܚܶܡܰܘܐ ܟܳܠܳܙܰܡ ܕܚܘܨܕܝ. ܬܪܶܐ ܐܰܘ ܬܠܳܬ݂ܐ ܝܰܪܚܶܐ ܗܘܠ ܕܷܡܟܰܡܠܝܘܰܐ ܐܘ ܚܨܳܕܐ ܘܢܩܳܠܐ ܕܘ ܙܰܕ ܠܝ ܐܰܕܪܐ. ܒܷܬ݂ܷܪ ܠܳܙܰܡܘܰܐ ܕܡܰܟܰܪܟ݂ܝܠܶܗ ܘܦܷܪܫܝ ܐܘ ܙܰܕ ܡܘ ܬܰܘܢܐ. ܐܰܫ ܫܘܓ݂ܠܳܢܰܢܝ ܟܘܠܠܶܗ ܒܬܰܥܒܐ ܝܰܩܘܪܐ ܗܳܘܷܢܘܰܐ. ܐܰܥ ܥܳܡܘܪܶܐ ܕܰܩ ܩܷܪܝܰܘܳܬ݂ܶܐ ܓ݂ܰܠܰܒܶܐ ܒܷܛܠܝܘܰܐ ܒܘ ܙܰܒܢܰܘܐ. ܒܰܕ ܕܳܪܶܐ ܩܰܡܳܝܶܐ ܒܰܠܟܝ ܐܘ ܒܰܪܢܳܫܐ ܒܩܰܝܣܐ ܡܶܕܶܐ ܚܳܦܰܪܘܰܐ ܐܝ ܐܰܪܥܐ. ܘܒܷܬ݂ܷܪ ܡܳܦܰܩܠܶܗ ܣܶܦܳܩܶܐ ܕܝ ܦܰܕܳܢܐ ܟ݂ܘܕ ܐܘ ܣܰܝܦܐ ܘܐܰܠܶܗ ܘܢܝܪܐ، ܠܰܫܰܢ ܕܕܳܘܰܪ ܙܷܬܬܷܪ ܒܰܚ ܚܝܶܘܷܢ. ܐܶܠܐ ܐܰܕܝܰܘܡܰܐ ܐܘ ܒܰܪܢܳܫܐ ܒܘ ܝܘܠܦܳܢܰܝܕ݂ܶܗ ܘܒܘ ܬܶܟܢܳܠܳܘܙ̰ܝ، ܡܳܦܰܩܠܶܗ ܡܰܟܝܢܰܬ ܩܰܘܝܶܐ ܗܰܡ ܠܘ ܕܘܳܪܐ ܗܰܡ ܣܬܶܐ ܠܘ ܚܨܳܕܐ. ܐܝ ܡܰܟܝܢܰܐ ܕܘ ܕܘܳܪܐ ܟܳܡܷܩܪܳܝܐ ܬܪܰܟܬܳܪ. ܟܳܡܝܬܰܚܰܬ ܣܶܦܳܩܶܐ ܒܷܬ݂ܪܶܗ ܠܘ ܒܕ݂ܳܪܳܐ ܕܘ ܙܰܕ. ܘܒܷܬ݂ܷܪ ܡܶܐ ܕܟܳܒܳܕ݂ܰܪ ܐܘ ܙܰܕ ܒܰܣ ܣܶܟܶܐ ܕܟܳܡܝܥܰܠܩܝ ܒܷܬ݂ܪܶܗ ܟܳܡܟܰܣܶܐ ܐܘ ܙܰܕ ܣܬܶܐ. ܗܰܘܟ݂ܰܐ ܒܚܰܐ ܝܰܘܡܐ ܗܰܡ ܟܳܕܳܘܰܪ ܗܰܡ ܟܳܙܳܪܰܥ ܘܗܰܡ ܟܳܡܟܰܣܶܐ ܘܟܳܡܟܰܡܰܠ ܓ݂ܰܠܰܒܶܐ ܦܰܕܳܢܶܐ ܘܟܳܣܳܝܰܡ ܫܘܓ݂ܠܐ ܕܡܐ ܫܰܓ݂ܳܠܶܐ. ܒܥܰܝܢܝ ܫܷܟܷܠ ܟܝܬܐ ܡܰܟܝܢܰܐ ܕܟܳܡܷܩܪܳܝܐ ܚܰܨܰܕܬܐ ܐܰܘ ܒܰܝܢ ܕܘ ܥܰܡܐ ܟܳܡܝܕ݂ܳܥܐ ܕܷܪܰܨܰܐ. ܒܘ ܙܰܒܢܐ ܕܘ ܚܨܳܕܐ ܗܰܡ ܟܳܚܘܨܕܐ ܗܰܡ ܣܬܶܐ ܟܳܛܘܚܢܐ ܘܟܳܦܷܪܫܐ ܐܘ ܬܰܘܢܐ ܡܘ ܙܰܕ. ܐܘ ܫܘܓ݂ܠܰܢܐ ܟܘܠܶܗ ܚܰܐ ܥܠܰܝܡܐ ܐܰܘ ܬܪܶܐ ܥܠܰܝܡܶܐ ܠܪܘܚܰـܝـܝܶܗ ܟܳܣܰܝܡܝܠܶܗ. ܐܘ ܫܘܓ݂ܠܐ ܝܰܩܘܪܐ ܕܣܰܝܡܝܘܰܝܠܶܗ ܥܠܰܝܡܶܐ ܓ݂ܰܠܰܒܶܐ، ܐܰܕܝܰܘܡܰܐ ܒܝ ܘܰܣܝܛܰܐ ܕܘ ܬܶܟܢܳܠܳܘܙ̰ܝ ܚܰܐ ܥܠܰܝܡܐ ܟܳܣܳܝܰܡܠܶܗ ܒܙܰܒܢܐ ܟܪܶܬܷܪ ܘܟܰܝܷܦܬܷܪ. ܒܰܬ ܬܡܳܢܝܝܰܬ ܦܬܝܚܝ ܕܰܪܒܳܢܶܐ ܠܗܷܢ ܡܰܩ ܩܷܪܝܰܘܳܬ݂ܶܐ ܕܛܘܪܥܰܒܕܝܢ. ܘܒܷܬ݂ܷܪ ܓܪܝܫܝ ܟ݂ܰܛܛܰܬ ܕܘ ܟܰܗܪܳܒܐ ܠܰܩ ܩܷܪܝܰܘܳܬ݂ܶܐ. ܘܒܷܬ݂ܷܪ ܦܬܝܚܝ ܥܰܝܢܳܬ݂ܶܐ ܕܰܡ ܡܰܝܶܐ ܘܓܪܝܫܝ ܐܰܡ ܡܰܝܶܐ ܠܰܒ ܒܳܬܶܐ. ܒܰܦ ܦܘܠܚܳܢܰܢܝ ܐܷܫܡܐ ܒܰܣܝܡܝ ܐܰܚ ܚܰܝܶܐ ܕܰܥ ܥܳܡܘܪܶܐ ܕܰܩ ܩܷܪܝܰܘܳܬ݂ܶܐ. ܐܘ ܬܶܟܢܳܠܳܘܙ̰ܝ ܣܬܶܐ ܠܰܦ ܐܰܬ ܬܷܫܥܝܝܰܬ ܥܰܒܷܪ ܒܰܚ ܚܰܝܶܐ ܕܰܣ ܣܘܪܝܳܝܶܐ ܕܛܘܪܥܰܒܕܝܢ. ܐܰܥ ܥܳܡܘܪܶܐ ܕܰܩ ܩܷܪܝܰܘܳܬ݂ܶܐ ܒܷܬ݂ܷܪ ܡܰܬ ܬܷܫܥܝܝܰܬ ܒܕܰܠܠܶܗ ܗܷܢ ܡܷܢܢܶܗ ܕܙܰܘܢܷܢܶܗ ܬܶܠܶܦܙܝܳܘܢ ܠܐ ܡܓܰܘܢܐ ܐܶܠܐ ܟܳܡܐ ܘܚܶܘܳܪܐ. ܘܟܘܠܠܶܗ ܐܰܢ ܢܳܫܶܐ ܕܝ ܩܪܝܬ݂ܐ ܠܷܬܡܝܘܰܐ ܕܷܡܦܰܪܔܝ ܐܰܥܠܶܗ. ܒܷܬ݂ܷܪ ܒܷܟܡܳܐ ܐܷܫܢܶܐ ܙܘܷܢܢܶܗ ܬܶܠܶܦܙܝܳܘܢ ܡܓܰܘܢܐ ܕܟܳܡܰܚܘܶܐ ܐܝ ܨܘܪܬܐ ܫܰܦܷܪܬܷܪ. ܒܘ ܙܰܒܢܰܘܐ ܒܟܘܠ ܒܰܝܬܐ ܠܰܬܘܰܐ ܬܶܠܶܦܘܢ. ܐܝ ܕܰܘܠܰܐ ܡܰܚܰܬܘܰܝܠܰܗ ܒܘ ܒܰܝܬܐ ܕܘ ܡܘܟ݂ܬܰܪ ܬܰܢܢܶܗ ܬܶܠܶܦܘܢ. ܘܰܐܝܢܰܐ ܕܳܐܒܰܥܘܰܐ ܕܡܷܔܓ݂ܰܠ ܥܰܡ ܐܰܢ ܢܳܫܰܝܕ݂ܶܗ ܕܟܷܬܢܶܗ ܒܰܐܘܪܘܦ݁ܰܐ ܐܷܙܙܶܘܰܐ ܠܘ ܒܰܝܬܐ ܕܘ ܡܘܟ݂ܬܰܪ. ܘܟܳܠܷܢܘܰܐ ܐܰܢ ܢܳܫܶܐ ܒܝ ܨܝܪܰܐ ܠܰܫܰܢ ܕܡܷܔܓ݂ܳܠܝ ܐܰܘ ܕܳܐܬ݂ܰܠܠܶܗ ܬܶܠܶܦܘܢ ܡܰܢ ܢܳܫܰܬ݂ܬ݂ܶܗ ܕܟܷܬܢܶܗ ܒܰܐܘܪܘܦ݁ܰܐ. ܐܝܢܰܩܠܰܗ ܕܫܷܡܥܝܘܰܐ ܩܳܠܶܗ ܕܷܚܕ݂ܳܕ݂ܶܐ ܒܷܬ݂ܷܪ ܡܶܐ ܙܰܒܢܐ ܝܰܪܝܟ݂ܐ، ܡܝ ܦܨܝܚܘܬ݂ܐ ܒܳܟܷ݂ܢܘܰܐ. ܟ݂ܘܕ ܐܘ ܙܰܒܢܰܐ ܢܐ، ܒܘ ܙܰܒܢܰܘܐ ܠܰܬܘܰܐ ܡܰܙܠܐ ܘܡܰܬ݂ܝܐ ܡܶܐ ܐܰܘܪܘܦ݁ܰܐ ܠܘ ܐܰܬ݂ܪܐ. ܡܰܘܟ݂ܰܐ ܩܛܝܥܝܘܰܐ ܐܰܢ ܐܶܣܳܪܶܐ ܕܰܐܢ ܢܳܫܶܐ ܥܰܡ ܚܕ݂ܳܕ݂ܶܐ. ܠܰܦ ܐܝ ܫܰܬܐ ܕܰܬܪܰܠܦܐ ܥܰܒܷܪ ܐܘ ܬܶܠܶܦܘܢ ܕܘ ܟܝܣܐ ܣܬܶܐ ܒܰܚ ܚܰܝܶܐ ܕܘ ܥܰܡܐ ܕܛܘܪܥܰܒܕܝܢ. ܐܶܠܐ ܥܰܡ ܚܒܳܠ ܒܓ݂ܰܠܰܒܶܐ ܕܘܟܟܳܬ݂ܶܐ ܠܐ ܓܳܪܰܫܘܰܐ ܘܓ݂ܰܠܰܒܶܐ ܥܰܣܩܳܘܐ ܕܰܐܢ ܢܳܫܶܐ ܡܷܔܓ݂ܳܠܝ ܥܰܡ ܚܕ݂ܳܕ݂ܶܐ. ܢܰܩܩܰܘܰܬ ܣܷܠܩܝܘܰܐ ܠܕܘܟܟܳܬ݂ܶܐ ܥܶܠܳܝܶܐ ܐܰܘ ܠܪܝܫܶܗ ܕܰܛ ܛܘܪܳܢܶܐ ܠܰܫܰܢ ܕܓܳܪܰܫ ܐܘ ܬܶܠܶܦܘܢ. ܘܒܷܬ݂ܷܪ ܓܪܝܫܝ ܐܰܬ ܬܰܠܰܦܘܢܶܐ ܠܰܒ ܒܳܬܶܐ. ܘܐܘܥܕܐ ܒܓ݂ܰܠܰܒܶܐ ܡܰܩ ܩܷܪܝܰܘܳܬ݂ܶܐ ܥܰܡ ܐܘ ܬܶܠܶܦܘܢ ܟܝܬܐ ܣܬܶܐ ܐܝܢܬܶܪܢܶܬ ܒܰܒ ܒܳܬܶܐ. ܘܒܟܝܣܶܗ ܕܰܥ ܥܠܰܝܡܶܐ ܣܬܶܐ ܟܘܠܠܶܗ ܟܝܬܐ ܬܶܠܶܦܘܢ ܕܘ ܟܝܣܐ. ܐܘܚܰܐ ܡܷܢܢܶܗ ܐܝܢܰܩܩܰܐ ܕܟܳܒܰܥ ܟܳܥܳܒܰܪ ܠܘ ܦܰܝܣܒܘܟ ܘܠܘ ܐܝܢܣܬܰܓܪܰܡ ܘܠܘ ܬܘܝܬܬܶܪ. ܘܟܳܩܳܕܰܪ ܕܣܳܝܰܡ ܐܶܣܳܪܶܐ ܥܰܡ ܐܰܚ ܚܰܘܪܳܢܰܝܕ݂ܶܗ ܐܰܘ ܥܰܡ ܐܰܢ ܢܳܫܰܝܕ݂ܶܗ ܒܰܐܝܢܰܐ ܐܰܬ݂ܪܐ ܕܟܷܬܢܶܗ. ܒܘ ܘܰܛܣܰܐܦ݁ ܐܰܘ ܒܕܰܦܶܐ ܚܪܶܢܶܐ ܟܝܒܶܗ ܗܰܡ ܕܡܷܔܓ݂ܰܠ ܗܰܡ ܣܬܶܐ ܕܚܳܙܶܐ ܐܝ ܨܘܪܬܐ ܕܡܰܢ ܕܟܳܡܷܔܓ݂ܰܠ ܐܰܥܡܶܗ. ܓ݂ܰܠܰܒܶܐ ܡܰܣ ܣܳܘܶܐ ܘܰܠܰܘ ܠܐ ܟܘܕ݂ܥܝ ܟܬ݂ܰܘܬܐ ܘܩܪܰܝܬܐ ܐܶܠܐ ܟܳܛܘܥܢܝ ܬܶܠܶܦܘܢ ܒܟܝܣܰܝـܝܶܗ ܘܟܳܡܷܣܬܰܥܡܠܝܠܶܗ. ܐܝܢܰܩܩܰܐ ܕܟܳܚܳܙܷܢ ܠܰܐܝܟܐ ܡܰܛܝ ܐܘ ܗܰܘܢܐ ܕܐܘ ܒܰܪܢܳܫܐ ܟܳܡܝܕܰܘܡܪܝ ܘܟܳܡܫܰܒܚܝ ܠܰܐܠܳܗܐ ܥܰܠ ܰܐܛ ܛܳܘܳܬ݂ܐ ܕܡܰܩܠܰܥܠܶܗ ܥܰܠ ܒܪܝܬ݂ܐ ܒܘ ܕܳܪܰܢܐ ܐܘ ܚܰܪܳܝܐ. ܘܟܷܐܡܡܝ ܒܰܐܠܳܗܐ ܒܪܝܬ݂ܐ ܒܰܣܝܡܐ، ܘܒܰܐ ܡܷܢ ܦܰܝܕܰܐ ܐܰܚܢܰܐ ܡܰܣܘܠܰܢ. ܡܶܩܷܡ ܒܥܷܣܪܝ ܐܷܫܢܶܐ، ܐܰܢ ܢܳܫܶܐ ܕܝ ܩܪܝܬ݂ܐ، ܟܘܠܠܶܗ ܠܷܬܡܝܘܰܐ ܠܰܫܰܢ ܕܰܡܥܰܘܢܝ ܚܕ݂ܳܕ݂ܶܐ ܘܕܙܰܘܢܷܢܢܶܗ ܬܪܰܟܬܳܪ ܠܘ ܫܘܓ݂ܠܐ ܕܝ ܩܪܝܬ݂ܐ. ܘܒܝ ܨܝܪܰܐ ܕܰܘܪܝܘܰܐ ܘܚܘܨܕܝܘܰܐ ܐܶܒܶܗ. ܐܰܘ ܟܷܬܘܰܐ ܚܰܐ ܡܝܢܝܒܘܣ ܒܝ ܩܪܝܬ݂ܐ ܠܘ ܡܰܙܠܐ ܘܠܘ ܡܰܬ݂ܝܐ ܠܡܷܕ݂ܝܰܕ݂. ܠܰܫܰܢ ܕܙܰܘܢܝ ܐܘ ܡܶܕܶܐ ܕܟܳܠܳܙܰܡܡܶܗ ܡܝ ܫܘܩܐ. ܘܚܰܐ ܬܶܠܶܦܘܢ ܒܘ ܒܰܝܬܐ ܕܘ ܡܘܟ݂ܬܰܪ ܠܰܫܰܢ ܕܡܷܔܓ݂ܳܠܝ. ܐܶܠܐ ܐܰܕܝܰܘܡܰܐ ܒܘ ܥܒܳܪܐ ܕܘ ܬܶܟܢܳܠܳܘܙ̰ܝ ܠܰܚ ܚܰܝܶܐ، ܓ݂ܰܠܰܒܶܐ ܡܰܝ ܝܰܩܪܳܬ݂ܶܐ ܟܷܬܬܶܗ ܠܪܘܚܰـܝـܝܶܗ ܬܪܰܟܬܳܪ ܩܘܡ ܐܘ ܬܰܪܥܰܬ݂ܬ݂ܶܗ. ܘܶܐܒܶܗ ܐܶܡܰܐ ܕܟܷܐܒܥܝ ܟܳܕܰܘܪܝ ܘܟܳܚܘܨܕܝ ܘܟܷܐܙܙܷܢ ܒܰܝܢ ܕܰܘ ܘܰܪܙܶܐ ܘܟܳܢܘܩܠܝ ܡܰܝܶܐ ܠܰܚ ܚܝܶܘܷܢܰܬ݂ܬ݂ܶܗ ܠܘ ܛܘܪܐ. ܘܟܷܬܬܶܗ ܣܬܶܐ ܟܘܠܠܶܗ ܒܰܒ ܒܳܬܰܬ݂ܬ݂ܶܗ ܬܶܠܶܦܙܝܳܘܢ ܘܬܶܠܶܦܘܢ ܘܐܝܢܬܶܪܢܶܬ. ܗܰܘܟ݂ܰܐ ܟܳܚܳܙܝܢܰܐ ܕܰܐܚ ܚܰܝܶܐ ܕܰܥ ܥܳܡܘܪܶܐ ܕܰܩ ܩܷܪܝܰܘܳܬ݂ܶܐ ܣܬܶܐ ܒܰܣܝܡܝ ܡܝ ܢܰܩܠܰܐ ܕܰܐܕܝܥܝ ܐܘ ܬܶܟܢܳܠܳܘܙ̰ܝ. ܐܶܠܐ ܡܶܐ ܓܰܒܐ ܚܪܶܢܐ ܠܰܝܒܰܢ ܕܡܰܢܟܪܝܢܰܐ ܐܝ ܟ݂ܣܰܪܰܐ ܣܬܶܐ ܕܗܰܘܝܠܶܗ ܘܕܟܷܬܠܶܗ ܓܰܘܳܢܳܐܝܬ݂ ܐܘ ܬܶܟܢܳܠܳܘܙ̰ܝ، ܘܕܝܠܳܢܳܐܝܬ݂ ܐܘ ܬܶܠܶܦܘܢ ܕܘ ܟܝܣܐ ܠܰܢ ܢܳܫܶܐ. ܠܓܳܪܰܢ ܕܰܝ ܝܰܕ݂ܘܥܬ݂ܳܢܶܐ ܟܳܠܳܙܰܡ ܕܐܘ ܒܰܪܢܳܫܐ ܙܷܬܬܷܪ ܡܶܐ ܚܰܡܷܫ ܩܰܛܝܢܳܬ݂ܶܐ، ܠܐ ܡܷܔܓ݂ܰܠ ܒܘ ܬܶܠܶܦܘܢ. ܥܰܠ ܕܐܘ ܪܰܕܝܰܣܝܳܘܢ ܕܟܝܬܐ ܒܘ ܬܶܠܶܦܘܢ ܟܳܡܰܕ݂ܷܪ ܓ݂ܰܠܰܒܶܐ ܠܘ ܚܘܠܡܳܢܐ ܕܘ ܒܰܪܢܳܫܐ. ܐܰܝ ܝܳܠܘܦܶܐ ܘܰܐܥ ܥܠܰܝܡܶܐ ܐܝܕ݂ܰܐ ܕܠܐ ܒܚܰܟܝܡܘܬ݂ܐ ܐܰܘ ܒܘ ܟܳܢܬܪܳܠ ܕܰܡ ܡܰܠܦܳܢܶܐ ܕܡܷܣܬܰܥܡܠܝܠܶܗ، ܟܳܡܰܫܰܦܥܝ ܐܘ ܙܰܒܢܰܬ݂ܬ݂ܶܗ ܟܘܠܠܶܗ ܐܶܒܶܗ ܘܠܐ ܟܳܩܳܪܷܢ ܒܰܗ ܗܶܪܓܰܬ݂ܬ݂ܶܗ. ܘܠܐ ܟܳܡܟܰܡܠܝ ܐܰܬ ܬܶܫܡܫܳܬ݂ܰܬ݂ܬ݂ܶܗ. ܘܠܐ ܟܳܫܘܓ݂ܠܝ. ܗܰܘܟ݂ܰܐ ܝܰܘܡܐ ܒܝܰܘܡܐ ܟܳܪܳܦܷܢ ܒܘ ܓܘܫܡܰܬ݂ܬ݂ܶܗ ܘܟܳܣܳܡܶܗ ܐܘ ܗܰܘܢܰܬ݂ܬ݂ܶܗ. ܘܠܐ ܟܳܡܷܟ݂ܠܳܛܝ ܒܘ ܟܶܢܫܐ. ܘܟܳܘܷܢ ܩܰܛܪܐ ܪܰܒܐ ܠܝ ܐܝܩܰܪܬ݂ܰܬ݂ܬ݂ܶܗ ܘܟܘܒܐ ܒܘ ܓܘܫܡܐ ܕܝ ܢܳܫܘܬ݂ܐ. ܒܘ ܫܷܟܷܠܰܢܐ ܨܷܢܥܰܬ ܓ݂ܰܠܰܒܶܐ ܕܡܝܣܳܡܝܘܰܐ ܒܰܢ ܐܝܕ݂ܳܬ݂ܶܐ، ܡܣܰܟܪܝ ܘܛܥܷܢ. ܡܶܩܷܡ ܐܰܟ ܟܰܬ݂ܳܘܶܐ، ܒܰܝ ܝܰܪܚܶܐ ܐܰܘ ܒܰܢ ܐܷܫܢܶܐ ܗܘܠ ܕܟܘܬ݂ܘܝܘܰܐ ܚܰܐ ܟܬ݂ܳܘܐ ܒܝ ܐܝܕ݂ܐ. ܐܝܢܰܩܠܰܗ ܕܷܡܟܰܡܠܝܘܰܝܠܶܗ، ܐܘ ܟܬ݂ܳܘܰܘܐ ܗܳܘܶܘܰܝܠܶܗ ܐܝܩܳܪܐ ܓ݂ܰܠܰܒܶܐ. ܘܰܐܟ ܟܰܬ݂ܳܘܶܐ ܡܷܦܨܳܚܝܘܰܐ ܓ݂ܰܠܰܒܶܐ ܒܝ ܟܬ݂ܰܘܬܰܝܕ݂ܶܗ ܥܰܠ ܕܡܷܪܫܰܡܘܰܐ ܐܷܫܡܰܝـܝܶܗ ܒܘ ܡܰܟܬܰܒܙܰܒܢܐ. ܗܰܘܟ݂ܰܐ ܟܘܬ݂ܘܝܘܰܐ ܒܝ ܚܰܪܰܝܬܰܝܕ݂ܶܗ: ܐܰܝܕܰܪܒܐ ܕܟܳܡܷܦܨܰܚ ܐܘ ܩܰܦ݁ܛܰܢ ܕܡܰܛܝܐ ܐܝ ܐܶܠܦܰܝܕ݂ܶܗ ܒܫܰܝܢܐ ܠܘ ܠܝܡܰܢ، ܗܰܘܟ݂ܰܐ ܟܳܡܷܦܨܰܚ ܐܘ ܟܰܬ݂ܳܘܐ ܒܘ ܣܶܪܛܐ ܚܰܪܳܝܐ ܕܘ ܟܬ݂ܳܘܰܝܕ݂ܶܗ. ܡܶܩܷܡ، ܠܐ ܐܰܘ ܘܰܪܩܶܐ ܘܠܐ ܐܰܪ ܪܝܫܰܝܰܬ ܘܠܐ ܐܝ ܚܷܒܪܐ ܡܝܩܰܦܝܳܘܰܐ. ܘܰܐܟ ܟܰܬ݂ܳܘܶܐ ܒܓ݂ܰܠܰܒܶܐ ܥܰܣܩܳܬ݂ܶܐ ܠܳܩܷܢܘܰܐ ܗܘܠ ܕܷܡܟܰܡܠܝܘܰܐ ܚܰܐ ܟܬ݂ܳܘܐ. ܐܶܠܐ ܟܳܚܳܙܝܢܰܐ ܒܷܬ݂ܷܪ ܡܶܐ ܕܥܰܒܷܪ ܐܘ ܬܶܟܢܳܠܳܘܙ̰ܝ ܠܰܥ ܥܝܕܳܬ݂ܐ ܘܠܰܕ ܕܰܝܪܶܐ، ܬܰܝـܝܡܐ ܐܝ ܨܷܢܥܰܐ ܕܝ ܟܬ݂ܰܘܬܐ ܘܗܰܘ ܢܳܫܐ ܟܳܟܳܬ݂ܰܘ ܒܝ ܐܝܕ݂ܐ. ܐܝܕ݂ܰܐ ܕܠܳܙܰܡ ܟܬ݂ܳܘܐ ܥܝܬܳܢܳܝܐ ܟ݂ܘܕ ܚܘܣܳܝܐ ܐܰܘ ܦܰܢܩܝܬ݂ܐ ܐܘ ܛܶܟܣܐ ܕܰܙܡܝܪܳܬ݂ܶܐ، ܟܳܡܷܟܬ݂ܳܘܝ ܒܘ ܟܳܡܦ݁ܝܘܬܶܪ. ܒܘ ܫܷܟܠܰܢܐ ܟܝܒܰܢ ܕܡܷܙܕܝܢܰܐ ܐܰܡ ܡܰܬ݂ܠܶܐ ܕܝ ܟ݂ܣܰܪܰܐ ܕܗܘܠܶܗ ܐܘ ܬܶܟܢܳܠܳܘܙ̰ܝ ܠܰܨ ܨܷܢܥܰܬ ܕܝ ܐܝܕ݂ܐ. ܐܰܕܝܰܘܡܐ ܥܰܠ ܕܰܐܟ ܟܶܦܶܐ ܟܳܡܷܩܛܳܥܝ ܒܰܡ ܡܰܟܝܢܰܬ ܘܟܳܡܝܢܰܩܫܝ، ܢܰܚܳܬܶܐ ܠܐ ܦܰܝܷܫ. ܐܘ ܣܶܡܐ ܘܐܘ ܕܰܗܘܐ ܟܳܡܝܣܳܡܝ ܒܰܡ ܡܰܟܝܢܰܬ. ܐܰܕ ܕܰܦܶܐ ܘܰܐܩ ܩܰܝܣܶܐ ܟܳܡܷܩܛܳܥܝ، ܘܒܰܡ ܡܰܟܝܢܰܬ ܟܳܡܝܣܳܡܝ ܐܰܬ ܬܰܪܥܶܐ ܘܰܐܔ ܔܰܡܰܬ ܘܰܐܟ ܟܘܪܶܣܝ ܘܰܐܡ ܡܰܣܰܬ. ܥܰܠ ܕܚܰܕ݂ܝܪܐ ܟܳܡܝܣܳܡܝ ܐܰܡ ܡܰܓܠܶܐ ܘܐܰܡ ܡܰܓܙܘܢܶܐ ܘܰܐܣ ܣܶܦܳܩܶܐ ܚܪܶܢܶܐ ܕܝ ܦܰܕܳܢܐ، ܚܰܕܳܕܶܐ ܠܐ ܦܰܝܷܫ. ܡܒܰܝܕ݂ܳܢܶܐ ܘܡܫܰܩܥܳܢܶܐ ܘܡܢܰܥܠܳܢܶܐ ܘܣܰܝܳܡܶܐ ܕܰܫ ܫܰܠܦܶܐ ܘܙܰܩܳܪܶܐ، ܗܰܘ ܟܳܚܳܙܝܢܰܐ ܠܐ ܒܝ ܫܘܩܐ ܕܡܷܕ݂ܝܰܕ݂ ܘܠܐ ܒܰܩ ܩܷܪܝܰܘܳܬ݂ܶܐ. ܡܰܠܦܳܢܐ ܫܷܟܪܝ ܐܰܩܛܰܫ 1603 ܡ̈ܠܐ.
