Ayhan Gürkan: ܕܘܟܬ݂ܐ ܚܰܐ ܕܡܷܬ݂ܢܰܚ: ܐܘ ܦ݁ܰܪܩ ܕܡܳܪܝ̱ ܗܳܒܷܠ ܘܡܳܪܝ̱ ܐܰܒܪܳܗܷܡ / U parq d mor Abrohom
U parq d mor Abrohom
ܩܘܡ ܐܘ ܬܰܪܥܐ ܒܰܪܳܝܐ ܕܝ ܕܰܝܪܐ ܕܡܳܪܝ̱ ܐܰܒܪܳܗܷܡ، ܗܘܠ ܠܝ ܫܰܬܐ ܕܰܬ ܬܪܰܠܦܐ، ܟܘܠܶܗ ܐܰܕܪܳܬ݂ܶܐ ܘܰܐ. ܟܘܠ ܝܰܘܡܐ ܒܷܬ݂ܷܪ ܡܝ ܨܠܘܬ݂ܐ ܕܥܰܨܪܝܝܶܐ، ܐܷܙܙܰܢ ܡܷܫܬܰܥܝܘܰܝܢܰܐ ܐܰܥܠܰܝܝܶܗ ܒܝ ܛܷܒܒܶܐ. ܐܘ ܥܰܡܐ ܕܡܷܕ݂ܝܰܕ ܒܘ ܩܰܝܛܐ ܡܰܚܬܝܘܰܐ ܐܘ ܙܰܐܕ ܕܷܬ݂ܬ݂ܶܗ ܐܰܥܠܰܝܝܶܗ. ܒܷܬ݂ܷܪ ܡܶܐ ܕܷܒܕܶܠܶܗ ܐܘ ܫܘܓ݂ܠܐ ܐܶܒܰܗ، ܣܝܡ ܚܝܕ݂ܳܪܶܗ ܕܰܢ ܐܰܕܪܳܬ݂ܶܐ ܫܘܪܳܢܶܐ ܥܶܠܳܝܶܐ. ܡܰܡܛܶܐ ܥܰܦܪܐ ܣܶܡܳܩܐ ܓ݂ܱܠܱܒܶܐ ܘܣܝܡ ܦ݁ܰܪܩ ܘܒܰܟ݂ܫ̰ܰܐ ܓ݂ܱܠܱܒܶܐ ܫܰܦܷܪܬܐ، ܡܠܝܬ݂ܐ ܐܝܠܳܢܶܐ، ܘܰܪܕܶܐ ܘܝܰܪܳܩܘܬ݂ܐ. ܡܰܚܰܬ ܐܶܒܰܗ ܟܘܪܣܝܶܐ ܘܡܰܨܰܬ ܠܰܫܰܢ ܐܘ ܐܝܬܳܘܐ. ܥܰܠ ܕܠܰܝܬ ܕܷܟ݂ܳܬ݂ܶܐ ܒܝ ܘܱܠܰܝܶܐ ܟܘܠܰܗ ܒܝ ܝܰܪܘܩܘܬ݂ܐ ܘܒܝ ܢܰܕܰܦܰܐ ܟ݂ܘܕ ܐܘ ܦ݁ܰܪܩܰܢܐ، ܐܰܡ ܡܰܥܡܘܪ ܕܝ ܕܰܘܠܶܐ ܒܘ ܙܳܝܘܕܐ ܟܡܰܡܛܷܢ ܐܰܢ ܢܝܫܶܐ ܘܰܐܢ ܢܰܥܝܡܰܬ݂ܬ݂ܶܗ ܘܟܳܝܷܬܘܝ ܐܶܒܶܗ ܥܰܠ ܕܟܷܬܝܐ ܫܰܦܝܪܐ ܘܢܰܕ݂ܝܦܐ ܘܒܰܣܝܡܐ ܘܡܐܰܡܢܐ. ܐܘ ܥܰܡܰܝܕ݂ܰܢ ܣܬܶܐ ܒܘ ܩܰܝܛܐ ܟܘܠܶܗ ܥܰܠ ܕܟܳܘܶܐ ܚܶܡܐ ܓ݂ܱܠܱܒܶܐ ܒܷܬ݂ܷܪ ܡܶܐ ܦܰܠܓܶܗ ܕܝܰܘܡܐ ܟܳܡܰܘܒܠܝ ܐܰܢ ܢܰܥܝܡܰܬ݂ܬ݂ܶܗ ܟܳܝܷܬܘܝ ܘܟܳܫܳܬܷܢ ܐܝ ܫ̰ܰܐܝ ܘܐܝ ܩܰܚܘܰܬ݂ܬ݂ܶܗ ܬܰܡܳܐ ܘܟܳܡܷܬ݂ܢܳܚܝ. ܘܐܰܢ ܢܰܥܝܡܶܐ ܣܬܶܐ ܟܳܡܷܫܬܰܥܷܢ ܒܰܬ ܬܷܫܬܶܥܷܢܝܶܐ ܕܐܝ ܒܱܠܰܕܝܝܶܐ ܕܡܷܕ݂ܝܰܕ݂ ܕܡܰܚܬܝܠܰܗ. ܘܟܝܬ ܓ݂ܱܠܱܒܶܐ ܢܳܫܶܐ ܣܬܶܐ، ܥܰܠ ܕܟܷܬܝܐ ܪܘܝܚܐ، ܟܳܣܰܝܡܝ ܐܰܕ ܕܘܪܳܫܶܐ ܕܷܬ݂ܬ݂ܶܗ ܬܰܡܐ. ܒܘ ܩܰܝܛܐ ܟܷܬܠܰܢ ܬܰܪܬܶܐ ܡܰܕܪܰܫܝܳܬ݂ܶܐ ܒܡܷܕ݂ܝܰܕ݂: ܚܕ݂ܐ ܒܝ ܥܝܬܐ ܕܡܳܪܝ̱ ܒܰܪܨܰܘܡܐ ܘܐܝ ܚܪܶܬܐ ܒܝ ܥܝܬܐ ܕܡܳܪܝ̱ ܫܰܪܒܷܠ. ܟܝܬ ܐܰܦ݁ܦ݁ܶܗ ܡܐ ܝܳܠܘܦܶܐ. ܐܰܚܢܰܐ ܐܰܡ ܡܰܠܦܳܢܶܐ ܣܬܶܐ ܟܳܡܰܘܒܠܝܢܰܐ ܐܰܢ ܢܰܥܝܡܶܐ ܕܝ ܡܰܕܪܰܫܬܐ ܟܡܐ ܢܰܩܩܰܬ ܠܝ ܕܰܝܪܐ. ܗܰܡ ܟܳܩܳܪܝܢܰܐ ܘܟܳܙܷܡܪܝܢܰܐ ܘܗܰܡ ܟܳܡܨܰܠܝܢܰܐ. ܘܗܰܡ ܣܬܶܐ ܐܰܢ ܢܰܥܝܡܶܐ ܟܳܡܰܦܝܬܝ ܘܰܟ݂ܬ ܒܰܣܝܡܐ ܒܘ ܬܷܫܬܶܥܷܢܝܐ ܘܒܘ ܕܘܪܳܫܐ. ܘܟܝܬ ܓ݂ܱܠܱܒܶܐ ܡܰܕܪܰܫܝܳܬ݂ܶܐ ܕܝ ܕܰܘܠܶܐ ܣܬܶܐ ܟܳܡܰܡܛܷܢ ܐܰܝ ܝܳܠܘܦܶܐ ܠܰܫܰܢ ܐܘ ܛܘܝܳܠܐ ܠܬܰܡܐ ܕܡܰܦܝܬܝ ܘܰܟ݂ܬ ܒܰܣܝܡܐ ܥܰܡ ܚܕ݂ܳܕ݂ܶܐ. ܒܘ ܙܳܝܘܕܐ ܒܘ ܩܰܝܛܐ ܟܳܚܳܙܰܬ ܟܘܠ ܝܰܘܡܐ ܟܡܐ ܟܰܠܳܬ݂ܶܐ ܟܳܐܬ݂ܷܢ ܠܘ ܦ݁ܰܪܩܰܢܐ ܠܰܫܰܢ ܕܓܘܪܫܝ ܨܷܪܬܳܬ݂ܶܐ ܥܰܠ ܕܟܷܬܝܐ ܓ݂ܱܠܱܒܶܐ ܫܰܦܝܪܐ ܘܝܰܪܳܩܐ ܘܡܙܰܝܢܐ. ܘܒܷܫܪܳܪܐ ܐܝ ܪܘܚܐ ܕܘ ܒܰܪܢܳܫܐ ܟܡܷܬ݂ܢܳܚܐ ܐܶܒܶܗ. ܐܘ ܡܶܕܰܢܐ ܟܘܠܶܗ ܠܘ ܝܘܣܷܦ ܬܘܪܟܶܪ ܕܒܶܗ ܡܰܩܣܝ ܐܰܠܝܰܣ (ܕܒܶܗ ܨܷܩܡܶܐ) ܣܷܡܠܶܗ ܘܗܰܘܝܠܶܗ ܬܰܥܒܐ ܓ݂ܱܠܱܒܶܐ ܒܷܫܪܳܪܐ. ܐܘܥܕܐ ܣܬܶܐ ܐܝܢܰܩܩܰܐ ܕܟܷܐܙܙܶܗ ܠܰܐܘܪܘܦ݁ܰܐ ܕܟܳܚܳܙܶܐ ܒܰܦ݁ ܦ݁ܰܪܩܰܬ ܕܬܰܡܐ ܘܰܪܕܶܐ ܟܳܡܰܡܛܶܗ ܥܰܡ ܪܘܚܶܗ ܐܘ ܒܘܙܰܪܥܰܬ݂ܬ݂ܶܗ ܘܟܳܙܳܪܰܥܥܶܗ. ܐܰܘ ܡܶܕܳܢܶܐ ܡܫܰܚܷܠܦܶܐ ܟܳܐܬ݂ܶܐ ܟܳܣܳܝܰܡܠܷܢ ܘܟܳܡܰܚܰܬܠܷܢ ܒܘ ܦ݁ܰܪܩ ܠܰܫܰܢ ܐܝ ܦܷܪܔܶܐ. ܒܝ ܒܰܟ݂ܫ̰ܰܬ݂ܶܐ ܒܷܫܪܳܪܐ ܡܷܢ ܕܠܰܙܷܡܠܰܢ ܐܝ ܒܱܠܰܕܝܝܶܐ ܕܡܷܕ݂ܝܰܕ݂ ܣܬܶܐ ܒܝ ܪܝܫܳܢܘܬ݂ܐ ܕܫܶܟ݂ܡܘܣ ܢܰܨܷܪܐܳܓ݂ܠܘ ܓ݂ܱܠܱܒܶܐ ܡܥܰܘܰܢܠܶܠܰܢ. ܘܐܘܥܕܐ ܣܬܶܐ ܡܷܢ ܕܟܳܠܳܙܰܡ ܟܳܡܥܰܘܷܢ ܥܰܠ ܕܘ ܦ݁ܰܪܩܰܢܐ ܗܰܘܝ ܦܰܠܩܐ ܡܝ ܘܱܠܰܝܶܐ ܕܟܳܠܳܙܰܡ ܐܰܣ ܣܳܥܘܪܶܐ ܕܚܳܙܝܠܶܗ ܘܕܡܷܬ݂ܢܳܚܝ ܐܶܒܶܗ. ܒܓܰܘܶܗ ܕܘ ܦ݁ܰܪܩܰܢܐ ܠܘ ܝܘܣܷܦ ܡܰܠܬܰܡܠܶܗ ܓ݂ܱܠܱܒܶܐ ܡܶܕܳܢܶܐ ܥܰܬܝܩܶܐ ܘܣܷܡܠܷܗ ܕܷܟܬ݂ܳܐ ܟ݂ܘܕ ܡܘܙܰܐ ܝܰܥܢܝ ܒܶܝܬ݂ ܥܰܬܝܩܳܬ݂ܶܐ. ܡܷܠܝܳܠܶܗ ܡܰܠܙܰܡܰܬ ܕܰܨ ܨܷܢܥܰܬ ܕܘ ܥܰܡܐ ܣܘܪܝܳܝܐ: ܣܶܦܳܩܶܐ ܥܰܬܝܩܶܐ ܕܘ ܣܝܳܡܐ ܕܰܥ ܥܰܪܫܶܐ، ܡܰܠܙܱܡܶܐ ܘܡܰܟܝܢܰܬ ܕܘ ܣܶܡܐ ܘܕܘ ܕܰܗܘܐ، ܡܰܠܙܱܡܶܐ ܕܝ ܢܷܔܰܪܰܐ، ܡܘܗܪܰܬ ܕܘ ܨܘܳܥܐ ܕܰܣ ܣܰܬܪܶܐ، ܡܰܠܙܱܡܶܐ ܘܓܘܡܬ݂ܐ ܕܘ ܙܩܳܪܐ ܘܕܘ ܥܙܳܠܐ، ܡܰܠܙܱܡܰܬ ܕܘ ܕܘܳܪܐ ܘܕܘ ܚܨܳܕܐ، ܡܰܟܝܢܰܬ ܥܰܬܝܩܶܐ ܕܰܨ ܨܘܪܬܳܬ݂ܶܐ، ܬܱܠܱܦܳܢܰܬ ܘܗܶܫ ܓ݂ܱܠܱܒܶܐ ܡܶܕܳܢܶܐ ܡܫܰܚܠܦܶܐ ܠܰܫܰܢ ܐܝ ܦܷܪܔܰܐ ܕܘ ܥܰܡܐ ܦܪܝܣܶܐ ܢܶܐ. ܐܝ ܕܰܝܪܐ ܕܡܳܪܝ̱ ܗܳܒܷܠ ܘܡܳܪܝ̱ ܐܰܒܪܳܗܷܡ ܗܘܠ ܡܶܩܷܡ ܟܡܐ ܐܷܫܢܶܐ ܗܰܘܝܳܘܰܐ ܚܰܪܒܬ݂ܐ ܐܶܠܐ ܐܰܕܝܰܘܡܰܐ ܒܘ ܚܰܝܠܐ ܕܰܐܠܳܗܐ ܒܝ ܝܰܨܝܦܘܬ݂ܐ ܕܘ ܥܰܡܐ ܣܘܪܝܳܝܐ ܕܟܳܥܳܝܰܫ ܒܰܕ ܕܘܘܰܠ ܕܰܐܘܪܘܦ݁ܦ݁ܰܐ ܕܰܥܝܪܐ ܢܰܩܩܰܐ ܚܪܶܬܐ ܠܘ ܫܘܒܚܰܝܕ݂ܰܗ ܐܘ ܩܰܡܳܝܐ ܒܝ ܥܡܰܪܰܐ. ܟܷܬܠܰܢ ܣܰܒܪܐ ܣܬܶܐ ܥܰܠ ܩܰܪܝܘܐ ܕܳܐܬ݂ܶܠܰܗ ܕܰܝܪܳܝܶܐ ܘܡܰܠܦܳܢܶܐ ܕܗܘܝܐ ܩܶܢܐ ܕܘ ܝܘܠܦܳܢܐ ܣܬܶܐ܀ ܡܠܦܢܐ ܐܝܗܐܢ ܓܘܪܩܐܢ 456
