Cäziz Aydin : ܐܰܪܟܰܚ ܩܪܝܬ݂ܐ ܚܠܝܬ݂ܐ /Arkaḥ qriṯo ḥliṯo

Arkaḥ qriṯo ḥliṯo

ܐܰܪܟܰܚ ܩܪܝܬ݂ܐ ܥܰܬܷܩܬܐ ܝܐ ܒܝ ܦܢܝܬ݂ܐ ܕܒܶܬ݂ܪܝܫܶܐ ܕܟܳܡܝܕ݂ܳܥܐ ܒܘ ܠܶܫܳܢܐ ܛܘܪܳܝܐ ܐܝ ܪܰܝـܝܬܶܐ. ܐܝ ܩܪܝܬ݂ܐ ܥܰܡܷܪܬܐ ܝܐ ܥܰܠ ܬܶܠܠܐ ܡܷܕ ܛܘܪܐܝܙܠܐ ܕܟܷܬܝܐ ܒܝ ܡܰܪܥܝܬ݂ܐ ܕܛܘܪܥܰܒܕܝܢ. ܐܰܪܟܰܚ ܟܳܦܰܝܫܳܐ ܒܘ ܦܰܠܓܐ ܕܰܩ ܩܷܪܝܰܘܳܬ݂ܶܐ ܕܒܶܬ݂ܪܝܫܶܐ. ܘܰܐܕܝܰܘܡܰܐ ܡܫܰܠܰܛܛܐ ܝܐ ܐܰܥܠܰܝܝܶܗ. ܐܰܩ ܩܷܪܝܰܘܳܬ݂ܶܐ ܕܒܶܬ݂ܪܝܫܶܐ ܟܘܠܠܗ ܟ݂ܰܠܷܢܘܰܐ ܔܓ݂ܶܪ ܡܶܢܰܗ. ܐܰܪܟܰܚ ܟܝܬ ܚܶܕ݂ܳܪܰܗ ܐܝ ܩܪܝܬ݂ܐ ܕܟܰܦܪܳܐ ܐܝ ܬܰܚܬܰܝܬܐ ܡܘ ܓܰܪܷܒܝܳܐ، ܘܐܷܚܘܐ ܡܘ ܡܰܕܷܢܚܐ، ܐܝ ܕܰܝܪܐ ܕܡܳܪܝ̱ ܡܰܠܟܶܐ، ܡܘ ܬܰܝܷܡܢܐ ܐܷܫܡܐ ܠܰܠܬܰܚܬܷܪ ܡܝ ܕܰܝܪܐ ܒܘ ܬܰܝܷܡܢܳܐ ܟܝܬ ܐܰܩ ܩܷܪܝܰܘܳܬ݂ܶܐ ܕܘ ܣܶܕܰܪܝ، ܕܚܰܪܒܰܬ݂ܡܷܫܟܶܐ ܘܒܰܕܷܒܒܶܐ. ܐܘ ܐܷܫܡܐ ܕܰܐܪܟܰܚ ܘܐܘ ܡܰܟܬ݂ܰܒܙܰܒܢܰܝܕ݂ܰܗ ܠܰܝܬܐ ܝܕ݂ܰܥܬܐ ܓ݂ܰܠܱܒܶܐ ܥܰܠ ܐܘ ܡܰܟܬܰܒܙܰܒܢܳܐ ܕܰܐܪܟܰܚ ܐܝ ܩܪܝܬ݂ܐ. ܐܶܠܐ ܟܳܐܬ݂ܶܐ ܐܷܫܡܰܗ ܒܷܟܡܐ ܕܷܟܟܳܬ݂ܶܐ. ܒܕܘܟܬ݂ܐ ܟܝܬ ܟܬ݂ܝܘܐ ܒܗܷܢ ܟܬ݂ܰܘܝܳܬ݂ܶܐ ܥܰܬܝܩܶܐ ܕܡܶܩܷܡ ܡܶܐ ܡܫܝܚܐ ܟܳܡܰܚܘܶܐ ܕܰܐܪܟܰܚ ܥܰܡܝܪܐ ܒܝ ܫܰܬܐ ܕܰܢ ܐܰܠܦܐ ܡܐ ܘܐܰܪܒܰܥ ܘܥܷܣܪܝ ܡܶܩܷܡ ܡܶܐ ܡܫܝܚܐ ܡܶܐ ܬܪܶܐ ܦܰܪܨܘܦܶܐ ܕܟܷܬܝܐ ܐܷܫܡܰܝܝܶܗ ܝܘܚܰܢ ܘܚܰܢܢܶܐ. ܒܕܘܟܬ݂ܐ ܚܪܶܬܐ ܟܳܐܬ݂ܶܐ ܐܷܫܡܶܗ ܕܕܘܟܬ݂ܐ ܟܬ݂ܝܘܐ ܟ݂ܘܕ ܐܰܪܟܘܚܘ ܒܰܟ ܟܬ݂ܰܘܝܳܬ݂ܶܐ ܕܰܒ ܒܰܨܡܳܪܶܐ ܡܘ ܙܰܒܢܐ ܕܰܢ ܐܰܟܰܕܳܝܶܐ ܒܘ ܕܳܪܐ ܕܰܬ ܬܷܫܥܐ ܕܡܶܩܷܡ ܡܶܐ ܡܫܝܚܐ. ܗܰܪܟܶܐ ܟܳܡܰܚܘܶܐ ܕܘ ܐܷܫܡܐ ܕܰܐܪܟܰܚ ܟܷܬܘܰܐ ܗܶܫ ܡܶܩܷܡ ܡܶܐ ܡܫܝܚܐ. ܒܘ ܙܰܒܢܐ ܕܰܢ ܐܰܟܰܕܳܝܶܐ ܐܝ ܩܪܝܬ݂ܐ ܗܰܘܟ݂ܰܐ ܡܷܩܪܶܘܰܐ. ܡܰܘܟ݂ܰܐ ܟܳܡܰܚܘܶܐ ܕܠܐ ܟܷܫܠܐ ܐܝ ܩܪܝܬ݂ܐ ܥܰܡܝܪܐ ܒܰܙ ܙܰܒܢܶܐ ܥܰܬܝܩܶܐ ܝܰܥܢܝ ܡܶܩܷܡ ܡܶܐ ܡܫܝܚܐ. ܒܷܬ݂ܷܪ ܡܶܐ ܡܫܝܚܐ ܣܬܶܐ ܟܳܐܬ݂ܶܐ ܐܷܫܡܰܗ ܒܘ ܙܰܒܢܐ ܕܥܰܡܝܪܐ ܐܝ ܕܰܝܪܐ ܕܡܳܪܝ̱ ܡܰܠܟܶܐ ܒܘ ܕܳܪܐ ܪܒܝܥܳܝܐ ܐܰܘ ܚܡܝܫܳܝܐ ܟ݂ܘܕ ܕܟܳܐܬ݂ܶܐ ܒܝ ܫܥܝܬ݂ܐ ܕܡܳܪܝ̱ ܡܰܠܟܶܐ ܘܕܡܳܪܝ̱ ܓܰܒܪܝـܝܠ ܘܒܫܷܥܝܳܬ݂ܶܐ ܚܪܶܢܶܐ ܐܰܘ ܒܕܷܟܟܳܬ݂ܶܐ ܚܪܶܢܶܐ. ܟܳܡܰܚܘܶܐ ܒܘ ܙܰܒܢܐ ܕܥܰܡܝܪܐ ܐܝ ܕܰܝܪܐ ܕܡܳܪܝ̱ ܡܰܠܟܶܐ ܐܝ ܩܪܝܬ݂ܐ ܥܰܡܷܪܬܳܘܰܐ ܘܪܰܒܬ݂ܳܘܰܐ. ܐܰܪܟܰܚ ܢܰܩܩܰܘܰܬ ܓ݂ܰܠܰܒܶܐ ܝܰܩܝܕ݂ܐ ܘܚܰܪܝܘܐ. ܒܕܘܟܬ݂ܐ ܟܝܬ ܟܬ݂ܝܘܐ ܕܟܳܐܡܷܪ: ܒܝ ܫܰܬܐ ܕܰܢ ܐܰܪܒܰܥܡܐ ܘܚܕ݂ܐ ܐܰܦ ܦܳܪܣܳܝܶܐ ܡܰܚܷܪܘܳܘܰܠܠܶܗ. ܐܶܠܐ ܟܘܠ ܕܚܘܪܘܳܘܰܐ ܢܰܩܩܰܐ ܚܪܶܬܐ ܡܰܥܷܡܪܝܘܰܝܠܰܗ ܐܰܢ ܢܳܫܶܐ ܕܝ ܩܪܝܬ݂ܐ. ܘܢܰܩܩܰܐ ܚܪܶܬܐ ܟܳܡܰܚܘܶܐ ܐܘ ܡܰܟܬ݂ܰܒܙܰܒܢܐ ܕܥܰܡܝܪܐ ܐܝ ܩܪܝܬ݂ܐ ܒܘ ܕܳܪܐ ܕܰܫ ܫܘܰܥܣܰܪ. ܐܝ ܩܪܝܬ݂ܐ ܗܘܠ ܐܰܕܝܰܘܡܰܐ ܦܰܝـܝܫܐ ܥܰܡܷܪܬܐ ܘܠܳܐ ܟ݂ܰܠܝܐ ܬܰܘܕܝ ܠܡܳܪܝܐ. ܔܓ̣ܶܪ ܡܶܐ ܙܰܒܢܐ ܟܰܪܝܐ ܟ݂ܕܘ ܣܰܝܦܐ ܐܰܘ ܙܰܒܢܶܐ ܚܪܶܢܶܐ ܗܰܘܟ݂ܰܐ ܥܰܣܩܶܐ. ܟ݂ܘܕ ܓ݂ܰܠܰܒܶܐ ܡܰܩ ܩܷܪܝܰܘܳܬܶܐ ܚܪܶܢܶܐ ܐܰܪܟܰܚ ܣܬܶܐ ܡܚܰܠܰܦܠܰܗ ܐܷܫܡܳܢܶܐ ܡܶܐ ܙܰܒܢܐ ܠܙܰܒܢܐ. ܐܘ ܐܷܫܡܐ ܥܰܬܝܩܐ ܟ݂ܘܕ ܚܙܶܠܰܢ ܠܰܠܥܰܠ ܟܳܡܝܕ݂ܰܥ ܟ݂ܘܕ ܐܰܪܟܘܚܘ ܘܡܶܢܶܗ ܐܰܬ݂ܝ ܐܰܪܟܰܚ. ܐܶܠܐ ܐܝ ܩܪܝܬ݂ܐ ܩܰܪܝܐ ܣܬܶܐ ܚܰܪܒܰܬܐܰܝܠܶܐ ܐܘ ܟ݂ܰܪܰܒܰܠܶܐ ܟ݂ܘܕ ܟܷܐܡܡܝ ܒܘ ܛܘܪܳܝܐ ܕܐܰܕܝܰܘܡܰܐ. ܟܳܡܰܚܘܶܐ ܥܰܠ ܕܦܰܝـܝܫܐ ܚܰܘܬܐ ܒܙܰܒܢܐ ܘܗܰܘܝܐ ܚܰܪܒܬ݂ܐ ܕܰܢ ܐܰܝܠܶܐ ܩܷܪܝܰܠܠܶܗ ܗܰܘܟ݂ܰܐ. ܘܐܰܕܝܰܘܡܰܐ ܟܳܡܝܕ݂ܳܥܐ ܒܘ ܙܳܝܘܕܐ ܒܘ ܐܷܫܡܐ ܕܟ݂ܰܪܰܒܰܠܶܐ، ܐܶܠܐ ܐܰܢ ܢܳܫܶܐ ܕܟܳܩܳܪܷܠܠܰܗ ܐܰܪܟܰܚ ܣܬܶܐ ܠܰܬܢܶܐ ܐܷܫܡܐ ܕܝܠܳܢܳܐܝܬ݂ ܒܘ ܙܰܒܢܰܢܐ . ܐܰܪܟܰܚ ܒܘ ܡܰܟܬ݂ܰܒܙܰܒܢܐ ܩܰܪܝܘܐ ܐܰܪܟܰܚ ܚܰܪܝܘܐ ܢܰܩܠܰܘܰܬ ܓ݂ܰܠܰܒܶܐ ܡܰܓ ܓܷܕܫܶܐ ܕܰܐܬ݂ܷܢ ܐܰܥܠܰܗ. ܗܰܟܟܰܐ ܡܰܦ ܦܳܪܣܳܝܶܐ ܘܗܰܟܟܰܐ ܣܬܶܐ ܡܰܥ ܥܰܡܶܐ ܚܪܶܢܶܐ. ܒܘ ܙܰܒܢܐ ܩܰܪܝܘܐ ܗܝܝܰܐ ܣܬܶܐ ܟ݂ܘܕ ܕܰܩ ܩܷܪܝܰܘܳܬ݂ܶܐ ܚܪܶܢܶܐ ܕܰܣ ܣܘܪܝܳܝܶܐ ܩܰܝܷܬ݂ܠܰܗ ܡܚܰܝܬܐ ܒܷܫܬܐ ܕܠܐ ܢܝܚܐ ܟ݂ܘܕ ܐܝ ܥܰܕܶܐ ܗܘܠ ܠܰܢ ܐܷܫܢܶܐ ܚܰܪܳܝܰܢܝ. ܒܘ ܣܰܝܦܐ ܐܰܢ ܢܳܫܶܐ ܕܰܐܪܟܰܚ ܠܰܝـܝܡܝܘܰܐ ܒܡܳܪܝ̱ ܡܰܠܟܶܐ ܥܰܡ ܢܳܫܶܐ ܓ݂ܰܠܰܒܶܐ ܡܰܩ ܩܷܪܝܰܘܳܬ݂ܶܐ ܕܒܶܝܬ݂ܪܝܫܶܐ ܘܡܰܩ ܩܷܪܝܰܘܳܬ݂ܶܐ ܚܪܶܢܶܐ ܕܘ ܡܰܕܷܒܪܐ، ܘܡܰܣܬܰܪܪܶܗ ܪܘܚܰـܝـܝܶـܗ ܬܰܡܐ. ܒܷܬ݂ܷܪ ܡܷܐ ܕܟܰܠܝ ܐܘ ܣܰܝܦܐ ܐܷܫܡܐ ܐܷܫܡܐ ܡܰܠܬܰܡܡܶܗ ܪܘܚܰـܝـܝܶـܗ ܘܝܰܬܝܘܝ ܢܰܩܩܰܐ ܚܪܶܬܐ ܒܝ ܩܪܝܬ݂ܐ. ܟܷܐܡܡܝ؛ ܟܷܬܘܰܐ ܒܘ ܙܰܒܢܐ ܕܘ ܣܰܝܦܐ ܫܰܘܥܝ ܝܰܩܪܳܬ݂ܶܐ ܒܰܐܪܟܰܚ. ܟܰܦܢܳܘܰܐ، ܠܰܬܘܰܠܠܶܗ ܡܶܕܶܐ ܠܘ ܥܰܡܐ ܡܫܝـܚܳـܝܐ ܕܳܐܟ݂ܷܠ ܟ݂ܕܝ ܥܰܕܶܐ ܘܕܫܳܬܶܐ. ܐܰܢ ܢܳܫܶܐ ܡܰܫܷܠܡܳܢܶܐ ܕܚܶܕܷܪ ܐܰܡ ܡܫܺܝܚܳܝܶܐ ܡܰܥܷܔܙܝܘܰܢܢܶܗ، ܡܰܘܟ݂ܰܐ ܗܷܢ ܡܰܢܢܶܗ ܢܰܦܝܩܝ ܡܝ ܩܪܝܬ݂ܐ ܘܣܰܬܝܪܝ ܒܕܷܟܟܳܬ݂ܶܐ ܡܚܰܠܦܶܐ ܟ݂ܘܕ ܣܛܰܡܒܷܠ ، ܣܥܶܪܬ، ܒܝܢܓܳܠ ܘܕܷܟܟܳܬ݂ܶܐ ܚܪܶܢܶܐ ܐܰܝܟܐ ܕܩܰܕܝܪܝ ܣܷܬܪܝ. ܘܠܳܐ ܬ݂ܢܝـܚـܝ ܐܰܢ ܢܳܫܶܐ ܕܝ ܩܪܝܬ݂ܐ ܗܘܠ ܠܰܥ ܥܷܣܪܝ ܐܷܫܢܰܢܝ ܐܰܚ ܚܰܪܳܝܶܐ. ܒܷܬ݂ܷܪ ܡܘ ܣܰܝܦܐ ܡܰܠܬܰܡܘܰܠܠܶܗ ܪܘܚܰـܝـܝܶـܗ ܐܷܫܡܐ ܐܶܠܐ ܒܰܢ ܐܷܫܢܶܐ ܕܰܫ ܫܰܘܥܝ ܗܘܠ ܠܰܬ ܬܷܫܥܝ ܐܝ ܩܪܝܬ݂ܐ ܟ݂ܰܠܝܐ ܡܶܐ ܓ݂ܰܠܰܒܶܐ ܥܳܡܘܪܶܐ ܡܶܐ ܕܝܕ݂ܰܗ. ܗܝܰܐ ܣܬܶܐ ܛܰܦܝܘܰܝܠܰܗ ܐܘ ܟܶܘܐ ܕܘ ܡܰܙܠܐ ܕܠܰܘܪܘܦ݁ܰܐ ܟ݂ܘܕ ܕܰܩ ܩܷܪܝܰܘܳܬ݂ܶܐ ܚܪܶܢܶܐ. ܘܢܰܩܝܨܝܘܰܐ ܐܰܥ ܥܳܡܘܪܰܝܕ݂ܰܗ ܓ݂ܰܠܰܒܶܐ، ܘܐܝ ܐܰܝܟܰܢܳܝܘܬ݂ܐ ܕܝ ܩܪܝܬ݂ܐ ܠܰܬܘܰܐ ܛܰܘܬܐ ܘܐܰܚ ܚܰܝܶܐ ܡܰܛܷܢܘܰܐ ܠܩܷܢܛܐ ܪܰܒܐ ܘܗܰܘܶܢܘܰܐ ܓ݂ܰܠܰܒܶܐ ܨܰܥܒܐ. ܡܰܛܝܳܘܰܐ ܐܝ ܩܪܝܬ݂ܐ ܠܷܟ݂ܠܳܝܐ. ܦܰܝܷܫܘܰܐ ܒܝ ܩܪܝܬ݂ܐ ܐܷܫܡܳܬܷܪ ܡܶܐ ܬܠܶܬ݂ܝ ܒܳܬܶܐ ܒܰܐܝܟܰܢܳܝܘܬ݂ܐ ܓ݂ܰܠܰܒܶܐ ܨܰܥܒܳܐ. ܐܰܠܳܗܐ ܡܰܣܷܬܪܝܠܶܗ، ܘܡܣܰܝܒܰܪܪܶܗ ܘܠܳܐ ܡܰܟܠ݂ܰܠܠܶܗ ܐܝ ܩܪܝܬ݂ܐ ܟ݂ܘܕ ܕܰܩ ܩܷܪܝܰܘܳܬ݂ܶܐ ܕܚܶܕ݂ܳܪܰܝـܝܶܗ. ܒܘ ܡܶܕܰܢܐ ܐܰܢ ܐܰܪܟܰܚܳܝܶܐ ܢܰܦܝܩܝ ܓܰܒܳܪܶܐ. ܐܰܥ ܥܝܬܳܬ݂ܶܐ ܘܰܕ ܕܰܝܪܶܐ ܕܷܒܓܰܘܰܗ ܘܕܚܶܕܳܪܰܗ ܕܰܐܪܟܰܚ ܐܰܪܟܰܚ؛ ܟ݂ܘܕ ܡܷܪܠܰܢ ܩܪܝܬ݂ܐ ܥܰܬܷܩܬܐ ܝܐ ܕܥܰܡܝܪܐ ܡܶܩܷܡ ܡܶܐ ܡܝܚܐ. ܐܘ ܥܰܡܰܝܕ݂ܰܗ ܡܰܩܒܶܠܶܗ ܐܝ ܡܫܝܚܳܝܘܬ݂ܐ ܒܘ ܕܳܪܐ ܕܰܢ ܐܰܪܒܥܐ ܒܘ ܙܰܒܢܐ ܕܡܳܪܝ ܡܰܠܟܶܐ ܐܘ ܩܰܕܝܫܐ ܕܡܰܥܡܰܪܠܶܗ ܐܝ ܕܰܝܪܐ ܒܘ ܩܽܘܪܘܐ ܕܝ ܩܪܝܬ݂ܐ. ܕܰܐܕܝܰܘܡܰܐ ܟܳܡܝܕ݂ܳܥܐ ܒܷܐܫܡܶܗ ܘܦܰܝـܝـܫܐ ܕܰܝܪܐ ܡܫܰܡܰܗܬܐ ܗܘܠ ܠܰܐܕܝܰܘܡܰܐ. ܐܝ ܕܰܝܪܰܬ݂ܶܐ ܟܳܦܰܝܫܐ ܒܘ ܬܰܝܡܢܐ ܕܝ ܩܪܝܬ݂ܐ ܘܡܶܩܷܡ ܪܰܒܬܷܪ ܡܘ ܡܶܕܶܐ ܕܟܳܡܰܚܷܘܝܐ ܐܰܕܝܰܘܡܰܘܰܐ. ܐܶܠܐ ܕܷܪܝܳܘܰܠܠܶܗ ܘܡܰܚܷܪܘܰܠܠܶܗ ܢܰܩܩܰܘܰܬ ܓ݂ܰܠܰܒܶܐ. ܒܝ ܚܘܒܐ ܘܒܘ ܛܢܳܢܐ (ܓ݂ܝܪܰܐ) ܕܰܢ ܢܳܫܶܐ ܕܝ ܩܪܝܬ݂ܐ ܚܰܒܝܒܬܐ ܕܰܐܪܟܰܚ ܢܰܩܩܰܐ ܚܪܶܬܐ ܡܰܥܷܡܪܝܘܰܝܠܰܗ. ܐܝ ܕܰܝܪܐ ܒܙܰܒܢܐ ܥܰܡܷܪܬܳܘܰܐ ܒܡܰܘܳܬ݂ܶܐ ܕܕܰܝܪܳܝܶܐ. ܐܰܕ ܕܰܝܪܳܝܶܐ ܕܒܝ ܕܰܝܪܐ ܙܰܒܢܐ ܝܰܪܝܟ݂ܐ ܡܳܠܰܦܦܶܗ ܐܘ ܕܰܪܒܐ ܕܷܡܫܝܚܐ ܠܢܳܫܶܐ ܓ݂ܰܠܰܒܶܐ. ܘܗܰܘܝܐ ܒܙܰܒܢܐ ܟܘܪܣܝܐ ܠܝ ܚܰܣܝܘܬ݂ܐ ܕܒܶܬ݂ܪܝܫܶܐ ܕܷܒܛܘܪܐܝܙܠܐ. ܘܐܘ ܙܰܒܢܐ ܕܝܰܬܷܘ ܐܘ ܚܰܣܝܐ ܩܰܡܳܝܐ ܒܝ ܕܰܝܪܐ ܕܡܳܪܝ̱ ܡܰܠܟܶܐ ܥܰܠ ܐܘ ܟܘܪܣܝܐ ܕܝ ܚܰܣܝܘܬ݂ܐ ܕܒܶܬ݂ܪܝܫܶܐ ܒܘ ܕܳܪܐ ܕܰܚ ܚܰܡܫܰܥܣܰܪܘܰܐ. ܝܰܥܢܝ ܒܕܶܠܰܗ ܐܝ ܚܰܣܝܘܬ݂ܐ ܒܝ ܕܰܝܪܐ ܒܝ ܫܰܬܐ ܕܰܢ ܐܰܠܦܳܐ ܰܐܪܒܰܥܡܐ ܘܫ̰ܰܥ ܫܰܘܥܝ. ܒܷܬ݂ܷܪ ܡܘ ܚܰܣܝܐ ܩܰܡܳܝܐ ܝܰܬܝܘܝ ܬܠܳܬܰܥܣܰܪ ܚܰܣܝܶܐ ܚܪܶܢܶܐ ܥܰܠ ܐܘ ܟܘܪܣܝ ܕܝ ܚܰܣܝܘܬ݂ܐ ܒܡܳܪܝ̱ ܡܰܠܟܶܐ. ܐܘ ܚܰܣܝܐ ܚܰܪܳܝܐ ܕܟܷܬܘܰܐ ܐܷܫܡܶܐ ܡܳܪܝ̱ ܣܶܘܶܝܪܝܳܘܣ ܨܰܘܡܶܐ ܝܐ. ܡܫܰܢܶܠܶܗ ܒܰܢ ܐܰܠܦܐ ܫ̰ܰܥܡܐ ܘܫܶܬ݂ ܥܷܣܪܝ. ܐܝ ܕܰܝܪܐ ܡܰܪ ܪܕܘܦܝܶܐ ܕܰܐܬ݂ܷܢ ܐܰܥܠܰܗ ܦܰܝـܝܫܐ ܡܶܐ ܙܰܒܢܐ ܠܙܰܒܢܐ ܟ݂ܠܝܬ݂ܐ ܐܶܠܐ ܐܰܓ݂ܠܰܿܒ ܥܰܡܷܪܬܳܘܰܐ. ܐܰܕܝܰܘܡܰܐ ܣܬܶܐ ܥܰܡܷܪܬܐ ܝܳܐ ܒܷܬܪܶܐ ܕܰܝܪܳܝܶܐ ܘܬܰܪܬܶܐ ܕܰܝܪܳܝܳܬ݂ܶܐ. ܘܟܝܬ ܐܶܒܰܗ ܡܕܰܝܠܳܢܐ ܕܟܷܡܥܰܘܷܢ ܠܰܥ ܥܳܡܘܪܶܐ ܕܝ ܕܰܝܪܐ ܒܘ ܫܘܓ݂ܠܰܝܕ݂ܰܗ ܘܚܰܡܫܐ ܝܳܠܘܦܶܐ ܕܟܳܩܳܪܶܢ ܒܝ ܕܰܝܪܐ. ܐܝ ܥܝܬܐ ܕܟܷܬܝܐ ܓ݂ܰܠܰܒܶܐ ܡܫܰܡܰܗܬܐ ܒܝ ܩܪܝܬ݂ܐ، ܐܝ ܥܝܬܐ ܕܡܳܪܝ̱ ܐܰܦܪܶܝܡ ܘܡܳܪܝ̱ ܬܶܐܘܕܳܘܪܳܘܣ ܝܐ. ܐܝ ܥܝܬܰܬ݂ܶܗ ܡܚܰܕܬ݂ܐ ܗܰܢܝ ܟܡܐ ܐܷܫܢܶܐ ܡܶܐ ܚܰܬ݂ܐ ܘܡܰܥܷܡܪܐ ܘܗܰܘܝܐ ܥܝܬܐ ܫܰܦܷܪܬܐ ܘܚܠܝܬ݂ܐ. ܐܝ ܥܝܬܐ ܕܟܳܡܝܨܰܠܶܐ ܐܶܒܰܗ ܐܰܕܝܰܘܡܰܐ ܒܝ ܩܪܝܬ݂ܐ ܗܰܬ݂ܶܐ ܒܰܣ ܝܳܐ. ܔܓ݂ܶܪ ܡܝ ܥܝܬܐ ܕܡܳܪܝ̱ ܐܰܦܪܶܝܡ ܘܡܳܪܝ̱ ܬܶܐܘܳܕܳܪܳܣ، ܐܰܥ ܥܝܬܳܬ݂ܶܐ ܚܪܶܢܶܐ ܠܰܬܢܶܐ ܒܰܐܝܟܰܢܳܝܘܬ݂ܐ ܕܡܝܨܰܠܶܐ ܐܰܦ݁ܦ݁ܶܗ، ܗܰܢܝ ܢܶܐ: ܥܝܬܐ ܕܟܷܬܝܳܐ ܒܓܰܘܰܗ ܕܝ ܩܪܝܬ݂ܐ ܐܝ ܥܝܬܐ ܕܝܳܠܕܰܬ݂ ܐܰܠܳܗܐ، ܥܝܬܐ ܕܘܰܪܕܐ ܕܟܳܦܰܝܫܐ ܒܘ ܡܰܥܷܪܒܐ ܕܝ ܩܪܝܬ݂ܐ ܘܟܝܒܰܗ ܚܰܡܫܳܐ ܟܝܠܳܡܰܬܪܶܐ ܪܰܚܘܩܬܐ ܡܝ ܩܪܝܬ݂ܐ، ܘܰܐܕܝܰܘܡܰܐ ܚܰܘܬܐ ܝܳܐ. ܐܝ ܥܝܬܐ ܕܩܘܒܬ݂ܐ ܟܰܠܰܗ ܒܘ ܓܰܪܷܒܝܐ ܕܝ ܩܪܝܬ݂ܐ ܠܰܠܬܰܚ ܡܶܐ ܟܰܦܪܐ ܐܝ ܬܰܚܬܰܝܬܐ، ܗܰܬ݂ܶܐ ܣܬܶܐ ܟܝܒܰܗ ܚܶܕܷ݂ܪ ܚܰܡܫܐ ܟܝܠܳܡܰܬܪܶܐ ܪܰܚܘܩܬܐ ܡܝ ܩܪܝܬ݂ܐ. ܐܷܫܡܳܢܶܐ ܕܰܛ ܛܘܪܳܢܶܐ ܘܕܰܕ ܕܷܟܟܳܬ݂ܶܐ ܕܟܝܬ ܒܝ ܩܪܝܬ݂ܐ ܟܝܬ ܛܘܪܳܢܶܐ ܓ݂ܰܠܰܒܶܐ ܚܶܕ݂ܷܪ ܐܝ ܩܪܝܬ݂ܐ ܕܰܐܪܟܰܚ، ܐܶܠܐ ܐܰܡ ܡܫܰܡܗܰܬ݂ܬ݂ܶܗ ܗܰܢܝ ܕܟܷܬܢܶܐ ܟܬ݂ܝܘܶܐ ܗܰܪܟܶܐ ܠܰܠܬܰܚ ܢܶܐ. ܒܝ ܩܰܡܰܝܬܐ ܒܳܕܝܢܰܐ ܡܶܐ ܛܘܳܥܶܗ ܕܝܰܘܡܐ ܕܝ ܩܪܝܬ݂ܐ. ܒܷܛ ܛܘܳܥܶܗ ܕܝܰܘܡܐ ܕܝ ܩܪܝܬ݂ܐ ܟܝܬܐ ܐܰܛ ܛܘܪܳܢܰܢܝ: ܐܰܟ ܟܰܪܡܶܐ ܕܰܩ ܩܰܠܰܔܶܐ، ܐܘ ܫܰܠܘܐ ܕܤܰܛܝـܝܐ، ܐܘ ܫܰܠܘܐ ܕܰܛ ܛܰܘܥܘܢܶܐ، ܐܘ ܫܰܠܘܐ ܕܘ ܒܰܪܰܢ، ܐܰܟ ܟ݂ܰܪܰܒܡܷܫܟܰܬ، ܐܰܟ ܟܘܪܪܰܬ، ܐܝ ܥܰܩܳܒܐ، ܐܰܕ ܕܳܪܳܬ݂ܶܐ، ܐܰܩ ܩܰܘܪܶܐ ܕܒܶܐ ܩܰܣܷܡܐ، ܫܟܰܦܬܡܝܪܶܐ، ܐܝ ܙܳܢܔܷܟܶܐ، ܐܝ ܓܳܠܶܐ ܕܘ ܥܰܕܕܐ، ܐܘ ܢܰܩܘܐ ܕܘ ܡܝܪܙܰܐ، ܐܰܒ ܒܰܪܪܰܗܶܐ، ܐܘ ܓܗܳܪ ܕܰܒ ܒܘܓ݂ܪܶܐ، ܘܐܘ ܓܗܳܪ ܕܘ ܣܶܡܐ. ܠܦܰܠܓܶܗ ܕܝܰܘܡܐ ܕܝ ܩܪܝܬ݂ܐ ܣܬܶܐ ܟܝܬܐ ܐܰܛ ܛܘܪܳܢܰܢܝ. ܐܰܟ ܟܰܪܡܶܐ ܕܝ ܪܰܘܡܐ، ܐܰܟ ܟܰܪܡܶܐ ܕܰܚ ܚܰܠܦܰܬ، ܐܝ ܫܝܫܰܠܬܐ، ܐܘ ܛܘܪܐ ܕܝ ܗܰܫܫܰܪܰܐ ܐܝ ܚܰܩܠܐ ܕܡܳܪܝ̱ ܣܝܣܝ، ܐܘ ܓܳܙܝܪܐ ܕܘ ܫܰܡܳܫܐ، ܐܝ ܢܘܘܰܝܬܐ ܕܒܰܐܒܷܢ، ܘܐܝ ܫܟܰܦܬܶܐ ܕܫܶܟܷܟܐ. ܡܶܐ ܣܠܳܩܶܗ ܕܝܰܘܡܐ ܕܝ ܩܪܝܬ݂ܐ ܟܝܬܐ ܐܰܕ ܕܘܟܳܬ݂ܰܢܝ؛ ܐܰܟ ܟܰܪܡܶܐ ܕܘ ܫܰܠܘܐ ܕܓܰܪܷܒ، ܐܰܪ ܪܰܡܰܬܶܠܰܬ، ܐܝ ܥܰܪܘܳܐ ܕܷܓ̣ܕܝ، ܐܘ ܫܰܠܘܐ ܥܰܡܘܩܐ، ܐܘ ܫܷܗܰܪ ܕܘ ܚܡܳܪܳܐ، ܐܰܟ ܟܰܪܡܶܐ ܕܩܰܪܥܶܐ ܕܰܓ ܓܘܒܶܐ، ܐܰܟ ܟܰܪܡܶܐ ܕܝ ܢܘܘܰܝܬܐ ܕܒܶܐ ܩܰܫܐ ܬܘܡܰܐ، ܐܰܕ ܕܶܘܳܪܶܐ، ܘܰܕ ܕܰܓ̣ܠܶܐ. ܡܘ ܓܰܒܐ ܕܝ ܗܰܘܰܐ ܟܘܪܪܶܐ ܕܝ ܩܪܝܬ݂ܐ ܣܬܶܐ ܟܝܬܐ ܐܰܕ ܕܘܟܳܬ݂ܰܢܝ؛ ܐܘ ܫܰܠܘܐ ܕܒܶܐ ܡܥܰܪܳܝܐ، ܐܘ ܕܝܝܰܪ ܕܰܚ ܚܰܪܰܡܝـܝܶܐ، ܐܝ ܚܰܪܦ݁ܬ݂ܐ، ܐܰܗ ܗܰܘܰܬ ܕܘ ܟ݂ܘܪܝ، ܐܘ ܫܰܠܘܐ ܕܘ ܨܰܠܡܐ، ܐܰܕ ܕܰܙܓܝܪܰܢܰܬ، ܐܝ ܓܘܗܰܪܪܶܐ، ܐܘ ܢܰܨܘܐ ܕܘ ܓܘܪܢܐ ܕܘ ܓܰܘܐ، ܐܰܒ ܒܰܢܰܬ، ܐܘ ܩܘܨܪܐ ܕܥܝܣܰܐ ܓܰܠܠܶܐ، ܐܘ ܫܰܠܘܐ ܕܝ ܛܰܒܙܐ، ܘܐܝ ܐܰܪܥܐ ܕܘ ܦܰܚܘܠܐ. ܐܝ ܐܰܝܟܰܢܳܝܘܬ݂ܐ ܕܰܐܕܝܰܘܡܰܐ ܐܰܕܝܰܘܡܰܐ ܐܝ ܩܪܝܬ݂ܐ، ܚܕ݂ܐ ܡܰܩ ܩܷܪܝܰܘܳܬ݂ܶܐ ܪܰܒܶܐ ܕܟܷܬܢܶܐ ܥܰܡܝܪܶܐ ܒܛܘܪܥܰܒܕܝܢ ܝܐ. ܘܬܰܘܕܝ ܠܡܳܪܝܐ ܥܰܡܷܪܬܐ ܝܐ ܒܘ ܥܰܡܐ ܣܘܪܝܳܝܐ ܘܠܰܝܬ ܢܳܫܶܐ ܡܰܥ ܥܰܡܶܐ ܚܪܶܢܶܐ ܐܶܒܰܗ. ܗܝܝܰܐ ܣܬܶܐ ܟ݂ܘܕ ܐܰܩ ܩܷܪܝܰܘܳܬ݂ܶܐ ܚܪܶܢܶܐ ܕܒܶܬ݂ܪܝܫܶܐ ܒܷܠܚܘܕ݂ܶܐ ܡܫܝܚܳܝܶܐ ܟܳܝܳܬܰܘ ܐܶܒܰܗ ܡܘ ܙܰܒܢܐ ܕܡܳܪܝ̱ ܡܰܠܟܶܐ، ܝܰܥܢܝ ܡܘ ܕܳܪܐ ܕܰܢ ܐܰܪܒܥܐ ܗܘܠ ܐܘܥܕܐ. ܩܪܝܬ݂ܐ ܝܐ ܚܠܝܬ݂ܐ ܕܟܳܡܝܗܰܒܒܐ ܒܰܢ ܢܳܫܶܐ. ܟܳܫܷܒܗܐ ܠܝ ܬܰܪܢܳܓ݂ܘܠܬܐ ܕܟܳܣܰܝܡܐ ܕܘܟܬ݂ܰܗ ܘܟܷܡܒܰܣܡܳܠܰܗ ܘܟܳܣܰܝܡܐ ܙܳܓ݂ܶܐ ܘܟܳܡܰܠܝܡܰܠܠܶܗ ܚܶܕ݂ܳܪܰܗ. ܗܰܘܟ݂ܰܐ ܣܬܶܐ ܐܰܪܟܰܚ ܟܳܡܰܠܝܡܐ ܐܰܢ ܐܰܒܢܶܐ ܕܝ ܩܪܝܬ݂ܐ ܚܶܕ݂ܳܪܰܗ ܘܟܳܡܝܫܰܘܫܛܐ ܓ݂ܰܠܰܒܶܐ ܘܟܳܝܷܪܘܐ ܒܰܒ ܒܳܬܶܐ ܘܒܰܢ ܢܳܫܶܐ ܕܟܷܡܒܰܣܡܝ ܕܘܟܬ݂ܰܝܝܶܗ ܘܟܳܡܰܥܷܡܪܝ ܐܝ ܩܪܝܬ݂ܐ. ܡܶܩܷܡ ܒܥܷܣܪܝ ܐܷܫܢܶܐ ܠܰܬܘܰܐ ܬܠܶܬ݂ܝ ܒܳܬܶܐ ܒܝ ܩܪܝܬ݂ܐ، ܐܰܕܝܰܘܡܰܐ ܟܝܬܐ ܐܶܒܰܗ ܚܰܡܫܐ ܐܷܫܬܝ ܒܳܬܶܐ ܒܝܩܰܪܝܳܬ݂ܶܐ ܪܰܒܶܐ ܬܰܘܕܝ ܠܡܳܪܝܐ. ܗܰܬ݂ܶܐ ܛܰܝܒܘܬ݂ܐ ܪܰܒܬܳܐ ܝܐ ܡܶܐ ܐܰܠܳܗܐ. ܐܰܪܟܰܚ؛ ܐܰܕܝܰܘܡܰܐ ܚܕ݂ܐ ܝܐ ܡܰܩ ܩܷܪܝܰܘܳܬ݂ܶܐ ܕܟܳܙܰܝܕܝ ܐܰܢ ܢܳܫܰܝܕ݂ܰܗ ܐܘ ܕܟܳܝܷܪܘܐ. ܐܰܥ ܥܳܡܘܪܰܝܕ݂ܰܗ ܐܰܠܳܗܐ ܡܳܙܰܕܕܶܗ، ܟܳܡܰܥܷܡܪܝ ܗܰܐ ܗܰܐ ܒܳܬܶܐ ܚܰܬ݂ܶܐ ܠܘ ܐܝܬܳܘܐ ܕܰܥ ܥܠܰܝܡܶܐ ܒܝ ܩܪܝܬ݂ܐ. ܐܘ ܫܘܫܳܛܐ ܕܝ ܩܪܝܬ݂ܐ ܝܰܘܡܐ ܒܘ ܝܰܘܡܐ ܟܳܡܰܚܘܶܐ ܐܰܥܠܰܗ. ܐܰܢ ܐܰܪܟܰܚܳܝܶܐ ܕܒܝ ܩܪܝܬ݂ܐ ܘܗܰܢܝ ܕܟܷܬܢܶܐ ܠܰܪܘܰܠ ܒܰܐܘܪܘܦ݁ܰܐ، ܡܘ ܛܢܳܢܐ ܘܡܝ ܐܰܘܝܘܬ݂ܐ ܕܟܷܬܬܶܗ ܥܰܡ ܚܕ݂ܳܕ݂ܶܐ ܟܳܐܒܷܢ ܐܝܕ݂ܳܐ ܒܐܝܕ݂ܳܐ ܘܟܷܡܥܰܘܢܝ ܚܕ݂ܳܕ݂ܶܐ ܘܟܳܣܰܝܡܝ ܦܘܠܚܳܢܐ ܛܰܘܐ ܠܘ ܫܘܫܳܛܐ ܕܝ ܩܪܝܬ݂ܐ. ܐܰܓ݂ܠܰܒ ܡܰܬ ܬܰܪܷܡܝܳܬ݂ܶܐ ܕܣܷܡܡܶܗ ܟܰܠܷܢ ܥܰܠ ܐܘ ܒܶܣܳܡܐ ܕܝ ܩܪܝܬ݂ܐ ܘܥܰܠ ܐܝ ܬܶܢܕ݂ܝܦܰܝܕܰܗ. ܡܚܰܕܰܬ݂ܬ݂ܶܗ ܐܝ ܥܝܬܐ ܪܰܒܬ݂ܐ ܕܡܳܪܝ̱ ܐܰܦܪܶܝܡ ܘܡܳܪܝ̱ ܬܶܐܘܳܕܳܪܳܣ ܘܡܷܪܘܰܠܠܶܗ ܘܣܝܡܰܠܠܶܗ ܥܝܬܐ ܫܰܦܷܪܬܐ. ܘܡܥܰܕܰܠܠܶܗ ܐܰܩ ܩܶܠܳܝܳܬ݂ܶܐ ܕܘ ܐܝܬܳܘܐ ܕܚܶܕܷ݂ܪ ܐܝ ܥܝܬܐ ܘܪܨܷܦܦܗ ܐܝ ܕܷܪܬܰܝܕ݂ܰܗ، ܘܒܢܰܠܠܶܗ ܒܶܝܬ݂ܣܷܠܝܶܐ ܚܰܬ݂ܶܐ ܒܓܰܒܐ ܡܶܐ ܕܝ ܕܷܪܬܐ. ܡܰܢܕܰܦܦܶܗ ܐܰܫ ܫܘܩܳܢܶܐ ܕܝ ܩܪܝܬ݂ܐ ܘܡܰܪܷܘܚܷܢܢܶܗ ܘܪܨܝܦܷܢܢܶܗ ܟܶܦܶܐ ܫܰܦܝܪܶܐ ܘܣܷܡܡܶܗ ܘܪܐ ܚܶܕ݂ܳܪܰܝܝܶܗ. ܐܰܫ ܫܘܩܳܢܶܐ ܥܝܩܶܐ ܕܠܐ ܩܷܕܪܝܘܰܐ ܐܰܪ ܪܰܕ݂ܳܝܳܬ݂ܶܐ ܕܡܗܰܠܟܝ ܐܰܦ݁ܦ݁ܶܗ ܡܰܪܷܘܚܷܢܢܶܗ ܘܡܥܰܕܠܷܢܢܶܗ ܫܰܦܝܪܐ. ܡܰܚܷܬܬܶܗ ܐܰܒܘܒܶܐ (ܒܳܪܝـܝܰܬ) ܬܰܚܬܝ ܐܰܪܥܐ ܘܣܷܡܡܶܗ ܐܰܓ݂ܘܓ݂ܐ (ܓܘܒܐ ܪܰܒܐ) ܠܰܡ ܡܰܝܶܐ ܥܔܝܩܶܐ ܕܝ ܩܪܝܬ݂ܐ ܘܡܷܦܩܷܢܢܶܗ ܠܰܪܘܰܠ. ܣܷܡܡܶܗ ܨܰܠܳܢ ܠܝ ܣܢܝܩܘܬ݂ܐ ܕܰܢ ܢܳܫܶܐ ܕܝ ܩܪܝܬ݂ܐ، ܠܰܡ ܡܷܫܬܰܘܳܬ݂ܶܐ ܘܠܰܚ ܚܰܓܶܐ ܚܪܶܢܶܐ. ܒܢܰܠܠܶܗ ܒܳܬܶܐ ܚܰܬ݂ܶܐ ܒܝ ܩܪܝܬ݂ܐ ܘܡܚܰܕܰܬ݂ܬ݂ܶܗ ܓ݂ܰܠܰܒܶܐ ܡܰܥ ܥܰܬܝܩܶܐ، ܘܡܰܫܦܰܪܪܶܗ ܐܰܕ ܕܷܪܬܳܬ݂ܶܐ ܕܰܒ ܒܳܬܶܐ، ܐܘ ܙܪܷܥܥܶܗ ܐܰܦ݁ܦ݁ܶܗ ܐܝܠܳܢܶܐ ܕܰܦ ܦܝܪܶܐ ܘܦܪܷܫܫܶܗ ܐܰܦ݁ܦ݁ܶܗ ܕܷܟܟܳܬ݂ܶܐ ܠܘ ܙܰܪܥܐ ܕܰܝ ܝܰܪܩܽܘܢܶܐ ܠܘ ܓܳܪܰܢ ܕܝ ܣܢܝܩܘܬ݂ܐ ܕܝ ܐܝܩܰܪܬ݂ܐ. ܫܰܘܥܝ ܒܳܬܶܐ ܡܚܰܕܷܰܬ݂ ܒܝ ܩܪܝܬ݂ܐ ܒܰܥ ܥܷܣܪܝ ܐܷܫܢܶܐ ܚܰܪܳܝܰܢܝ. ܐܰܓ݂ܠܰܒ ܡܰܒ ܒܳܬܶܐ ܡܰܥܷܡܪܷܢܢܶܗ ܕܚܳܙܷܢ ܐܝ ܣܢܝܩܘܬ݂ܐ ܕܰܥ ܥܠܰܝܡܶܐ ܘܰܥܠܰܝܡܳܬ݂ܶܐ ܕܝ ܩܪܝܬ݂ܐ. ܐܰܕܝܰܘܡܰܐ ܟܝܬ ܙܷܕ ܡܶܐ ܡܐ ܥܠܰܝܡܶܐ ܐܘ ܥܠܰܝܡܳܬ݂ܶܐ ܒܰܐܪܟܰܚ ܕܟܷܬܢܶܐ ܐܝ ܥܬܝܕ݂ܘܬ݂ܐ ܐܘ ܫܘܦܪܐ ܚܰܝܐ ܕܝ ܩܪܝܬ݂ܐ. ܠܐ ܕܷܡܰܘܙܰܕܢܐ ܐܠܐ ܕܡܰܚܘܶܢܐ ܐܘ ܫܪܳܪܐ ܘܐܘ ܫܘܫܳܛܐ ܡܰܦܷܨܚܳܢܐ ܕܟܳܘܶܐ ܒܝ ܩܪܝܬ݂ܐ ܡܒܰܪܰܟܬܰܬ݂ܶܐ. ܬܰܘܕܝ ܠܘ ܥܰܡܐ ܒܪܝܟ݂ܐ ܕܰܢ ܐܰܪܟܰܚܳܝܶܐ ܥܰܠ ܐܘ ܔܰܗܰܕ ܪܰܒܐ ܕܡܰܚܘܰܠܠܶܗ ܒܘ ܥܶܕܳܠܐ ܘܒܘ ܫܘܫܳܛܐ ܕܝ ܩܪܝܬ݂ܐ ܚܰܒܝܒܬܰܬ݂ܶܗ. ܐܰܚ ܚܰܝܶܐ ܕܰܐܕܝܰܘܡܰܐ ܒܝ ܩܪܝܬ݂ܐ ܐܰܚ ܚܰܝܶܐ ܒܝ ܩܪܝܬ݂ܐ ܐܰܕܝܰܘܡܰܐ ܐܰܓ݂ܠܰܒ ܥܰܠ ܐܝ ܐܰܟܳܪܘܬ݂ܐ، ܥܰܠ ܐܝ ܙܰܪܳܥܘܬ݂ܐ، ܥܰܠ ܐܘ ܣܝܳܡܐ ܕܰܚ ܚܰܝܘܳܬ݂ܐ، ܘܥܰܠ ܐܰܟ ܟܰܪܡܶܐ ܪܰܟܝܘܶܐ ܢܶܐ. ܒܰܚ ܚܰܪܳܝܳܬ݂ܰܢܝ ܒܷܬ݂ܷܪ ܡܷܐ ܕܰܢ ܢܳܫܶܐ ܕܝ ܩܪܝܬ݂ܐ ܗܰܘܷܠܠܶܗ ܡܟܳܢܘܬ݂ܐ ܠܘ ܒܷܢܝܳܢܐ ܕܰܒ ܒܳܬܶܐ، ܟܝܬ ܓ݂ܰܠܰܒܶܐ ܡܰܥ ܥܠܰܝܡܶܐ ܟܳܫܘܓ݂ܠܝ ܥܰܠ ܐܘ ܒܢܳܝܐ ܕܰܒ ܒܳܬܶܐ. ܘܟܝܬ ܗܷܢ ܡܰܢ ܢܳܫܶܐ ܕܝ ܩܪܝܬ݂ܐ، ܘܕܝܠܳܢܳܐܝܬ ܐܰܥ ܥܠܰܝܡܶܐ، ܟܷܐܙܙܷܢ ܠܘ ܨܰܝܕܳܐ. ܐܶܠܐ ܐܘ ܨܰܝܕܐ ܠܰܬܝܐ ܠܝ ܬܰܓܳܪܘܬ݂ܐ، ܒܰܣ ܟܷܡܕܰܒܷܪ ܗܷܢ ܡܝ ܣܢܝܩܘܬ݂ܐ ܕܘ ܒܰܨܪܐ ܠܘ ܡܘܟܠܐ ܕܝ ܐܝܩܰܪܬ݂ܐ ܕܗܷܢ ܡܰܒ ܒܳܬܶܐ. ܥܰܠ ܕܰܢ ܐܰܪܥܳܬ݂ܶܐ ܕܘ ܙܪܳܥܐ ܐܷܫܡܳܐ ܢܶܐ ܡܰܘܟ݂ܰܐ ܚܨܳܕܐ ܠܰܝܬ ܓ݂ܰܠܰܒܶܐ. ܟܳܙܷܪܥܝ ܚܷܡܨܶܐ، ܚܶܛܶܐ، ܣܥܳܪܶܐ، ܟܘܫܢܶܐ ܘܛܠܰܘܚܶܐ ܠܰܫܰܢ ܐܝ ܣܢܝܩܘܬ݂ܰܬ݂ܬ݂ܶܗ، ܐܘ ܚܨܳܕܰܬ݂ܬ݂ܶܗ ܣܬܶܐ ܟܳܘܶܐ ܒܝ ܐܝܕ݂ܐ ܐܰܘ ܒܡ ܡܰܓܙܘܢܶܐ. ܘܐܘ ܕܘܳܪܐ ܐܰܓ݂ܠܰܒ ܟܳܘܶܐ ܒܰܚ ܚܰܝܘܳܬ݂ܶܐ. ܢܳܩܘܨܶܐ ܢܶܐ ܐܰܢ ܢܳܫܶܐ ܕܟܳܕܰܘܪܝ ܒܘ ܓܳܪܘܪܐ (ܬܪܰܟܬܳܪ). ܐܶܠܐ ܐܘ ܥܰܦܪܐ ܕܟܷܬܠܰܗ ܓ݂ܰܠܰܒܶܐ ܥܰܬܝܪܐ ܝܐ ܒܰܟ ܟܰܪܡܶܐ، ܘܟܳܡܰܚܘܶܐ ܓ݂ܰܠܰܒܶܐ ܛܳܘܐ ܠܰܥ ܥܷܢܘܶܐ ܕܘ ܕܪܰܝܨܐ. ܐܰܥ ܥܷܢܘܶܐ ܕܘ ܕܪܰܝܨܐ ܕܰܐܪܟܰܚ ܓ݂ܰܠܰܒܶܐ ܡܫܰܡܗܶܐ ܘܛܝܡܐ ܢܶܐ. ܐܰܓ݂ܠܰܒ ܡܘ ܥܰܦܪܰܢܐ ܡܰܠܝܳܝܐ ܟܶܦܶܐ ܘܩܰܬܳܪܶܐ ܘܠܰܬܝܐ ܛܳܘܐ ܠܘ ܙܪܳܥܐ. ܟܷܬܠܰܗ ܟܡܳܐ ܓܳܙܝܪܶܐ ܚܶܕ݂ܳܪܰܗ، ܐܶܠܐ ܠܰܬܢܶܐ ܓ݂ܰܠܰܒܶܐ. ܐܘ ܩܠܝܡܐ ܟܳܡܪܰܒܶܐ ܫܷܟܠܰܬ ܓ݂ܰܠܰܒܶܐ ܕܰܘܡܶܐ ܕܰܦ ܦܝܪܶܐ ܒܘ ܥܰܦܪܰܝܕ݂ܶܗ. ܟܘܠ ܒܰܝܬܐ ܕܟܳܩܳܕܷܰܪ ܗܳܘܶܐ ܡܳܪܐ ܠܰܚ ܚܰܝܘܳܬ݂ܶܐ ܳܡܪܰܒܶܐ ܟܡܐ ܚܰܝܘܳܬ݂ܶܐ ܒܘ ܒܰܝܬܐ ܠܘ ܚܶܘܳܪܐ ( ܝܰܥܢܝ ܚܰܠܘܐ ܘܡܶܕܶܐ ܕܟܳܡܝܣܷܡ ܡܘ ܚܰܠܘܐ). ܘܡܳܪܶܐ ܕܘ ܒܰܝܬܐ ܳܡܕܰܒܷܪ ܐܘ ܒܰܨܪܐ، ܐܘ ܚܰܠܘܐ، ܐܘ ܩܰܛܝܪܐ، ܐܝ ܓܘܶܬܐ، ܐܘ ܙܷܒܕܐ، ܐܘ ܡܷܫܚܐ ܘܟܘܠ ܡܶܕܶܐ ܕܟܳܡܝܣܷܡ ܡܘ ܚܶܘܳܪܐ ܡܘ ܒܰܝܬܐ. ܘܐܰܣ ܣܢܝܩܘܳܬ݂ܶܐ ܚܪܶܢܶܐ ܳܡܟܰܡܰܠܠܶܗ ܡܘ ܡܷܕܶܐ ܕܟܳܙܳܪܷܥ ܒܰܢ ܐܰܪܥܳܬ݂ܶܐ ܘܡܰܟ ܟܰܪܡܶܐ. ܘܟܝܬܐ ܗܷܢ ܡܰܥ ܥܠܰܝܡܶܐ ܟܳܫܘܓ݂ܠܝ ܒܦܘܠܚܳܢܶܐ ܚܪܶܢܶܐ ܕܘ ܒܢܳܝܐ ܕܰܒ ܒܳܬܶܐ ܕܡܰܠܝܡܷܢܢܶܗ ܐܷܫܡܐ ܕܙܘܙܶܐ ܠܰܣ ܣܢܝܩܘܳܬ݂ܶܐ ܚܪܶܢܶܐ ܕܝ ܐܝܩܰܪܬ݂ܐ. ܐܘ ܥܰܦܪܐ ܕܝ ܩܪܝܬ݂ܐ ܡܷܩܩܰܐ ܕܗܳܘܶܐ ܛܳܘܐ ܠܰܟ ܟܰܪܡܶܐ ܘܰܥ ܥܷܢܘܶܐ ܕܘ ܕܪܰܝܨܐ ܡܷܩܩܰܐ ܕܗܳܘܶܢ ܛܳܘܶܐ ܠܐ ܟܳܡܰܟܦܷܢ ܕܷܡܕܰܒܪܝ ܐܝ ܣܢܝܩܘܬ݂ܐ ܕܝ ܐܝܩܰܪܬ݂ܐ. ܐܰܟ ܟܰܪܡܶܐ ܕܝ ܩܪܝܬ݂ܐ ܠܐ ܟܳܘܷܢ ܟ݂ܘܕ ܡܶܩܷܡ ܛܳܘܶܐ. ܚܕ݂ܐ ܡܝܕ݂ܶܗ ܕܰܚ ܚܰܝܘܳܬ݂ܶܐ ܕܘ ܡܰܕܷܒܪܐ ܠܐ ܟܳܛܳܪܷܢ ܕܗܳܘܷܢ، ܘܕܰܬ ܬܰܪܬܶܐ ܐܘ ܩܘܪܐ ܘܐܝ ܐܰܝܟܰܢܳܝܘܬ݂ܐ ܕܘ ܡܘܙܳܓ݂ܐ ܟܳܡܰܚܷܪܘܰܠܠܶܗ. ܕܰܬܠܳܬ݂ ܡܰܝ ܝܰܩܕ݂ܳܢܶܐ ܕܟܳܘܷܢ ܒܰܛ ܛܘܪܳܢܶܐ ܢܰܫܝܦܝ ܓ݂ܰܠܰܒܶܐ ܡܰܢܢܶܗ. ܐܘ ܡܶܕܶܐ ܕܟܳܘܶܐ ܣܬܶܐ ܟܳܦܳܝܷܫ ܒܘ ܒܰܝܬܐ ܳܡܕܰܒܷܪ ܗܷܢ ܡܝ ܚܫܰܚܬܐ ܕܝ ܐܝܩܰܪܬ݂ܐ. ܟܝܬ ܢܳܩܘܨܐ ܡܝ ܩܪܝܬ݂ܐ ܕܳܡܙܰܒܢܝ ܥܷܢܘܶܐ ܘܢܰܒܝܫܳܬ݂ܶܐ ܕܘ ܕܪܰܝܨܐ ܐܶܠܐ ܠܐ ܓ݂ܰܠܰܒܶܐ. ܟܳܡܷܣܬܰܥܷܡܠܝ ܗܰܡ ܐܰܥ ܥܷܢܘܶܐ ܠܘ ܣܝܳܡܐ ܕܘ ܚܰܡܪܐ، ܕܝܒܷܣ، ܢܰܒܝ݂ܫܳܬ݂ܶܐ، ܐܘ ܡܶܕܶܐ ܕܟܳܦܳܝܷܫ ܟܳܣܰܝܡܝܠܶܗ ܚܰܘܕܰܠ، ܘܡܶܢܰܗ ܟܳܣܰܝܡܝ ܚܰܠܝܠܶܐ، ܒܰܣܬܝܩܶܐ، ܘܥܳܠܝܩܶܐ ܠܝ ܣܢܝܩܘܬ݂ܐ ܕܘ ܡܘܟܠܐ ܕܒܘ ܣܰܬ݂ܘܐ. ܐܰܓ݂ܠܰܒ ܡܰܝ ܝܰܩܪܳܬ݂ܶܐ ܟܷܘܝܐ ܐܝ ܐܝܕܰܪܰܐ ܕܷܬ݂ܬ݂ܶܐ ܡܘ ܡܶܕܶܐ ܕܟܳܐܬ݂ܶܐ ܡܰܚ ܚܰܝܘܳܬ݂ܶܐ. ܟܘܠ ܐܝܩܰܪܬ݂ܐ ܠܘ ܓܳܪܰܢ ܕܘ ܚܰـܝܠܰܝܕ݂ܰܗ ܘܕܝ ܣܢܝܩܘܬ݂ܰܝܕ݂ܰܗ ܟܳܡܷܪܘܳܐ ܬܰܘܪܳܬܶܐ، ܥܶܙܶܐ ܘܥܘܳܢܶܐ ܒܘ ܒܝܬܐ. ܟܳܦܰܝܫܐ ܥܰܠ ܐܝ ܐܝܩܰܪܬ݂ܐ ܡܷܢ ܚܰܝܠܐ ܟܷܬܠܰܗ ܕܩܘܕܪܐ ܡܷܪܘܐ ܐܰܚ ܚܰܝܘܳܬ݂ܰܢܝ. ܓܠܳܙܰܡܡܶܗ ܢܳܫܶܐ ܕܚܳܝܷܪ ܐܰܥܠܰܝܝܶܗ ܕܡܰܪܦܷܢܢܶܗ ܠܝ ܒܰܩܪܐ، ܕܚܷܠܘܷܢܢܶܗ، ܘܡܰܥܰܠܦܷܢܢܶܗ ܗܰܢܐ ܣܬܶܐ ܫܽܘܓ݂ܠܐ ܝܳܐ. ܓܠܳܙܰܡܡܶܗ ܢܳܫܶܐ ܡܰܘܟ݂ܰܐ ܟܘܠ ܢܳܫܐ ܠܐ ܟܳܩܳܕܰܪ ܕܡܳܪܰܘ ܚܰܝܘܳܬ݂ܶܐ ܒܘ ܒܰܝܬܐ. ܐܰܚ ܚܰܝܘܳܬܶܐ ܟܳܡܷܦܩܝ ܐܰܓ݂ܠܰܒ ܡܰܐ ܡܰܣܪܰܦܶܐ ܕܝ ܐܝܩܰܪܬ݂ܐ. ܐܘ ܚܶܘܳܪܐ ܟܘܠܶܗ ܡܘ ܒܰܝܬܐ ܟܳܡܝܕܰܒܷܪ. ܗܰܡ ܟܳܡܝܣܷܡ ܡܶܢܶܗ ܩܰܛܝܪܐ، ܓܘܶܬܐ، ܫܘܪܬܢ، ܠܰܒܰܢܝـܝܶܐ، ܕܰܘܓ݂ܶܐ، ܙܷܒܕܐ ܘܡܷܫܚܐ. ܟܳܬܳܠܷܢ ܐܝ ܣܢܝܩܘܬ݂ܰܬ݂ܰܗ ܐܘ ܡܶܕܶܐ ܕܟܳܙܳܝܷܕ ܟܝܬܐ ܡܟܳܢܘܳܬ݂ܶܐ ܕܷܡܙܰܒܢܝܠܷܢ ܒܝ ܫܘܩܐ ܘܕܡܰܣܷܪܦܷܢܢܶܗ ܥܰܠ ܪܘܚܰـܝـܝܶܗ. ܐܝ ܣܢܝܩܘܬ݂ܐ ܕܘ ܒܰܣܪܐ ܟܘܠܶܗ ܕܝ ܐܝܩܰܪܬ݂ܐ ܡܰܚ ܚܰܝܘܳܬ݂ܰܢܝ ܘܡܘ ܨܰܝܕܐ ܟܳܡܝܕܰܒܪܐ. ܟ݂ܘܕ ܡܶܐ ܡܶܩܷܡ ܡܷܪܠܝ ܐܰܢ ܐܰܪܟܰܚܳـܝܶܐ ܟܷܐܙܙܷܢ ܠܘ ܨܰܝܕܐ. ܐܶܠܐ ܐܘ ܨܰܝܕܐ ܟܳܠܳܙܰܡܠܗ ܡܰܕ݂ܥܐ ܠܰܬܝܐ ܦܫܝܩܐ ܚܰܐ ܕܳܐܡܶܪ ܓܷܐܙܙܝ ܠܘ ܨܰܝܕܐ. ܓܠܳܙܷܡ ܕܳܐܕܷ݂ܰܥ ܐܰܝܕܰܪܒܐ ܟܩܳܕܰܪ ܨܳܝܷܕ ܐܘ ܨܰܝܕܰܝܕ݂ܶܗ. ܟܝܬ ܐܶܒܶܗ ܬܰܗܠܝܟܰܐ (ܩܷܢܛܐ) ܪܰܒܬ݂ܐ ܐܝܕ݂ܰܐ ܐܘ ܨܰܝܳܕܐ ܕܠܳܘܶܐ ܨܰܝܳܕܐ ܛܳܘܘܐ. ܘܕܝܠܳܢܳܐܝܬ ܐܝܢܰܩܩܰܐ ܕܡܝܔܰܪܚـܝ ܐܒ ܒܪܳܙܶܐ ܟܷܦ݁ܦ݁ܶܗ ܕܘܥܪܝ ܥܰܠ ܚܰܐ ܘܩܘܛܠܝܠܶܗ ܣܬܶܐ. ܠܐ ܟܘܠ ܚܰܝܘܬ݂ܐ ܟܳܨܳܝܷܕ ܐܘ ܨܰܝܳܕܐ ܐܶܠܐ ܐܰܚ ܚܰܝܘܳܬ݂ܶܐ ܕܗܳܘܶܐ ܠܶܗ ܪܘܟ݂ܣܰܐ (ܦܣܳܣܳܐ) ܥܰܠ ܐܘ ܨܰܝܕܰܬ݂ܬ݂ܶܗ. ܐܰܓ݂ܠܰܒ ܡܰܚ ܚܰܝܘܳܬ݂ܐ ܕܟܳܨܰܝܕܝ ܐܰܢ ܢܳܫܶܐ ܕܰܐܪܟܰܚ ܒܪܳܙܶܐ ܢܶܐ. ܚܕ݂ܐ، ܥܰܠ ܕܟܝܬ ܓ݂ܰܠܰܒܶܐ ܡܰܢܢܶܗ ܘܒܰܠܟܝ ܣܬܶܐ ܥܰܠ ܕܟܷܬܝܐ ܐܘ ܙܒܳܛܰܬ݂ܬ݂ܶܗ ܦܫܝܩܐ. ܕܰܬ ܬܪܶܐ، ܓ݂ܷܙܙܰܠܰܬ ܐܰܘ ܩܰܩܘܳܢܶܐ ܢܶܐ. ܢܰܩܩܰܐ ܠܰܨ ܨܰܝܳܕܶܐ ܩܛܷܠܠܶܗ ܫܰܘܥܐ ܒܪܳܙܶܐ ܡܛܰܢܢܶܗ ܠܝ ܩܪܝܬ݂ܐ ܘܡܦܰܠܰܓ݂ܓ݂ܶܗ ܐܘ ܒܰܨܪܐ ܥܰܠ ܐܰܒ ܒܳܬܶܐ ܕܝ ܩܪܝܬ݂ܐ. ܐܰܓ݂ܠܰܒ ܡܰܝ ܝܰܩܪܳܬ݂ܶܐ ܒܝ ܩܪܝܬ݂ܐ ܳܡܚܰܕ݂ܪܝ ܐܝ ܣܝܩܘܬ݂ܐ ܕܘ ܣܰܬ݂ܘܐ ܒܘ ܒܰܝܬܐ. ܠܐ ܟܳܚܳܙܷܢ ܣܢܝܩܘܬ݂ܐ ܕܫܘܩܠܝ ܐܰܡ ܡܘܟܠܳܢܶܐ ܟ݂ܕܘ ܒܷܪܓ݂ܷܠ،ܓܰܪܣܐ݂، ܗܘܪܷܟܶܐ، ܚܶܛܶܐ ܕܝܩܶܐ ܠܝ ܠܰܒܰܢܝـܝܶܐ. ܗܷܢ ܡܝܰ ܝܰܩܪܳܬ݂ܶܐ ܟܳܛܘܚܢܝ ܐܰܚ ܚܶܛܰܬ݂ܬ݂ܶܗ ܒܝ ܪܷܚܝܐ ܘܟܳܣܰܝܡܝ ܡܰܢܢܶܗ ܐܘ ܩܰܡܚܰܬ݂ܬ݂ܶܗ، ܘܗܷܢ ܟܳܫܘܩܠܝ ܐܘ ܩܰܡܚܐ ܚܰܕ݂ܝܪܐ ܘܟܳܣܰܝܡܝ ܐܘ ܠܰܚܡܐ ܒܘ ܬܰܢܘܪܐ ܕܘ ܒܰܝܬܐ. ܐܘ ܠܰܚܡܐ ܕܘ ܬܰܢܘܪܐ ܠܘ ܚܘܠܡܳܢܐ ܛܰܘ ܡܘ ܠܰܚܡܐ ܕܝ ܫܘܩܐ ܝܐ. ܐܶܠܐ ܟܘܠܠܶܗ ܠܐ ܟܳܢܷܦܩܐ ܒܐܝܕ݂ܰܝـܝܶܗ ܕܣܰܝܡܝ ܐܘ ܠܰܚܡܰܬ݂ܬ݂ܶܗ ܒܘ ܬܰܢܘܪܐ. ܓܠܳܙܰܡܠܶܗ ܕܘܳܩܐ ܘܠܐ ܟܘܠ ܢܳܫܶܐ ܟܳܪܳܚܷܡ ܣܳܝܰܡܠܶܗ ܒܘ ܒܰܝܬܐ، ܥܰܠ ܕܬܰܥܒܐ ܝܐ ܓ݂ܰܠܰܒܶܐ. ܓܠܳܙܷܡ ܠܝ ܐܰܬ݂ܬܐ ܕܣܰܝܡܐ ܠܰܚܡܐ ܒܘ ܒܰܝܬܐ ܕܗܳܘܶܠܰܗ ܩܰܡܚܐ ܒܘ ܒܰܝܬܐ ܘܬܷܠܝܐ ܚܡܝܪܐ، ܘܒܷܬ݂ܷܪ ܠܰܝܫܳܠܷܗ ܘܔܘܓ݂ܪܐ ܐܘ ܬܰܢܘܪܐ ܘܒܷܬ݂ܷܪ ܡܐܷ ܕܚܰܡܷܥ ܐܘ ܠܰܝܫܐ ܡܒܰܨܛܳܠܶܗ، ܡܚܰܕ݂ܪܳܠܶܗ ܘܡܷܒܠܳܠܶܗ ܠܘ ܬܰܢܘܪܳܐ، ܘܕܰܘܩܳܠܶܗ، ܘܣܰܝܡܳܠܶܗ ܠܰܚܡܐ ܒܰܣܝܡܐ. ܪܶܚܶܗ ܕܘ ܠܰܚܡܐ ܕܰܚ ܚܶܛܶܐ ܕܟܳܡܝܣܷܡ ܒܘ ܬܰܢܘܪܐ ܟܳܐܬ݂ܶܐ ܡܶܐ ܪܘܚܩܳܐ ܕܥܰܣܪܳܝܳܬ݂ܶܐ ܕܡܷܬܪܳܘܰܬ ܘܠܰܝܬ ܟ݂ܳܬ݂ܶܗ ܒܰܣܝܡܐ ܗܝܝܶܐ ܚܰܬ݂ܐ ܘܫܰܚܝܢܐ. ܟܝܬ ܥܰܕܶܐ ܐܝ ܐܰܬ݂ܬܐ ܕܟܳܣܰܝܡܐ ܐܘ ܠܰܚܡܐ ܡܘ ܬܰܢܘܪܐ ܗܘܠ ܠܘ ܒܰܝܬܐ ܡܰܢ ܕܚܷܙܝܐ ܳܡܩܰܕܡܐ ܠܷܢ ܠܰܚܡܐ ܫܰܚܝܢܐ ܘܟܐܘܟ݂ܠܝܠܶܗ ܳܡܚܰܣܷܢ ܒܰܡ ܡܝܬ݂ܶܐ. ܚܰܐ ܠܐ ܟܳܩܳܕܷܰܪ ܦܳܪܷܫ ܐܘ ܛܰܥܡܰܝܕ݂ܶܗ ܗܘܠ ܕܠܐ ܡܔܰܪܷܒ ܕܳܐܟ݂ܷܠ ܡܝܢܶܗ. ܘܠܘ ܚܘܠܡܳܢܐ ܣܬܶܐ ܓ݂ܰܠܰܒܶܐ ܛܳܘܘܐ ܝܐ، ܥܰܠ ܕܝ ܚܶܛܐ ܟܘܠܰܗ ܝܐ ܘܠܰܬܝܐ ܩܠܷܦܬܐ ܟ݂ܘܕ ܟܳܩܘܠܦܝ ܐܘܥܕܐ ܐܝ ܚܶܛܐ ܕܟܳܣܰܝܡܝܠܰܗ ܩܰܡܚܐ ܒܝ ܦܰܒܪܝܩܰܐ. ܐܘ ܚܰܝܠܐ ܕܝ ܚܶܛܐ ܟܳܡܰܡܝܬ݂ܝܠܶܗ ܒܘ ܩܠܳܦܰܝܕ݂ܰܗ ܘܠܐ ܟܳܛܳܪܷܠܠܰܗ ܛܰܥܡܐ. ܐܰܥ ܥܰܕܰܬ ܕܝ ܩܪܝܬ݂ܐ ܐܰܪܟܰܚ ܣܬܶܐ ܟ݂ܘܕ ܐܰܩ ܩܷܪܝܰܘܳܬ݂ܶܐ ܚܪܶܢܶܐ ܕܘ ܛܘܪܐ ܒܪܝܟ݂ܐ ܕܛܘܪܥܰܒܕܝܢ. ܟܷܬܠܰܗ ܥܰܕܰܬ ܗܷܢ ܡܰܢܢܶܗ ܕܝܠܳܢܳܝܶܐ ܢܶܐ ܠܰܐܪܟܰܚ ܘܗܷܢ ܣܬܶܐ ܥܰܝܢܝ ܟ݂ܘܕ ܐܰܩ ܩܷܪܝܰܘܳܬ݂ܶܐ ܚܪܶܢܶܐ ܢܶܐ. ܒܘ ܙܰܒܢܐ ܕܟܷܬܘܰܐ ܐܝ ܩܪܝܬ݂ܐ ܥܰܡܷܪܬܐ ܘܡܠܝܬ݂ܐ ܐܰܚ ܚܰܝܶܐ ܫܷܟܷܠܘܰܝܢܶܐ. ܘܡܶܩܷܡ ܡܶܐ ܥܷܣܪܝ ܐܷܫܢܶܐ ܕܟܷܬܘܰܐ ܙܘܚܬ݂ܐ ܒܝ ܩܪܝܬ݂ܐ ܘܕܟܷܬܘܰܝܠܰܗ ܐܷܫܡܐ ܥܳܡܘܪܶܐ ܫܷܟܷܠ ܚܪܶܢܐ ܘܰܝܢܶܐ. ܘܐܰܕܝܰܘܡܰܐ ܕܟܳܚܳܙܝܢܰܐ ܕܝ ܩܪܝܬ݂ܐ ܟܳܙܰܝܕܐ ܒܘ ܚܰܝܠܐ ܕܰܐܠܳܗܐ ܘܕܟܳܡܰܥܷܡܪܝ ܐܰܢ ܢܳܫܰܝܕ݂ܰܗ ܗܰܐ ܗܰܐ ܒܳܬܶܐ ܫܷܟܷܠ ܚܪܶܢܐ ܢܶܐ ܐܰܚ ܚܰܝܶܐ ܐܶܒܰܗ. ܗܷܢ ܡܰܥ ܥܰܕܰܬ ܩܰܡܳܝܶܐ ܕܰܢ ܢܰܥܝܡܶܐ ܘܕܰܥܠܰܝܡܶܐ ܕܝ ܩܪܝܬ݂ܐ ܣܰܝܡܝܘܰܢܢܶܗ ܗܰܢܝ ܢܶܐ. ܐܘ ܟܪܳܟ݂ܐ ܕܒܰܥ ܥܶܕܶܐ؛ ܕܥܶܕܐ ܪܰܒܐ ܘܕܥܶܕܐ ܢܰܥܝܡܐ، ܐܝ ܚܰܢܐ ܚܰܢܐ ܩܪܝܬ݂ܐ، ܐܰܪ ܪܳܙܘܢܶܐ، ܐܘ ܟܚܳܠܐ ܕܰܥ ܥܰܝܢܶܐ ܒܡܳܪܝ̱ ܫܷܡܥܘܢ ܣܳܒܐ، ܐܘ ܣܝܒܳܪܐ، ܬܷܫܬܥܷܢܝܐ ܕܝ ܚܰܛܪܐ ܘܦ݁ܰܠܠܳܐ، ܔܷܪܪܶܐ، ܬܘܫܬܶܐ، ܟܰܫܳܟܶܐ، ܛܰܦܫܐ، ܘܚܪܶܢܶܐ. ܐܘ ܡܶܕܶܐ ܕܦܰܝܷܫ ܒܗܰܘܢܝ ܡܰܢܝ ܓ݂ܰܠܰܒܶܐ ܐܘ ܟܪܳܟ݂ܐ ܕܒܰܥ ܥܶܕܶܐ ܝܐ. ܟܘܪܟ݂ܝܘܰܝܢܰܐ ܥܰܠ ܐܝ ܫܰܟܰܪ ܘܥܰܠ ܐܰܒ ܒܶܥܶܐ ܘܟܝܬ ܕܳܐܒܷܢܘܰܝܠܰܢ ܟܰܠܠܰܘܰܬ ܘܒܘ ܥܶܕ݂ܐ ܢܰܥܝܡܐ ܗܷܢ ܐܰܒܷܢܘܰܝܠܰܢ ܦܝܪܶܐ. ܐܰܚܢܰܐ ܢܰܥܝܡܶܐ ܡܷܦܨܳܚـܝܘܰܝܢܰܐ ܓ݂ܰܠܰܒܶܐ ܒܘ ܝܰܘܡܐ ܕܘ ܥܶܕ݂ܐ. ܡܶܩܷܡ ܡܘ ܥܶܕ݂ܐ ܒܫܰܒܬ݂ܐ ܡܚܰܕ݂ܪܝܘܰܝܢܰܐ ܪܘܚܰܢ ܠܘ ܝܰܘܡܐ ܕܘ ܥܶܕ݂ܐ ܒܷܬ݂ܷܪ ܡܶܐ ܨܰܘܡܐ ܝܰܪܝܟ݂ܐ ܘܡܶܐ ܨܠܘܬ݂ܐ ܓ݂ܰܠܰܒܶܐ ܐܘ ܝܰܘܡܐ ܕܘ ܥܶܕ݂ܐ ܡܳܠܶܘܰܝܠܰܢ ܦܨܝـܚܘܬ݂ܐ. ܩܰܝܡܝܘܰܝܢܰܐ ܟ݂ܰܝـܝܦܐ ܘܠܰܘܫܝܘܰܝܢܰܐ ܐܰܔ ܔܘܠܰܝܕ݂ܰܢ ܐܰܫ ܫܰܦܝܪܶܐ ܘܐܷܙܙܰܘܰܝܢܰܐ ܠܝ ܥܝܬܐ ܘܠܐ ܡܰܠܷܚܩܝܘܰܝܢܰܐ ܕܟܘܪܟ݂ܝܢܰܐ ܒܰܒ ܒܳܬܶܐ ܕܝ ܩܪܝܬ݂ܐ. ܡܰܝܕܝܘܰܝܢܰܠܰܢ ܨܷܡܕܐ ܢܰܥܷܡܬܐ ܐܰܘ ܟܝܣܐ ܕܢܰܝܠܳܢ ܘܟܘܪܟ݂ܝܘܰܝܢܰܐ ܓܘܕܐ ܓܘܕܐ ܥܰܡ ܚܕ݂ܳܕ݂ܶܐ ܗܘܠ ܕܡܰܬܝܡܝܘܰܝܢܰܐ ܐܰܒ ܒܳܬܶܐ ܟܘܠܠܶܗ ܘܰܐܬ݂ܝܘܰܝܢܰܐ ܠܘ ܒܰܝܬܐ ܡܳܛܝܘܰܝܢܰܐ ܐܝ ܫܰܟܰܪ. ܩܰܬܘܰܝܠܰܢ ܣܬܶܐ ܒܶܥܶܐ ܡܓܰܘܢܶܐ ܘܫܰܦܝܪܶܐ ܘܐܰܡ ܡܶܕܳܢܶܐ ܚܪܶܢܶܐ ܕܡܰܠܝܡܝܘܰܝܢܰܐ ܘܦܷܪܫܝܘܰܝܢܰܢܢܶܗ ܘܬܳܠܝܘܰܝܢܰܢܢܶܗ ܠܰܝ ܝܰܘܡܳܬ݂ܶܐ ܕܳܐܬ݂ܷܢ. ܘܐܘܟܠܝܘܰܝܢܰܐ ܐܰܦ݁ܦ݁ܶܗ ܒܰܫ ܫܳܒܘܥܶܐ. ܒܥܶܕ݂ܐ ܢܰܥܝܡܐ ܐܰܓ݂ܠܰܒ ܡܰܠܝܡܝܘܰܝܢܰܐ ܫܰܟܰܪ ܘܦܝܪܶܐ ܘܩܳܝܰܬ݂ܘܰܝܠܰܢ ܣܬܶܐ ܙܘܙܶܐ ܡܰܢ ܢܳܫܶܐ ܕܝ ܐܝܩܰܪܬ݂ܐ. ܘܒܥܶܕ݂ܐ ܪܰܒܳܐ ܣܬܶܐ ܥܰܡ ܐܝ ܫܰܟܰܪ ܘܐܰܙ ܙܘܙܶܐ، ܡܰܠܝܡܝܘܰܝܢܰܐ ܒܶܥܶܐ ܣܬܶܐ. ܐܰܥ ܥܶܕ݂ܶܐ ܙܷܕ ܡܰܪ ܪܰܒܶܐ ܡܰܦܷܨܚـܝܘܰܐ ܠܰܢ ܢܰܥܝܡܶܐ. ܐܰܚ ܚܰܝܶܐ ܕܝ ܩܪܝܬ݂ܐ ܒܰܙ ܙܰܒܢܶܐ ܥܝܩܶܐ ܐܰܚ ܚܰܝܶܐ ܕܝ ܩܪܝܬ݂ܐ ܒܰܙ ܙܰܒܢܶܐ ܥܝܩܶܐ ܓ݂ܰܠܰܒܶܐ ܥܰܣܩܶܘܰܝ ܢܶܐ. ܘܠܰܬܘܰܐ ܦܫܝܩܐ ܠܝ ܐܶܡܐ ܘܒܰܒܐ ܕܡܷܪܘܝܘܰܐ ܐܰܢ ܢܰܥܝܡܰܬܬ݂ܶܗ. ܐܝ ܐܶܡܐ ܘܐܘ ܒܰܒܐ ܐܰܬ ܬܪܶܐ ܚܰܝܶܐ ܡܰܝـܝܪܶܐ ܥܰܝܫܝܘܰܐ ܥܰܠ ܕܠܰܬܘܰܐ، ܠܐ ܟܰܗܪܳܒܐ (ܔܰܝܪܰܢ) ܘܠܐ ܡܰܟܝܢܰܬ ܘܠܐ ܡܶܕܶܐ ܚܪܶܢܐ ܡܰܡ ܡܶܕܳܢܶܐ ܕܘ ܙܰܒܢܰܢܐ ܕܡܰܟ̣݂ܷܦ ܐܘ ܬܰܥܒܐ ܕܰܚ ܚܰܝܶܐ. ܐܝ ܐܝܩܰܪܬ݂ܐ ܓܠܳܙܷܡ ܡܕܰܒܪܳܘܰܐ ܟܘܠ ܡܶܕܶܐ ܒܘ ܒܰܝܬܐ. ܘܗܰܢܝ ܕܠܰܬܘܰܠܠܶܗ ܐܰܪܥܳܬ݂ܶܐ ܘܚܰܝܘܳܬ݂ܶܐ ܦܰܝܫܝܘܰܐ ܟܰܦܝܢܶܐ ܘܦܷܬܚـܝܘܰܐ ܐܝܕ݂ܰܝـܝܶܗ ܠܰܢ ܢܳܫܶܐ ܚܪܶܢܶܐ ܠܰܫܰܢ ܕܳܐܒܷܢܢܶܗ ܡܶܕܶܐ ܕܷܡܕܰܒܪܝ ܐܝ ܐܝܩܰܪܬ݂ܰܬ݂ܬ݂ܶܗ. ܐܰܠܳܗܐ ܡܰܣܬܷܪ ܘܠܐ ܡܰܡܛܶܐ ܙܰܒܢܶܐ ܗܰܘܟ݂ܰܐ ܡܰܝـܝܪܶܐ ܥܰܠ ܐܝ ܢܳܫܘܬ݂ܐ. ܐܰܒ ܒܰܒܳܢܰܝܕ݂ܰܢ ܘܐܰܣ ܣܳܒܰܝܕ݂ܰܢ ܚܰܝܶܐ ܕܡܷܣܟܝܢܘܬ݂ܐ ܘܦܰܩܝܪܝـܝܶܐ ܪܰܒܬ݂ܐ ܥܰܝـܝܫܝ ܘܡܳܪܰܘܘܰܠܠܰܢ. ܘܰܐܚܢܰܐ ܕܠܐ ܐܝܩܳܪܐ ܟ݂ܘܕ ܥܰܕܶܐ ܒܦܳܬܰܝـܝܶܗ ܠܐ ܟܳܚܰܝܪܝܢܰܐ܆ ܟ݂ܘܕ ܚܰܐ ܕܡܶܕܶܐ ܠܐ ܣܷܡܡܰܠܠܰܢ. ܐܰܕܝܰܘܡܰܐ ܟܝܬ ܟܰܗܪܳܒܐ ܒܰܩ ܩܷܪܝܰܘܳܬ݂ܶܐ ܘܡܶܕܳܢܶܐ ܕܰܚ ܚܰܝܶܐ ܓ݂ܰܠܰܒܶܐ ܥܰܠ ܐܘ ܟܰܗܪܳܒܐ ܟܳܫܘܓ݂ܠܝ ܘܟܳܡܰܟ݂ܝܦܝ ܐܘ ܬܰܥܒܐ ܕܰܢ ܢܳܫܶܐ ܕܝ ܩܪܝܬ݂ܐ. ܘܟܝܬ ܣܬܶܐ ܐܰܕܝܰܘܡܰܐ ܡܰܟܝܢܰܬ ܕܓ݂ܰܠܰܒܶܐ ܡܘ ܫܘܓ݂ܠܐ ܐܰܦ݁ܦ݁ܶܗ ܟܳܡܝܣܷܡ ܘܒܰܣܝܡܝ ܐܰܚ ܚܰܝܶܐ ܕܘ ܒܰܪܢܳܫܐ. ܒܘ ܙܰܒܢܐ ܕܰܣ ܣܳܒܰܝܕ݂ܰܢ ܒܰܠܰܢܓܰܙܝـܝܶܘܰܐ، ܘܟܘܠ ܡܶܕܶܐ ܒܘ ܚܰܝܠܐ ܕܰܢ ܐܝܕܳܬ݂ܶܐ ܡܝܣܷܡܘܰܐ ܘܒܘ ܬܰܥܒܐ ܕܰܟ ܟܰܬܦܳܬ݂ܶܐ. ܠܰܬܘܰܐ ܠܐ ܟܰܗܪܳܒܐ ܘܠܐ ܡܰܟܝܢܰܬ ܕܷܡܥܰܘܢܝ ܐܘ ܒܰܪܢܳܫܐ ܒܘ ܫܘܓ݂ܠܰܝܕ݂ܶܗ. ܣܶܦܳܩܶܐ ܟ݂ܘܕ ܐܰܕܝܰܘܡܰܐ ܠܘ ܢܩܳܠܐ ܘܠܘ ܛܥܳܢܐ ܕܰܡ ܡܶܕܳܢܶܐ ܠܰܬܘܰܐ. ܐܰܢ ܢܳܫܶܐ ܒܰܩ ܩܷܪܝܰܘܳܬ݂ܶܐ ܣܰܝܡܝܘܰܐ ܐܰܣ ܣܶܦܳܩܰܢܝ ܗܷܢܢܶܐ ܷ ܒܐܝܕ݂ܰܝܝܶܗ ܘܡܷܣܬܰܥܷܡܠܝܘܰܢܢܶܗ ܒܘ ܫܘܓ݂ܠܰܬ݂ܬ݂ܶܗ ܕܘ ܝܰܘܡܐ ܘܒܰܚ ܚܰܝܰܬ݂ܬ݂ܶܗ ܕܝ ܩܪܝܬ݂ܐ. ܗܰܪܟܶܐ ܟܳܒܰܥܢܐ ܕܟܳܬ݂ܰܘܢܐ ܥܰܠ ܟܡܐ ܡܰܣ ܣܶܦܳܩܰܢܝ ܘܒܶܐ ܐܰܝܕܰܪܒܐ ܣܰܝܡܝܘܰܢܢܶܗ. ܘܒܷܬ݂ܷܪ ܓܡܰܚܟܶܢܐ ܥܰܠ ܐܘ ܫܘܓ݂ܠܐ ܕܣܰܝܡܝܘܰܐ ܒܘ ܙܰܒܢܰܘܐ ܐܘ ܥܝܩܐ ܘܥܰܠ ܐܘ ܫܷܟܷܠ ܕܰܚ ܚܰܝܰܬ݂ܬ݂ܶܗ. ܐܝ ܩܰܚܦܘܪܬܐ ܐܝ ܩܰܚܦܘܪܬܐ ܡܝܣܳܡܳܘܰܐ ܡܶܐ ܫܷܟܷܠ ܕܓܶܠܐ ܕܟܷܬܝܐ ܐܷܫܡܶܗ ܬܰܕܪܶܐ. ܐܘ ܓܶܠܰܢܐ ܟܳܘܶܐ ܒܰܢ ܐܰܪܥܳܬ݂ܶܐ ܘܕܝܠܳܢܳܐܝܬ ܒܰܘ ܘܰܪܙܶܐ، ܟܳܫܳܒܷܗ ܠܰܫ ܫܪܘܠܶܐ. ܡܰܡܛܝܘܰܐ ܐܰܬ ܬܰܕܪܶܐ ܡܘ ܛܘܪܐ ܘܚܘܪܟܝܘܰܢܢܶܗ ܛܳܘܘܐ ܒܘ ܚܘܪܰܟܐ. ܒܷܬ݂ܷܪ ܣܰܝܡܝܘܰܐ ܡܰܢܒܠܐ ܡܰܟ ܟܶܦܶܐ ܓܰܪܒ݁ܳܢܝܟܰܬ ܘܛܰܝܫܝܘܰܢܢܶܗ ܥܰܦܪܐ ܣܶܡܳܩܐ. ܒܷܬ݂ܷܪ ܡܘ ܥܰܦܪܐ ܣܶܡܳܩܐ ܡܰܚܬܝܘܰܐ ܩܰܛܡܐ ܐܰܥܠܰܝـܝܶܗ ܘܡܰܬܪܝܘܰܝܠܶܗ ܠܰܫܰܢ ܕܝ ܩܰܚܦܘܪܬܐ ܡܷܫܠܳܚܐ ܡܘ ܡܰܢܒܠܐ ܒܷܬ݂ܷܪ ܡܷܐ ܕܣܝܡܐ ܘܢܰܫܝܦܐ. ܡܰܝܕܝܘܰܐ ܐܰܬ ܬܰܕܪܶܐ ܘܣܰܝܡܝܘܰܢܢܶܗ ܠܰܝܫܐ ܘܒܷܬ݂ܷܪ ܛܰܝܫܝܘܰܝܠܶܗ ܥܰܠ ܐܘ ܡܰܢܒܠܳܐ ܘܣܰܝܡܝܘܰܐ ܐܝ ܩܰܚܦܘܪܬܐ. ܐܝ ܪܰܒܘܬ݂ܐ ܕܝ ܩܰܚܦܘܪܬܐ ܦܰܝܫܳܘܰܐ ܥܰܠ ܐܝ ܪܰܒܘܬ݂ܐ ܕܘ ܡܰܢܒܠܳܐ. ܒܶܐ ܡܷܩܩܰܐ ܪܰܒܬ݂ܐ ܐܷܒܥܝܘܰܐ ܕܗܷܘܝܐ ܐܝ ܩܰܚܦܘܪܬܐ ܗܰܩܩܰܐ ܣܬܶܐ ܪܰܒܐ ܣܰܝܡܝܘܰܐ ܐܘ ܡܰܢܒܠܳܐ. ܒܷܬ݂ܷܪ ܡܷܐ ܕܟܰܡܷܠ ܐܘ ܛܝܳܫܐ ܕܘ ܠܰܝܫܐ ܥܰܠ ܐܘ ܡܰܢܒܠܳܐ، ܡܳܚܷܢܘܰܐ ܐܝܕ݂ܰܝـܝܶܗ ܒܘ ܟܰܠܫܐ ܘܒܷܬ݂ܷܪ ܥܰܠ ܐܝ ܩܰܚܦܘܪܬܐ ܪܓ݂ܝܬ݂ܐ ܘܡܰܚܘܪܝܘܰܐ ܐܝ ܕܘܟܬܐ ܕܟܷܐܒܥܝ، ܘܗܰܘܟ݂ܰܐ ܡܢܰܩܫܝܘܰܝܠܰܗ ܘܣܰܝܡܝܘܰܝܠܰܗ ܫܰܦܷܪܬܐ. ܦܰܝܫܳܘܰܐ ܒܕܘܟܬ݂ܐ ܗܘܠ ܚܶܕܷ݂ܪ ܥܰܣܪܐ ܝܰܘܡܶܐ، ܛܳܪܷܢܘܰܐ ܕܢܷܫܦܐ ܛܳܘܘܐ. ܡܷܐ ܕܢܰܫܝܦܐ ܐܝ ܩܰܚܦܘܪܬܐ ܡܰܝܕܝܘܰܝܠܰܗ ܡܘ ܡܰܢܒܠܳܐ ܘܡܟܰܦܪܝܘܰܝܠܰܗ. ܘܐܝܢܰܩܩܰܐ ܕܠܳܙܰܡܘܰܐ ܡܰܝܕܝܘܰܝܠܰܗ ܘܢܘܩܠܝܘܰܐ ܐܶܒܰܗ ܐܰܥ ܥܷܢܘܶܐ ܐܘ ܥܰܦܪܐ ܐܘ ܣܰܪܘܐ ܘܡܶܕܳܢܶܐ ܚܪܶܢܶܐ. ܟܘܠ ܒܰܝܬܐ ܣܳܝܰܡܘܰܝܠܶܗ ܟܡܐ ܩܰܚܦܘܪܝܳܬ݂ܶܐ ܠܘ ܓܳܪܰܢ ܕܝ ܣܢܝܩܘܬ݂ܐ ܕܘ ܒܰܝܬܐ. ܐܝ ܟܳܪܐ ܐܝ ܟܳܪܐ ܡܝܣܳܡܳܘܰܐ ܡܘ ܥܰܦܪܐ ܣܶܡܳܩܐ ܘܡܷܣܬܰܥܷܡܠܝܘܰܝܠܰܗ ܟ݂ܘܕ ܥܷܡܒܰܪ ܒܘ ܒܰܝܬܐ ܠܘ ܬܠܳܝܐ ܕܘ ܙܰܕ. ܡܫܰܝܶܠܝ ܠܒܰܒܝ ܒܶܐ ܐܰܝܕܰܪܒܐ ܡܝܣܳܡܳܘܰܐ ܡܷܪܠܶܗ؛ ܡܳܛܝܘܰܝܢܰܐ ܥܰܦܪܐ ܣܶܡܳܩܐ ܘܢܘܚܠܝܘܰܝܢܰܠܶܗ ܘܡܰܚܬܝܘܰܝܢܰܐ ܥܘܪܐ ܐܶܒܶܗ ܘܟ݂ܘܠܛܝܘܰܝܢܰܠܶܗ ܫܰܦܝܪܐ ܒܷܚܕ݂ܳܕ݂ܶܐ ܘܡܰܚܬܝܘܰܝܢܰܐ ܡܰܝܶܐ ܐܰܥܠܶܗ ܘܡܰܬܪܝܘܰܝܢܰܠܶܗ. ܘܕܰܝܫܝܘܰܝܢܰܠܶܗ ܘܠܰܝܫܝܘܰܝܢܰܠܶܗ ܛܳܘܘܐ. ܡܷܐ ܕܟܰܡܷܠ ܐܘ ܠܝܳܫܐ ܓܡܰܚܬܝܘܰܝܢܰܐ ܐܘ ܐܰܪܥܐ ܕܝ ܟܘܳܪܐ. ܡܷܐ ܕܡܰܚܷܬܠܰܢ ܐܰܪܥܰܗ ܕܝ ܟܘܳܪܐ ܟܳܠܝܘܰܝܢܰܐ ܝܰܘܡܐ ܗܘܠ ܕܢܳܫܰܦ ܘܒܷܬ݂ܷܪ ܟܘܠ ܝܰܘܡܐ ܓܣܰܝܡܝܘܰܝܢܰܐ ܫܦܘܠܐ ܡܶܢܰܗ. ܥܰܠ ܕܟܘܠܰܗ ܠܐ ܗܷܘܝܳܘܰܐ ܒܷܚܕ݂ܳܐ ܢܰܩܩܰܐ، ܘܠܐ ܩܘܕܪܝܘܰܝܢܰܐ ܣܰܝܡܝܢܰܐ ܟܘܠܰܗ ܒܚܰܐ ܝܰܘܡܐ. ܥܰܠ ܕܟܳܠܳܙܷܡ ܢܳܫܷܦܘܰܐ ܐܘ ܡܶܕܶܐ ܕܣܝܡ ܡܶܩܷܡ ܒܝܰܘܡܐ. ܡܰܘܟ݂ܰܐ ܐܷܫܡܐ ܐܷܫܡܐ ܐܰܘ ܫܦܘܠܐ ܫܦܘܠܐ ܣܰܝܡܝܘܰܝܢܰܐ. ܝܰܥܢܝ ܟܘܠ ܝܰܘܡܐ؛ ܦܰܠܓܐ ܕܡܷܬܪܐ ܡܶܢܰܗ ܣܰܝܡܝܘܰܝܢܰܐ ܗܘܠ ܕܢܷܫܦܳܘܰܐ. ܗܶܕܝ ܓܣܰܝܡܝܘܰܝܢܰܐ ܐܘ ܝܰܘܡܐ ܕܒܷܬ݂ܪܶܗ ܐܷܫܡܐ ܚܪܶܢܐ ܗܘܠ ܕܥܘܠܝܳܘܰܐ ܩܘܡܬ݂ܐ. ܘܒܷܬ݂ܷܪ ܓܡܰܚܬܝܘܰܝܢܰܐ ܩܰܝܣܶܐ ܐܰܥܠܰܗ ܘܓܡܰܚܬܝܘܰܝܢܰܐ ܛܝܢܐ ܥܠܰ ܐܰܩ ܩܰܝܣܶܐ ܘܩܘܛܪܝܘܰܝܢܰܠܰܗ ܐܶܠܐ ܓܛܳܪܝܘܰܝܢܰܠܰܗ ܬܰܪܥܐ ܦܬܝـܚܐ ܠܰܫܰܢ ܕܡܷܢܚܰܬ ܠܓܰܘܰܗ. ܐܘ ܨܰܢܕܘܩܐ ܐܘ ܨܰܢܕܘܩܐ ܣܬܶܐ ܟ݂ܕܝ ܟܳܪܐ ܡܘ ܥܰܦܪܐ ܣܶܡܳܩܐ ܡܝܣܷܡܘܰܐ ܘܡܝܬܰܚܷܬܘܰܐ ܐܶܒܶܗ ܡܶܕܳܢܶܐ ܢܰܫܝܦܶܐ ܕܘ ܡܘܟܠܐ ܟ݂ܘܕ ܐܰܦܫܳܬ݂ܶܐ. ܗܝܝܶܐ ܣܬܶܐ ܟ݂ܕܘ ܣܝܳܡܐ ܕܝ ܟܳܪܐ ܟ݂ܘܠܛܝܘܰܐ ܥܰܦܪܐ ܣܶܡܳܩܐ ܘܥܘܪܐ ܒܷܚܕ݂ܳܕ݂ܶܐ ܘܠܰܝܫܝܘܰܢܢܶܗ ܛܳܘܘܐ ܥܰܡ ܚܕ݂ܳܕ݂ܶܐ ܥܰܠ ܫܶܢܐ ܡܶܕܶܐ ܗܘܠ ܕܗܳܘܶܘܰܐ ܒܘ ܫܷܟܷܠ ܕܘ ܠܰܝܫܐ. ܘܗܶܕܝ ܒܳܕܷܢܘܰܐ ܣܰܝܡܝ ܐܘ ܨܰܢܕܘܩܐ ܪܶܙ ܒܘ ܪܶܙ ܗܘܠ ܕܟܳܡܰܠܘܰܐ. ܗܳܘܶܘܰܐ ܨܰܢܕܘܩܐ ܠܰܢ ܐܰܦܫܳܬ݂ܶܐ ܠܘ ܙܰܕ ܘܠܘ ܡܷܕܶܐ ܕܠܳܙܰܡܘܰܐ. ܐܘ ܬܰܢܘܪܐ ܐܘ ܬܰܢܘܪܐ ܡܝܣܷܡܘܰܐ ܠܘ ܣܝܳܡܐ ܕܘ ܠܰܚܡܐ. ܐܷܙܙܷܢ ܡܰܡܛܷܢܘܰܐ ܣܰܪܝܓ݂ܰܐ ܕܳܐܕܰܡܬܳܐ ܝܰܥܢܝ ܥܰܦܪܐ ܣܶܡܳܩܐ ܢܰܫܝܦܐ ܟ݂ܕܰܐ ܟܶܣܬܰܟܶܐ ܕܘ ܦܰܚܡܐ ܡܝ ܚܰܩܠܐ ܘܡܰܚܬܝܘܰܝܠܶܗ ܥܰܠ ܫܳܥܳܐ ܡܶܕܶܐ. ܘܡܰܪܝܣܝܘܰܐ ܡܰܝܶܐ ܥܰܠ ܐܘ ܥܰܦܪܐ ܣܶܡܳܩܰܘܐ ܗܘܠ ܕܡܰܪܦܶܘܰܐ ܚܕ݂ܳܕ݂ܶܐ ܘܗܳܘܶܘܰܐ ܦܰܟ݂ܘܟ݂ܐ. ܘܒܷܬ݂ܷܪ ܡܰܚܬܝܘܰܐ ܦܰܠܓܶܗ ܕܟܝܣܐ ܕܬܰܘܢܐ ܣܬܶܐ ܐܰܥܠܶܗ ܘܠܰܝܫܝܘܰܝܠܶܗ ܗܘܠ ܕܛܳܘܘܐ ܡܷܟ݂ܠܳܛܝܘܰܐ ܐܘ ܛܝܢܐ ܐܘ ܥܘܪܐ ܒܷܚܕ݂ܳܕ݂ܶܐ. ܡܷܕ ܠܷܫܘܰܠܠܶܗ ܛܰܘܘܐ ܓܒܳܕܷܢܘܰܐ ܒܘ ܣܝܳܡܐ ܕܘ ܬܰܢܘܪܐ. ܒܝ ܩܰܡܰܝܬܐ ܡܰܚܬܝܘܰܐ ܐܘ ܐܰܪܥܐ ܕܘ ܬܰܢܘܪܐ ܥܰܠ ܪܘܝـܚܐ ܘܒܷܬ݂ܷܪ ܡܰܚܬܝܘܰܐ ܟܘܠ ܝܰܘܡܐ ܪܶܙ. ܐܘ ܛܝܢܐ ܐܝܢܰܩܩܰܐ ܩܰܡܰܝܬܐ ܚܕ݂ܐ ܢܰܩܩܰܐ ܣܰܝܡܝܘܰܝܠܶܗ ܘܠܐ ܛܳܪܷܢܘܰܐ ܕܢܳܫܷܦ ܗܘܠ ܕܬܳܝܷܡ ܐܘ ܬܰܢܘܪܐ، ܡܰܘܟ݂ܰܐ ܐܝܢܰܩܩܰܐ ܕܒܳܕܷܢܘܰܐ ܒܘ ܣܝܳܡܐ ܕܘ ܬܰܢܘܪܐ، ܐܘ ܛܝܢܐ ܗܳܘܶܘܰܐ ܚܰܕ݂ܝܪܐ. ܘܟܘܠ ܝܰܘܡܐ ܡܰܝܕܝܘܰܐ ܗܷܢ ܡܶܢܶܗ ܡܘ ܛܝܢܰܘܐ ܘܣܰܝܡܝܘܰܐ ܪܶܙ ܒܪܶܙ ܕܘ ܬܰܢܘܪܐ ܗܘܠ ܫܰܒܬ݂ܐ. ܡܷܐ ܕܟܰܡܷܠܘܰܐ ܐܘ ܬܰܢܘܪܐ ܐܰܢ ܢܰܩܠܰܐ ܛܳܪܷܢܘܰܐ ܢܳܫܷܦ ܗܘܠ ܥܰܣܪܐ ܝܰܘܡܶܐ ܘܒܷܬ݂ܷܪ ܡܰܝܕܝܘܰܝܠܶܗ ܘܡܰܚܬܝܘܰܝܠܶܗ ܒܕܘܟܬ݂ܶܗ ܘܔܘܓ̣ܪܝܘܰܝܠܶܗ ܛܰܘܘܐ ܒܰܣ ܣܰܘܟܳܬ݂ܶܐ ܬܪܶܐ ܬܠܳܬ݂ܐ ܝܰܘܡܶܐ. ܘܗܶܕܝ ܡܰܚܬܝܘܰܝܠܶܗ ܒܝ ܕܘܟܬ݂ܐ ܕܟܳܠܳܙܰܡ ܘܟܳܫܰܝܥܝ ܚـܝܕ݂ܳܪܶܗ ܟܳܘܶܐ ܚܰܕ݂ܝܪܐ ܠܘ ܣܝܳܡܐ ܕܘ ܠܰܚܡܐ. ܐܘ ܓܰܘܕܐ ܕܘ ܡܝܳܥܐ ܐܘ ܓܰܘܕܐ ܕܘ ܡܝܳܥܐ ܣܰܝܡܝܘܰܝܠܶܗ ܡܘ ܓܰܠܕܐ ܕܰܚ ܚܰܝܘܳܬ݂ܶܐ. ܡܰܝܕܝܘܰܐ ܐܘ ܓܰܠܕܐ ܕܰܚ ܚܰܝܘܳܬ݂ܶܐ ܕܢܘܚܪܝܘܰܐ ܘܡܰܚܬܝܘܰܝܠܶܗ ܒܓܰܘܶܗ ܕܕܰܣܬܐ ܘܡܰܚܬܝܘܰܐ ܣܬܶܐ ܒܘ ܕܰܣܬܐ ܫܟܰܢܷܟܰܬ ܕܰܒ ܒܰܠܘܛܶܐ، ܟܷܐܡܡܷܢܢܶܗ ܔܰܦܬܶܐ. ܐܘ ܓܰܘܕܐ ܛܳܪܷܢܘܰܝܠܶܗ ܒܓܰܘܶܗ ܕܝ ܔܰܦܬܶܐ ܩܰܕܰܪ ܚܰܡܫܰܥܣܰܪ ܝܰܘܡܶܐ، ܡܝܔܰܣܷܕܘܰܐ ܛܳܘܘܐ ܘܡܝܔܰܦܷܬܘܰܐ. ܡܷܐ ܕܡܔܰܦܷܕ ܐܘ ܓܰܘܕܐ ܡܰܝܕܝܘܰܝܠܶܗ ܘܚܘܠܩܝܘܰܝܠܶܗ ܛܳܘܘܐ ܒܝ ܡܘܣܶܐ (ܡܕܰܟܝܳܐ) ܣܰܝܡܝܘܰܝܠܶܗ ܠܰܘܠܰܒܶܐ ܘܣܰܝܡܝܘܰܝܠܶܗ ܡܳܝܘܥܐ ܘܚܰܝܛܝܘܰܝܠܶܗ ܠܰܫܰܢ ܕܠܐ ܢܳܦܷܩ ܐܘ ܩܰܛܝܪܐ ܡܝ ܕܘܟܬ݂ܐ ܕܚܷܛܛܶܗ ܘܡܰܚܨܝܘܰܝܠܰܗ ܛܳܘܘܐ. ܘܣܳܦܷܢܘܰܐ ܐܘ ܩܰܛܝܪܐ ܒܘ ܩܕ݂ܳܠܐ ܕܘ ܓܰܠܕܐ ܘܡܰܚܬܝܘܰܐ ܨܷܛܠܐ ܕܩܰܛܝܪܐ ܘܚܰܐ ܕܡܰܝܶܐ ܘܡܰܝܥܝܘܰܢܢܶܗ. ܣܰܝܡܝܘܰܐ ܬܠܳܬ݂ܐ ܕܰܩܪܳܢܶܐ ܒܘ ܫܷܟܷܠ ܕܝ ܟܳܢܶܐ ܘܡܷܨܪܝܘܰܐ ܐܘ ܓܰܘܕܐ ܒܘ ܚܰܘܠܐ ܒܪܝܫܶܐ ܕܰܕ ܕܰܩܪܳܢܶܐ ܘܡܰܝܥܝܘܰܐ ܐܘ ܩܰܛܝܪܐ. ܡܷܐ ܕܡܷܥܥܶܗ ܐܘ ܩܰܛܝܪܐ ܡܶܐ ܩܳܠܶܗ ܐܷܕ݂ܥܝܘܰܐ ܕܗܰܘܝ. ܗܶܕܝ ܡܰܟ݂ܠܝܘܰܐ ܐܰܕ ܕܰܘܓ݂ܶܐ ܠܘ ܠܰܓܰܢ ܘܦܷܪܫܝܘܰܐ ܐܘ ܡܷܫܚܐ ܡܰܕ ܕܰܘܓ݂ܶܐ ܘܟ݂ܳܠܰܨܘܰܐ ܐܘ ܡܝܳܥܳܐ. ܣܰܟܬܐ ܕܘ ܕܘܳܪܐ: ܣܰܝܡܝܘܰܐ ܐܝ ܐܰܠܶܐ ܕܘ ܕܘܳܪܐ ܡܰܩ ܩܰܝܣܶܐ ܕܘ ܒܰܠܘܛܐ. ܐܷܙܙܷܢܘܰܐ ܡܰܡܛܝܘܰܐ ܩܰܝܣܐ ܕܒܰܠܘܛܐ ܥܘܝܔܐ ܡܘ ܛܘܪܐ، ܐܷܡܡܝܘܰܝܠܶܗ ܒܰܪܟܳܐ ܥܰܠ ܕܟܷܬܘܰܐ ܥܘܝܔܐ ܟ݂ܕܝ ܒܰܪܟܳܐ. ܐܝ ܒܰܪܟܰܝܐ ܢܘܩܘܝܘܰܐ ܐܘ ܐܰܪܥܐ ܬܰܚܬܳܝܐ ܝܰܥܢܝ ܐܘ ܓܰܒܐ ܚܠܝܡܐ، ܘܢܷܔܪܝܘܰܝܠܶܗ ܛܳܘܘܐ. ܡܷܐ ܕܢܩܘܘܶܐ ܐܘ ܐܰܪܥܐ ܬܰܚܬܳܝܐ ܕܝ ܒܰܪܟܳܐ ܘܢܔܷܪܪܶܗ، ܢܷܔܪܝܘܰܐ ܩܰܝܣܐ ܚܪܶܢܐ ܐܷܡܡܝܘܰܝܠܶܗ ܣܰܝܦܐ. ܐܘ ܣܰܝܦܐ ܠܘ ܙܒܳܛܐ ܕܝ ܐܰܠܶܐ ܘܰܐ ܘܗܳܘܶܘܰܐ ܪܝܫܐ ܡܶܢܶܗ ܪܰܦܷܥ ܡܘ ܚܪܶܢܐ ܘܡܰܥܷܒܪܝܘܰܐ ܐܘ ܓܰܒܐ ܪܰܦܝܥܐ ܡܶܐ ܠܰܠܬܰܚ ܒܘ ܢܰܩܘܐ ܕܝ ܒܰܪܟܐ ܗܘܠ ܕܡܳܛܶܐ ܠܰܐܪܥܶܗ ܕܘ ܩܰܝܣܐ ܕܝ ܣܰܟܬܐ. ܒܷܬ݂ܷܪ ܡܷܐ ܕܡܰܚܷܬܘܰܠܠܶܗ ܐܘ ܣܰܝܦܐ ܡܰܚܬܝܘܰܐ ܩܰܝܣܐ ܒܰܝܢ ܐܘ ܣܰܝܦܐ ܠܝ ܒܰܪܟܳܐ ܐܷܡܡܝܘܰܝܠܶܗ ܬܰܥܠܳܐ. ܐܘ ܩܰܝܣܰܢܐ ܝܰܥܢܝ ܐܘ ܬܰܥܠܳܐ ܙܳܒܰܛܘܰܐ ܐܝ ܒܰܪܟܐ ܘܐܘ ܣܰܝܦܐ ܒܷܚܕ݂ܳܕ݂ܶܐ. ܘܚܰܝܨܝܘܰܝܠܶܗ ܒܩܰܝܣܘܣܶܐ ܕܷܐܡܡܝܘܰܢܢܶܗ ܒܰܠܘܛܶܐ. ܘܡܰܚܬܝܘܰܝܠܰܗ ܠܝ ܒܰܪܟܐ ܡܰܫܳܢܐ ܘܚܰܝܨܝܘܰܝܠܰܗ ܛܳܘܘܐ ܒܬܰܪܬܶܐ ܪܰܓ݂ܠܳܬ݂ܶܐ. ܘܒܷܬ݂ܷܪ ܡܰܚܬܝܘܰܐ ܣܰܟܬ݂ܐ ܕܦܰܪܙܠܐ ܒܰܐܪܥܶܗ ܕܘ ܣܰܝܦܐ ܕܩܘܕܪܝ ܕܰܘܪܝ ܐܶܒܰܗ. ܓܷܡܩܰܡܪܝܘܰܐ ܐܝ ܐܰܠܶܐ ܛܳܘܘܐ ܠܰܫܰܢ ܕܠܐ ܡܷܨܠܳܚܐ ܘܕܰܘܪܝܘܰܐ ܐܶܒܰܗ ܚܰܡܡܷܫ ܫܶܬ ܐܷܫܢܶܐ ܘܠܐ ܡܷܬܘܳܪܳܘܰܐ. ܘܡܰܝܕܝܘܰܐ ܦܰܠܩܐ ܕܷܣܦ݁ܝܢܕܰܪ ܟ݂ܰܝـܝܦܐ ܣܰܝܡܝܘܰܝܠܶܗ ܢܝܪܐ ܩܰܢ ܕܡܝܬܰܣܪܝ ܐܰܬ ܬܪܶܐ ܬܰܘܪܶܐ ܒܘ ܢܝܪܰܘܐ ܘܩܘܛܥܝܘܰܐ ܐܰܪܒܰܥ ܟܠܶܡܶܐ ܘܡܰܚܬܝܘܰܢܢܶܗ ܬܪܶܐ ܟ݂ܘܢܝܩܶܐ ܘܡܰܚܬܝܘܰܐ ܣܬܶܐ ܒܰܒܣܐ ܒܘ ܦܰܠܓܰܝܕ݂ܰܗ ܠܰܫܰܢ ܐܰܬ ܬܪܶܐ ܬܰܘܪܶܐ ܕܗܳܘܷܢ ܦܪܝܫܶܐ. ܡܰܣܪܝܘܰܐ ܐܰܬ ܬܪܶܐ ܬܰܘܪܶܐ ܒܷܚܕ݂ܳܕ݂ܶܐ ܟܘܠ ܚܰܐ ܒܷܬܪܶܐ ܟܠܶܡܶܐ. ܡܰܚܬܝܘܰܐ ܐܝ ܐܰܠܶܐ ܘܕܰܘܪܝܘܰܐ. ܐܘ ܕܰܘܳܪܐ ܗܳܘܶܘܰܝܠܶܗ ܡܰܣܳܣܐ ܕܡܝܣܷܡܘܰܐ ܡܝ ܚܰܛܪܐ ܕܘ ܪܰܝܡܘܢܐ. ܡܰܚܬܝܘܰܐ ܒܪܝܫܶܗ ܕܘ ܡܰܣܳܣܐ ܠܰܒܷܕ ܕܘ ܦܰܪܙܠܐ ܕܷܡܟܰܦܪܝ ܐܝ ܐܰܠܶܐ ܡܘ ܛܝܢܐ، ܘܒܘ ܐܰܪܥܰܝܕ݂ܶܗ ܣܬܶܐ ܒܰܨܡܳܪܐ ܕܡܷܩܪܶܘܰܐ ܙܰܩܛܝـܝܶܐ ܠܘ ܙܩܳܛܐ ܕܰܬ ܬܰܘܪܶܐ. ܕܘܳܪܳܐ. ܙܪܳܥܐ، ܚܨܳܕܐ ܡܶܩܷܡ ܕܰܘܪܝܘܰܐ ܐܰܢ ܐܰܪܥܳܬ݂ܶܐ ܒܰܚ ܚܰܝܘܳܬ݂ܶܐ. ܡܶܩܷܡ ܡܷܐ ܕܳܐܬ݂ܶܐ ܐܘ ܣܰܬ݂ܘܐ ܘܕܰܘܪܝܘܰܐ ܗܶܕܝ ܗܶܕܝ ܘܙܷܪܥܝܘܰܐ. ܐܘ ܕܰܘܳܪܐ ܕܳܘܰܪܘܰܐ ܚܪܶܢܐ ܡܰܠܩܷܛܘܰܐ ܒܷܬ݂ܪܶܗ ܐܘ ܙܰܕ ܒܰܟܼ ܟ݂ܛܘܛܶܐ. ܡܶܩܷܡ ܠܰܬܘܰܐ ܬܪܰܟܬܳܪܶܐ ܘܠܰܬܘܰܐ ܚܳܨܘܕܝܳܬ݂ܶܐ ܡܷܐ ܕܡܰܛܝ ܐܘ ܙܰܕ ܠܘ ܚܨܳܕܐ ܘܫܰܥܷܬ݂ ܐܷܙܙܷܢܘܰܐ ܠܘ ܚܨܳܕܐ ܒܰܡ ܡܰܓܙܘܢܶܐ ܘܚܘܨܕܝܘܰܐ ܐܘ ܙܰܕ ܘܢܘܩܠܝܘܰܝܠܶܗ ܒܰܫ ܫܰܠܶܐ ܥܰܠ ܐܰܚ ܚܰܝܘܳܬ݂ܶܐ ܠܰܢ ܐܰܕܪܳܬ݂ܶܐ ܘܦܳܝܰܫܘܰܐ ܬܰܡܐ ܗܘܠ ܕܢܳܫܰܦܘܰܐ ܛܳܘܘܐ. ܘܟܘܠ ܢܰܩܩܰܐ ܓܡܰܝܕܝܘܰܐ ܚܶܕܷܪ ܥܰܣܪܐ ܫܰܠܶܐ ܦܷܪܫܝܘܰܢܢܶܗ ܒܝ ܩܰܣܣܰܠܶܐ ܐܰܘ ܒܘ ܡܰܠܚܳܝܐ ܘܡܰܣܪܝܘܰܐ ܐܷܫܬܐ ܐܰܘ ܫܰܘܥܐ ܬܰܘܪܶܐ ܐܰܘ ܚܡܳܪܶܐ ܐܰܥܠܶܗ ܘܗܳܘܶܘܰܐ ܚܰܐ ܕܰܝـܝܡ ܐܰܥܡܰܝـܝܶܗ ܘܡܰܟܷܪܟ݂ܝܘܰܐ ܐܝ ܓܶܪܰܐ ܐܰܘ ܐܰܕܪܐ ܐܰܘ ܐܝ ܕܪܳܟ݂ܬܐ. ܫܰܒܬ݂ܐ ܕܝܰܘܡܳܬ݂ܶܐ ܠܐ ܟ݂ܘܠܨܳܳܘܰܐ ܐܝ ܓܶܪܰܐ. ܐܘ ܙܰܕ ܡܰܩܷܠܒܝܘܰܝܠܶܗ ܘܡܰܛܷܪܨܝܘܰܝܠܶܗ. ܘܢܳܦܰܩܘܰܠܠܶܗ ܬܰܩܪܝܒܰܢ ܥܷܣܪܝ ܫܰܠܶܐ ܕܙܰܕ ܡܝ ܐܰܕܪܐ ܘܒܷܬ݂ܷܪ ܓܷܡܕܰܪܷܢܘܰܝܠܶܗ ܒܰܡ ܡܰܠܚܳܝܶܐ ܘܦܷܪܫܝܘܰܐ ܐܘ ܙܰܕ ܡܘ ܬܰܘܢܐ. ܐܰܢ ܢܳܫܶܐ ܒܘ ܙܰܒܢܰܘܐ ܚܳܙܷܢܘܰܐ ܥܰܣܩܘܬ݂ܐ ܓ݂ܰܠܰܒܶܐ ܘܡܣܰܝܒܰܪܪܶܗ ܡܪܳܪܶܐ ܕܠܐ ܟܰܝܠܐ. ܘܐܘ ܙܰܕ ܟܘܠܶܗ ܚܘܨܕܝܘܰܝܠܶܗ ܒܝ ܐܝܕ݂ܐ ܘܒܘ ܡܰܓܙܘܢܐ ܘܢܘܩܠܝܘܰܝܠܶܗ ܒܰܫ ܫܰܠܶܐ ܥܰܠ ܐܰܚ ܚܡܳܪܶܐ. ܐܘܥܕܐ ܐܰܡ ܡܰܟܝܢܰܬ ܓܷܫܬ ܟܘܠ ܡܶܕܶܐ ܟܳܣܰܝܡܝ. ܐܝ ܓܳܪܷܣܬܐ ܒܷܬ݂ܷܪ ܡܷܐ ܕܚܘܨܕܝܘܰܐ ܐܰܛ ܛܠܰܘܚܶܐ ܡܰܝܕܝܘܰܐ ܐܝ ܣܢܝܩܘܬ݂ܐ ܕܘ ܒܰܝܬܐ ܡܰܢܢܶܗ ܘܦܷܪܫܝܘܰܢܢܶܗ ܠܟ݂ܰܣܪܰܐ ܠܘ ܡܘܟܠܐ ܕܒܘ ܣܰܬ݂ܘܐ. ܓܷܡܨܰܘܠܝܘܰܢܢܶܗ ܘܡܢܰܩܝܘܰܢܢܶܗ ܡܰܒ ܒܘܓ݂ܪܶܐ ܡܷܐ ܕܡܢܰܩܷܢܢܶܗ ܓܘܪܣܝܘܰܢܢܶܗ ܒܝ ܓܳܪܷܣܬܐ. ܐܝ ܓܳܪܷܣܬܐ ܟܘܝܐ ܡܶܐ ܬܪܶܐ ܦܰܠܩܶܐ ܕܟܶܦܶܐ. ܐܘ ܦܰܠܩܐ ܬܰܚܬܳܝܐ ܟܷܬܠܶܗ ܡܘܟܠܐ ܒܘ ܦܰܠܓܐ ܐܘ ܥܶܠܳܝܐ ܟܷܬܠܶܗ ܢܰܩܘܐ ܒܘ ܦܰܠܓܐ ܘܟܳܥܳܒܷܪ ܒܘ ܡܘܟ݂ܠܐ ܕܘ ܦܰܠܩܐ ܬܰܚܬܳܝܐ. ܘܟܷܬܠܰܗ ܐܝܕ݂ܐ ܡܘ ܩܰܝܣܐ ܒܘ ܓܰܒܰܝܕ݂ܰܗ ܡܶܐ ܠܰܦ ܠܰܪܘܰܠ ܠܰܫܰܢ ܐܘ ܓܰܪܳܣܐ ܕܙܳܒܰܛܠܶܗ ܕܩܳܕܰܪ ܡܰܒܪܰܡ ܐܘ ܦܰܠܩܐ ܥܶܠܳܝܐ ܥܘܠ ܡܘ ܬܰܚܬܳܝܐ ܕܓܳܪܷܣ ܐܰܛ ܛܠܰܘܚܶܐ ܐܰܘ ܡܶܕܶܐ ܚܪܶܢܐ. ܐܘ ܓܰܪܳܣܐ ܡܰܚܷܬܘܰܐ ܟܘܠ ܢܰܩܠܰܐ ܠܰܟܡܐ ܛ ܛܠܰܘܚܶܐ ܒܘ ܢܰܩܘܐ ܘܓܘܪܣܝܘܰܐ. ܐܰܛ ܛܠܰܘܚܶܐ ܐܰܓ݂ܠܰܒ ܟܳܡܷܬܟ݂ܳܠܝ ܒܨܰܘܡܐ ܪܰܒܐ ܘܒܨܰܘܡܐ ܙܥܘܪܐ ܘܒܝ ܐܰܪܒܥܐ ܥܪܘܒܬܐ. ܢܳܩܽܘܨܐ ܟܳܡܷܬܟ݂ܳܠܝ ܒܰܝ ܝܰܘܡܳܬ݂ܶܐ ܚܪܶܢܶܐ. ܐܰܚ ܚܷܡܨܶܐ ܐܰܚ ܚܷܡܨܶܐ ܣܬܶܐ ܗܰܘܟ݂ܰܐ ܡܷܐ ܕܢܰܫܝܦܝ ܟܳܚܘܨܕܷܢܢܶܗ ܘܡܰܚܬܷܢܢܶܗ ܒܝ ܐܰܕܪܐ. ܘܒܷܬ݂ܷܪ ܟܷܡܦܰܪܕ݂ܷܢܢܶܗ ܒܝ ܓܶܪܰܐ ܒܰܚ ܚܰܝܘܳܬ݂ܶܐ. ܘܒܷܬ݂ܷܪ ܡܝ ܓܶܪܰܐ ܟܳܦܷܪܫܝ ܐܘ ܡܶܕܶܐ ܕܟܳܠܳܙܰܡܡܶܗ ܡܰܢܢܶܗ ܠܘ ܒܰܝܬܐ ܘܗܷܢ ܟܳܦܷܪܫܷܢܢܶܗ ܠܘ ܒܘܙܰܪܥܐ. ܘܟܳܣܰܝܡܝ ܡܰܢܢܶܗ ܚܶܡܨܶܐ ܩܰܪܥܳܢܶܐ، ܝܰܟ݂ܢܝ ܘܡܘܟܠܳܢܶܐ ܚܪܶܢܶܐ. ܐܰܚ ܚܪܶܢܶܐ ܕܟܳܙܰܝܕܝ ܟܷܡܙܰܒܢܷܢܢܶܗ ܒܝ ܫܘܩܐ. ܐܝ ܪܷܚܝܐ ܡܶܩܷܡ ܒܘ ܙܰܒܢܐ ܕܰܣ ܣܳܒܰܝܕ݂ܰܢ ܠܰܬܘܰܐ ܐܝܡܟܰܢ ܕܰܪ ܪܰܕ݂ܳܝܳܬܳܐ (ܥܰܪܰܒܰܬ). ܐܘ ܡܰܙܠܐ ܘܡܰܬ݂ܝܐ ܟܘܠܶܗ ܗܳܘܶܘܰܐ ܒܰܪ ܪܰܓ݂ܠܶܐ. ܡܶܕܶܐ ܕܰܐܓ݂ܠܰܒ ܠܳܙܷܡܘܰܐ ܠܰܩ ܩܷܪܝܰܘܳܬ݂ܶܐ ܐܝ ܪܷܚܝܳܐ ܘܰܐ. ܠܰܬܘܰܐ ܪܷܚܝܐ ܒܰܐܪܟܰܚ، ܡܰܘܟ݂ܰܐ ܐܝܢܰܩܰܐ ܕܠܳܙܰܡܘܰܐ ܛܚܳܢܐ ܕܚܷܛܶܐ ܐܰܘ ܕܷܛ ܛܠܰܘܚܶܐ ܟܷܬܘܰܐ ܪܷܚܝܐ ܒܩܰܪܬܡܝܢ، ܒܒܰܕܷܒܒܶܐ، ܒܰܐܢܚܷܠ، ܒܰܐܣܬܷܠ ܒܰܡ ܡܰܝܶܐ ܚܶܘܳܪܶܐ، ܒܡܷܕ݂ܝܰܕ݂، ܒܷܢܨܝܘܝܢ. ܡܰܠܟ݂ܝܘܰܐ ܙܷܕ ܡܷܐ ܫܶܬ݂ ܫܳܥܶܐ ܗܘܠ ܕܡܳܛܷܢܘܰܐ ܠܝ ܪܷܚܝܐ ܕܛܘܚܢܝ ܐܘ ܙܰܕܰܬ݂ܬ݂ܶܗ. ܐܘ ܝܰܘܡܐ ܟܘܠܶܗ ܐܷܙܙܶܘܰܐ ܒܘ ܕܰܪܒܐ ܒܬܰܥܒܐ ܓ݂ܰܠܰܒܶܐ. ܢܰܩܩܰܬ ܡܰܬ ܬܪܰܥܣܰܪ ܕܘ ܠܰܠܝܐ ܗܘܠ ܠܰܫ ܫܶܬ݂ ܕܨܰܦܪܰܝܬܐ ܗܘܠ ܕܡܳܛܝܘܰܐ ܠܝ ܪܷܚܝܐ ܕܡܷܕ݂ܝܰܕ݂. ܛܘܚܢܝܘܰܐ ܐܰܛ ܛܰܥܢܰܬ݂ܬ݂ܶܗ ܡܰܛܷܥܢܝܘܰܢܢܶܗ ܘܕܘܥܪܝܘܰܐ ܠܘ ܒܰܝܬܐ ܡܗܰܠܟ݂ܳܢܶܐ ܥܰܠ ܒܰܪܒܘܢܷܣ، ܒܰܔܷܢܢܶܐ، ܘܟܰܦܪܐ ܘܡܳܛܷܢܘܰܐ ܠܘ ܒܰܝܬܐ. ܐܰܩ ܩܘܶܪܷܫ ܡܶܩܷܡ ܠܰܬܘܰܐ ܐܝܡܟܰܢ ܕܘ ܣܝܳܡܐ ܕܰܩ ܩܘܨܪܶܐ ܘܕܰܒ ܒܳܬܶܐ ܒܝ ܬܘܓ݂ܠܰܐ ܘܒܝ ܫ̰ܝܡܰܢܬܐ. ܐܷܙܙܷܢܘܰܐ ܩܘܛܥܝܘܰܐ ܩܰܝܣܶܐ ܩܘܛܥܝܘܰܐ ܚܷܕܷܪ ܡܐ ܩܰܝܣܶܐ ܘܡܐ ܣܬܘܢܰܬ ܘܣܰܪܔܷܠܠܰܬ. ܘܣܰܝܡܝܘܰܐ ܥܣܰܪ ܣܬܘܢܰܬ ܘܥܰܠ ܩܰܪܥܰܝܝܶܗ ܣܰܪܔܷܠܠܰܬ ܢܘܩܘܝܘܰܢܢܶܗ ܗܳܘܷܢܘܰܐ ܒܘ ܫܷܟܷܠ ܕܘ ܫ̰ܰܛܰܠ. ܓܡܰܚܬܝܘܰܐ ܐܰܩ ܩܰܝܣܶܐ ܥܰܠ ܚܕ݂ܳܕ݂ܶܐ ܘܣܰܝܡܝܘܰܢܢܶܗ ܩܰܪܷܫ. ܡܷܐ ܕܣܷܡܡܗܐ ܐܘ ܩܰܪܷܫ ܩܘܛܪܝܘܰܝܠܶܗ ܒܰܩ ܩܰܝܣܶܐ ܚܠܝܡܶܐ. ܡܷܐ ܕܩܛܷܪܪܶܗ ܒܰܩ ܩܰܝܣܶܐ ܚܠܝܡܶܐ ܓܡܰܚܬܝܘܰܐ ܩܰܝܣܶܐ ܪܰܦܝܥܶܐ ܐܰܥܠܶܗ ܛܳܘܘܐ ܒܘ ܫܷܟܷܠ ܕܰܨ ܨܰܘܥܳܬ݂ܶܐ ܘܒܷܬ݂ܷܪ ܛܰܪܦܶܐ ܐܰܥܠܰܝܝܶܗ ܘܗܶܕܝ ܓܷܡܬܰܪܒܝܘܰܝܠܶܗ ܒܥܰܦܪܐ ܢܰܫܝܦܐ ܐܘ ܩܰܪܷܫ ܘܗܳܘܶܘܰܐ ܐܘ ܚܘܠܡܐ ܕܘ ܥܰܦܪܐ ܣܶܡܳܩܐ ܚܷܕܷܪ ܦܰܠܓܶܗ ܕܡܷܬܪܐ ܘܒܷܬ݂ܷܪ ܓܡܰܬܪܝܘܰܝܠܶܗ ܛܳܘܘܐ ܘܓܡܰܢܕܪܝܘܰܝܠܶܗ ܒܝ ܡܰܢܕܰܪܘܢܶܐ ܛܳܘܘܐ. ܘܦܰܝܫܝܘܰܐ ܬܰܚܬܘ ܩܰܪܷܫܰܘܐ ܒܰܢ ܐܷܫܢܶܐ. ܟܘܠ ܫܰܬܐ ܡܰܢܕܷܪܝܘܰܐ ܐܝ ܓܳܪܐ ܒܘ ܥܘܪܐ ܕܠܐ ܕܳܠܷܦ ܥܰܠ ܩܰܪܥܰܝܝܶܗ. ܐܰܩ ܩܰܝܣܶܐ ܕܘ ܒܰܠܘܛܐ ܕܡܝܬܰܚܬܝܘܰܐ ܒܘ ܩܰܪܷܫ ܦܰܝܫܝܘܰܐ ܓ݂ܰܠܰܒܶܐ ܙܰܒܢܐ ܝܰܪܝܟ݂ܐ ܘܠܐ ܒܰܝܩܝܘܰܐ. ܐܘ ܫܶܚܳܢܐ ܕܘ ܒܰܝܬܐ ܡܶܩܷܡ ܗܳܘܶܘܰܐ ܒܰܟ ܟܳܢܘܢܶܐ. ܐܰܟ ܟܳܢܘܢܶܐ ܗܳܘܶܢܘܰܐ ܒܘ ܦܰܠܓܐ ܕܘ ܒܰܝܬܐ ܕܰܩ ܩܘܶܪܷܫ. ܡܰܚܬܝܘܰܐ ܩܰܝܣܶܐ ܝܰܪܝܟ݂ܶܐ ܥܰܠ ܐܘ ܟܳܢܘܢܐ ܘܗܳܘܶܘܰܐ ܕܶܟ݂ܳܢܐ ܓ݂ܰܠܰܒܶܐ ܠܰܘܓ݂ܷܠ ܒܰܣ ܡܝ ܡܰܔܒܘܪܝܶܐ ܘܰܐ. ܠܰܬܘܰܐ ܡܫܰܚܢܳܢܝܳܬ݂ܶܐ ܠܰܬܘܰܐ ܦܰܚܡܐ ܠܰܬܘܰܐ ܡܶܕܶܐ ܠܘ ܫܶܚܳܢܐ ܡܝ ܡܰܔܒܘܪܝܶܐ ܡܷܣܬܰܥܷܡܠܝܘܰܐ ܐܰܟ ܟܳܢܘܢܶܐ. ܗܳܘܷܢܘܰܐ ܐܰܩ ܩܘܶܪܷܫ ܟܳܡܶܐ ܡܘ ܕܶܟ݂ܳܢܐ ܘܢܰܩܩܰܘܰܬ ܡܷܒܥܳܔܝܘܰܐ ܐܰܢ ܢܳܫܶܐ ܕܘ ܒܰܝܬܐ ܡܘ ܕܶܟ݂ܳܢܐ. ܒܠܰܠܝܐ ܦܰܝܫܝܘܰܐ ܩܷܡ ܐܰܫ ܫܪܳܓ݂ܶܐ (ܩܡܰܫ ܫܪܳܓ݂ܶܐ) ܩܷܡ ܕܰܠ ܠܰܡܦ݁ܰܬ ܕܘ ܓܰܙ. ܕܷܡܟ݂ܝܘܰܐ ܒܰܝܢ ܐܰܟ ܟܘܪܦܶܐ ܘܒܰܝܢ ܐܰܥ ܥܝܩܰܪܘܶܐ ܗܳܘܷܢܘܰܐ ܓ݂ܰܠܰܒܶܐ ܫܰܦܷ݁ܪܙܰܐ ܐܰܦ ܦܰܩܝܪܶܐ. ܐܝ ܥܡܰܪܰܐ ܕܰܒ ܒܳܬܶܐ ܕܰܩ ܩܛܳܪܶܐ ܒܝ ܚܰܪܰܝܬܰܬ݂ܶܗ ܡܷܐ ܕܪܰܘܝܚܳܐ ܘܰܐ ܒܪܝܬ݂ܐ ܒܘ ܙܰܒܢܐ ܕܒܰܒܳܢܰܝܢܰܐ ܒܕܰܠܠܶܗ ܕܣܰܝܡܝ ܐܰܒ ܒܳܬܶܐ ܒܩܶܠܳܝܳܬ݂ܶܐ، ܐܶܠܐ ܕܝܣܰܐ ܒܬܰܥܒܐ ܪܰܒܐ ܡܝܣܳܡܝܘܰܐ. ܐܰܟ ܟܶܦܶܐ ܡܷܢܩܳܠܝܘܰܐ ܒܝ ܟܰܬܦܐ ܐܰܘ ܥܰܠ ܚܰܨܶܗ ܕܰܚ ܚܡܳܪܶܐ. ܐܝ ܢܩܰܪܬܐ ܚܷܒܫܝܘܰܝܠܰܗ ܒܰܫ ܫܰܘܟܰܬ ܘܡܳܛܷܢܘܰܝܠܰܗ ܡܘ ܛܘܪܐ. ܢܘܩܠܝܘܰܝܠܰܗ ܒܰܣ ܣܰܪܝܓ݂ܰܬ ܘܒܰܬ ܬܰܢܰܓܰܝܰܬ ܘܒܰܣ ܣܰܒܠܰܬ. ܐܝܢܰܩܩܰܐ ܕܒܳܢܷܢܘܰܐ ܐܝ ܩܶܠܰܝܬܐ ܡܰܩܝܡܝܘܰܝܠܰܗ ܐܷܫܬܐ ܫܰܘܥܐ ܪܶܙܶܐ ܡܳܛܷܢܘܰܐ ܩܰܝܣܶܐ ܡܘ ܛܘܪܐ ܘܩܘܛܪܝܘܰܝܠܰܗ ܡܷܐ ܕܩܛܝܪܰܠܠܶܗ ܡܰܚܬܝܘܰܐ ܩܰܝܣܶܐ ܒܰܪܒܰܢ ܕܷܚܕ݂ܳܕ݂ܶܐ. ܡܰܚܬܝܘܰܐ ܩܰܝܣܐ ܚܰܐ ܝܰܪܝܟ݂ܐ ܡܘ ܪܝܫܐ ܠܘ ܪܝܫܐ ܕܝ ܩܶܠܰܝܬܐ ܐܷܡܡܝܘܰܝܢܰܠܶܗ ܩܰܝܣܐ ܕܝ ܢܘܢܬܐ. ܡܷܐ ܕܡܰܚܷܬܘܰܠܠܶܗ ܐܘ ܩܰܝܣܐ ܕܝ ܢܘܢܬܐ ܓܣܷܢܕܝܘܰܝܠܶܗ ܒܩܰܝܣܐ ܪܰܦܝܥܐ ܒܘ ܫܷܟܷܠ ܕܰܩ ܩܰܝܣܶܐ ܕܰܡ ܡܰܥܘܳܠܶܐ ܘܓܡܳܠܷܢܘܰܐ ܒܰܝܢܷܬ݂ܬ݂ܶܗ ܩܰܝܣܶܐ ܢܰܥܝܡܶܐ ܡܩܰܣܩܷܣܶܐ، ܘܓܩܳܪܷܢܘܰܐ ܠܰܢ ܢܳܫܶܐ ܕܝ ܩܪܝܬ݂ܐ ܕܷܡܥܰܘܢܷܢܢܶܗ. ܒܰܙ ܙܰܒܢܰܢܷܟ ܐܰܢ ܢܳܫܶܐ ܒܰܩ ܩܷܪܝܰܘܳܬ݂ܶܐ ܡܥܰܘܢܝܘܰܐ ܚܕ݂ܳܕ݂ܶܐ. ܓܡܳܛܷܢܘܰܐ ܥܰܦܪܐ ܣܶܡܳܩܐ ܘܣܰܝܡܝܘܰܐ ܓܘܠܠܳܟܰܬ ܕܘ ܛܝܢܐ ܡܰܚܬܝܘܰܐ ܡܐ ܣܰܪܝܓ݂ܰܬ ܕܥܰܦܪܐ ܘܐܰܪܒܥܐ ܚܰܡܫܐ ܫܰܠܶܐ ܕܬܰܘܢܐ ܘܡܓܰܘܠܝܘܰܝܠܶܗ ܓܘܠܠܳܟܰܬ ܘܩܳܪܷܢܘܰܐ ܠܰܥܠܰܝܡܶܐ ܕܝ ܩܪܝܬ݂ܐ ܘܩܘܛܪܝܘܰܐ ܐܘ ܩܛܳܪܐ ܕܘ ܩܘܨܪܐ. ܐܘ ܡܳܪܐ ܕܘ ܒܰܝܬܐ ܢܳܚܰܪܘܰܐ ܪܝܫܐ ܕܣܰܘܰܠ ܠܰܢ ܢܳܫܶܐ ܕܳܐܬ݂ܷܢܘܰܐ ܠܘ ܥܶܘܳܢܐ. ܡܷܐ ܕܩܛܝܪ ܒܰܓ ܓܘܠܠܳܟܰܬ ܝܰܘܡܐ ܓܛܳܪܷܢܘܰܐ ܕܢܳܫܷܦ ܐܘ ܛܝܢܐ. ܐܘ ܝܰܘܡܐ ܕܒܷܬ݂ܪܶܗ ܓܩܳܪܶܘܰܐ ܠܰܢ ܢܳܫܶܐ ܕܝ ܩܪܝܬ݂ܐ ܢܰܩܩܰܐ ܚܪܶܬܐ ܓܕܳܐܡܰܪܘܰܐ ܬܳܟ݂ܘ ܐܰܥܡܰܝܢܰܐ ܓܩܘܛܪܝܢܰܐ ܐܘ ܩܘܨܪܐ ܒܰܟ ܟܶܦܶܐ ܘܟܰܠܫܐ. ܐܷܙܙܷܢܘܰܐ ܐܰܢ ܢܳܫܶܐ ܡܥܰܘܢܝܘܰܐ ܚܕ݂ܳܕ݂ܶܐ. ܡܰܚܬܝܘܰܐ ܫ̰ܝܡܰܢܬܐ ܘܟܶܦܶܐ ܒܰܪܒܰܢ ܕܷܚܕ݂ܳܕ݂ܶܐ ܥܰܠ ܐܘ ܛܝܢܰܘܐ ܕܘ ܩܛܳܪܐ ܗܘܠ ܕܟܳܡܰܠܘܰܐ ܘܩܘܛܪܝܘܰܝܠܶܗ ܒܘ ܫܷܟܷܠ ܕܝ ܟܳܢܶܐ. ܡܷܐ ܕܦܰܝܫܳܘܰܐ ܐܝ ܟܶܦܐ ܚܰܪܰܝܬܐ ܕܘ ܒܰܝܬܐ ܐܘ ܗܳܣܬܰܐ ܓܩܳܪܶܘܰܐ ܠܘ ܡܳܪܐ ܕܘ ܒܰܝܬܐ ܓܕܳܐܡܰܪܘܰܐ ܡܷܢ ܟܷܐܒܥܷܬ ܓܕܳܐܡܰܪܘܰܝܠܶܗ ܟܳܐܒܰܥܢܐ ܨܰܦܽܘܪܐ ܐܝ ܟ݂ܷܠܥܰܝܕ݂ܝ ܓܕܳܐܡܰܪܘܰܝܠܶܗ ܓܕܳܐܒܶܢܘܟܼ ܨܰܦܘܪܐ ܓܕܳܐܡܰܪܘܰܝܠܶܗ ܥܰܠ ܐܘ ܟ݂ܶܪ ܐܝ ܟܶܦܐ ܚܰܪܰܝܬܐ. ܘܗܝܝܶܐ ܡܰܕܥܷܪܘܰܐ ܐܰܥܠܶܗ ܓܕܳܐܡܷܪܘܰܐ ܬܰܘܕܝ ܐܶܠܘܟܼ. ܡܷܐ ܕܘ ܩܛܳܪܐ ܢܰܫܷܦ ܓܡܰܝܕܝܘܰܐ ܐܘ ܩܰܠܷܒ ܡܶܐ ܬܰܚܬܶܗ ܘܓܡܰܢܕܦܝܘܰܝܠܶܗ ܘܒܷܬ݂ܷܪ ܟܳܣܷܟ݂ܪܝ ܐܰܢ ܢܰܩܘܶܐ ܕܘ ܒܰܝܬܐ ܓܡܳܠܝܘܰܢܢܶܗ ܒܘܓܪܶܐ ܘܫ̰ܝܡܰܢܬܐ ܟܘܠܠܶܗ ܟܡܰܠܷܘܫܝܠܶܗ ܘܟܳܝܷܬܘܝ ܐܶܒܶܗ. ܐܰܪܟܰܚ ܒܙܰܒܢܐ ܟܰܪܝܐ ܡܰܐܝܟܐ ܠܰܐܝܟܐ. ܐܰܒ ܒܰܒܳܢܰܝܕ݂ܰܢ ܣܬܶܐ ܚܙܰܠܠܶܗ ܥܰܣܩܘܬ݂ܐ ܐܶܠܐ ܬܰܘܕܝ ܠܡܳܪܝܐ ܐܰܕܝܰܘܡܰܐ ܟܝܬ ܟܰܗܪܳܒܐ ܒܰܩ ܩܷܪܝܰܘܳܬ݂ܶܐ ܘܡܶܕܳܢܶܐ ܕܰܚ ܚܰܝܶܐ ܓ݂ܰܠܰܒܶܐ ܥܰܠ ܐܘ ܟܰܗܪܳܒܐ ܟܳܫܘܓ݂ܠܝ ܘܟܳܡܰܟ݂ܝܦܝ ܐܘ ܬܰܥܒܐ ܕܰܢ ܢܳܫܶܐ ܕܝ ܩܪܝܬ݂ܐ. ܐܘܥܕܐ ܟܘܠ ܡܶܕܶܐ ܒܝ ܪܰܚܰܐ ܝܐ. ܟܝܬܐ ܡܰܟܝܢܰܬ، ܘܓ݂ܰܠܰܒܶܐ ܡܘ ܫܘܓ݂ܠܐ ܐܰܦ݁ܦ݁ܶܗ ܟܳܡܝܣܷܡ. ܪܰܘܝـܚܐ ܒܪܝܬ݂ܐ ܥܰܠ ܐܰܢ ܢܳܫܶܐ ܘܣܰܘܝܥܝ. ܒܰܣܝܡܝ ܐܰܚ ܚܰܝܶܐ ܕܘ ܒܰܪܢܳܫܐ، ܐܶܠܐ ܒܰܠܟܝ ܣܬܶܐ ܐܷܫܡܐ ܙܰܝـܝـܕܝ ܐܰܩ ܩܶܛܪܶܐ ܕܒܰܝܢ ܐܝ ܐܝܩܰܪܬ݂ܐ. ܡܶܩܷܡ ܐܰܡ ܡܪܳܪܶܐ ܡܝ ܠܰܝܬܳܝܘܬ݂ܐ ܕܘ ܡܶܕܶܐ ܘܰܝܢܶܐ، ܐܘܥܕܐ ܐܰܓ݂ܠܰܒ ܡܝ ܒܰܣܝܡܘܬ݂ܐ ܘܡܝ ܪܰܚܰܐ ܢܶܐ. ܥܰܠ ܐܰܩ ܩܶܛܪܶܐ ܕܟܳܐܬ݂ܷܢ ܡܝ ܚܝܪܘܬ݂ܐ ܕܰܐܕܝܰܘܡܰܐ ܒܰܝܢ ܐܝ ܐܝܩܰܪܬ݂ܐ. ܐܰܢ ܐܶܡܳܬ݂ܶܐ ܘܰܐܒ ܒܰܒܳܢܶܐ ܠܰܬܢܶܐ ܬ݂ܢܝـܚܳـܝܶܐ ܒܘ ܦܷܟܷܪ ܟ݂ܘܕ ܡܶܩܷܡ. ܟܳܡܰܚܘܶܐ ܟܘܠ ܙܰܒܢܐ ܟܳܡܰܡܛܶܐ ܐܘ ܒܷܣܡܰܝܕ݂ܶܗ ܘܰܐܩ ܩܷܛܪܰܝܕ݂ܶܗ ܥܰܡ ܚܕ݂ܳܕ݂ܶܐ. ܐܰܕܝܰܘܡܰܐ ܒܰܩ ܩܷܪܝܰܘܳܬ݂ܶܐ ܠܐ ܒܰܣ ܩܰܪܷܫ، ܐܶܠܐ ܟܳܣܰܝܡܝ ܒܳܬܶܐ ܫܰܦܝܪܶܐ ܒܝ ܬܘܓ݂ܠܰܐ ܘܒܰܟ ܟܶܦܶܐ ܡܢܰܩܫܶܐ ܘܒܝ ܫ̰ܝܡܰܢܬܐ ܘܩܘܣܪܶܐ ܚܰܠܝܶܐ ܠܘ ܝܬܳܘܐ، ܘܟܳܘܰܠܠܶܗ ܪܰܕ݂ܳܝܬ݂ܶܐ ܠܘ ܡܰܙܠܐ ܘܡܰܬ݂ܝܳܐ ܘܟܷܬܬܶܗ ܟܘܠ ܡܶܕܶܐ ܕܠܳܙܷܡ ܠܰܚ ܚܰܝܶܐ ܒܘ ܒܰܝܬܐ. ܬ݂ܢـܝـܚـܝ ܐܷܫܡܐ ܒܘ ܦܰܓ݂ܪܐ ܐܰܢܰܩܩܰܐ ܕܡܷܬ݂ܢܳܚܝܘܰܐ ܣܬܶܐ ܒܘ ܗܰܘܢܐ ܘܒܝ ܪܘܚܐ ܗܶܫ ܛܰܘ ܓܬܳܘܶܘܰܐ. ܐܶܠܐ ܕܝܣܰܐ ܓܠܳܙܷܡ ܕܳܐܒܷܢ ܬܰܘܕܝܳܬ݂ܶܐ ܘܫܘܒܚܐ ܠܰܐܠܳܗܐ ܥܰܠ ܐܝ ܛܰܝܒܘܬ݂ܐ ܕܣܷܡܠܶܗ ܐܰܥܡܰܝܝܶܗ. ܥܰܙܝܙ ܐܰܝܕܝܢ ܐܰܪܟܰܚܳܝܐ 4.625 ܡ̈ܠܐ.