Mixayel Cabdallah: ܐܝ ܚܶܛܐ ܢܰܦܝܩܐ ܡܶܐ ܒܶܝܬ݂ܢܰܗܪܝܢ / I ḥeṭo nafiqo me Beṯnahrin

ܐܘ ܝܘܠܦܳܢܐ ܗܘܠ ܐܘܥܕܐ ܠܐ ܡܰܛܝ ܠܕܰܪܓ̣ܐ ܕܐܳܒܶܐ ܦܘܢܳܝܐ ܥܰܠ ܫܘܐܠܐ ܕܠܰܬܝܐ ܦܫܝܛܐ: ܡܶܐ ܐܶܡܰܐ ܐܝ ܐܰܪܥܐ ܛܥܷܢܬܐ ܝܐ ܒܰܒ ܒܷܙܪܶܐ ܘܒܽܘܙܰܪܥܶܐ ܘܓܪܘܡܶܐ (ܐܘ ܒܶܙܪܐ ܕܟܘܠ ܐܝܠܳܢܐ ܘܐܝܠܬܐ ܘܝܰܪܳܩܘܬ̣ܐ ܘܓܶܠܐ ܟܷܬܠܶܗ ܐܷܫܡܳܐ ܡܫܰܚܷܠܦܐ)؟ ܡܘ ܣܶܦܪܐ ܕܰܒܪܝܬ̣ܐ ܕܝ ܕܝܰܬ݂ܝܩܝ ܥܰܬܷܩܬܐ ܟܐܷܕ݂ܥܝܢܰܐ ܕܐܰܠܳܗܐ ܒܪܶܠܶܗ ܐܝ ܝܰܪܳܩܘܬ̣ܐ ܒܘ ܝܰܘܡܐ ܕܰܬܠܳܬ̣ܐ ܘܐܘ ܒܰܪܢܳܫܐ ܒܘ ܝܰܘܡܐ ܕܰܢ ܐܷܫܬܐ، ܘܒܰܟܬ̣ܰܘܝܳܬ̣ܶܐ ܨܶܨܳܢܳܝܳܬ̣ܶܐ ܥܰܠ ܐܰܠ ܠܘܚܶܐ ܩܰܪܡܝܕܳܝܶܐ (ܟܬ̣ܰܘܬܐ ܥܰܬܷܩܬܷܪ ܡܰܢܢܶܗ ܠܰܝܬ) ܟܳܩܳܪܝܢܰܐ ܐܰܝܕܰܪܒܐ ܐܰܢ ܐܰܠܳܗܳܬ̣ܶܐ ܕܒܶܬ̣ ܢܰܗܪܝܢ ܒܪܰܠܠܶܗ ܒܝ ܩܰܡܰܝܬܐ ܐܝ ܐܰܪܥܐ ܘܡܝܰܬ̣ܪܰܠܠܶܗ ܒܐܶܣܛܘܟܣܶܐ ܕܰܚ ܚܰܝܶܐ ܘܒܷܬ̣ܷܪ ܡܶܐ ܗܰܬ݂ܶܐ ܣܷܡܡܶܗ ܐܘ ܒܰܪܢܳܫܐ ܡܘ ܥܰܦܪܐ ܐܰܟ̣ ܟܝܳܢܐ ܓܡܝܪܐ܀ ܒܟܘܠ ܝܰܒܷܫܬܐ (=ܢܰܫܦܶܐ) ܟܳܚܳܙܝܢܰܐ ܐܝܠܳܢܶܐ ܘܕܰܘܡܶܐ ܘܦܝܪܶܐ ܘܝܰܪܘܩܶܐ ܡܫܰܚܷܠܦܶܐ، ܡܰܣܪܶܐ ܒܘ ܟܝܳܢܐ ܘܒܰܫ ܫܘܚܠܳܦܶܐ ܕܝ ܫܰܬܐ ܘܒܘ ܝܘܪܟ̣ܐ ܕܘ ܝܰܘܡܐ ܕܟܳܡܰܒܰܗܪܐ ܘܟܳܡܰܫܰܚܢܐ ܐܝ ܫܷܡܫܐ ܐܶܒܶܗ، ܘܒܘ ܦܘܪܫܳܢܐ ܕܝ ܫܚܰܢܬ̣ܐ ܒܰܝܢ ܐܘ ܠܰܠܝܐ ܘܐܘ ܐܝܡܳܡܐ، ܘܒܰܡ ܡܰܝܶܐ ܕܟܳܡܰܨܪܠܠܶܗ ܘܢܳܛܪܠܠܶܗ ܕܟܳܡܰܣܪܰܠܠܶܗ ܘܢܷܛܪܰܠܠܶܗ ܐܝ ܐܰܪܥܐ ܘܐܘ ܥܘܡܩܰܬ̣ܬ̣ܶܗ܀ ܚܰܐ ܟܝܒܶܐ ܕܐܳܡܰܪ: ܟ̣ܶܕ ܟܝܬܐ ܦܘܪܫܳܢܐ ܪܰܒܐ ܘܐܰܡܝܢܐ ܒܰܝܢ ܕܰܢ ܢܳܫܶܐ ܕܟܳܚܳܝܷܢ ܥܰܠ ܝܰܒܺܝ̈ܫܳܬܶܐ ܢܰܫܦܰܬ ܡܫܰܚܷܠܦܶܐ، ܗܰܘܟ̣ܰܐ ܣܬܶܐ ܟܝܬܐ ܦܘܪܫܳܢܐ ܒܰܢ ܐܝܠܳܢܶܐ ܘܒܰܦ ܦܝܪܶܐ ܘܐܶܒܳܒܢܶܐ ܕܟܳܝܳܥܰܢ ܘܡܳܛܰܢ ܘܒܷܫܠܝ ܗܰܪܟܶܐ ܘܬܰܡܐ܀ ܛܪܐ ܕܘܥܪܝܢܰܐ ܠܘ ܡܠܘܘܐ ܘܠܘ ܢܝܫܐ ܕܝܕܰܢ! ܡܶܩܷܡ ܡܶܐ ܡܫܝܚܐ ܚܶܕܷܪ ܬܪܰܥܣܰܪ ܐܰܠܦܐ ܐܷܫܢܶܐ ܐܘ ܟܝܳܢܐ ܕܝ ܐܰܪܥܐ ܕܰܢ ܐܰܒܳܗܳܬ̣ܰܝܕܰܢ ܒܶܬ̣ ܢܰܗܪܝܢ ܡܫܰܚܠܰܦ؛ ܐܝ ܫܚܰܢܬ̣ܐ ܥܰܠܝܐ، ܐܰܢ ܐܝܠܳܢܶܐ ܘܐܝ ܚܰܝܘܬ̣ܐ ܘܐܰܦ ܦܝܪܶܐ ܢܰܩܝܨܝ، ܐܘ ܒܰܪܢܳܫܐ ܠܰܘ ܟܳܩܳܝܰܬ̣ܠܶܗ ܕܣܳܘܰܥ ܡܘ ܨܰܝܕܐ ܘܡܘ ܩܛܳܦܐ ܘܬܰܠܬܝܡܐ ܕܰܦ ܦܝܪܶܐ ܕܝܳܥܷܢܘܰܐ ܠܪܘܚܰܝܝܶܐ (ܐܘ ܒܰܪܢܳܫܐ ܩܰܡܳܝܐ ܟܰܪܳܟ̣ܐ ܘܰܐ ܥܰܠ ܐܘ ܡܘܟܠܐ ܘܨܰܝܳܕܐ ܘܰܐ) - ܗܰܬ̣ܶܐ ܘܰܐ ܐܝ ܥܶܠܬ̣ܐ ܕܛܪܶܠܰܗ ܕܡܫܰܪܶܐ ܕܦܳܠܰܚ ܒܝ ܐܰܪܥܐ، ܕܳܘܰܪܠܰܗ ܘܙܳܪܰܥܠܰܗ ܘܚܳܨܰܕ ܘܬܳܠܶܐ ܐܘ ܡܶܕܶܐ ܕܟܐܒܐ، ܘܣܳܝܰܡ ܒܰܝܬܳܝܘܬ̣ܐ ܠܝ ܚܰܝܘܬ̣ܐ܀ ܟܘܠ ܡܕܝܢܳܝܘܬ̣ܐ ܒܷܒܪܝܬ̣ܐ ܡܫܰܬܣܐ ܥܰܠ ܐܝ ܐܰܟܳܪܘܬ̣ܐ: ܓܰܒܰܝܢܰܐ ܐܘ ܙܪܳܥܐ ܕܰܚ ܚܶܛܶܐ ܘܕܰܣ ܣܥܳܪܶܐ ܘܰܐ، ܒܐܰܡܶܪܝܟܰܐ ܐܘ ܙܪܳܥܐ ܕܘ ܕܰܚܢܐ ܘܰܐ، ܘܒܘ ܨܝܢ ܐܘ ܙܪܳܥܐ ܕܝ ܪܶܙܐ ܘܰܐ܀ ܘܗܰܘܟ̣ܰܐ، ܐܰܢ ܢܳܫܶܐ، ܕܗܘܠ ܐܘ ܙܰܒܢܰܘܐ ܠܰܬܘܰܐ ܡܶܕܶܐ ܕܡܰܣܷܪܪܶܗ ܒܚܕܳܕܶܐ، ܠܰܬܝܡܝ ܒܕܘܟܬ̣ܐ ܚܕܐ، ܗܰܘܷܢ ܐܰܟܳܪܶܐ، ܡܰܥܡܰܪܪܶܗ ܒܳܬܶܐ ܕܗܰܘܷܢ ܥܰܡ ܐܘ ܙܰܒܢܐ ܡܕܝܢܳܬ̣ܶܐ، ܡܫܰܬܰܣܣܶܗ ܟܢܘܫܝܶܐ، ܡܛܰܟܰܣܣܶܗ ܐܰܚ ܚܰܝܰܬ̣ܬ̣ܶܗ ܒܩܳܢܘܢܶܐ܀ ܐܘ ܡܒܰܚܢܳܢܐ ܨܰܢ ܟܪܰܡܶܪ ܒܘ ܟܬ̣ܳܘܰܝܕܶܗ (ܐܘ ܡܰܟܬ̣ܰܒܙܰܒܢܐ ܡܫܰܪܶܐ ܒܘ ܐܰܬ̣ܪܐ ܕܰܫ ܫܘܡܶܪܳܝܶܐ) ܟܳܐܡܰܪ: ܬܰܡܳܐ، ܒܒܶܬ̣ ܢܰܗܪܝܢ ܐܝ ܬܰܚܬܰܝܬܐ، ܡܬܰܥܡܪܝ ܐܰܡ ܡܕܝܢܳܬ̣ܶܐ ܩܰܡܳܝܶܐ ܒܷܒܪܝܬ̣ܐ، ܡܶܐ ܬܰܡܐ ܢܰܦܝܩܐ ܐܝ ܟܬ̣ܰܘܬܐ ܩܰܡܰܝܬܐ، ܣܝܡܝ ܩܳܢܘܢܶܐ ܕܡܛܰܟܣܝ ܐܰܚ ܚܰܝܶܐ ܕܘ ܟܢܘܫܝܐ (ܐܰܩ ܩܳܢܘܢܶܐ ܕܐܘܪܢܰܡܡܘ ܘܚܰܡܘܪܰܒܝ)، ܒܒܶܬ̣ ܢܰܗܪܝܢ ܙܪܝܥܐ ܐܝ ܚܶܛܐ ܩܰܡܰܝܬܐ، ܬܰܡܐ ܡܰܚܡܰܥܥܶܗ ܐܰܣ ܣܥܳܪܶܐ ܕܡܰܢܢܶܗ ܡܳܦܰܩܩܶܗ ܐܘ ܫܰܟ̣ܪܐ ܕܗܰܘܝ ܐܘ ܫܬܳܝܐ ܡܳܬ̣ܳܝܐ ܘܐܰܬ̣ܪܳܢܳܝܐ ܕܰܥ ܥܳܡܘܪܶܐ ܕܒܶܬ̣ ܢܰܗܪܝܢ ܗܘܠ ܠܘ ܕܳܪܐ ܕܰܬܠܳܬ̣ܐ ܒܷܬ̣ܷܪ ܡܶܐ ܡܫܝܚܐ، ܬܰܡܐ ܡܫܰܪܰܠܠܶܗ ܓܘܪܫܝ ܐܰܡ ܡܰܝܶܐ ܫܰܦܝܶܐ ܘܚܘܠܡܳܢܳܝܶܐ ܘܩܰܪܝܪܶܐ ܕܰܢ ܢܰܗܪܶܐ ܕܰܛ ܛܘܪܳܢܶܐ ܕܒܘ ܓܰܪܒܝܐ ܕܒܶܬ̣ ܢܰܗܪܝܢ ܠܰܕ ܕܷܟܟܳܬ̣ܶܐ ܢܰܫܝܦܶܐ ܘܠܰܡ ܡܕܝܢܳܬ̣ܶܐ، ܘܡܰܫܬܷܢ ܐܝ ܐܰܪܥܐ ܘܐܰܙ ܙܰܪܥܶܐ ܒܰܡ ܡܰܝܶܐ ܕܕܶܩܠܰܬ݂ ܘܰܦܪܳܬ̣، ܬܰܡܐ ܟܬܺܝܘ ܐܘ ܡܫܰܒܠܳܢܐ ܩܰܡܳܝܐ ܕܰܐܰܟܳܪܶܐ، ܢܰܦܝܩܝ ܐܰܡ ܡܶܨܥܳܝܳܬ̣ܶܐ ܘܐܰܡ ܡܳܐܢܶܐ ܕܝ ܐܰܟܳܪܘܬ̣ܐ (ܣܰܟܬ̣ܐ، ܢܰܪܓܐ ܘܫܰܪܟܐ) ܘܕܝ ܡܘܣܝܩܝ ܣܬܶܐ، ܬܰܡܐ ܡܬܰܥܡܪܝ ܐܰܐܶܣܪܶܐ ܩܰܡܳܝܶܐ ܘܐܰܪ ܪܶܚܝܶܐ ܘܐܰܬ ܬܰܢܘܪܶܐ (ܐܘ ܐܶܫܡܐ ܕܘ ܬܰܢܘܪܐ ܦܪܝܣ ܒܐܰܬ̣ܪܰܘܳܬ̣̈ܶܐ ܡܫܰܚܷܠܦܶܐ ܕܘ ܡܰܕܷܢܚܐ، ܘܒܘ ܙܰܒܢܐ ܕܝ ܡܰܡܠܰܟ̣ܬܐ ܪܰܒܬ̣ܳܐ ܕܐܳܬ̣ܘܪܳܝܶܐ ܡܰܛܝ ܠܡܶܨܪܶܢ ܘܡܶܐ ܬܰܡܐ ܡܒܰܪܒܶܙ ܒܘ ܓܰܪܒܝܐ ܕܐܰܦܪܝܩܝ)̤ ܬܰܡܐ، ܘܠܐ ܒܕܘܟܬ̣ܐ ܚܪܶܬܐ، ܣܝܡ ܐܘ ܠܰܚܡܐ ܩܰܡܳܝܐ ܡܘ ܠܰܝܫܐ ܚܰܡܝܥܐ܀ ܝ ܕܰܝܰܐܡܳܢܕ ܒܘ ܟܬ̣ܳܘܰܝܕܶܗ (ܡܰܦܷܩܥܳܬ̣ܐ، ܫܰܪܥܘܛܶܐ، ܡܝܟܰܢܶܐ - ܐܘ ܩܶܨܐ ܕܰܟܢܘܫܝܶܐ ܢܳܫܳܝܶܐ) ܟܳܟܳܬ̣ܰܘ ܗܰܘܟ݂ܰܐ: ܐܝ ܚܶܛܐ ܡܰܛܝܐ ܡܶܐ ܒܶܬ̣ ܢܰܗܪܝܢ ܠܝ ܐܰܪܥܐ ܕܰܝܰܘܢܳܝܶܐ ܡܶܩܷܡ ܬܡܰܢܝܐ ܐܰܠܦܐ ܘܚܰܡܶܫܡܳܐ ܐܷܫܢܶܐ، ܘܒܷܬ̣ܷܪ ܙܰܒܢܐ ܠܐ ܝܰܪܝܟ̣ܐ ܡܰܚܘܶܠܰܗ ܒܐܘܪܝܦܝ ܐܝ ܡܶܨܥܳܝܬܐ ܘܐܝ ܡܰܕܶܢܚܳܝܬܐ، ܘܠܰܘܟ̣ܰܐ ܐܝ ܡܰܪܕܘܬ̣ܐ ܕܘ ܡܰܕܷܢܚܐ ܡܶܨܥܳܝܐ ܕܐܰܘܪܘܦ̇ܐ ܡܰܪܕܘܬ̣ܐ ܕܝ ܚܶܛܐ ܝܐ، ܘܠܰܘܟ̣ܰܐ ܣܬܶܐ ܒܝ ܫܰܬܐ ܕܐܰܠܦܳܐ ܘܬܫܰܥܡܐ ܘܬܫܰܥ ܘܬܶܫܥܝ ܡܫܰܬܣܐ ܒܘ ܐܰܬ̣ܪܐ ܦܪܰܢܫܳܝܐ (ܕܦܰܪܰܢܣܰܐ) ܟܢܘܫܬܐ ܡܰܚܰܬܠܰܗ ܡܬܰܚܷܬ ܐܶܫܡܰܗ: ܐܘܪܝܦܝ (ܐܰܘܪܘܦ̇ܐ) - ܡܰܪܕܘܬ̣ܐ ܕܘ ܠܰܚܡܐ)܀