Šëkri Aqtaš: ܐܘ ܒܷܛܠܳܢܐ ܩܰܝܛܳܝܐ ܒܝ ܩܪܝܬܐ / U bëṭlono qayṭoyo bi qriṯo 2

U bëṭlono qayṭoyo bi qriṯo 2

ܫܡܘܐܝܶܠ ܝܳܠܘܦܐ ܟܰܫܝܪܐ ܘܚܦܝܛܐ ܝܐ ܒܝ ܡܰܕܪܰܫܬܐ ܩܠܝܪܝܩܰܝܬܐ ܕܡܳܪܝ ܓܰܒܪܺܐܝܶܠ. ܟܳܦܳܝܰܫ ܒܝ ܕܰܝܪܐ ܡܘ ܝܰܪܚܐ ܕܰܐܝܠܘܠ ܗܘܠ ܠܘ ܝܰܪܚܐ ܕܷܚܙܝܪܷܢ ܕܶܐܒܶܗ ܟܳܡܷܣܟ݂ܳܪܝ ܐܰܡ ܡܰܕܪܫܳܬ݂ܶܐ ܕܘ ܠܶܫܳܢܐ ܬܷܪܟܳܝܐ. ܒܘ ܙܰܒܢܰܢܐ ܟܘܠܶܗ܆ ܟܘܠ ܝܰܘܡܐ ܥܰܡ ܐܰܚ ܚܰܘܪܳܢܰܝܕ݂ܶܗ ܟܐܘܙܙܶܗ ܨܰܦܪܰܝܬܐ ܚܶܠܳܝܐ ܡܝ ܕܰܝܪܐ ܠܡܷܕ݂ܝܰܕ݂. ܠܰܫܰܢ ܕܩܳܪܶܐ ܘܝܳܠܰܦ ܒܝ ܡܰܕܪܰܫܬܐ ܬܷܪܟܰܝܬܐ. ܘܥܰܣܪܺܝܝܶܐ ܒܘ ܒܰܨܐ ܟܳܕܳܥܰܪ ܠܝ ܕܰܝܪܐ. ܗܰܘܟ݂ܰܐ ܟܳܫܷܦܥܝ ܐܰܬ ܬܶܫܪܳܝܳܬ݂ܐ ܘܐܘ ܣܰܬ݂ܘܐ ܘܐܘ ܪܰܒܷܥ ܒܘ ܝܘܠܦܳܢܐ. ܐܶܠܳܐ ܒܘ ܩܰܝܛܐ ܒܦܰܠܓܶܗ ܕܘ ܝܰܪܚܐ ܕܷܚܙܝܪܷܢ ܟܳܡܷܣܟ݂ܳܪܝ ܐܰܡ ܡܰܕܪܫܳܬ݂ܐ ܕܘ ܠܶܫܳܢܐ ܬܷܪܟܳܝܐ. ܘܐܰܝ ܝܳܠܘܦܶܐ ܟܳܣܰܝܡܝ ܬܠܳܬ݂ܐ ܝܰܪܚܶܐ ܒܷܛܠܳܢܐ. ܐܰܝ ܝܳܠܘܦܶܐ ܩܠܝܪܝܩܳܝܶܐ ܕܝ ܡܰܕܪܰܣܶܐ ܕܡܳܪܝ ܓܰܒܪܺܐܝܶܠ ܣܬܶܐ ܟܳܡܷܦܠܳܓ݂ܝ ܠܬܰܪܬܶܐ ܓܘܕܶܐ. ܘܟܘܠ ܝܳܠܘܦܐ ܟܘܙܙܶܗ ܓܰܒ ܐܝ ܐܝܩܰܪܬ݂ܰܝܕ݂ܶܗ ܠܝ ܩܪܝܬ݂ܐ܆ ܘܟܳܣܰܝܰܡ ܒܷܛܠܳܢܐ ܝܰܪܚܐ ܘܦܰܠܓܶܗ. ܫܡܘܐܝܶܠ ܣܬܶܐ ܒܘ ܩܰܝܛܐ ܐܰܙܙܶܗ ܠܝ ܩܪܝܬ݂ܐ ܕܒܶܩܘܣܝܳܢܶܐ ܕܟܳܥܷܡܪܝ ܐܶܒܰܗ ܐܘ ܩܰܫܫܰܝܕ݂ܶܗ ܘܐܝ ܩܰܫܬܰܝܕ݂ܶܗ. ܘܡܰܫܦܰܥܠܶܗ ܐܘ ܩܰܝܛܐ ܓܰܒܰܝܝܶܗ܆ ܒܘ ܫܘܓ݂ܠܐ ܘܒܘ ܡܰܙܠܐ ܕܒܰܝܢ ܐܰܟ ܟܰܪܡܶܐ ܘܒܝ ܪܳܥܝܘܬܐ ܕܰܨ ܨܰܦܘܪܶܐ ܘܒܘ ܡܰܙܠܳܐ ܕܠܝ ܥܺܕܬܐ ܘܒܝ ܬ݂ܢܰܚܬܐ. ܐܝܢܰܩܠܰܐ ܕܬܰܝܡܝ ܐܰܝ ܝܰܘܡܳܬ݂ܰܝܕ݂ܶܗ܆ ܛܠܷܒ ܠܶܗ ܟ݂ܰܬܷܪ ܘܢܫܷܩ ܠܶܗ ܐܝܕ݂ܶܗ ܕܐܘ ܩܰܫܫܰܝܕ݂ܶܗ ܘܕܐܝ ܩܰܫܬܰܝܕ݂ܶܗ ܘܕܰܥܷܪ ܡܘ ܒܷܛܠܳܢܐ ܩܰܝܛܳܝܐ ܠܝ ܕܰܝܪܐ ܕܩܳܪܶܐ ܘܝܳܠܰܦ ܐܰܗ ܗܶܪܓܰܝܕ݂ܶܗ ܐܰܣ ܣܷܪܝܳܝܶܐ. ܒܷܬ݂ܷܪ ܡܶܐ ܕܕܰܥܝܪܝ ܐܰܚ ܚܰܘܪܳܢܰܝܕ݂ܶܗ ܣܬܶܐ ܡܫܰܪܰܠܠܶܗ ܒܰܐ ܗܷܪܓܶܐ ܣܘܪܝܳܝܶܐ. ܒܚܰܐ ܡܰܝ ܝܰܘܡܳܬ݂ܶܐ ܡܫܰܐܶܠܶܗ ܐܘ ܡܷܠܦܳܢܐ ܠܰܝ ܝܳܠܘܦܶܐ ܘܐܡܷܪ ܠܶܗ: ܐܰܝܕܰܪܒܐ ܡܰܫܦܰܥܟ݂ܘ ܐܘ ܒܷܛܠܳܢܐ ܩܰܝܛܳܝܐ ܒܝ ܩܪܝܬ݂ܐ ܘܡܷܢ ܣܷܡܟ݂ܘ؟ ܐܘ ܫܡܘܐܝܶܠ ܡܰܥܠܶܠܶܗ ܨܰܘܥܶܗ ܘܰܐܒܷܥ ܕܡܰܚܟܶܐ ܥܰܠ ܐܘ ܒܷܛܠܳܢܰܝܕ݂ܶܗ ܕܘ ܩܰܝܛܐ. ܐܘ ܡܰܠܦܳܢܐ ܐܡܷܪ ܠܶܗ: ܩܷܡ ܡܰܚܟܝ ܚܳܙܝܢܰܐ. ܫܡܘܐܝܶܠ ܩܰܝܷܡ ܘܒܕܶܠܶܗ ܕܳܐܡܰܪ: ܐܳܢܐ ܒܘ ܩܰܝܛܐ ܐܰܙܙܝܢܐ ܠܝ ܩܪܝܬ݂ܐ ܕܒܶܩܘܣܝܳܢܶܐ ܕܟܳܡܝܕ݂ܳܥܐ ܒܶܝܬܩܘܤܛܰܢ. ܡܥܰܘܰܢܠܝ ܐܰܣ ܣܳܒܰܝܕ݂ܝ ܒܘ ܫܘܓܠܐ. ܒܟܘܠ ܨܰܦܪܳܐ ܡܶܐ ܚܶܠܳܝܐ܆ ܡܶܩܷܡ ܕܢܳܦܰܩ ܐܘ ܝܰܘܡܐ ܘܕܗܳܘܶܐ ܚܶܡܳܐ܆ ܐܳܢܐ ܘܐܘ ܩܰܫܫܰܝܕ݂ܝ ܡܰܚܬܝܘܰܝܢܰܐ ܐܘ ܪܷܫܘܳܢܐ ܘܐܰܥ ܥܳܩܘܠܝܳܬ݂ܶܐ ܘܐܘ ܚܰܘܠܐ ܥܰܠ ܐܝ ܚܡܰܪܬܳܐ ܘܥܰܠ ܐܝ ܒܰܓ݂ܰܠܬ݂ܐ ܘܷܐܙܙܰܘܰܝܢܰܐ ܠܘ ܛܘܪܐ. ܩܘܛܥܝܘܰܝܢܰܐ ܛܰܪܦܶܐ ܒܝ ܡܰܓܠܐ ܠܰܨ ܨܰܦܘܪܶܐ ܘܠܰܥ ܥܶܙܶܐ. ܒܷܬ݂ܷܪ ܡܰܛܰܥܢܝܘܰܝܢܰܐ ܐܝ ܚܡܰܪܬܐ ܘܐܝ ܒܰܓ݂ܰܠܬ݂ܐ ܘܚܰܝܨܝܘܰܝܢܰܐ ܐܘ ܛܰܥܢܐ ܒܘ ܚܰܘܠܳܐ. ܘܳܐܬ݂ܝܘܰܝܢܰܐ ܠܘ ܒܰܝܬܐ. ܒܷܬܷ݂ܪ ܡܶܐ ܙܰܒܢܐ ܟܰܪܝܐ ܕܡܷܬ݂ܢܳܚܝܘܰܝܢܰܐ܆ ܚܰܝܨܝܘܰܝܢܰܐ ܚܰܨܰܢ ܘܡܰܝܕܝܘܰܝܢܰܐ ܐܰܥܡܰܝܢܰܐ ܡܰܝܶܐ ܔܰܡܘܕܶܐ ܘܰܐܡ ܡܰܓܙܘܢܶܐ ܕܘ ܚܨܳܕܐ ܕܚܘܨܕܝܢܰܐ ܐܰܦ݁ܦ݁ܶܗ ܐܰܚ ܚܶܛܶܐ ܘܐܰܣܥܳܪܶܐ ܘܐܰܛܠܰܘܚܶܐ. ܐܷܙܙܰܘܰܝܢܰܐ ܠܘ ܚܨܳܕܳܐ ܕܰܚ ܚܶܛܶܐ ܘܕܰܣܥܳܪܶܐ ܘܕܰܛܠܰܘܚܶܐ ܘܕܰܚ ܚܷܡܨܶܐ. ܐܘ ܩܰܫܫܰܝܕ݂ܝ ܘܥܰܡܡܳܢܝ ܚܘܨܕܝܘܰܐ܆ ܘܳܐܢܐ ܡܰܠܬܰܡܘܰܝܢܳܐ ܐܰܣ ܣܶܡܳܠܶܐ ܘܣܳܝܰܡܘܰܝܢܰܢܶܐ ܓܕܝܫܶܐ. ܒܷܬ݂ܷܪ ܡܰܡܛܝܘܰܝܢܰܢܶܗ ܒܘ ܫܰܠܐ ܐܰܘ ܒܘ ܬܪܰܟܬܳܪ ܠܝ ܐܰܕܪܐ ܕܣܰܝܡܝܢܰܢܶܗ ܦܰ݁ܛܳܙ ܘܦܷܪܫܝܢܰܐ ܐܘ ܙܰܕ ܘܐܘ ܬܰܘܢܐ ܡܶܐ ܚܕ݂ܳܕ݂ܶܐ. ܡܶܐ ܕܗܳܘܶܐ ܘܰܐ ܥܰܣܪܺܝܶܐ ܕܘܥܪܝܘܰܝܢܰܐ ܥܰܡ ܚܕ݂ܳܕ݂ܶܐ ܠܘ ܒܰܝܬܐ. ܡܷܦܨܰܚܘܰܝܢܳܐ ܓ݂ܰܠܰܒܶܐ ܐܝܢܰܩܩܰܐ ܕܷܡܥܰܘܰܢܘܰܝܢܐ ܐܰܢ ܢܳܫܰܝܕ݂ܝ ܒܘ ܫܘܓ݂ܠܐ. ܐܝܕ݂ܰܐ ܕܗܳܘܶܐ ܙܰܒܢܐ ܐܷܙܙܝܘܰܝܢܐ ܥܰܡ ܐܰܚ ܚܰܘܪܳܢܶܐ ܘܡܷܫܬܰܥܝܘܰܝܢܰܐ ܒܝ ܓܘܝܐ. ܒܷܬ݂ܷܪ ܐܳܬ݂ܶܘܰܝܢܐ ܠܘ ܒܰܝܬܐ ܘܚܳܝܰܦܘܰܝܢܐ ܘܡܰܚܫܰܡܘܰܝܢܐ. ܒܷܬܷ݂ܪ ܡܝ ܚܫܰܡܬܳܐ ܙܰܒܢܐ ܟܰܪܝܐ ܡܦܰܪܰܔܘܰܝܢܐ ܥܰܠ ܐܘ ܬܶܠܶܦܷܙܝܳܘܢ. ܐܝܢܰܩܩܰܐ ܕܳܐܬܳܘܰܝܠܝ ܫܰܢܬ݂ܐ ܣܳܠܰܩܘܰܝܢܐ ܥܰܠ ܐܝ ܓܳܪܐ ܘܕܳܡܰܟ݂ܘܰܝܢܐ ܥܰܠ ܐܘ ܬܰܟ݂ܬ. ܒܷܬܷ݂ܪ ܡܶܐ ܕܚܳܝܰܪܘܰܝܢܐ ܘܡܦܰܪܰܔܘܰܝܢܐ ܥܰܠ ܐܰܟ ܟܘܟܘܶܐ ܥܰܝܢܝ ܡܝܛܳܡܝܘܰܐ ܘܕܳܡܰܟܘܰܝܢܐ ܫܢܬܐ ܒܰܣܷܡܬܐ. ܐܝܢܰܩܩܰܐ ܕܡܰܬܷܡܠܰܢ ܐܘ ܚܨܳܕܐ ܢܩܝܠܰܢ ܐܘ ܙܰܕ ܠܝ ܐܰܕܪܐ. ܗܷܢ ܡܝܢܶܗ ܥܰܠ ܐܝ ܚܡܰܪܬܐ. ܘܗܷܢ ܒܘ ܬܪܰܟܬܳܪ. ܛܚܷܢ ܠܰܢ ܒܘ ܦ݁ܰܛܳܙ ܘܦܪܷܫ ܠܰܢ ܐܘ ܙܰܕ ܡܘ ܬܰܘܢܐ. ܡܰܚܰܬܠܰܢ ܐܘ ܙܰܕ ܒܰܟ ܟܳܪܶܐ ܘܐܘ ܬܰܘܢܐ ܒܝ ܟܰܕܝܢܶܐ ܠܰܫܰܢ ܕܒܘ ܣܰܬ݂ܘܐ ܘܒܰܝ ܝܰܘܡܳܬ݂ܶܐ ܕܐܘ ܬܰܠܓܳܐ ܡܰܥܰܠܦܝ ܐܰܚܝܶܘܷܢ. ܐܶܠܳܐ ܒܗܷܢ ܡܰܝ ܝܰܘܡܶܐ ܐܷܙܙܰܘܰܝܢܐ ܠܘ ܟܰܪܡܐ ܘܩܘܛܦܝܘܰܝܢܰܐ ܥܷܢܘܶܐ ܡܰܣ ܣܰܬܶܐ. ܐܳܢܐ ܙܳܒܰܛܘܰܝܢܐ ܐܘ ܣܰܪܬܘܠܐ ܘܐܘ ܣܳܒܰܝܕ݂ܝ ܩܳܛܰܦܘܰܐ ܘܡܳܠܶܐ ܘܰܐ ܐܘ ܣܰܠܐ ܒܰܣ ܣܘܓ݂ܠܶܐ. ܘܕܘܥܪܝܘܰܝܢܰܐ ܠܘ ܒܰܝܬܐ. ܗܷܢ ܡܰܝ ܝܰܘܡܶܐ ܐܷܙܙܰܘܰܝܢܰܐ ܥܡ ܚܕ݂ܳܕ݂ܶܐ ܠܘ ܘܰܪܙܐ܆ ܕܡܰܡܛܝܢܰܐ ܒܳܨܝܢܶܐ ܘܦܘܔܶܐ ܘܙ̰ܰܒܰܫܰܬ. ܥܰܠ ܕܟܷܬܢܶܐ ܝܰܩܘܪܶܐ܆ ܡܷܒܠܝܘܰܝܢܰܐ ܐܝ ܚܡܰܪܬܐ ܐܰܥܡܰܝܢܰܐ ܘܡܰܛܰܥܢܝܘܰܝܢܰܠܰܗ. ܒܗܷܢ ܡܰܝ ܝܰܘܡܶܐ ܣܬܶܐ ܪܳܚܰܡܘܰܝܢܳܐ ܕܷܐܙܙܝ ܩܡܰܐ ܨܰܦܘܪܶܐ ܘܡܰܪܥܶܢܰܢܶܗ ܒܘ ܛܘܪܐ. ܡܶܐ ܨܰܦܪܐ ܩܳܠܰܥܘܰܝܢܰܢܢܶܗ ܠܝ ܡܰܪܥܰܐ. ܘܦܰܠܓܶܗ ܕܝܰܘܡܳܐ ܡܰܕܥܰܪܘܰܝܢܰܢܶܗ ܠܘ ܒܰܝܬܐ. ܒܰܝ ܝܰܘܡܶܐ ܕܰܚ ܚܘܫܰܒܶܐ ܐܷܙܙܝܘܰܝܢܐ ܠܝ ܥܺܝܬܐ. ܘܣܳܠܰܩܘܰܝܢܐ ܠܘ ܡܰܕ݂ܒܚܐ. ܓ݂ܱܠܰܒܶܐ ܒܷܣܡܳܘܰܝܠܝ ܐܝ ܨܠܘܬ݂ܐ ܒܝ ܥܺܝܬܳܐ ܕܡܳܪܝ ܐܶܠܺܝܐ. ܒܘ ܩܰܝܛܐ ܟܳܘܶܐ ܓ݂ܰܠܰܒܶܐ ܚܶܡܐ ܒܝ ܩܪܝܬ݂ܐ. ܘܐܘ ܕܰܪܓ݂ܐ ܕܝ ܫܚܰܢܬܐ ܟܳܣܳܠܰܩ ܗܘܠ ܚܰܡܷܫ ܘܰܐܪܒܥܝ. ܡܰܘܟ݂ܰܐ ܟܳܠܳܙܰܡ ܕܗܳܘܝܢܰܐ ܡܳܪܳܐ ܠܪܘܚܰܝܢܰܐ ܕܠܳܐ ܟܳܝܰܘܠܰܢ ܡܝ ܫܷܡܫܐ ܥܰܘܷܕܬܳܐ. ܐܝ ܩܪܝܬ݂ܐ ܓ݂ܠܰܒܶܐ ܒܰܣܷܡܬܐ ܝܐ. ܡܰܥܒܰܪ ܠܝ ܒܷܛܠܳܢܐ ܒܰܣܝܡܐ ܥܰܡ ܐܰܢ ܢܳܫܰܝܕ݂ܝ ܘܰܐܚ ܚܰܘܪܳܢܰܝܕ݂ܝ. ܐܶܢ ܡܳܪܝܐ ܕܨܳܒܶܐ ܫܰܬܐ ܚܪܶܬܐ ܕܝܣܰܐ ܒܘ ܩܰܝܛܐ ܟܳܒܰܥ ܢܐ ܕܐܷܙܙܝܢܳܐ ܠܝ ܩܪܝܬ݂ܐ.