ܐܘ ܥܰܡܐ ܣܘܪܝܳܝܐ؛ ܠܬܝܐ ܒܰܣ ܐܘ ܥܰܡܐ ܥܰܬܝܩܐ ܕܬܘܪܟܝܝܰܐ، ܐܶܠܐ ܚܰܐ ܡܰܥ ܥܰܡܶܐ ܥܰܬܝܩܶܐ ܕܘ ܡܰܕܷܢܚܐ ܡܶܨܥܳܝܐ ܟܘܠܶܗ ܝܐ. ܐܘ ܠܶܫܳܢܐ ܣܘܪܝܳܝܐ ܣܬܶܐ ܚܰܐ ܡܰܠ ܠܶܫܳܢܶܐ ܥܰܬܝܶܩܐ ܕܷܒܪܝܬ݂ܐ ܝܐ. ܥܰܡ ܚܒܳܠ، ܒܰܗ ܗܔܳܡܶܐ ܘܒܰܩ ܩܰܛܠܶܐ ܘܒܰܙ ܙܷܠܡܝܝܰܬ ܕܗܰܘܷܢ ܥܰܠ ܐܘ ܥܰܡܰܐ ܢܐ، ܡܰܢܩܰܨܨܶܗ ܐܘ ܡܷܢܝܳܢܰܝܕ݂ܶܗ ܘܡܰܡܛܰܠܠܶܗ ܠܷܬܝܳܡܐ ܒܘ ܐܰܬ݂ܪܐ ܕܰܐܢ ܐܰܒܳܗܳܬ݂ܰܝܕ݂ܶܗ. ܡܰܙ ܙܰܒܢܶܐ ܩܰܡܳܝܶܐ ܗܘܠ ܠܰܕܝܰܘܡܰܐ ܠܐ ܬܰܐܝܡܝ ܐܰܩ ܩܪܳܒܶܐ ܒܘ ܐܰܬ݂ܪܐ ܕܟܳܥܰܝܫܝ ܐܰܣ ܣܘܪܝܳܝܶܐ. ܗܰܘܷܢ ܗܔܳܡܶܐ ܕܠܐ ܡܷܢܝܳܢܐ ܥܰܠ ܐܘ ܐܰܬ݂ܪܰܐ ܢܐ. ܡܰܘܟ݂ܰܐ ܟܘܠ ܕܐܘ ܥܰܡܐ ܡܰܠܬܰܡܠܶܗ ܪܘܚܶܗ، ܐܰܬ݂ܝ ܓܘܢܚܶܐ ܘܪܕܘܦܝܶܐ ܐܰܥܠܶܗ. ܚܰܬܬܰܐ ܒܘ ܕܳܪܐ ܕܰܚ ܚܰܐ ܘܥܷܣܪܝ ܕܟܳܡܷܚܫܰܘ ܐܘ ܕܳܪܐ ܕܘ ܝܘܠܦܳܢܐ ܘܕܘ ܬܶܟܢܳܠܳܙ̰ܝ ܟܳܚܳܙܝܢܰܐ ܕܒܝ ܫܰܬܐ ܕܰܬܪܰܠܦܐ ܘܰܐܪܒܰܥܣܰܪ ܐܰܡ ܡܰܪܗܒܳܢܶܐ (ܐܰܬ ܬܶܪܳܪܝܣܬ) ܗܔܷܡܡܶܗ ܥܰܠ ܐܘ ܥܰܡܐ ܣܘܪܝܳܝܐ ܘܡܫܝܚܳܝܐ ܒܘ ܥܷܪܰܐܩ ܘܣܘܪܝܝܰܐ ܘܬܘܪܟܝܝܰܐ. ܒܷܬ݂ܷܪ ܡܰܗ ܗܔܳܡܰܢܝ ܢܰܩܷܨ ܐܘ ܡܷܢܝܳܢܐ ܕܐܘ ܥܰܡܐ ܒܬܘܪܟܝܝܰܐ ܘܣܘܪܝܝܰܐ ܘܒܘ ܥܷܪܰܐܩ، ܡܰܡ ܡܷܠܝܘܢܶܐ ܠܰܢ ܐܰܠܦܰܝܐ.
