Ayhan Gürkan: ܐܝ ܥܝܶܫܶܐ ܕܥܰܡ ܐܰܢ ܢܳܫܶܐ / I cyeše d cam an noše
I cyeše d cam an noše
ܐܘ ܬܘܟ݂ܠܳܢܐ ܓ݂ܱܠܱܒܶܐ ܡܘܗܝܡ ܝܳܐ ܒܰܚ ܚܰܝܶܐ ܕܘ ܒܰܪܢܳܫܐ. ܠܱܫܰܢ ܚܰܐ ܕܩܳܕܰܪ ܕܥܳܝܰܫ ܥܰܡ ܐܰܢ ܢܳܫܶܐ ܘܕܩܳܕܰܪ ܕܣܳܝܰܡ ܫܒܳܒܘܬ݂ܐ ܘܫܘܓ݂ܠܐ ܘܬܷܔܔܰܪܰܐ. ܐܘ ܒܰܪܢܳܫܐ ܟܠܳܙܰܡܠܶܗ ܘܰܟ݂ܬ ܘܬܰܥܒܐ ܘܨܰܒܷܪ ܓ݂ܱܠܱܒܶܐ ܠܱܫܰܢ ܕܩܳܕܰܪ ܕܷܡܚܰܝܨܷܠ ܐܘ ܬܘܟ݂ܠܳܢܐ ܘܐܝ ܗܰܝܡܳܢܘܬ݂ܐ ܕܰܢ ܢܳܫܶܐ. ܐܘ ܥܰܡܐ ܡܫܝܚܳܝܐ ܒܝ ܨܷܢܥܰܐ، ܒܘ ܡܰܗܘܐ ܘܫܩܳܠܐ، ܒܝ ܫܒܳܒܘܬ݂ܐ ܘܒܝ ܢܳܫܘܬ݂ܰܝܕ݂ܶܗ ܕܰܝـܝܡܰܐ ܛܪܶܠܶܗ ܬܰܬ݂ܝܪ ܥܰܠ ܐܰܢ ܢܳܫܶܐ ܕܟܳܥܳܝܰܫ ܐܰܥܡܰܝـܝܶܗ. ܡܝ ܟ݂ܰܨܪܰܐ ܕܝ ܢܳܫܘܬ݂ܐ ܘܕܝ ܫܒܳܒܘܬ݂ܐ. ܡܫܝܚܐ ܟܳܐܡܰܪ: ܪܚܰܡܘ ܐܘ ܩܰܪܝܘܰܬ݂ܟ݂ܘ ܟ݂ܘܕ ܪܘܚܰܝܟ݂ܘ. ܒܕܘܟܬ݂ܐ ܚܪܶܬܐ ܟܳܐܡܰܪ: ܗܘܠ ܕܟܝܬ ܐܝܡܟܰܢܝـܝܶܐ ܥܝܰܫܘ ܥܰܡ ܐܰܢ ܢܳܫܶܐ ܒܚܘܒܐ. ܡܰܘܟ݂ܰܐ ܐܘ ܥܰܡܐ ܡܫܝܚܳܝܐ ܟܳܪܳܚܰܡ ܐܝ ܢܳܫܘܬ݂ܐ، ܟܷܡܝܰܩܰܪ ܐܘ ܒܰܪܢܳܫܐ ܘܟܷܡܥܰܘܰܢ ܐܘ ܔܝܪܰܐܢ ܕܝܕ݂ܶܗ ܒܟܘܠ ܡܶܕܶܐ ܕܟܳܠܳܙܰܡܠܶܗ. ܓ݂ܱܠܱܒܶܐ ܢܳܩܘܨܐ ܕܢܳܫܐ ܛܰܝܐ ܐܰܘ ܡܶܐ ܥܰܡܐ ܚܪܶܢܐ ܕܗܰܘܝܠܶܗ ܫܘܟܘܘܶܐ ܥܰܠ ܫܒܳܒܘܬ݂ܐ ܕܣܘܪܝܳܝܐ ܘܓܰܘܳܢܳܝܐ ܕܷܡܫܝܚܳܝܐ. ܕܰܝـܝܡܰܐ ܒܝ ܛܳܘܘܬ݂ܐ ܟܡܰܬ݂ܟܪܷܢܢܶܗ. ܐܘ ܡܫܝܚܳܝܐ ܟܳܠܳܙܰܡ ܕܗܳܘܶܐ ܢܰܕܝܦܐ ܘܕܪܳܚܰܡ، ܕܷܡܝܰܩܰܪ ܘܕܷܡܥܰܘܰܢ ܐܰܢ ܢܳܫܶܐ. ܐܘ ܥܰܡܐ ܣܘܪܝܳܝܐ ܥܰܠ ܕܟܷܬܝܐ ܡܳܪܶܗ ܕܡܰܪܕܘܬ݂ܐ ܘܬܰܪܝܟ݂ ܥܰܬܝܩܐ ܣܬܶܐ، ܟܳܐܕ݂ܰܥ ܐܰܝܕܰܪܒܐ ܘܡܷܢ ܫܷܟܷܠ ܥܳܝܰܫ ܒܘ ܒܰܝܬܐ. ܡܰܘܟ݂ܰܐ ܐܘ ܣܘܪܝܳܝܐ ܟܳܥܳܝܰܫ ܥܰܡ ܐܰܢ ܢܳܫܶܐ ܒܚܘܒܐ ܘܟܳܡܰܢܕ݂ܰܦ ܐܘ ܒܰܝܬܰܝܕ݂ܶܗ ܡܶܐ ܠܰܘܓ݂ܷܠ ܘܡܶܐ ܠܰܪܘܰܠ ܘܟܳܘܶܐ ܛܘܦܣܐ ܛܰܘܘܐ ܠܰܢ ܢܳܫܶܐ. ܡܶܩܷܡ ܒܷܟܡܐ ܝܰܘܡܶܐ ܟܷܬܘܰܝܠܰܢ ܡܥܰܙܝـܝܶܐ ܒܝ ܥܝܬܐ. ܐܰܬ݂ܝ ܚܰܐ ܡܰܛ ܛܰܝܶܐ ܥܰܬܝܩܶܐ ܕܷܐܫܡܶܗ ܟܱܡܰܠ ܕܗܶܫ ܟܳܥܳܝܰܫ ܒܡܷܕ݂ܝܰܕ݂ ܐܘܥܕܐ ܟܳܫܳܓ݂ܰܠ ܒܝ ܒܱܠܱܕܝـܝܶܐ. ܔܓ݂ܝܠܝܢܰܐ ܗܰܘܟ݂ܰܐ ܐܷܫܡܐ ܥܰܠ ܡܷܕ݂ܝܰܕ݂ ܘܥܰܠ ܐܰܝ ܝܰܘܡܶܐ ܕܡܰܦܷܬܠܶܗ ܘܟܳܐܡܰܪ: ܐܝܢܰܩܩܰܐ ܕܟܳܡܰܟܪܰܟ݂ܢܐ ܐܰܢ ܢܳܫܶܐ ܕ݂ܰܝܦܶܐ ܬܘܪܝܣܬ ܒܓܰܘܶܗ ܕܝ ܘܱܠܰܝܶܐ ܟܳܐܡܰܪܢܷܢ: ܐܘ ܒܰܝܬܐ ܕܚܳܙܝܬܘ ܩܘܡ ܐܘ ܬܰܪܥܰܝܕ݂ܶܗ ܢܰܕ݂ܝܦܐ، ܐܝܕ݂ܰܥܘ ܐܘ ܒܰܝܬܰܘܐ ܕܰܣ ܣܘܪܝܳܝܶܐ ܝܐ. ܡܰܥܠܱܣܰܦ ܥܰܠ ܕܢܰܩܝܨܝ ܐܰܣ ܣܘܪܝܳܝܶܐ ܡܝ ܘܱܠܰܝܶܐ ܟܳܚܳܙܝܬܘ ܡܷܕ݂ܝܰܕ݂ ܡܷܩܩܰܐ ܥܔܝܩܐ. ܡܶܩܷܡ ܡܷܕ݂ܝܰܕ݂ ܠܰܬܘܰܐ ܗܰܘܟ݂ܰܐ ܥܔܷܩܬܐ. ܡܷܕ݂ܝܰܕ݂ ܡܶܩܷܡ ܐܰܙ ܙܰܒܘܩܳܢܰܝܕ݂ܰܗ ܟܘܠܠܶܗ ܥܰܦܪܳܐ ܘܰܝܢܶܐ. ܐܶܠܐ ܐܘ ܥܰܡܐ ܡܰܢܕ݂ܰܦܘܰܐ ܩܘܡ ܐܘ ܬܰܪܥܰܝܕ݂ܶܗ. ܒܘ ܙܳܝܘܕܐ ܝܰܘܡܶܗ ܕܚܘܫܰܒܐ ܐܝܢܰܩܩܰܐ ܚܰܐ ܕܢܳܦܰܩܘܰܐ ܠܒܰܝܢ ܕܝ ܘܱܠܰܝܶܐ ܚܳܙܶܘܰܐ ܐܝ ܢܰܕ݂ܰܦܰܐ ܡܷܦܬܰܚܘܰܐ ܒܶܗܢ ܕܝܕ݂ܶܗ. ܡܰܘܟ݂ܰܐ ܒܝ ܫܰܬܐ ܕܰܢ ܐܰܠܦܐ ܘܬܫܰܥܡܐ ܘܐܷܫܬܝ، ܡܷܕ݂ܝܰܕ݂ ܡܢܰܩܝܳܘܰܐ ܐܝ ܘܱܠܰܝܶܐ ܢܰܕ݂ܷܦܬܐ ܒܓܰܘܶܗ ܕܬܷܪܟܝـܝܰܐ. ܒܷܬ݂ܷܪ ܡܶܐ ܘܰܟ݂ܬ ܐܰܢ ܢܳܫܶܐ ܕܡܰܟܪܰܟ݂ܘܰܝܢܳܠܷܢ ܗܷܢܢܶܐ ܟܳܡܰܚܘܝܠܝ ܟܷܐܡܡܝ: ܗܰܢܐ ܣܬܶܐ ܒܰܝܬܐ ܕܰܣ ܣܘܪܝܳܝܶܐ ܝܐ. ܟܷܡܫܰܝܠܝܠܝ ܟܷܐܡܡܝ: ܡܱܕܰܐܡ ܐܰܢ ܢܳܫܰܢܝ ܗܰܘܟ݂ܰܐ ܢܰܕ݂ܝܦܶܐ ܘܒܝ ܛܳܘܘܬ݂ܐ ܟܡܰܡܛܰܬ ܒܰܚܣ ܕܷܬ݂ܬ݂ܶܗ، ܩܰܝ ܠܐ ܢܰܦܝܩܝܬܘܢܢܶܗ ܡܳܪܐ ܘܛܪܰܠܟ݂ܘ ܕܡܰܗܷܙܡܝ؟ ܡܷܪܠܝܠܷܢ: ܠܐ ܐܰܚܢܰܐ ܐܰܛ ܛܰܝܶܐ ܥܰܬܝܩܶܐ ܠܐ ܢܰܦܝܩܝܢܰܠܷܢ ܡܳܪܐ. ܐܶܠܐ ܐܝ ܕܰܘܠܶܐ ܠܰܘܝܰܠܠܷܢ ܡܳܪܐ ܛܪܶܠܰܗ ܕܡܰܗܷܙܡܝ. ܟܐܘܕ݂ܥܝܬܘ: ܐܰܚܢܰܐ ܣܬܶܐ ܒܷܬ݂ܷܪ ܡܶܐ ܕܐܰܙܙܷܢ ܐܰܣ ܣܘܪܝܳܝܶܐ ܘܐܰܬ݂ܷܢ ܐܰܟ ܟܘܪܕܳܝܶܐ ܠܡܷܕ݂ܝܰܕ݂، ܠܐ ܩܰܕܝܪܝܢܰܐ ܕܥܰܝܫܝܢܰܐ ܐܰܥܡܰܝـܝܶܗ، ܛܪܶܠܰܢ ܡܷܕ݂ܝܰܕ݂ ܡܰܗܙܰܡܠܰܢ ܒܷܬ݂ܷܪ ܡܰܢܢܶܗ. ܐܰܚܢܰܐ ܝܰܠܝܦܝܘܰܝܢܰܐ ܠܰܣ ܣܘܪܝܳܝܶܐ ܒܝ ܥܝܶܫܶܐ، ܒܝ ܔܝܪܰܐܢܬܝـܝܶܐ ܘܒܝ ܚܰܘܪܘܬ݂ܐ. ܐܶܠܐ ܥܰܡ ܐܰܛ ܛܰܝܶܐ ܚܰܬ݂ܶܐ ܕܐܰܬ݂ܷܢ ܠܝ ܘܱܠܰܝܶܐ، ܠܐ ܩܰܕܝܪܝܢܰܐ ܕܥܰܝܫܝܢܰܐ. ܡܷܬܝܰܩܶܢܘ ܐܘܥܕܐ ܕܟܳܡܰܟܪܰܟ݂ܢܰܢܟ݂ܘ، ܟܳܚܳܫܰܘܢܐ ܪܘܚܝ ܢܘܟ݂ܪܳܝܐ ܒܡܷܕ݂ܝܰܕ݂ ܥܰܠ ܕܠܰܝܬ ܢܳܫܶܐ ܕܟܳܐܕ݂ܰܥܢܐ ܠܐ ܡܰܔ ܔܝܪܰܐܢ، ܘܠܐ ܡܰܚ ܚܰܘܪܳܢܰܝܕ݂ܝ ܕܝܰܪܝܘܝܢܰܐ ܥܰܡ ܚܕ݂ܳܕ݂ܶܐ. ܔܓ݂ܰܝܪ ܡܰܚ ܚܷܠܡܶܐ ܠܐ ܦܰܝܷܫܠܝ ܒܰܙ ܙܰܒܘܩܳܢܰܢܝ. ܡܶܩܷܡ ܐܝܢܰܩܩܰܐ ܕܟܷܬܘܰܐ ܡܠܝܬ݂ܐ ܡܰܣ ܣܘܪܝܳܝܶܐ ܡܝ ܟ݂ܰܨܪܰܐ ܕܝ ܔܝܪܰܐܢܬܝـܝܶܐ ܘܕܝ ܚܰܘܪܘܬ݂ܐ ܘܕܝ ܢܳܫܘܬ݂ܐ ܓ݂ܱܠܱܒܶܐ ܒܰܣܷܡܬܐ ܘܰܐ. ܡܰܬܠܐ: ܐܰܣ ܣܘܪܝܳܝܶܐ ܡܥܰܘܢܝܘܰܐ ܐܰܢ ܢܳܫܶܐ ܓ݂ܱܠܱܒܶܐ. ܚܰܐ ܕܠܳܙܰܡܘܰܝܠܶܗ ܡܶܕܶܐ. ܕܰܪܚܰܠ ܘܠܐ ܡܩܰܒܷܠ ܕܡܶܕܶܐ ܡܣܰܥܕܝܘܰܝܠܶܗ. ܐܘܥܕܐ ܒܰܚ ܚܰܝܶܐ ܠܰܝܒܰܢ ܕܗܳܘܝܢܰܐ ܪܰܚܰܐ ܟ݂ܘܕ ܡܶܩܷܡ ܕܟܷܬܘܰܐ ܡܠܝܬ݂ܐ ܣܘܪܝܳܝܶܐ. ܒܷܫܪܳܪܐ ܥܰܡ ܐܰܢ ܢܳܫܰܢܝ ܠܐ ܚܰܘܪܘܬ݂ܐ، ܘܠܐ ܔܝܪܰܐܢܬܝـܝܶܐ ܠܐ ܟܡܝܣܷܡ. ܡܶܩܷܡ ܢܳܦܰܩܘܰܝܠܰܢ ܩܰܛܪܶܐ ܘܩܰܠܰܬ ܥܰܡ ܐܰܣ ܣܘܪܝܳܝܶܐ ܐܶܠܐ ܒܘܰܟ݂ܬ ܟܰܪܝܐ ܐܳܬ݂ܝܘܰܝܢܰܐ ܠܷܚܕ݂ܳܕ݂ܶܐ ܟ݂ܘܕ ܠܰܘܝ ܡܶܕܐ ܡܕܰܘܡܝܘܰܝܢܰܐ. ܐܘܥܕܐ ܒܡܶܕܶܐ ܢܰܥܝܡܐ ܟܳܘܶܐ ܩܰܛܠܐ. ܗܰܢܝ ܩܰܠܶܐ ܣܬܶܐ ܠܐ ܟܐܘܕ݂ܥܝ ܕܷܡܩܰܬܠܝ. ܡܰܘܟ݂ܰܐ ܟ݂ܘܙܙܝ ܒܰܝ ܝܰܘܡܶܐ ܥܰܬܝܩܶܐ ܕܟܷܬܘܰܐ ܡܷܕ݂ܝܰܕ݂ ܡܠܝܬܐ ܣܘܪܝܳܝܶܐ. ܡܝ ܟ݂ܰܨܪܰܐ ܕܘ ܬܘܟ݂ܠܳܢܐ ܘܕܝ ܗܰܝܡܳܢܘܬ݂ܐ ܣܬܶܐ ܥܰܝܢܝ ܡܶܕܶܐ. ܗܘܠ ܠܝ ܫܰܬܐ ܕܰܬ ܬܪܰܠܦܐ ܥܰܠ ܕܟܷܬܘܰܐ ܫܓ݂ܘܫܝܶܐ ܓ݂ܱܠܱܒܶܐ ܒܘ ܐܰܬ݂ܪܐ، ܐܘ ܐܰܬ݂ܪܐ ܠܰܬܘܰܐ ܡܘܣܰܥܝܕ ܕܒܰܪܬ݂ܐ ܠܪܘܚܰܗ ܕܥܰܝܫܐ ܒܓ݂ܶܝܪ ܕܘܟܬ݂ܐ، ܡܘ ܩܰܛܠܐ ܘܬܷܗܙܝܡܐ ܕܗܳܘܶܘܰܐ. ܡܰܠܦܷܢܝܳܬ݂ܶܐ ܘܡܰܥܡܘܪ ܢܝܫܶܐ ܬܷܪܟܳܝܶܐ ܕܐܳܬ݂ܷܢܘܰܐ ܠܛܘܪܥܰܒܕܝܢ. ܐܘ ܒܰܒܐ ܡܰܣܠܰܡܘܰܐ ܐܝ ܒܰܪܬ݂ܐ ܠܰܣ ܣܘܪܝܳܝܶܐ ܐܳܡܰܪܘܰܐ: ܗܰܬ݂ܶܐ ܐܝ ܒܰܪܬ݂ܰܬ݂ܟ݂ܘ ܝܐ ܗܘܰܘܘܠܰܗ ܡܳܪܐ. ܐܷܙܙܶܘܰܐ ܠܐ ܚܳܝܰܪܘܰܐ ܒܷܬ݂ܪܶܗ. ܐܰܣ ܣܘܪܝܳܝܶܐ ܗܘܝܘܰܝܠܰܗ ܡܳܪܐ ܟ݂ܘܕ ܒܰܪܬ݂ܐ ܡܶܐ ܕܷܬ݂ܬ݂ܶܗ. ܫܰܦܷܥ ܒܰܥ ܥܣܰܪܰܬ ܐܷܫܢܶܐ ܗܶܫ ܟܷܡܕܰܘܰܡ ܐܘ ܡܰܗܘܐ ܘܫܩܳܠܐ ܒܰܝܢܳܬ݂ܰܝـܝܶܗ. ܡܶܕܶܐ ܚܪܶܢܐ، ܥܠ ܕܒܰܩ ܩܷܪܝܰܘܳܬ݂ܐ ܠܰܝܬ ܕܘܟܬ݂ܐ ܡܐܰܡܰܢܬܐ، ܗܘܠ ܠܐܘܥܕܐ ܟܳܐܬ݂ܷܢ ܐܘ ܥܡܐ ܕܰܩ ܩܷܪܝܰܘܳܬ݂ܶܐ ܗܰܡ ܕܝ ܘܱܠܰܝܶܐ ܥܰܠ ܐܘ ܐܷܫܡܐ ܕܰܒ ܒܰܒܳܢܶܐ ܘܕܰܔ ܔܷܕܕܳܢܶܐ، ܟܡܰܡܛܷܢ ܐܰܙ ܙܘܙܶܐ ܘܐܰܕ ܕܰܗܘܳܢܰܬ݂ܬ݂ܶܗ ܘܟܡܰܚܬܷܢܢܶܗ ܓܰܒ ܐܰܡ ܡܫܝܚܳܝܶܐ ܒܐܱܡܰܢܶܐ، ܥܰܠ ܕܟܷܬܬܶܗ ܗܰܝܡܳܢܘܬ݂ܐ ܘܬܘܟ݂ܠܳܢܐ ܐܰܦ݁ܦ݁ܶܗ. ܒܘ ܙܳܝܘܕܐ ܐܘ ܥܰܡܐ ܛܰܝܐ ܟܳܐܬ݂ܶܐ ܡܣܰܘܝܐ ܠܰܕ ܕܘܟܰܢܶܐ ܕܰܡ ܡܫܝܚܳܝܶܐ ܟܣܳܝܰܡ ܐܘ ܡܰܗܘܐ ܘܫܩܳܠܰܝܕ݂ܶܗ ܘܟܡܰܚܬܝ ܐܰܙ ܙܘܙܰܬ݂ܬ݂ܶܗ ܓܰܒܰܝـܝܶܗ، ܥܰܠ ܕܠܰܬܬܶܗ ܬܘܟ݂ܠܳܢܐ ܥܰܠ ܚܕ݂ܳܕ݂ܶܐ. ܘܟܷܐܡܡܝ ܐܰܡ ܡܫܝܚܳܝܶܐ ܡܐܰܡܢܶܐ ܢܶܐ، ܠܐ ܟܷܡܕܰܓܠܝ، ܘܫܰܪܝܪܶܐ ܢܶܐ ܒܘ ܫܘܓ݂ܠܰܬ݂ܬ݂ܶܗ. ܡܝ ܟ݂ܰܨܪܰܐ ܕܝ ܨܷܢܥܰܐ ܣܬܶܐ ܢܰܦܷܩ ܐܷܫܡܶܗ ܕܝ ܨܷܢܥܰܐ ܕܰܣ ܣܘܪܝܳܝܶܐ ܒܘ ܐܰܬ݂ܪܐ ܟܘܠܶܗ. ܗܰܢܐ ܫܘܒܗܳܪܐ ܘܫܰܢܨ ܪܰܒܐ ܝܐ ܐܶܠܰܢ ܠܰܡ ܡܫܝܚܳܝܶܐ ܕܟܷܬܢܶܐ ܥܰܝܳܫܶܐ ܐܰܕܝܰܘܡܰܐ ܒܛܘܪܥܰܒܕܝܢ. ܟܡܷܦܬܰܟ݂ܪܝܢܰܐ ܒܰܒ ܒܰܒܳܢܰܝܕ݂ܰܢ ܕܷܛܪܰܠܠܶܗ ܐܘ ܐܷܫܡܰܢܐ ܐܘ ܛܰܘܐ ܐܶܠܰܢ. ܡܘ ܝܰܘܡܐ ܩܰܡܳܝܐ ܗܘܠ ܠܐܘܥܕܐ ܐܰܢ ܢܳܫܶܐ ܟܷܐܙܙܷܢ ܒܷܬ݂ܪܶܗ ܕܘ ܐܷܫܡܐ ܘܕܝ ܡܰܪܩܰܐ. ܟܫܘܩܠܝ ܐܝ ܣܢܝܩܘܬ݂ܐ ܘܟܣܰܝܡܝ ܐܘ ܫܘܓ݂ܠܰܬ݂ܬ݂ܶܗ. ܗܰܪܟܶܐ ܒܘ ܛܘܪܐ ܡܶܩܷܡ ܐܝ ܡܰܪܩܰܐ ܐܰܘ ܐܷܫܡܐ ܕܘ ܣܬܰܐܕ݂ ܘܰܐ. ܐܘ ܥܰܡܐ ܒܷܬ݂ܪܶܗ ܕܘ ܐܷܫܡܐ ܐܷܙܙܶܘܰܐ. ܠܱܫܰܢ ܐܰܔ ܔܘܠܶܐ ܐܳܬ݂ܷܢܘܰܐ ܒܰܣ ܣܰܥܰܝܰܬ ܕܰܪܒܐ ܠܓܰܒ ܐܘ ܣܬܰܐܕ݂ ܣܘܪܝܳܝܐ ܕܚܳܝܰܛܠܷܢ ܒܰܕܠܶܐ. ܘܓ݂ܱܠܱܒܶܐ ܢܰܩܩܰܐܬ ܠܐ ܩܳܝܰܬ݂ܘܰܝܠܷܢ ܕܰܘܪܐ ܥܰܠ ܕܗܳܘܶܘܰܐ ܫܘܓ݂ܠܐ ܓ݂ܱܠܱܒܶܐ. ܠܐ ܒܰܣ ܐܰܚ ܚܰܝܳܛܶܐ ܐܶܠܐ ܣܰܝܳܡܶܐ ܕܰܩ ܩܘܢܕܪܰܝܰܬ، ܕܘ ܕܰܗܘܐ ܘܕܘ ܣܶܡܐ ܘܕܰܨ ܨܳܦ݁ܰܬ ܘܔܓܰܝܪ. ܘܠܱܫܰܢ ܐܘ ܣܬܰܐܕ݂ ܕܰܒ ܒܳܬܶܐ ܢܷܛܪܝܘܰܐ ܒܰܝ ܝܰܪܚܶܐ ܕܟ݂ܳܠܶܐ ܘܕܐܳܬ݂ܶܐ ܕܡܰܥܡܰܪ ܐܝ ܥܡܰܪܰܬ݂ܬ݂ܶܗ. ܐܘ ܣܬܰܐܕ݂ ܣܘܪܝܳܝܐ ܕܐܳܒܰܬܘܰܝܠܶܗ ܐܘ ܡܰܐܠ ܕܷܒܪܝܬ݂ܐ ܠܐ ܣܳܝܰܡܘܰܐ ܫܘܓ݂ܠܐ ܣܰܟ݂ܬܰܐ ܘܠܐ ܡܰܚܷܬܘܰܐ ܥܰܠ ܪܘܚܗ ܕܐܰܢ ܢܳܫܶܐ ܕܷܐܷܡܡܝ: ܗܰܢܐ ܐܘ ܫܘܓ݂ܠܐ ܕܷܦܠܰܐܢ ܗܳܣܬܰܐ ܝܐ. ܗܘܠ ܠܐܘܥܕܐ ܐܝܢܰܩܩܰܐ ܕܣܘܪܝܳܝܐ ܕܣܳܝܰܡ ܫܘܓ݂ܠܐ ܠܐ ܡܶܐ ܠܶܒܶܗ، ܟܷܬܠܰܢ ܟ݂ܰܒܪܐ ܒܘ ܣܘܪܝܳܝܐ ܕܟܷܐܡܡܝܢܰܠܶܗ ܐܘ ܫܘܓ݂ܠܐ ܕܘ ܛܰܝܐ ܝܐ. ܐܰܕܝܰܘܡܰܐ ܟܚܳܙܝܢܰܐ ܒܰܡ ܡܷܠܝܘܢܶܐ ܢܳܫܶܐ ܟܰܪܳܟ݂ܶܐ ܬܘܪܝܣܬ ܟܳܐܬ݂ܷܢ ܥܰܠ ܐܘ ܐܷܫܡܐ ܣܘܪܝܳܝܐ ܠܱܫܰܢ ܕܫܘܩܠܝ ܡܶܕܶܐ ܕܟܷܬܝܐ ܥܰܝـܝܕ ܕܰܣ ܣܘܪܝܳܝܶܐ. ܟܷܐܒܥܰܬ ܡܘ ܣܶܡܐ ܠܘ ܕܰܗܘܐ ܘܠܘ ܚܰܡܪܐ، ܥܰܠ ܕܟܷܬܬܶܗ ܬܘܟ݂ܠܳܢܐ ܒܘ ܐܷܫܡܐ ܣܘܪܝܳܝܐ. ܗܷܢܓܝ ܐܰܒ ܒܰܒܳܢܰܝܕ݂ܰܢ ܫܓ݂ܷܠܠܶܗ ܒܢܰܕ݂ܝܦܘܬ݂ܐ ܘܒܷܡܣܰܘܝܘܬ݂ܐ ܒܝ ܨܷܢܥܰܬ݂ܬ݂ܶܗ ܐܘ ܐܷܫܡܐ ܣܘܪܝܳܝܐ ܗܰܘܝ ܡܰܪܩܰܐ ܠܪܘܚܶܗ. ܗܰܢܐ ܫܰܢܨ ܪܰܒܐ ܝܐ ܠܱܫܰܢ ܐܰܣ ܣܘܪܝܳܝܶܐ ܗܰܡ ܠܱܫܰܢ ܐܰܟ ܟܘܪܕܳܝܶܐ ܕܟܷܬܢܶܐ ܥܰܝܳܫܶܐ ܐܰܥܡܰܝܢܰܐ. ܐܶܠܐ ܚܰܐ ܠܐ ܟܠܳܙܰܡ ܛܳܥܶܐ ܐܘ ܬܰܥܒܐ ܕܰܒ ܒܰܒܳܢܶܐ ܕܬܰܥܝܒܝ ܘܛܪܰܠܠܶܗ ܐܘ ܐܷܫܡܐ ܛܰܘܘܰܢܐ ܐܶܠܰܢ. ܐܰܕܝܰܘܡܰܐ ܥܰܠ ܦܳܬ݂ܰܝـܝܶܗ ܟܐܘܟ݂ܠܝܢܰܐ ܐܘ ܠܰܚܡܰܝܕ݂ܰܢ. ܐܰܚܢܰܐ ܣܬܶܐ ܟܠܳܙܰܡ ܕܷܡܗܰܠܟ݂ܝܢܰܐ ܒܘ ܕܰܪܒܐ ܕܰܒ ܒܰܒܳܢܰܝܕ݂ܰܢ ܒܝ ܡܣܰܘܝܘܬ݂ܐ ܘܒܝ ܫܪܳܠܘܬ݂ܐ ܘܕܷܢܦܩܝܢܰܐ ܡܳܪܐ ܠܘ ܬܘܟ݂ܠܳܢܐ ܘܠܝ ܗܰܝܡܳܢܘܬܐ ܕܘ ܥܰܡܐ ܕܟܷܬܠܶܗ ܐܰܥܠܰܝܢܰܐ. ܕܛܳܪܝܢܰܐ ܐܷܫܡܐ ܛܰܘܘܐ ܒܷܬ݂ܪܰܝܢܰܐ ܠܱܫܰܢ ܐܰܢ ܐܰܒܢܰܝܕ݂ܰܢ. ܐܶܠܐ ܡܰܥܠܰܣܰܦ ܟܳܚܳܙܝܢܰܐ ܓ݂ܱܠܱܒܶܐ ܡܰܡ ܡܳܪܶܐ ܕܰܨ ܨܷܢܥܰܬ ܐܰܕܝܰܘܡܰܐ ܒܝ ܫܘܩܐ ܠܐ ܟܢܷܦܩܝ ܡܳܪܐ ܠܝ ܘܱܪܰܬ݂ܶܐ ܕܰܒ ܒܰܒܳܢܰܬ݂ܬ݂ܶܗ. ܟܥܷܔܩܝ ܐܷܫܡܶܗ ܕܒܰܒܰܝـܝܶܗ ܘܕܘ ܥܰܡܰܬ݂ܬ݂ܶܗ ܘܗܰܡ ܐܝ ܨܷܢܥܰܬ݂ܬ݂ܶܗ ܒܰܕ ܕܘܓܠܶܐ ܒܘ ܡܰܐܠ ܣܰܟ݂ܬܰܐ ܕܟܷܡܙܰܒܢܝ. ܗܰܬ݂ܶܐ ܟ݂ܝܶܢܶܐ ܝܐ ܥܰܠ ܐܘ ܐܷܫܡܐ ܛܳܘܐ ܘܠܘ ܬܰܥܒܐ ܕܒܰܒܳܢܰܝܢܰܐ. ܓ݂ܱܠܱܒܶܐ ܥܰܝܒܐ ܪܰܒܐ ܝܐ ܟܳܡܷܫܬܰܥܷܢ ܒܘ ܕܰܥܬܝܕ݂ ܕܷܬ݂ܬ݂ܶܗ. ܟܳܚܳܙܝܢܰܐ ܒܷܒܪܝܬ݂ܐ ܐܘ ܥܰܡܐ ܒܰܡ ܡܷܠܝܘܢܶܐ ܙܘܙܶܐ ܟܳܡܰܨܪܷܦ ܟܳܣܳܝܰܡ ܪܶܩܠܰܡ ܠܱܫܰܢ ܕܷܡܙܰܒܷܢ ܐܘ ܡܰܐܠ ܕܝܕ݂ܶܗ. ܐܶܠܐ ܐܰܒ ܒܰܒܳܢܰܝܕ݂ܰܢ ܒܝ ܕܰܥܬ݂ܐ ܕܒܰܝܢ ܥܰܝܢܰܝـܝܶܗ ܒܝ ܫܰܪܝܪܘܬ݂ܐ ܕܘ ܫܘܓ݂ܠܰܬ݂ܬ݂ܶܗ ܕܠܐ ܟܡܷܙܘܰܢ ܒܰܡ ܡܷܠܝܘܢܶܐ ܛܪܰܠܠܶܗ ܐܶܠܰܢ ܡܰܪܩܰܐ. ܡܶܐ ܕܐܰܢ ܐܝܢܣܰܢܰܬ ܗܰܘܷܠܠܶܗ ܬܘܟ݂ܠܳܢܐ ܐܰܥܠܳܘܟ݂ ܘܢܰܦܷܩ ܐܷܫܡܳܘܟ݂ ܒܝ ܛܳܘܘܬ݂ܐ ܕܠܐ ܪܶܩܠܰܐܡ ܓܕܳܐܬ݂ܷܢ ܐܰܡ ܡܷܫܬܪܝـܝܶܐ ܠܓܰܒܘܟ݂. ܐܘ ܫܘܓ݂ܠܰܝܕ݂ܘܟ݂ ܓܷܡܗܰܠܶܟ ܟ݂ܘܕ ܐܰܡ ܡܰܝܶܐ. ܥܰܠ ܕܒܰܒܘܟ݂ ܛܪܶܠܶܗ ܐܷܫܡܐ ܛܰܘܘܐ ܒܷܬ݂ܪܶܗ. ܐܝܕ݂ܰܐ ܕܷܡܗܰܠܟ݂ܰܬ ܒܰܕ ܕܰܘܣܰܬ ܕܒܰܒܘܟ݂ ܘܕܐܷܕ݂ܥܰܬ ܕܐܘܟ݂ܠܰܬ ܐܝ ܕܰܘܠܰܝܕ݂ܘܟ݂، ܓܡܷܬ݂ܢܳܚܰܬ ܒܰܚ ܚܰܝܰܝܕ݂ܘܟ݂ ܘܓܡܰܫܷܦܥܰܬ ܚܰܝܶܐ ܢܝܚܶܐ ܘܒܰܣܝܡܶܐ. ܐܝܕ݂ܰܐ ܕܠܐ ܢܷܦܩܰܬ ܡܳܪܐ ܠܘ ܐܷܫܡܐ ܕܦܰܝܷܫܠܘܟ݂ ܝܐ ܘܱܪܰܬ݂ܶܐ، ܕܒܳܕܰܬ ܕܐܘܟ݂ܠܰܬ، ܕܷܡܟܰܝܦܰܬ، ܘܕܡܝܒܰܝܛܪܰܬ ܘܕܡܷܬܘܰܟܠܰܬ ܥܰܠ ܐܘ ܡܰܐܠ ܕܦܰܝܷܫܠܘܟ݂ ܡܶܐ ܒܰܒܘܟ݂، ܓܢܷܦܠܰܬ ܟ݂ܰܝـܝܦܐ. ܟܝܬ ܟ݂ܰܒܪܐ ܟܷܐܡܡܝ: ܐܝ ܒܷܛܪܝـܝܶܐ ܠܐ ܦܰܝـܝܫܐ ܠܘ ܬܰܘܪܐ ܕܝ ܦܰܕܳܢܐ. ܡܰܬ݂ܠܐ ܚܰܐ ܕܥܰܝـܝܫܝܢܰܠܶܗ ܚܰܬ݂ܐ. ܟܷܬܘܰܐ ܚܰܐ ܐܷܫܡܶܗ ܡܰܠܟܶܐ ܒܡܷܕ݂ܝܰܕ݂ ܒܷܬ݂ܷܪ ܡܶܐ ܕܟ݂ܰܠܝܐ ܐܝ ܩܪܝܬܐ ܕܒܳܬܶܐ ܐܰܬ݂ܝ ܪܰܟܘ ܒܡܷܕ݂ܝܰܕ݂. ܒܙܰܒܢܐ ܟܰܪܝܐ ܦܬܷܚܠܶܠܶܗ ܕܘܟܰܢܐ ܕܘ ܕܰܗܘܐ. ܐܶܠܐ ܥܰܠ ܕܟܷܬܘܰܐ ܒܰܪܢܳܫܐ ܡܣܰܘܝܐ ܘܐܝܕ݂ܶܗ ܦܬܷܚܬܐ، ܐܳܬ݂ܷܢܘܰܐ ܛܰܝܶܐ ܘܣܘܪܝܳܝܶܐ ܡܰܡܛܷܢܘܰܐ ܐܰܙ ܙܘܙܰܬ݂ܬ݂ܶܗ ܡܰܚܬܝܘܰܝܠܷܢ ܓܰܒܶܗ ܒܐܱܡܰܢܶܐ. ܒܙܰܒܢܐ ܓ݂ܱܠܱܒܶܐ ܟܰܪܝܐ ܩܰܕܷܪ ܕܗܳܘܶܐ ܚܰܐ ܡܰܙ ܙܰܢܓܝܢ ܕܝ ܘܱܠܰܝܶܐ. ܒܷܬ݂ܷܪ ܒܙܰܒܢܐ ܡܰܫܦܰܥܠܶܗ ܩܱܙܰܐ ܕܝ ܪܰܕ݂ܰܝܬܐ ܘܡܚܰܣܶܐ. ܛܪܶܠܶܗ ܒܷܬ݂ܪܶܗ ܡܰܐܠ ܓ݂ܱܠܱܒܶܐ ܠܰܢ ܢܰܥܝܡܰܝܕ݂ܶܗ. ܐܘ ܥܰܡܐ ܗܶܫ ܥܰܠ ܐܷܫܡܶܗ ܕܘ ܒܰܒܰܬ݂ܬ݂ܶܗ ܐܳܬ݂ܶܘܰܐ، ܡܰܡܛܶܘܰܐ ܘܡܰܚܰܬܘܰܐ ܐܰܙ ܙܘܙܰܬ݂ܬ݂ܶܗ ܓܰܒܰܝـܝܶܗ. ܒܘܰܟ݂ܬ ܓ݂ܱܠܱܒܶܐ ܟܰܪܝܐ ܐܰܢ ܐܰܒܢܶܐ ܥܰܠ ܕܠܐ ܩܰܕܝܪܝ ܕܷܡܗܰܠܟ݂ܝ ܒܘ ܕܰܪܒܐ ܕܘ ܒܰܒܰܬ݂ܬ݂ܶܗ. ܒܕܰܠܠܶܗ ܟܐܘܟ݂ܠܝ ܘܟܷܡܟܰܝܦܝ ܒܘ ܡܰܐܠ ܕܦܰܝܷܫܠܷܢ ܡܘ ܒܰܒܰܬ݂ܬ݂ܶܗ. ܒܓܰܘܶܗ ܕܷܟܡܐ ܐܷܫܢܶܐ ܢܰܦܝܠܝ ܡܝ ܕ݂ܰܪܒܐ. ܡܙܰܒܰܢܠܷܢ ܐܘ ܡܰܐܠ ܕܘ ܒܰܒܰܬ݂ܬ݂ܶܗ ܟܘܠܶܗ ܘܠܐ ܩܰܕܝܪܝ ܕܐܳܒܷܢ ܐܘ ܕܰܝܢܐ ܕܐܰܥܠܰܝـܝܶܗ. ܔܒܝܪܝ ܕܡܰܗܷܙܡܝ ܡܝ ܘܱܠܰܝܶܐ ܡܶܩܷܡ ܡܰܕ ܕܰܝܢܶܐ. ܗܰܬ݂ܶܐ ܝܐ ܐܝ ܚܰܪܰܝܬܐ ܕܘ ܒܰܪܢܳܫܐ ܝܐ ܐܝܢܰܩܩܰܐ ܕܷܡܚܰܠܷܩ ܐܘ ܬܘܟ݂ܠܳܢܰܝܕ݂ܶܗ ܥܰܠ ܐܘ ܡܰܐܠ ܕܷܒܪܝܬ݂ܐ ܘܕܠܐ ܢܳܦܰܩ ܡܳܪܐ ܠܘ ܐܷܫܡܐ ܕܐܝܪܷܬ݂ܠܶܗ ܡܘ ܒܰܒܐ. ܡܠܦܢܐ ܐܝܗܐܢ ܓܘܪܩܐܢ
