Šëkri Aqtaš: ܐܝ ܡܰܕܪܰܫܬܐ ܕܷܢܨܝܘܷܢ ܘܰܐܩ ܩܳܢܘܢܰܝܕ݂ܰܗ / I madrašto dë Nṣiwën w aq qonunayḏa

I madrašto dë Nṣiwën w aq qonunayḏa

ܩܰܕܝܫܐ ܡܳܪܝ ܝܰܥܩܘܒ، ܒܝ ܫܰܬܐ ܕܰܬܠܰܬ݂ܡܐ ܘܫ̰ܰܥ، ܗܰܘܝ ܚܰܣܝܐ ܠܷܢܨܝܘܷܢ ܐܝ ܘܰܠܰܝܶܐ. ܒܷܬ݂ܷܪ ܡܶܐ ܕܗܰܘܝ ܚܰܣܝܐ، ܣܷܡܠܶܗ ܫܘܫܳܛܶܐ ܪܰܒܶܐ ܒܷܢܨܝܘܷܢ ܡܘ ܓܰܒܐ ܕܘ ܝܘܠܦܳܢܐ ܘܕܝ ܡܰܪܕܘܬ݂ܐ ܘܕܘ ܡܰܟܬܰܒܙܰܒܢܐ. ܚܰܐ ܡܰܫ ܫܘܫܳܛܰܢܝ ܐܝ ܥܡܰܪܰܐ ܕܝ ܥܝܬܐ ܕܒܰܢܝܐ ܥܰܠ ܐܷܫܡܶܗ. ܘܐܘ ܚܪܶܢܐ ܣܬܶܐ، ܐܘ ܦܬܳܚܐ ܕܝ ܡܰܕܪܰܫܬܐ ܡܫܰܡܰܗܬܐ ܕܷܢܨܝܘܷܢ ܝܐ. ܘܰܠܰܘ ܢܰܦܝܠܝ ܗܷܢ ܡܰܒ ܒܶܢܝܳܢܶܐ ܕܓܰܒ ܐܝ ܥܝܬܐ، ܐܶܠܐ ܐܝ ܥܝܬܐ ܗܘܠ ܠܰܕܝܰܘܡܰܐ ܟܳܦܰܝܫܐ ܥܰܡܷܪܬܐ. ܒܷܬ݂ܷܪ ܡܶܐ ܕܡܝܕ ܕܰܤܛܷܪ ܡܝ ܘܰܙܝܪܘܬ݂ܐ ܕܝ ܡܰܪܕܘܬ݂ܐ ܕܬܘܪܟܝܝܰܐ، ܒܝ ܪܝܫܳܢܘܬ݂ܐ ܕܘ ܚܰܣܝܐ ܕܛܘܪܥܰܒܕܝܢ ܐܝ ܡܥܰܠܝܘܬ݂ܐ ܕܡܳܪܝ ܛܝܡܳܬ݂ܶܐܘܳܣ ܫܡܘܐܝܶܠ ܐܰܩܛܰܫ، ܡܝ ܫܰܬܐ ܕܰܬܪܰܠܦܐ ܗܘܠ ܠܰܕܝܰܘܡܰܐ ܟܝܬܐ ܫܘܓ݂ܠܐ ܘܢܰܕ݂ܰܦܰܐ ܒܝ ܕܷܪܬܰܝܕ݂ܰܗ ܘܚܶܕ݂ܳܪܰܗ. ܐܝܢܰܩܠܰܐ ܕܢܰܕ݂ܷܦ ܐܘ ܓܰܒܐ ܕܠܰܦ ܦܰܠܓܶܗ ܕܝܰܘܡܐ ܕܝ ܕܷܪܬܐ ܡܘ ܥܰܦܪܐ ܘܡܰܟ ܟܶܦܶܐ، ܢܰܦܝܩܝ ܐܰܫ ܫܘܪܳܢܶܐ ܘܩܷܫܬܳܬ݂ܶܐ ܥܰܬܝܩܶܐ ܕܝ ܥܝܬܐ ܕܟܷܬܢܶܗ ܐܰܟ ܟܶܦܰܬ݂ܬ݂ܶܗ ܟܘܠܠܶܗ ܪܰܒܶܐ ܘܡܢܰܩܫܶܐ. ܟܳܦܰܝܫܐ ܒܰܬܚܘܡܶܐ ܕܝ ܡܰܪܥܝܬ݂ܐ ܕܛܘܪܥܰܒܕܝܢ. ܘܐܘ ܫܘܟܳܢܐ ܕܝ ܕܰܝܪܐ ܕܡܳܪܝ ܓܰܒܪܺܐܝܶܠ ܟܳܡܕܰܒܰܪܠܰܗ. ܩܰܕܝܫܐ ܡܳܪܝ ܝܰܥܩܘܒ، ܐܝܢܰܩܠܰܐ ܕܰܐܙܙܶܗ ܠܝ ܣܘܢܢܰܕܘܣ ܕܠܰܬܝܡܐ ܒܢܝܩܝܝܰܐ ܒܝ ܫܰܬܐ ܕܰܬܠܰܬ݂ܡܐ ܘܚܰܡܷܫ ܘܥܷܣܪܝ، ܡܳܒܶܠܶܗ ܐܰܥܡܶܗ ܡܳܪܝ ܐܰܦܪܶܝܡ ܣܬܶܐ. ܠܓܳܪܰܢ ܕܘ ܟܰܬ݂ܳܘܐ ܣܘܪܝܳܝܐ ܒܰܪ ܚܰܕ݂ܒܫܰܒܐ، ܒܷܬ݂ܷܪ ܡܶܐ ܕܕܰܥܝܪܝ ܡܳܪܝ ܝܰܥܩܘܒ ܘܡܳܪܝ ܐܰܦܪܶܝܡ ܡܝ ܣܘܢܢܰܕܘܣ، ܡܳܪܝ ܝܰܥܩܘܒ ܦܬܷܚܠܶܗ ܐܝ ܡܰܕܪܰܫܬܐ ܕܷܢܨܝܘܷܢ ܘܡܰܚܰܬܠܶܗ ܡܳܪܝ ܐܰܦܪܶܝܡ ܡܰܠܦܳܢܐ ܐܶܒܰܗ. ܡܳܪܝ ܐܰܦܪܶܝܡ ܗܰܡ ܡܳܠܰܦܠܶܗ ܗܰܡ ܣܬܶܐ ܡܕܰܒܰܪܠܶܗ ܐܝ ܡܰܕܪܰܫܬܐ ܬܡܳܢܶܐ ܘܬܠܶܬ݂ܝ ܐܷܫܢܶܐ. ܒܷܬ݂ܷܪ ܡܶܐ ܕܷܢܨܝܘܷܢ ܦܰܐܝܫܐ ܬܰܚܬ ܐܝ ܫܘܠܛܳܢܘܬ݂ܐ ܕܰܦ ܦܳܪܣܳܝܶܐ، ܡܳܪܝ ܐܰܦܪܶܝܡ ܥܰܡ ܡܰܠܦܳܢܶܐ ܚܪܶܢܶܐ ܘܥܰܡܐ ܓ݂ܰܠܰܒܶܐ، ܒܝ ܫܰܬܐ ܕܰܬܠܰܬ݂ܡܐ ܘܬܠܰܬ݂ ܘܐܷܫܬܝ، ܥܰܪܝܩܝ ܘܰܐܙܙܷܢ ܗܷܢ ܡܷܢܢܶܗ ܠܕܝܝܰܪܒܰܟܷܪ ܘܗܷܢ ܡܷܢܢܶܗ ܡܰܛܷܢ ܠܐܘܪܗܝ. ܐܘ ܠܶܫܳܢܐ ܪܘܫܡܳܝܐ ܕܝ ܡܰܕܪܰܫܬܐ ܕܷܢܨܝܘܷܢ ܣܘܪܝܳܝܳܘܰܐ. ܐܶܠܐ ܡܝܬܰܘܠܰܦܘܰܐ ܠܶܫܳܢܐ ܝܰܘܢܳܝܐ ܣܬܶܐ. ܐܝ ܡܰܕܪܰܫܬܐ ܕܷܢܨܝܘܷܢ، ܟ݂ܘܕ ܟܘܟܘܐ ܒܰܗܘܪܐ ܡܰܒܗܰܪܠܰܗ ܥܰܠ ܐܝ ܣܶܦܪܳܝܘܬ݂ܐ ܘܥܰܠ ܐܝ ܡܰܪܕܘܬ݂ܐ ܣܘܪܝܳܝܬܐ. ܘܢܰܦܝܩܝ ܡܝܢܰܐ ܝܳܠܘܦܶܐ ܓ݂ܰܠܰܒܶܐ ܝܰܠܝܦܶܐ ܘܢܰܗܝܪܶܐ ܕܷܟ݂ܕܷܡܡܶܗ ܐܝ ܥܝܬܐ ܘܐܘ ܠܶܫܳܢܐ ܣܘܪܝܳܝܐ ܒܘ ܙܰܒܢܐ ܕܝ ܛܳܥܝܘܬ݂ܐ ܘܕܝ ܚܰܢܦܘܬ݂ܐ. ܡܰܘܟ݂ܰܐ ܐܝ ܡܕ݂ܝܬܐ ܕܷܢܨܝܘܷܢ ܣܬܶܐ ܟܳܡܝܕ݂ܳܥܐ ܐܝ ܕܰܪܓܷܫܬܐ ܕܘ ܝܘܠܦܳܢܐ ܘܐܝ ܡܕ݂ܝܬܐ ܕܝ ܐܝܕ݂ܰܥܬ݂ܐ ܘܐܝ ܐܶܡܐ ܕܰܡ ܡܰܠܦܳܢܶܐ ܘܝܰܕ݂ܘܥܬ݂ܳܢܶܐ. ܘܥܰܠ ܕܟܳܦܰܝܫܐ ܒܘ ܬܚܘܡܐ ܕܬܘܪܟܝܝܰܐ ܘܣܘܪܝܝܰܐ، ܟܳܡܝܬܰܘܡܰܪܠܰܗ ܣܬܶܐ ܐܝ ܡܕ݂ܝܬܐ ܕܰܬ ܬܚܘܡܶܐ. ܐܘ ܛܘܟܳܣܐ ܕܰܩ ܩܝܢܳܬ݂ܶܐ ܕܝ ܥܝܬܐ ܣܘܪܝܳܝܬܐ ܕܟܳܡܕܰܘܰܡ ܗܘܠ ܠܰܕܝܰܘܡܰܐ ܒܘ ܙܰܒܢܐ ܕܡܳܪܝ ܐܰܦܪܶܝܡ ܘܒܝ ܡܰܕܪܰܫܬܰܬ݂ܶܐ ܡܬܰܚܰܬ. ܐܘ ܩܰܕܝܫܐ ܡܳܪܝ ܐܰܦܪܶܝܡ ܩܰܝܷܡ ܡܩܰܒܷܠ ܕܒܰܪܕܰܝܨܰܢ ܐܘ ܦܝܠܳܣܘܦܐ ܘܰܐܚ ܚܰܘܪܳܢܰܝܕ݂ܶܗ، ܘܡܰܥܒܰܪܠܶܗ ܐܘ ܡܘܣܝܩܝ ܘܰܐܩ ܩܝܢܳܬ݂ܶܐ ܠܝ ܥܝܬܐ. ܘܛܪܶܠܶܗ ܕܰܐܒ ܒܢܳܬ݂ܶܐ ܡܰܝܕܝ ܕܘܟܬ݂ܐ ܥܰܠ ܐܝ ܓܘܕܐ ܒܝ ܨܠܘܬ݂ܐ. ܐܘ ܛܘܟܳܣܰܐ ܢܐ ܕܰܩ ܩܝܢܳܬ݂ܶܐ ܟܳܡܕܰܘܰܡ ܗܘܠ ܠܰܕܝܰܘܡܰܐ ܒܝ ܥܝܬܐ. ܘܓ݂ܰܠܰܒܶܐ ܡܰܨܠܰܘܳܬ݂ܶܐ ܘܡܰܒ ܒܳܥܘܳܬ݂ܶܐ ܕܝ ܥܝܬܐ، ܕܡܳܪܝ ܐܰܦܪܶܝܡ ܢܶܐ. ܟܬ݂ܘܠܶܗ ܣܬܶܐ ܡܝܡܪܶܐ ܕܠܐ ܡܷܢܝܳܢܐ. ܘܡܫܰܢܶܠܶܗ ܒܝ ܫܰܬܐ ܕܰܬܠܰܬ݂ܡܐ ܘܬܠܰܬ݂ ܘܫܰܘܥܝ. ܡܬܰܚܰܬ ܐܘ ܦܰܓ݂ܪܰܝܕ݂ܶܗ ܒܐܘܪܗܳܝ ܒܷܚܕ݂ܐ ܕܰܝܪܐ. ܐܶܠܐ ܐܰܕܝܰܘܡܰܐ ܠܐ ܐܝ ܕܰܝܪܐ ܘܠܐ ܐܘ ܦܰܓ݂ܪܰܝܕ݂ܶܗ ܟܳܡܝܕ݂ܰܥ ܐܰܝܟܳܐ ܝܐ. ܐܰܩ ܩܳܢܘܢܶܐ ܕܝ ܡܰܕܪܰܫܬܐ ܕܷܢܨܝܘܷܢ؛ ܒܷܬ݂ܷܪ ܡܶܐ ܕܡܰܚܬܝ ܐܰܩ ܩܳܢܘܢܶܐ ܒܝ ܡܰܕܪܰܫܬܐ، ܟܘܠ ܢܳܫܐ ܪܚܷܡܠܶܗ ܘܡܘܰܨܰܦܠܶܗ ܐܘ ܛܘܟܳܣܐ ܕܝ ܡܰܕܪܰܫܬܐ. ܐܷܫܡܰܗ ܕܝ ܡܰܕܪܰܫܬܐ ܠܐ ܒܘ ܡܰܕܢܚܐ ܠܚܘܕ݂ܶܐ ܫܡܝܥܘܰܐ، ܐܶܠܐ ܦܪܝܣܘܰܐ ܒܷܒܪܝܬ݂ܐ ܟܘܠܰܗ. ܐܳܬ݂ܷܢܘܰܐ ܝܳܠܘܦܶܐ ܡܰܢ ܐܰܪܒܰܥ ܟ݂ܰܣܰܘܷܪ ܕܷܒܪܝܬ݂ܐ ܕܩܳܪܷܢ ܘܝܘܠܦܝ ܒܝ ܡܰܕܪܰܫܬܰܬ݂ܶܐ ܬܶܐܳܘܠܳܘܓ݂ܝ، ܕܳܟܬܳܘܪܝܝܶܐ، ܦܰܠܣܰܦܶܐ، ܡܰܢܛܷܩ، ܣܶܦܪܳܝܘܬ݂ܐ، ܓܶܐܘܳܡܰܛܪܝ، ܐܰܣܬܪܳܢܳܘܡܝ ܘܟܝܢܘܬ݂ܐ. ܩܳܢܘܢܐ ܐ. ܒܘ ܩܰܪܰܪ ܕܘ ܡܕܰܒܪܳܢܐ ܘܕܰܡ ܡܥܰܘܢܳܢܰܝܕ݂ܶܗ، ܓܡܝܢܰܩܶܐ ܡܕܰܒܪܳܢܐ ܚܰܬ݂ܐ ܠܝ ܡܰܕܪܰܫܬܐ. ܒܘ ܓܘܒܳܝܐ ܠܳܐ ܟܳܘܶܐ ܕܢܳܫܐ ܣܳܝܰܡ ܦܘܪܫܳܢܐ. ܐܰܝܢܰܐ ܕܣܳܝܰܡ ܓܡܝܔܰܙܶܐ. ܕܠܳܙܰܡ ܓܡܝܚܰܠܰܩ ܡܝ ܡܰܕܪܰܫܬܐ ܐܘ ܡܝ ܘܰܠܰܝܶܐ. ܩܳܢܘܢܐ ܒ. ܐܰܝܢܰܐ ܕܡܝܢܰܩܶܐ ܠܝ ܡܕܰܒܪܳܢܘܬ݂ܐ، ܠܳܐ ܟܳܘܶܐ ܕܣܳܝܰܡ ܦܘܪܫܳܢܐ ܒܰܝܢ ܕܰܝ ܝܳܠܘܦܶܐ ܐܰܘ ܕܰܡ ܡܰܠܦܳܢܶܐ. ܘܟܳܠܳܙܰܡ ܕܷܡܕܰܒܰܪ ܐܝ ܡܰܕܪܰܫܬܐ ܐܝܢܰܩܩܰܐ ܕܷܡܫܰܘܰܪ ܒܰܡ ܡܕܰܒܪܳܢܐ ܚܪܶܢܶܐ. ܡܰܢ ܕܣܳܝܰܡ ܦܰܘܕܐ ܣܬܶܐ، ܕܠܐ ܡܝܫܰܘܰܪ ܩܰܡܰܝܬܐ ܒܘ ܡܕܰܒܪܳܢܐ ܘܒܰܡ ܡܥܰܘܢܳܢܰܝܕ݂ܶܗ، ܠܳܐ ܟܳܘܶܐ ܕܡܝܔܰܙܶܐ. ܐܘ ܡܕܰܒܪܳܢܐ ܟܝܒܶܗ ܩܳܛܰܥ ܘܳܐܒܶܐ ܔܷܙܰܐ، ܒܷܬ݂ܷܪ ܡܶܐ ܕܷܡܫܰܘܰܪ ܒܘ ܡܰܘܬܒܐ ܕܝ ܡܰܕܪܰܫܬܐ. ܩܳܢܘܢܐ ܓ. ܐܰܕ ܕܰܝܪܳܝܶܐ ܕܟܳܐܬ݂ܷܢ ܠܘ ܝܘܠܦܳܢܐ ܠܝ ܡܰܕܪܰܫܬܐ، ܒܷܬ݂ܷܪ ܡܶܐ ܕܷܒܕܰܠܠܶܗ ܗܰܟܟܰܐ ܕܛܳܪܷܢ ܡܘ ܝܘܠܦܳܢܐ ܐܘ ܕܣܰܝܡܝ ܚܛܝܬ݂ܐ ܟܷܕ ܐܝ ܙܳܢܝܘܬ݂ܐ ܐܘ ܓܢܳܘܐ ܐܘ ܚܰܪܫܶܐ. ܐܘ ܕܢܷܦܩܝ ܠܰܪܘܰܠ ܡܝ ܗܰܝܡܳܢܘܬ݂ܐ. ܐܰܘ ܣܬܶܐ ܕܣܰܝܡܝ ܦܷܛܢܰܐ ܘܦܠܝܓ݂ܘܬ݂ܐ ܒܰܝܢ ܕܘ ܥܰܡܐ، ܟܳܠܳܙܰܡ ܕܡܝܬܰܘܦܩܝ ܡܝ ܡܰܕܪܰܫܬܐ ܘܚܰܬܬܰܐ ܡܝ ܘܰܠܰܝܶܐ. ܩܳܢܘܢܐ ܕ. ܕܠܐ ܡܘ ܟ݂ܰܒܪܐ ܕܘ ܡܕܰܒܪܳܢܐ ܘܕܰܕ ܕܰܝܪܳܝܶܐ، ܠܰܝܬܐ ܕܰܤܛܷܪ ܠܰܝ ܝܳܠܘܦܶܐ ܕܝ ܡܰܕܪܰܫܬܐ ܕܫܷܦܥܝ ܠܘ ܓܰܒܐ ܕܰܪ ܪܘܡܳܝܶܐ ܠܰܫܰܢ ܐܘ ܙܘܳܢܐ ܘܙܶܒܳܢܐ. ܐܰܘ ܠܰܫܰܢ ܐܝ ܨܠܘܬ݂ܐ ܐܘ ܣܬܶܐ ܠܰܫܰܢ ܐܘ ܝܘܠܦܳܢܐ. ܐܝܕ݂ܰܐ ܕܠܐ ܕܰܤܛܷܪ ܕܫܷܦܥܝ ܠܘ ܓܰܒܐ ܚܪܶܢܐ، ܟܳܠܳܙܰܡ ܕܠܐ ܡܝܬܰܩܰܒܠܝ ܢܰܩܠܰܐ ܚܪܶܬܐ ܒܰܝܢ ܕܘ ܥܰܡܐ. ܚܰܬܬܰܐ ܐܰܩ ܩܳܢܘܢܶܐ ܕܝ ܡܰܕܪܰܫܬܐ، ܡܩܰܒܷܠ ܕܘ ܣܝܳܡܐ ܕܝ ܬܷܔܔܰܪܰܐ ܢܶܐ ܣܬܶܐ. ܐܘ ܚܰܐ ܕܷܚܕ݂ܐ ܢܰܩܠܰܐ ܐܷܙܙܷܗ ܠܰܫܰܢ ܕܷܡܨܰܠܶܐ ܐܰܘ ܕܝܳܠܰܦ، ܒܷܬ݂ܷܪ ܡܶܐ ܕܡܷܙܒܰܛ، ܓܡܝܘܰܒܰܟ݂. ܒܫܰܪܛ ܕܢܰܩܩܰܐ ܚܪܶܬܐ ܕܠܷܐܙܙܶܗ ܓܡܝܥܰܦܶܐ ܘܓܡܝܬܰܩܒܰܠ. ܩܳܢܘܢܐ ܗ. ܠܰܝܬܐ ܕܰܤܛܷܪ ܠܰܝ ܝܳܠܘܦܶܐ ܐܝܢܰܩܠܰܐ ܕܟܷܬܝܐ ܐܝ ܡܰܕܪܰܫܬܐ ܦܬܷܚܬܐ، ܕܫܘܓ݂ܠܝ ܐܘ ܕܝܘܠܦܝ ܨܷܢܥܰܐ ܒܕܘܟܬ݂ܐ ܚܪܶܬܐ. ܐܶܠܐ ܐܝܢܰܩܠܰܐ ܕܡܷܣܟ݂ܳܪܐ ܐܝ ܡܰܕܪܰܫܬܐ ܝܰܢܝ ܡܶܐ ܪܝܫܶܗ ܕܘ ܝܰܪܚܐ ܕܰܬܡܰܢܝܐ ܗܘܠ ܠܝ ܚܰܪܰܝܬܐ ܕܘ ܝܰܪܚܐ ܕܰܥ ܥܶܣܪܐ، ܟܷܐܦ݁ܦ݁ܶܗ ܢܷܦܩܝ ܠܰܪܘܰܠ ܡܶܐ ܢܨܝܘܷܢ ܘܙܰܘܢܝ ܐܘ ܡܶܕܶܐ ܕܟܷܐܒܥܝ. ܐܰܡ ܡܰܠܦܳܢܶܐ ܣܬܶܐ ܒܓܰܘܶܗ ܕܰܬ ܬܠܳܬ݂ܐ ܝܰܪܚܰܢܝ ܟܷܐܦ݁ܦ݁ܶܗ ܕܫܘܓ݂ܠܝ ܒܫܘܓ݂ܠܳܢܶܐ ܒܓܰܘܰܗ ܕܝ ܘܰܠܰܝܶܐ. ܒܫܰܪܛ ܕܐܘ ܫܘܓ݂ܠܐ ܕܣܰܝܡܝ ܡܰܠܷܩ ܠܝ ܨܷܢܥܰܬ݂ܬ݂ܶܗ. ܩܳܢܘܢܐ ܘ. ܐܘ ܡܕܰܒܪܳܢܐ ܕܝ ܡܰܕܪܰܫܬܐ، ܕܠܳܘܶܐ ܐܰܥܡܶܗ ܬܪܶܐ ܐܰܘ ܬܠܳܬ݂ܐ ܣܳܗܕܶܐ، ܠܰܬܠܶܗ ܕܰܤܛܷܪ ܕܡܰܟ݂ܪܰܔ ܐܰܟ ܟܰܠܰܘܰܬ ܕܝ ܡܰܕܪܰܫܬܐ. ܐܰܝ ܝܳܠܘܦܶܐ ܣܬܶܐ ܕܟܷܬܬܷܗ ܟܰܠܰܘܰܬ ܓ݂ܰܠܰܒܶܐ، ܠܰܬܬܶܗ ܕܰܤܛܷܪ ܕܳܐܒܷܢ ܐܰܟ ܟܰܠܰܘܰܬ݂ܬ݂ܶܗ ܒܘ ܣܰܠܰܦ. ܥܰܠ ܕܐܰܩ ܩܳܢܘܢܶܐ ܕܝ ܥܝܬܐ ܡܩܰܒܷܠ ܕܘ ܣܰܠܰܦ ܢܶܐ. ܩܳܢܘܢܐ ܙܙ. ܕܠܐ ܡܘ ܟ݂ܰܒܪܐ ܕܘ ܡܕܰܒܪܳܢܐ ܘܕܰܡܥܰܘܢܳܢܰܝܕ݂ܶܗ، ܠܳܐ ܟܳܘܶܐ ܕܡܝܩܰܝܕܝ ܝܳܠܘܦܶܐ ܚܰܬ݂ܶܐ ܒܝ ܡܰܕܪܰܫܬܐ. ܒܷܬ݂ܷܪ ܡܶܐ ܕܡܝܩܰܝܕܝ، ܓܡܝܬܰܘܠܦܝ ܕܡܰܛܝܥܝ ܘܕܷܡܝܰܩܪܝ ܠܰܩ ܩܳܢܘܢܶܐ ܕܝ ܡܰܕܪܰܫܬܐ. ܩܳܢܘܢܐ ܚ. ܠܰܪܘܰܠ ܡܰܣ ܣܰܒܰܒܶܐ ܕܟܷܬܢܶܗ ܓ݂ܰܠܰܒܶܐ ܡܘܗܝܡ، ܠܳܐ ܟܳܘܶܐ ܕܰܝ ܝܳܠܘܦܶܐ ܪܘܚܩܝ ܘܛܳܪܷܢ ܡܘ ܝܘܠܦܳܢܐ. ܩܳܢܘܢܐ ܛ. ܐܰܝ ܝܳܠܘܦܶܐ، ܒܷܬ݂ܷܪ ܡܶܐ ܕܩܳܪܷܢ ܐܰܡ ܡܰܙܡܘܪܶܐ ܒܝ ܨܠܘܬ݂ܐ ܕܘ ܣܘܬܳܪܐ، ܓܷܙܙܷܢ ܠܰܩ ܩܶܠܳܝܳܬ݂ܰܬ݂ܬ݂ܶܗ ܕܘ ܕܡܳܟ݂ܐ. ܨܰܦܪܰܝܬܐ ܣܬܶܐ ܚܶܠܳܝܐ ܟܘܠܠܶܗ ܓܩܰܝܡܝ ܘܓܚܘܕ݂ܪܝ ܒܝ ܥܝܬܐ. ܢܳܫܐ ܡܶܐ ܥܰܨܪܝܝܶܐ ܠܷܓܙܳܒܰܬܠܶܗ ܕܘܟܬ݂ܐ ܒܝ ܥܝܬܐ. ܐܝ ܨܝܪܰܐ ܩܰܡܰܝܬܐ ܒܝ ܥܝܬܐ، ܟܘܠܢܰܩܩܰܐ ܕܰܟ ܟܳܗܢܶܐ ܝܐ. ܩܳܢܘܢܐ ܝ. ܥܰܠ ܕܟܘܠ ܝܳܠܘܦܐ ܟܷܬܠܶܗ ܩܶܠܰܝܬܐ ܠܪܘܚܶܗ، ܟܳܠܳܙܰܡ ܟܘܠ ܚܰܐ ܕܕܳܡܰܟ݂ ܒܝ ܩܶܠܰܝܬܰܝܕ݂ܶܗ. ܠܐ ܟܳܘܶܐ ܕܷܬ ܬܪܶܐ ܝܳܠܘܦܶܐ ܕܷܡܟ݂ܝ ܒܩܶܠܰܝܬܐ ܚܕ݂ܐ. ܩܳܢܘܢܐ ܝܐ. ܐܝܢܰܩܩܰܐ ܕܚܰܐ ܡܰܝ ܝܳܠܘܦܶܐ ܕܟܳܝܰܘܠܶܗ، ܟܳܠܳܙܰܡ ܕܰܚܪܶܢܶܐ ܡܥܰܘܢܝܠܶܗ ܘܗܳܘܷܢܠܶܗ ܡܳܪܐ ܗܘܠ ܕܢܳܝܰܚܠܶܗ. ܩܳܢܘܢܐ ܝܒ. ܐܝܢܰܩܩܰܐ ܕܗܳܘܶܐ ܩܰܛܪܐ ܒܰܝܢ ܕܷܬ ܬܪܶܐ ܝܳܠܘܦܶܐ، ܕܠܐ ܡܘ ܟ݂ܰܒܪܐ ܕܘ ܡܕܰܒܪܳܢܐ ܠܐ ܟܳܘܶܐ ܕܷܐܙܙܷܢ ܠܘ ܒܶܝܬ݂ܕܝܢܐ ܢܘܟ݂ܪܳܝܐ. ܐܘ ܚܰܐ ܕܕܳܝܰܫ ܐܘ ܩܳܢܘܢܰܐ ܢܐ؛ ܟܳܠܳܙܰܡ ܕܡܝܚܰܠܰܩ ܡܝ ܡܰܕܪܰܫܬܐ ܘܡܝܬܰܘܦܰܩ ܡܝ ܘܰܠܰܝܶܐ. ܩܳܢܘܢܐ ܝܓ. ܐܘ ܝܳܠܘܦܐ ܕܠܐ ܩܳܪܶܐ ܘܡܳܦܰܩ ܩܰܛܪܶܐ ܒܝ ܡܰܕܪܰܫܬܐ؛ ܓܡܝܬܰܘܦܰܩ ܗܰܡ ܡܝ ܡܰܕܪܰܫܬܐ ܗܰܡ ܣܬܶܐ ܡܝ ܘܰܠܰܝܶܐ. ܩܳܢܘܢܐ ܝܕ. ܐܘ ܚܰܐ ܕܚܳܙܶܐ ܡܶܕܶܐ ܡܣܰܟܪܐ ܘܠܐ ܡܰܣܠܰܡܠܶܗ ܠܘ ܡܕܰܒܪܳܢܐ، ܐܰܘ ܐܘ ܚܰܐ ܕܡܳܝܰܕ ܟܬ݂ܳܘܐ ܐܰܡܰܢܶܐ ܡܘ ܡܕܰܒܪܳܢܐ ܘܠܐ ܡܰܕܥܰܪܠܶܗ، ܓܡܝܔܰܙܶܐ ܘܓܡܝܬܰܘܦܰܩ ܡܝ ܘܰܠܰܝܶܐ. ܩܳܢܘܢܐ ܝܗ. ܐܘ ܝܳܠܘܦܐ ܕܣܷܡܠܶܗ ܦܰܘܕܐ، ܒܷܬ݂ܷܪ ܡܶܐ ܕܡܝܘܰܒܰܟ݂ ܡܶܐ ܝܳܠܘܦܐ ܚܪܶܢܐ ܕܠܐ ܡܰܢܕܰܡ ܘܛܳܠܰܒ ܫܘܒܩܳܢܐ، ܐܰܘ ܕܝܣܰܐ ܕܣܳܝܰܡ ܦܰܘܕܐ، ܟܳܠܳܙܰܡ ܕܐܘ ܝܳܠܘܦܐ ܕܷܡܘܰܒܰܟ݂ܠܶܗ ܘܡܰܘܕܰܥ ܐܘ ܡܶܕܶܐ ܕܣܷܡܠܶܗ ܠܘ ܡܕܰܒܪܳܢܐ. ܐܝܕ݂ܰܐ ܕܠܐ ܡܰܘܕܰܥܠܶܗ، ܒܷܬ݂ܷܪ ܡܶܐ ܕܡܷܫܡܳܥܐ ܐܝ ܨܒܘܬ݂ܐ ܗܝܝܶܗ ܣܬܶܐ ܓܡܝܔܰܙܶܐ ܟ݂ܘܕ ܐܘ ܝܳܠܘܦܰܘܐ ܕܣܷܡܠܶܗ ܐܘ ܦܰܘܕܐ. ܩܳܢܘܢܐ ܝܙܙ. ܐܘ ܝܳܠܘܦܐ ܕܡܰܫܟܶܐ ܥܰܠ ܡܶܕܶܐ ܘܠܐ ܩܳܕܰܪ ܕܷܡܫܰܪܰܪ ܐܝ ܫܟܘܘܰܝܕ݂ܶܗ، ܓܡܝܔܰܙܶܐ ܥܰܠ ܐܰܕ ܕܘܓܠܶܐ ܕܷܡܕܰܓܶܠܶܗ. ܩܳܢܘܢܐ ܝܘ. ܐܘ ܝܳܠܘܦܐ ܕܟܳܝܰܘܠܶܗ ܟܶܘܐ ܕܘ ܡܰܘܬܐ، ܐܝܕ݂ܰܐ ܕܛܳܪܶܐ ܘܰܨܝܝܶܐ ܠܘ ܡܕܰܒܪܳܢܐ ܘܠܰܡ ܡܰܠܦܳܢܶܐ، ܓܡܝܬܰܩܰܒܠܐ ܐܝ ܘܰܨܝܝܰܝܕ݂ܶܗ. ܐܝܕ݂ܰܐ ܕܠܘܝܐ ܐܝ ܘܰܨܝܝܶܐ ܩܘܡ ܐܘ ܡܕܰܒܪܳܢܐ ܠܷܓܡܝܬܰܩܰܒܠܐ. ܘܐܘ ܡܰܠܰܝܕ݂ܶܗ ܟܘܠܶܗ ܓܡܝܬܰܗܘܶܐ ܠܝ ܡܰܕܪܰܫܬܐ. ܩܳܢܘܢܐ ܝܚ. ܐܘ ܝܳܠܘܦܐ، ܒܡܷܢ ܣܰܒܰܦ݁ ܕܷܡܨܰܥܰܪ ܐܘ ܕܡܳܚܶܐ ܠܝܳܠܘܦܐ ܚܪܶܢܐ، ܓܡܝܘܰܒܰܟ݂ ܡܰܝ ܝܳܠܘܦܶܐ ܚܰܕ݂ܝܪܶܐ ܘܓܡܝܔܰܙܶܐ ܩܘܡ ܐܘ ܥܰܡܐ. ܩܳܢܘܢܐ ܝܛ. ܐܘ ܝܳܠܘܦܐ ܕܡܝܔܰܙܶܐ ܡܘ ܥܰܡܐ ܬܠܰܬ݂ ܟܳܪܶܐ ܥܰܠ ܣܘܔ ܕܣܷܡܠܶܗ، ܕܝܣܰܐ ܕܷܡܕܰܘܰܡ ܘܕܚܳܛܶܐ ܓܡܝܔܰܙܶܐ ܘܓܡܝܬܰܘܦܰܩ ܗܰܡ ܡܝ ܡܰܕܪܰܫܬܐ ܗܰܡ ܣܬܶܐ ܡܝ ܘܰܠܰܝܶܐ. ܩܳܢܘܢܐ ܟ. ܐܰܡ ܡܰܠܦܳܢܶܐ، ܕܠܐ ܡܘ ܕܰܤܛܷܪ ܕܘ ܡܕܰܒܪܳܢܐ ܐܰܘ ܝܰܘܡܐ ܕܗܳܘܷܢ ܟܰܐܝܘܶܐ، ܐܝܕ݂ܰܐ ܕܠܐ ܡܷܠܦܝ ܟܳܠܳܙܰܡ ܕܡܝܔܰܙܷܢ ܘܡܷܩܛܰܥ ܡܘ ܡܥܰܫܰܬ݂ܬ݂ܶܗ. ܩܳܢܘܢܐ ܟܐ. ܐܘ ܝܳܠܘܦܐ ܕܣܳܝܰܡ ܦܰܘܕܐ ܐܰܘ ܣܘܔ، ܓܡܝܙܰܗܰܪ ܬܠܰܬ݂ ܟܳܪܶܐ ܡܘ ܪܝܫܐ ܘܡܘ ܡܰܘܬܒܐ ܕܝ ܡܰܕܪܰܫܬܐ. ܐܝܕ݂ܰܐ ܕܝܣܰܐ ܕܣܳܝܰܡ ܐܘ ܦܰܘܕܰܘܐ، ܓܡܝܔܰܙܶܐ. ܒܷܬ݂ܷܪ ܡܶܐ ܕܷܡܔܰܙܶܐ ܕܠܐ ܡܰܩܒܰܠ ܐܝ ܔܷܙܰܝܕ݂ܶܗ ܘܡܰܥܒܰܪ ܢܳܫܶܐ ܡܶܐ ܠܰܪܘܰܠ ܒܝ ܡܰܣܰܠܶܐ، ܐܝܕ݂ܰܐ ܐܘ ܦܰܘܕܰܝܕ݂ܶܗ ܕܗܳܘܶܐ ܢܰܥܝܡܐ ܣܬܶܐ، ܗܰܘ ܟܳܘܶܐ ܕܡܝܥܰܦܶܐ. ܐܝܕ݂ܰܐ ܕܠܳܙܰܡ ܓܡܝܚܰܠܰܩ ܡܝ ܡܰܕܪܰܫܬܐ ܘܓܡܝܬܰܘܦܰܩ ܡܝ ܘܰܠܰܝܶܐ. ܩܳܢܘܢܐ ܟܒ. ܐܘ ܡܕܰܒܪܳܢܐ ܕܝ ܡܰܕܪܰܫܬܐ، ܠܰܬܠܶܗ ܕܰܤܛܷܪ ܕܷܡܕܰܒܰܪ ܐܝ ܡܰܕܪܰܫܬܐ ܠܰܪܘܰܠ ܡܰܩ ܩܳܢܘܢܰܢܝ. ܐܝܕ݂ܰܐ ܕܢܳܦܰܩ ܠܰܪܘܰܠ ܡܰܩ ܩܳܢܘܢܶܐ ܕܟܷܬܢܶܐ ܡܛܰܟܣܶܐ، ܓܡܝܔܰܙܶܐ ܒܷܥܣܰܪ ܠܝܪܰܬ ܕܘ ܕܰܗܘܐ. ܘܓܡܝܚܰܩܰܪ ܩܘܡ ܐܘ ܥܰܡܐ ܘܓܡܝܬܰܘܦܰܩ ܡܝ ܘܰܠܰܝܶܐ. ܚܰܣܝܐ ܒܰܪܨܰܘܡܐ ܐܘ ܚܰܘܪܐ ܕܢܰܣܛܘܪ ܘܰܐ. ܐܝܢܰܩܠܰܐ ܕܗܰܘܝ ܚܰܣܝܐ ܠܷܢܨܝܘܷܢ، ܡܰܡܛܶܠܶܗ ܢܰܪܣܰܝ ܠܷܢܨܝܘܷܢ ܕܟܷܬܘܰܐ ܐܘ ܡܕܰܒܪܳܢܐ ܕܝ ܡܰܕܪܰܫܬܐ ܕܐܘܪܗܳܝ. ܘܥܰܡ ܚܕ݂ܳܕ݂ܶܐ ܦܬܷܚܚܶܗ ܕܝܣܰܐ ܐܝ ܡܰܕܪܰܫܬܐ ܕܷܢܨܝܘܷܢ ܕܷܣܟ݂ܝܪܳܘܰܐ. ܠܰܬܝܡܝ ܝܳܠܘܦܶܐ ܓ݂ܰܠܰܒܶܐ ܠܝ ܡܰܕܪܰܫܬܐ. ܐܰܦ ܦܳܪܣܳܝܶܐ ܣܬܶܐ ܡܥܰܘܢܝܘܰܐ ܠܝ ܡܰܕܪܰܫܬܐ. ܡܬܰܚܬܝ ܩܳܢܘܢܶܐ ܚܰܬ݂ܶܐ ܠܝ ܡܰܕܪܰܫܬܐ ܕܷܦܬܝܚܐ ܡܶܐ ܚܰܬ݂ܐ ܒܘ ܙܰܒܢܐ ܕܢܰܪܣܰܝ ܘܒܰܪܨܰܘܡܐ. ܐܶܠܐ ܥܰܡ ܚܒܳܠ ܐܰܩ ܩܳܢܘܢܰܢܷܟ ܠܐ ܟܬ݂ܝܘܝ ܒܰܟܬ݂ܳܘܶܐ. ܐܶܠܐ ܟܳܡܝܬܰܘܡܰܪ ܕܟܷܬܘܰܝܢܶܗ ܩܰܪܝܘܶܐ ܠܰܩ ܩܳܢܘܢܶܐ ܕܡܶܩܷܡ. ܒܷܬ݂ܷܪ ܡܶܐ ܕܐܝ ܡܰܕܪܰܫܬܐ ܒܕܶܠܰܗ ܒܘ ܝܘܠܦܳܢܐ، ܪܚܝܡܐ ܡܶܐ ܟܘܠ ܢܳܫܐ. ܐܷܫܡܰܗ ܠܐ ܒܘ ܡܰܕܷܢܚܐ ܬܰܢܶܐ ܦܪܝܣ ܐܶܠܐ ܡܰܛܝܘܰܐ ܗܘܠ ܪܳܘܡܰܐ ܕܐܝܛܰܠܝܰܐ ܘܠܰܦܪܝܩܰܐ ܣܬܶܐ. ܝܳܠܘܦܶܐ ܓ݂ܰܠܰܒܶܐ ܡܰܡ ܡܕ݂ܝܢܳܬ݂ܶܐ ܕܘ ܡܰܕܢܚܐ ܘܕܰܦ ܦܳܪܣܳܝܶܐ ܘܡܶܐ ܒܶܝܬ݂ܢܰܗܪܝܢ ܟܘܠܰܗ ܐܳܬܷ݂ܢܘܰܐ ܕܩܳܪܷܢ ܘܝܘܠܦܝ. ܝܘܠܦܝܘܰܐ ܬܶܐܘܳܠܳܘܓ݂ܝ، ܡܰܢܛܷܩ، ܦܰܠܣܰܦܶܐ، ܐܰܤܛܪܳܢܳܘܡܝ، ܐܳܣܝܘܬ݂ܐ ܘܓܶܐܳܡܰܛܪܝ. ܡܬܰܪܓܡܝܘܰܐ ܣܬܶܐ ܟܬ݂ܳܘܶܐ ܓ݂ܰܠܰܒܶܐ ܕܝ ܬܰܘܕܝܬ݂ܐ ܘܕܝ ܐܝܕ݂ܰܥܬ݂ܐ ܡܘ ܠܶܫܳܢܐ ܝܰܘܢܳܝܐ ܠܘ ܠܶܫܳܢܐ ܣܘܪܝܳܝܐ. ܩܳܪܷܢܘܰܐ ܠܰܦ ܐܰܠܦܐ ܝܳܠܘܦܶܐ ܒܝ ܡܰܕܪܰܫܬܰܬ݂ܶܐ. ܘܟܘܠ ܝܳܠܘܦܐ ܟܷܬܘܰܝܠܶܗ ܩܶܠܰܝܬܐ ܕܘ ܕܡܳܟ݂ܐ ܠܪܘܚܶܗ. (ܡܰܠܦܳܢܐ ܢܰܣܝܡ ܕܳܪܘ) ܟܬ݂ܝܘܐ ܝܐ ܒܘ ܡܰܟܬܰܒܙܰܒܢܐ، ܕܐܝ ܡܰܕܪܰܫܬܰܬ݂ܶܐ ܗܘܠ ܠܦܰܠܓܶܗ ܕܘ ܕܳܪܐ ܕܰܫ ܫܰܘܥܐ ܦܬܷܚܬܳܘܰܐ. ܐܶܠܐ ܠܓܳܪܰܢ ܕܝ ܟܬ݂ܰܘܬܐ ܕܚܰܙܝܐ ܥܰܠ ܚܕ݂ܐ ܟܶܦܐ ܕܢܰܦܝܩܐ ܒܝ ܕܷܪܬܐ ܕܝ ܥܝܬܐ ܕܡܳܪܝ ܝܰܥܩܘܒ، ܗܘܠ ܠܦܰܠܓܶܗ ܕܘ ܕܳܪܐ ܕܰܬܪܰܥܣܰܪ ܦܰܐܝܫܐ ܦܬܷܚܬܐ. ܟܝܬܐ ܥܰܠ ܐܝ ܟܶܦܐ ܚܰܡܫܰܥܣܰܪ ܪܶܙܰܬ ܒܷܟܬ݂ܰܘܬܐ ܐܶܤܛܪܰܢܓܶܠܰܝܬܐ. ܟܰܪܝܳܐܝܬ݂ ܟܝܒܰܢ ܕܷܐܡܡܝܢܰܐ، ܐܝ ܡܰܕܪܰܫܬܐ ܕܷܢܨܝܘܷܢ ܩܰܡܰܝܬܐ ܦܬܝܚܐ ܒܝ ܝܰܨܝܦܘܬ݂ܐ ܕܡܳܪܝ ܝܰܥܩܘܒ ܘܕܡܳܪܝ ܐܰܦܪܶܝܡ. ܘܒܷܬ݂ܷܪ ܡܶܐ ܕܷܣܟ݂ܝܪܐ ܐܝ ܡܰܕܪܰܫܬܐ ܕܐܘܪܗܳܝ، ܐܰܬ݂ܝ ܡܰܠܦܳܢܐ ܢܰܪܣܰܝ ܠܷܢܨܝܘܷܢ ܘܗܝܝܶܗ ܣܬܶܐ ܫܓ݂ܝܠܶܗ ܓ݂ܰܠܰܒܶܐ ܘܡܫܰܘܫܛܳܠܶܗ. ܟܳܡܝܕ݂ܳܥܐ ܐܝ ܒܶܝܬ݂ܨܰܘܒܐ ܩܰܡܰܝܬܐ ܕܷܦܬܝܚܐ ܒܒܶܝܬ݂ܢܰܗܪܝܢ ܘܕܢܰܦܝܩܝ ܝܳܠܘܦܶܐ ܓ݂ܰܠܰܒܶܐ ܡܳܪܶܐ ܕܝܘܠܦܳܢܐ ܥܶܠܳܝܐ ܡܝܢܰܗ. ܐܰܣ ܣܘܪܝܳܝܶܐ ܥܰܐܝܫܝ ܒܒܶܝܬ݂ܢܰܗܪܝܢ ܘܰܐܕܝܰܘܡܐ ܣܬܶܐ ܘܰܠܰܘ ܢܰܩܷܨ ܐܘ ܡܷܢܝܳܢܰܬ݂ܬ݂ܶܗ، ܐܶܠܐ ܗܶܫ ܟܳܥܰܝܫܝ ܒܛܘܪܥܰܒܕܝܢ. ܐܰܟ ܟܬ݂ܳܘܶܐ ܘܰܐܝ ܝܘܠܦܳܢܶܐ ܕܷܡܩܰܕܰܡܡܶܗ ܠܷܒܪܝܬ݂ܐ ܒܰܡ ܡܰܕܪܫܳܬ݂ܰܢܝ، ܡܰܥܠܰܠܶܗ ܐܘ ܕܰܪܓ݂ܐ ܕܰܣ ܣܘܪܝܳܝܶܐ ܘܐܘ ܐܝܩܳܪܰܬ݂ܬ݂ܶܗ ܒܰܝܢ ܕܰܐܥ ܥܰܡܶܐ ܢܘܟ݂ܪܳܝܶܐ ܟܘܠܠܶܗ. ܗܘܠ ܠܐܰܕܝܰܘܡܰܐ ܐܰܝ ܝܰܕ݂ܘܥܬ݂ܳܢܶܐ ܐܘܪܝܦܳܝܶܐ ܟܳܡܒܰܚܢܝ ܥܰܠ ܐܰܟ ܟܬ݂ܳܘܶܐ ܕܷܟܬ݂ܝܘܝ ܒܐܝܕ݂ܳܬ݂ܶܗ ܕܰܡ ܡܰܠܦܳܢܶܐ ܡܫܰܡܗܶܐ ܕܰܣ ܣܘܪܝܳܝܶܐ. ܐܰܕܝܰܘܡܰܐ ܒܰܐܠܡܰܢܝܰܐ ܘܒܘ ܣܘܶܝܕ ܘܒܐܝܢܓܝܠܬܶܪܰܐ ܘܒܰܢ ܐܰܬ݂ܪܰܘܳܬ݂ܶܐ ܚܪܶܢܶܐ ܕܷܒܪܝܬ݂ܐ ܒܰܒ ܒܶܝܬܨܰܘܒܶܐ ܟܳܡܷܠܦܝ ܐܘ ܠܶܫܳܢܐ ܣܘܪܝܳܝܐ. ܠܰܫܰܢ ܕܝܘܠܦܝ ܐܘ ܫܶܪܫܐ ܕܰܠ ܠܶܫܳܢܶܐ ܥܰܬܝܩܶܐ ܟ݂ܘܕ ܐܘ ܥܶܒܪܳܝܐ ܘܐܘ ܥܰܪܰܒܳܝܐ. ܘܠܰܫܰܢ ܕܝܘܠܦܝ ܣܬܶܐ ܐܝ ܬܷܫܡܷܫܬܐ ܕܷܡܩܰܕܰܡܠܶܗ ܐܘ ܠܶܫܳܢܐ ܣܘܪܝܳܝܐ ܒܝ ܦܰܠܣܰܦܶܐ ܝܰܘܢܰܝܬܐ ܘܐܘ ܬܘܪܓܳܡܰܝܕ݂ܰܗ ܩܰܡܰܝܬܐ ܠܘ ܣܘܪܝܳܝܐ ܘܒܷܬ݂ܷܪ ܠܘ ܥܰܪܰܒܳܝܐ. ܐܰܡ ܡܰܠܦܳܢܶܐ ܣܘܪܝܳܝܶܐ ܒܬܰܥܒܐ ܘܥܰܡܠܐ ܪܰܒܐ ܡܬܰܪܓܰܡܡܶܗ ܒܰܡ ܡܰܕܪܫܳܬ݂ܰܢܝ ܟܬ݂ܳܘܶܐ ܓ݂ܰܠܰܒܶܐ ܝܰܩܘܪܶܐ ܠܘ ܣܘܪܝܳܝܐ. ܕܰܐܕܝܰܘܡܰܐ ܟܳܡܟ݂ܰܡܠܝ ܐܰܒ ܒܶܝܬ݂ܥܰܬܝܩܳܬ݂ܐ ܡܫܰܡܗܶܐ ܕܰܐܘܪܘܦ݁ܰܐ ܟ݂ܘܕ ܘܰܬܝܩܰܢ ܘܒܶܪܠܝܢ ܘܦܰ݁ܪܝܣ ܘܠܳܢܕܳܢ. ܡܠܦܢܐ ܫܟܪܝ ܐܩܛܫ 1540 ܡ̈ܠܐ.