Ayhan Gürkan: ܐܘ ܚܰܠܘܐ ܕܝ ܐܶܡܐ / U ḥalwo di emo

U ḥalwo di emo

ܐܘ ܚܰܠܘܐ ܕܝ ܐܶܡܐ ܠܰܫܰܢ ܐܘ ܢܰܥܝܡܐ ܕܟܳܘܶܐ ܚܰܬ݂ܐ ܓ݂ܰܠܰܒܶܐ ܡܘܗܝܡ ܝܐ. ܔܓ݂ܰܝܪ ܡܘ ܟܶܘܐ ܐܝ ܐܶܡܐ ܕܡܷܢܩܐ ܐܘ ܢܰܥܝܡܰܝܕ݂ܰܗ ܗܰܡ ܐܶܠܰܗ ܘܗܰܡ ܠܘ ܢܰܥܝܡܐ ܦܰܝܕܰܐ ܝܐ. ܡܶܩܷܡ ܒܰܙ ܙܰܒܢܶܐ ܥܰܬܝܩܶܐ ܒܕܘܟܳܬ݂ܶܐ ܒܷܬ݂ܷܪ ܡܘ ܡܰܘܠܳܕ݂ܐ ܐܘ ܚܰܠܘܐ ܩܰܡܳܝܐ ܥܰܠ ܕܟܷܬܘܰܐ ܐܘ ܓܰܘܢܰܝܕ݂ܶܗ ܫܰܥܘܬ݂ܐ ܟܡܷܬܝܰܩܢܝܘܰܐ ܕܟܳܐܒܶܐ ܙܰܪܰܪ ܠܘ ܢܰܥܝܡܐ، ܡܰܘܟ݂ܰܐ ܡܰܟ݂ܝܪܝܘܰܐ ܐܘ ܚܰܠܘܰܢܐ ܠܰܪܘܰܠ . ܐܶܠܐ ܒܝ ܛܰܒܝܥܰܐ ܟܘܠ ܡܶܕܶܐ ܕܷܟ݂ܠܷܩܠܶܗ ܐܰܠܳܗܐ ܡܘܚܰܩܰܩ ܟܝܬ ܦܰܝܕܰܐ ܐܶܒܶܗ. ܒܰܙ ܙܰܒܢܰܢܝ ܐܰܚ ܚܰܪܳܝܶܐ ܐܰܕ ܕܷܟ݂ܶܬܷܪ ܣܬܶܐ ܒܷܬ݂ܷܪ ܡܰܬ ܬܰܚܠܝܠܶܐ ܕܣܷܡܡܶܗ ܡܰܛܷܢ ܠܩܰܢܰܥܰܐ ܕܘ ܚܰܠܘܰܢܐ ܐܘ ܩܰܡܳܝܐ ܕܟܷܬܝܐ ܫܰܥܘܬ݂ܐ ܓ݂ܰܠܰܒܶܐ ܡܘܗܝܡ ܝܐ ܠܰܫܰܢ ܐܘ ܢܰܥܝܡܐ. ܡܫܰܝܰܠ ܡܰܕ ܕܷܟ݂ܶܬܷܪ، ܗܰܠ ܐܘ ܚܰܠܘܐ ܕܰܚ ܚܷܝܶܘܷܢ ܟܳܨܳܝܰܕ ܕܘܟܬ݂ܶܗ ܕܘ ܚܰܠܘܐ ܕܝ ܐܶܡܐ؟ ܟܷܐܡܡܝ؛ ܠܐ. ܐܘ ܚܰܠܘܐ ܕܰܚ ܚܷܝܶܘܷܢ ܠܘ ܓܳܪܰܢ ܕܘ ܚܰܠܘܐ ܕܝ ܐܶܡܐ ܡܫܰܚܷܠܦܳܐ ܝܐ ܓ݂ܰܠܰܒܶܐ. ܐܘ ܚܰܝܘܰܢ ܕܟܳܐܟ݂ܰܠ ܓܶܠܐ ܐܰܘ ܝܰܪܳܩܘܬ݂ܐ ܒܷܬ݂ܷܪ ܡܷܐ ܕܐܰܟ݂ܝܠܶܗ ܡܘܟܠܳܢܶܐ ܕܟܝܬ ܐܰܦ݁ܦ݁ܶܗ ܐܰܨܝܬ ܟܳܡܷܩܛܰܥ ܐܘ ܚܰܠܘܰܬ݂ܬ݂ܶܗ. (ܝܰܥܢܝ ܟܳܡܝܫܰܚܠܷܦ ܘܟܳܘܶܐ ܡܰܝܳܢܐ). ܐܶܠܐ ܐܝ ܐܶܡܐ ܐܝܢܰܩܩܰܐ ܙܰܒܢܐ ܝܰܪܝܟ݂ܐ ܕܐܘܟ݂ܠܐ ܝܰܪܳܩܘܬ݂ܐ ܘܕܠܐ ܐܘܟ݂ܠܐ ܒܰܣܪܐ، ܐܘ ܚܰܠܘܰܝܕ݂ܰܗ ܟܳܘܶܐ ܡܰܝܳܢܐ ܟ݂ܕܘ ܚܰܠܘܐ ܕܰܬ ܬܰܘܪܳܬ݂ܶܐ. ܒܰܣ ܒܷܬ݂ܷܪ ܡܷܐ ܕܕܘܥܪܐ ܘܕܐܘܟ݂ܠܐ ܒܰܣܪܐ ܢܰܩܩܰܐ ܚܪܶܬܐ ܟܳܕܳܥܰܪ ܐܘ ܚܰܠܘܰܝܕ݂ܰܗ ܟ݂ܘܕ ܡܶܩܷܡ. ܡܰܘܟ݂ܰܐ ܐܘ ܡܘܟܠܐ ܕܘ ܒܰܣܪܐ ܠܰܫܰܢ ܐܝ ܐܰܬ݂ܬܐ ܕܡܷܢܩܐ ܓ݂ܰܠܰܒܶܐ ܡܘܗܝܡ ܝܐ. ܟܘܠ ܕܘܟܬ݂ܐ ܟܷܬܠܰܗ ܠܪܘܚܰܗ ܫܷܟܠܰܬ ܕܡܘܟܠܳܢܶܐ. ܡܰܣܰܠܰܐ، ܐܰܢ ܢܳܫܶܐ ܕܟܳܥܰܝܫܝ ܒܣܝܒܝܪܝܰܐ ܥܰܠ ܕܝܰܪܳܩܘܬ݂ܐ ܠܐ ܟܳܡܝܩܰܦܶܐ ܒܘ ܙܳܝܘܕܐ ܒܰܣܪܐ ܟܐܘܟ݂ܠܝ. ܡܰܘܟ݂ܰܐ ܐܰܢ ܢܳܫܶܐ ܕܟܳܥܰܝܫܝ ܬܰܡܐ ܟܳܘܷܢ ܒܓܘܫܡܐ ܪܰܒܐ ܘܩܰܘܝܐ ܓ݂ܰܠܰܒܶܐ ܐܶܠܐ ܥܘܡܪܰܝܝܶܗ ܟܳܘܶܐ ܟܰܪܝܐ. ܟܝܬ ܢܳܫܶܐ ܕܟܳܥܰܝܫܝ ܒܷܣܘܝܔܪܰܐ ܘܒܘ ܗܷܢܕ. ܒܰܚ ܚܰܝܰܬ݂ܬ݂ܶܗ ܟܘܠܠܶܗ ܠܐ ܟܐܘܟ݂ܠܝ ܒܰܣܪܐ ܐܶܠܐ ܐܘ ܓܘܫܡܰܬ݂ܬ݂ܶܗ ܟܳܘܶܐ ܝܰܪܝܟ݂ܐ ܘܩܰܘܝܐ. ܗܰܬ݂ܶܐ ܟܷܐܬ݂ܝܐ ܡܝ ܐܶܡܐ ܕܟܳܡܷܢܩܐ ܐܘ ܢܰܥܝܡܰܝܕ݂ܰܗ ܘܟܷܘܝܐ ܡܳܪܐ ܠܪܘܚܰܗ ܡܰܡ ܡܘܟܠܳܢܶܐ ܕܟܳܐܒܷܢ ܙܰܪܰܪ ܠܝ ܨܰܚـܚܰـܝܕ݂ܰܗ. ܐܘ ܚܰܠܘܐ ܕܝ ܐܶܡܐ ܠܐ ܒܰܣ ܠܘ ܓܘܫܡܐ ܟܳܐܒܶܐ ܦܰܝܕܰܐ، ܐܶܠܐ ܟܳܘܶܐ ܡܥܰܘܢܳܢܐ ܠܝ ܪܘܚܐ، ܘܠܘ ܡܶܚܐ ܣܬܶܐ ܕܟܳܝܳܪܰܘ. ܠܰܩܷܕܰܡ ܟܳܢܳܛܰܪ، ܘܟܳܡܰܩܘܶܐ ܐܘ ܢܰܥܝܡܐ ܡܩܰܒܷܠ ܕܰܟ ܟܶܘܶܐ. ܘܗܰܡ ܐܝܢܰܩܩܰܐ ܕܟܳܡܷܢܩܐ ܐܝ ܐܶܡܐ ܐܘ ܢܰܥܝܡܰܝܕ݂ܰܗ ܟܳܩܳܘܶܐ ܐܘ ܬܘܟ݂ܠܳܢܐ ܘܐܝ ܚܘܒܐ ܕܒܰܝܢ ܠܝ ܐܶܡܐ ܘܠܘ ܢܰܥܝܡܐ ܣܬܶܐ. ܟܝܬܐ ܐܶܒܶܗ ܟܘܠ ܫܷܟܷܠ ܕܒ݂ܝܬܰܡܝܢ ܕܟܷܬܝܐ ܣܢܝܩܳܝܐ ܐܰܥܠܰܝܝܶܗ ܐܘ ܓܘܫܡܐ ܕܘ ܢܰܥܝܡܐ ܕܝܠܳܢܳܐܝܬ݂ ܒܢ ܐܷܫܬܐ ܝܰܪܚܶܐ ܩܰܡܳܝܶܐ. ܐܰܝ ܝܘܬ݂ܪܳܢܶܐ ܕܘ ܚܰܠܘܐ ܕܝ ܐܶܡܐ ܓ݂ܰܠܰܒܶܐ ܢܶܐ. ܚܰܐ ܠܰܝܒܶܗ ܕܡܰܚܟܶܐ ܥܰܠ ܐܝ ܦܰܝܕܰܐ ܕܘ ܚܰܠܘܐ ܕܝ ܐܶܡܐ. ܡܰܘܟ݂ܰܐ ܐܰܕ ܕܷܟ݂ܶܬܷܪ ܟܷܐܡܡܝ؛ ܐܘ ܢܰܥܝܡܐ ܟܳܠܳܙܰܡ ܐܰܢ ܐܷܫܬܐ ܝܰܪܚܶܐ ܩܰܡܳܝܶܐ ܒܰܣ ܒܘ ܚܰܠܘܐ ܕܝ ܐܶܡܐ ܕܡܝܩܰܘܰܬ. ܐܝܢܰܩܩܰܐ ܕܘ ܢܰܥܝܡܐ ܕܠܳܐ ܝܳܢܰܩ ܐܘ ܚܰܠܘܐ ܕܝ ܐܶܡܐ، ܡܩܰܒܷܠ ܕܰܟ ܟܶܘܶܐ ܟܳܘܶܐ ܙܰܥܝܦ ܠܐ ܟܳܩܳܕܰܪ ܕܷܡܚܰܪܰܦ݁ ܡܩܰܒܷܠ ܕܘ ܟܶܘܐ. ܒܰܢ ܐܷܫܢܰܢܝ ܐܰܚ ܚܰܪܳܝܶܐ، ܒܡܷܕ݂ܝܰܕ݂ ܣܬܶܐ ܟܳܚܳܙܝܢܰܐ ܕܰܢ ܐܳܣܰܘܳܬ݂ܐ ܟܳܡܷܠܦܝ ܐܰܢ ܐܶܡܳܬ݂ܶܐ ܥܰܠ ܐܝ ܐܳܠܨܳܝܘܬ݂ܐ ܕܘ ܚܰܠܘܐ ܕܝ ܐܶܡܐ ܠܘ ܢܰܥܝܡܰܝܕ݂ܰܗ. ܢܰܩܩܰܘܰܬ ܟܳܣܰܝܡܝ ܟ݂ܢܘܫܝܶܐ ܥܰܡ ܐܰܢ ܐܶܡܳܬ݂ܶܐ. ܘܢܰܩܩܰܘܰܬ ܟܳܦܷܪܣܝ ܟܬ݂ܰܘܝܳܬ݂ܶܐ. ܘܢܰܩܩܰܘܰܬ ܟܳܡܥܰܠܩܝ ܟܬ݂ܰܘܝܳܬ݂ܶܐ ܥܰܠ ܐܰܫ ܫܘܪܳܢܶܐ ܒܓܰܘܶܗ ܕܰܒ ܒܶܝܬ݂ܟܪܝܗܶܐ. ܒܰܒ ܒܶܝܬ݂ܟܪܝܗܶܐ ܕܡܷܕ݂ܝܰܕ݂ ܣܬܶܐ ܠܰܪܘܰܠ ܥܰܠ ܐܘ ܫܘܪܐ، ܒܷܟܬ݂ܰܘܬܐ ܪܰܒܬ݂ܐ ܟܬ݂ܘܘܶܗ ܒܰܐܪܒܥܐ ܠܶܫܳܢܶܐ، ܒܘ ܬܷܪܟܝ ܘܒܘ ܥܰܪܰܒܝ ܘܒܘ ܟܘܪܕܳܝܐ ܘܒܘ ܣܘܪܝܳܝܐ ܗܰܘܟ݂ܰܐ: ܒܰܢ ܐܷܫܬܐ ܝܰܪܚܶܐ ܩܰܡܳܝܶܐ، ܒܰܣ ܚܰܠܘܐ ܕܝ ܐܶܡܐ. ܡܠܦܢܐ ܐܝܗܐܢ ܓܘܪܩܐܢ 443