ܐܰܣ ܣܘܪܝܳܝܶܐ، ܒܕܰܠܠܶܗ ܡܝ ܫܰܬܐ ܕܰܐܢ ܐܷܫܬܝܝܰܬ ܕܥܘܪܩܝ ܡܶܐ ܛܘܪܥܰܒܕܝܢ. ܩܰܡܰܝܬܐ ܐܰܙܙܷܢ ܒܰܩ ܩܰܦܠܰܬ ܡܰܩ ܩܷܪܝܰܘܳܬ݂ܶܐ ܕܛܘܪܥܰܒܕܝܢ ܠܷܤܛܰܢܒܷܠ ܕܫܘܓ݂ܠܝ ܘܣܷܬܪܝ ܬܰܡܐ. ܒܷܬ݂ܷܪ ܡܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܬܡܳܢܝ ܣܬܶܐ ܒܕܰܠܠܶܗ ܕܷܐܙܙܷܢ ܠܰܐܢ ܐܰܬ݂ܪܰܘܳܬ݂ܶܐ ܕܰܐܘܪܘܦ݁ܰܐ. ܐܝ ܓܳܠܘܬ݂ܐ ܕܰܣ ܣܘܪܝܳܝܶܐ ܟܷܬܠܰܗ ܥܶܠܠܳܬ݂ܶܐ (ܣܰܒܰܒܶܐ) ܓ݂ܰܠܰܒܶܐ ܘܡܫܰܚܠܦܶܐ. ܟܳܠܳܙܰܡ ܕܝܘܠܦܝܢܰܐ ܩܰܝ ܐܰܣ ܣܘܪܝܳܝܶܐ ܥܰܪܝܩܝ ܡܘ ܐܰܬ݂ܪܰܬ݂ܬ݂ܶܗ ܘܛܪܰܠܠܶܗ ܡܘ ܥܰܦܪܐ ܕܰܐܢ ܐܰܒܳܗܳܬ݂ܰܬ݂ܶܗ.
ܐܰܥ ܥܶܠܠܳܬ݂ܶܐ ܕܝ ܓܳܠܘܬ݂ܐ ܟܝܒܰܢ ܗܰܘܟ݂ܰܐ ܪܰܝܙܝܢܰܢܶܗ؛ ܐܝ ܐܰܝܟܰܢܳܝܘܬ݂ܐ ܕܘ ܐܶܟܳܢܳܡܝ. ܐܰܢ ܐܶܣܳܪܰܬ݂ܬ݂ܶܗ ܥܰܡ ܐܰܔ ܔܝܪܰܢܰܬ݂ܬ݂ܶܗ. ܐܰܚ ܚܰܩܩܰܬ݂ܬ݂ܶܗ ܕܒܘ ܢܳܡܘܣܐ ܐܶܣܳܢܳܝܐ ܕܝ ܕܰܘܠܰܐ. ܐܰܥ ܥܰܣܩܳܬ݂ܶܐ ܕܷܓܪܷܫܫܶܗ ܒܝ ܥܰܣܟܰܪܝܝܶܐ ܥܰܠ ܕܟܷܬܘܰܝܢܶܗ ܡܫܝܚܳܝܶܐ. ܐܰܥ ܥܰܣܩܳܬ݂ܶܐ ܕܠܳܩܷܢܘܰܐ ܐܰܦ݁ܦ݁ܶܗ ܒܰܕ ܕܰܐܝܪܰܬ ܪܘܫܡܳܝܶܐ. ܘܰܐܥ ܥܰܣܩܳܬ݂ܶܐ ܕܩܷܡ ܐܘ ܝܘܠܦܳܢܐ ܣܘܪܝܳܝܐ. ܗܰܢܝ ܗܷܢ ܡܰܥ ܥܰܣܩܳܬ݂ܶܐ ܩܰܡܳܝܶܐ ܢܶܐ ܕܡܰܙܷܥܥܶܗ ܐܘ ܥܰܡܐ ܣܘܪܝܳܝܐ ܕܥܳܪܰܩ ܘܡܰܪܦܶܐ ܐܰܩ ܩܷܪܝܰܘܳܬ݂ܰܝܕ݂ܶܗ ܘܰܐܥ ܥܝܬܳܬ݂ܶܐ ܘܕܰܝܪܰܝܕ݂ܶܗ ܘܰܐܒ ܒܳܬܶܐ ܘܰܐܟ ܟܰܪܡܰܝܕ݂ܶܗ ܕܒܐܝܕ݂ܶܗ ܙܪܝܥܝܠܶܗ. ܥܰܝܫܝܘܰܐ ܒܙܘܥܬ݂ܐ ܘܩܛܷܥܘܰܠܠܶܗ ܐܘ ܣܰܒܪܰܬ݂ܬ݂ܶܗ ܡܰܚ ܚܰܝܶܐ ܕܒܘ ܐܰܬܪܐ ܕܬܘܪܟܝܝܰܐ. ܥܰܠ ܕܡܶܐ ܫܰܬܐ ܠܫܰܬܐ ܢܳܩܰܨܘܰܐ ܐܘ ܡܷܢܝܳܢܰܬ݂ܬ݂ܶܗ ܒܘ ܐܰܬܪܰܬ݂ܬ݂ܶܗ܆ ܔܒܝܪܝ ܕܟܘܪܟܷ݂ܢܢܶܗ ܥܰܠ ܚܰܝܶܐ ܚܰܬ݂ܶܐ ܘܡܰܪܟܘܷܢܢܶܗ ܥܬܝܕ݂ܘܬܐ ܒܰܐܬܪܰܘܳܬ݂ܶܐ ܚܪܶܢܶܐ. ܥܰܠ ܕܠܐ ܩܰܕܝܪܝ ܕܷܡܫܰܚܠܦܝ ܐܰܥ ܥܰܣܩܳܬ݂ܶܐ ܕܟܝܬܐ ܩܰܡܘܬ݂ܰܝܝܶܗ ܘܕܰܢ ܢܰܥܝܡܰܬ݂ܬ݂ܶܗ ܒܘ ܐܰܬ݂ܪܐ؛ ܡܰܗܙܰܡܡܶܗ ܘܰܐܙܙܷܢ ܡܒܰܪܒܙܝ ܒܰܐܢ ܐܰܪܒܰܥ ܟ݂ܰܣܰܘܷܪ ܕܷܒܪܝܬ݂ܐ.
ܐܘ ܣܰܒܰܒ ܢܳܩܘܨܐ ܕܝ ܓܳܠܘܬ݂ܐ؛ ܐܘ ܐܶܟܳܢܳܡܝ ܝܐ. ܐܶܠܐ ܥܰܡ ܚܒܳܠ ܟܳܚܳܙܝܢܰܐ ܕܟܘܠ ܢܰܩܩܰܐ ܐܝ ܕܰܘܠܰܐ ܟܷܡܡܐ؛ ܐܰܣ ܣܘܪܝܳܝܶܐ ܡܘ ܐܶܟܳܢܳܡܝ ܘܠܰܫܰܢ ܕܥܰܝܫܝ ܚܰܝܶܐ ܒܰܣܝܡܶܐ ܒܰܐܘܪܘܦ݁ܰܐ، ܥܰܪܝܩܝ ܡܶܐ ܬܘܪܟܝܝܰܐ. ܡܰܬ݂ܠܐ؛ ܒܝ ܫܰܬܐ ܕܰܬܪܰܠܦܐ ܐܰܣ ܣܦܰܪܝܰܘܡܳܝܶܐ ܒܢܳܪܘܶܔ ܡܫܰܝܰܠܠܶܗ ܡܘ ܪܝܫ ܘܰܙܝܪܶܐ ܕܬܘܪܟܝܝܰܐ ܒܘܠܰܢܬ ܐܶܔܶܘܝܬ ܘܡܷܪܪܶܗ؛ ܩܰܝ ܐܰܣ ܣܘܪܝܳܝܶܐ ܥܰܪܝܩܝ ܡܶܐ ܬܘܪܟܝܝܰܐ؟ ܡܰܕܥܰܪܠܶܗ ܐܰܥܠܰܝܝܶܗ ܘܡܷܪܠܶܗ: ܠܰܫܰܢ ܕܰܡܥܰܕܠܝ ܐܘ ܐܶܟܳܢܳܡܝܝܰܬ݂ܬ݂ܶܗ ܥܰܪܝܩܝ. ܐܶܠܐ ܒܰܫܪܳܪܐ ܟܳܚܳܙܝܢܰܐ ܕܠܰܬܝܐ ܫܪܳܠܐ ܐܘ ܡܶܕܰܢܐ ܕܡܷܪܠܶܗ ܐܶܔܶܘܝܬ. ܥܰܠ ܕܰܐܣ ܣܘܪܝܳܝܶܐ ܐܰܝܟܐ ܕܟܳܥܰܝܫܝ ܐܰܚ ܚܰܝܰܬ݂ܬ݂ܶܗ ܡܘ ܓܰܒܐ ܕܘ ܐܶܟܳܢܳܡܝ ܥܠܶܬܷܪ ܡܰܚ ܚܰܝܶܐ ܕܰܔ ܔܝܪܰܢܰܬ݂ܬ݂ܶܗ ܢܶܐ. ܒܛܘܪܥܰܒܕܝܢ ܣܬܶܐ ܘܒܷܐܤܰܛܢܒܷܠ ܣܬܶܐ ܐܰܣ ܣܘܪܝܳܝܶܐ ܠܰܬܘܰܝܢܶܐ ܠܐ ܦܰܩܝܪܶܐ ܘܠܐ ܟܰܦܝܢܶܐ. ܥܰܠ ܗܰܬ݂ܶܐ ܐܘ ܘܰܙܝܪܐ ܕܝ ܕܰܘܠܰܐ ܕܳܐܡܰܪ ܐܘ ܡܶܕܰܢܐ؛ ܝܰܐ ܠܳܟܳܕ݂ܰܥ ܠܰܣ ܣܘܪܝܳܝܶܐ ܝܰܐ ܣܬܶܐ ܡܰܘܕܥܳܢܘܬ݂ܐ ܦܰܘܕܐ ܟܷܬܠܶܗ.
ܟܝܒܰܢ ܕܦܷܗܡܝܢܰܐ ܕܠܰܬܠܶܐ ܐܘ ܐܶܟܳܢܳܡܝ ܥܰܠܰܩܰܐ ܒܐܝ ܓܳܠܘܬ݂ܐ ܕܐܘ ܥܰܡܐ ܣܘܪܝܳܝܐ ܡܰܡ ܡܰܬ݂ܠܰܢܝ؛ ܒܛܘܪܥܰܒܕܝܢ ܘܒܡܰܪܕܶܐ ܐܰܢ ܐܰܪܥܳܬ݂ܶܐ ܛܳܘܶܐ ܘܰܐܟ ܟܰܪܡܶܐ ܛܳܘܶܐ ܘܰܐܒ ܒܳܬܶܐ ܫܰܦܝܪܶܐ ܘܰܐܕ ܕܘܟܰܢܶܐ ܪܰܒܶܐ ܘܰܐܨ ܨܷܢܥܰܬ ܥܶܠܳܝܶܐ ܘܟܘܠ ܡܶܕܶܐ ܛܳܘܐ ܘܫܰܦܝܪܐ ܕܰܣ ܣܘܪܝܳܝܶܐ ܝܐ. ܐܝܢܰܩܩܰܐ ܕܥܰܪܝܩܝ ܓ݂ܰܠܰܒܶܐ ܡܷܢܢܶܗ ܠܐ ܡܙܰܒܰܢܢܶܗ ܐܰܡ ܡܷܠܟܰܬ݂ܬ݂ܶܗ. ܗܰܟܟܰܐ ܕܗܳܘܷܢܘܰܐ ܦܰܩܝܪܶܐ ܓܷܡܙܰܒܢܝܘܰܐ ܘܒܷܬ݂ܷܪ ܓܥܘܪܩܝܘܰܐ. ܐܰܝܢܰܐ ܕܦܰܐܝܫܝ ܘܕܠܐ ܥܰܪܝܩܝ ܣܬܶܐ ܥܰܬܝܪܶܐ ܢܶܐ ܘܦܰܐܝܫ ܐܘ ܡܰܠ ܘܐܘ ܡܷܠܟ ܟܘܠܶܗ ܐܰܦ݁ܦ݁ܶܗ. ܡܰܬ݂ܠܐ ܒܝ ܩܪܝܬ݂ܐ ܕܒܶܩܘܣܝܳܢܶܐ ܡܶܩܷܡ ܡܝ ܓܳܠܘܬ݂ܐ ܟܷܬܘܰܐ ܡܐ ܘܥܷܣܪܝ ܒܳܬܶܐ. ܐܰܕܝܰܘܡܰܐ ܥܷܣܪܝ ܒܳܬܶܐ ܟܳܣܰܝܡܝ ܘܟܐܘܟ݂ܠܝ ܐܘ ܡܷܠܟ ܕܰܩ ܩܘܣܢܳܝܶܐ ܚܪܶܢܶܐ ܕܰܐܙܙܷܢ ܠܰܐܘܪܘܦ݁ܰܐ. ܟܳܚܳܙܝܢܰܐ ܕܗܷܢܢܷܟ ܣܬܶܐ ܗܰܘ ܟܳܕܰܘܪܝ ܐܰܢ ܐܰܪܥܳܬ݂ܶܐ ܘܰܐܟ ܟܰܪܡܶܐ ܪܰܚܘܩܶܐ ܥܰܠ ܕܠܰܬܢܶܐ ܣܢܝܩܳܝܶܐ. ܥܰܠ ܕܐܘ ܥܰܡܐ ܩܛܷܥܘܰܝܠܶܗ ܐܘ ܣܰܒܪܐ ܡܰܚ ܚܰܝܶܐ ܕܐܘ ܐܰܬ݂ܪܐ܆ ܠܐ ܡܥܰܕܠܝܘܰܐ ܠܐ ܐܰܩ ܩܷܪܝܰܘܳܬ݂ܶܐ ܘܠܐ ܐܰܒ ܒܳܬܰܬ݂ܬ݂ܶܗ.
ܒܥܰܝܢܝ ܫܷܟܷܠ ܐܰܣ ܣܘܪܝܳܝܶܐ ܕܰܡ ܡܕ݂ܝܢܳܬ݂ܶܐ ܣܬܶܐ؛ ܗܷܢ ܡܷܢܢܶܗ ܡܰܪܦܰܠܠܶܗ ܟܘܠ ܡܶܕܶܐ ܕܟܷܬܘܰܠܠܶܗ ܘܥܰܪܝܩܝ. ܘܗܷܢ ܡܷܢܢܶܗ ܒܟܰܠܰܘܰܬ ܢܳܩܘܨܶܐ ܡܙܰܒܰܢܢܶܗ ܐܰܡ ܡܷܠܟܰܬ݂ܬ݂ܶܗ ܘܡܰܗܙܰܡܡܶܗ. ܐܘ ܥܰܡܐ ܕܟܷܬܘܰܐ ܒܷܐܤܛܰܢܒܷܠ ܣܬܶܐ، ܥܰܡ ܕܟܷܬܘܰܝܢܶܐ ܥܰܬܝܪܶܐ ܣܬܶܐ ܥܰܪܝܩܝ ܘܰܐܙܙܷܢ ܠܰܐܡܶܪܝܟܰܐ ܘܠܰܐܘܪܘܦ݁ܰܐ، ܥܰܠ ܕܟܷܬܢܶܐ ܐܰܚ ܚܰܝܶܐ ܕܰܐܘܪܘܦ݁ܰܐ ܒܰܣܷܡܬܷܪ ܡܶܐ ܕܬܘܪܟܝܝܰܐ. ܚܰܐ ܟܝܒܶܗ ܕܡܷܦܬܰܟܰܪ ܘܕܳܐܡܰܪ؛ ܐܰܣ ܣܘܪܝܳܝܶܐ ܠܘ ܟܶܦ ܐܰܙܙܷܢ ܠܰܐܘܪܘܦ݁ܰܐ ܐܶܠܐ ܦܰܘܕܐ ܝܐ.
ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܬܰܪܬܶܐ ܘܰܐܪܒܥܝ ܗܰܘܝ ܟܰܦܢܐ ܒܛܘܪܥܰܒܕܝܢ. ܐܝ ܫܰܬܰܬ݂ܶܐ ܟܳܡܝܕ݂ܳܥܐ ܒܰܝܢ ܕܘ ܥܰܡܐ ܐܝ ܫܰܬܐ ܕܝ ܓ݂ܰܠܰܐ. ܒܘ ܙܰܒܢܰܘܐ ܓ݂ܰܠܰܒܶܐ ܣܘܪܝܳܝܶܐ ܫܪܳܠܐ ܡܘ ܟܰܦܢܐ ܐܰܙܙܷܢܘܰܐ ܠܷܡܕ݂ܝܢܳܬ݂ܶܐ ܚܪܶܢܶܐ ܕܘ ܡܰܥܪܒܐ ܕܬܘܪܟܝܝܰܐ ܕܫܘܓ݂ܠܝ ܘܡܩܰܝܙܢܝ ܟܰܠܰܘܰܬ. ܐܝ ܓܳܠܘܬ݂ܰܬ݂ܶܐ ܡܕܰܘܰܡܠܰܗ ܗܘܠ ܠܝ ܫܰܬܐ ܕܰܐܢ ܐܷܫܬܝܝܰܬ. ܐܰܕܝܰܘܡܰܐ ܓ݂ܰܠܰܒܶܐ ܡܰܣ ܣܘܪܝܳܝܶܐ ܕܟܷܬܢܶܐ ܒܷܐܤܛܰܢܒܷܠ ܒܘ ܙܰܒܢܰܘܐ ܕܝܠܳܢܳܐܝܬ݂ ܡܶܐ ܡܰܪܕܶܐ ܐܰܙܙܷܢ ܘܡܳܒܰܠܠܶܗ ܐܘ ܟܰܠܠܰܐ ܘܐܘ ܡܰܠ ܕܟܷܬܘܰܠܠܶܗ. ܒܷܬ݂ܷܪ ܡܶܐ ܕܪܰܟܝܘܝ ܒܷܐܤܛܰܢܒܷܠ ܦܬܷܚܚܶܗ ܫܘܓ݂ܠܳܢܶܐ ܘܗܰܘܷܢ ܥܰܬܝܪܶܐ ܡܫܰܡܗܶܐ. ܡܰܪܟܶܐ ܟܳܦܷܗܡܝܢܰܐ ܕܝܣܰܐ ܕܠܰܬܝܐ ܐܘ ܐܶܟܳܢܳܡܝ ܩܰܛܪܐ ܪܰܒܐ ܕܝ ܓܳܠܘܬ݂ܐ ܐܶܠܐ ܐܝ ܙܷܠܡܝܝܶܐ ܘܐܝ ܚܰܩܣܷܙܝܝܶܗ ܕܣܰܝܡܝܘܰܐ ܐܰܛ ܛܰܝܶܐ ܡܩܰܒܷܠ ܕܰܣ ܣܘܪܝܳܝܶܐ.
ܚܰܐ ܡܰܩ ܩܰܛܪܶܐ ܚܪܶܢܶܐ ܕܰܣ ܣܘܪܝܳܝܶܐ܆ ܐܰܢ ܐܶܣܳܪܶܐ ܕܥܰܡ ܐܰܔ ܔܝܪܰܢܶܐ ܝܐ. ܟܝܬܐ ܩܰܛܪܶܐ ܕܟܳܥܰܝܫܷܢܢܶܗ ܐܰܣ ܣܘܪܝܳܝܶܐ ܗܘܠ ܠܰܕܝܰܘܡܐ ܒܛܘܪܥܰܒܕܝܢ܆ ܒܰܣ ܥܰܠ ܕܟܷܬܢܶܐ ܡܫܝܚܳܝܶܐ. ܐܰܛ ܛܰܝܶܐ ܕܟܷܬܢܶܐ ܔܝܪܰܢܶܐ ܠܰܣ ܣܘܪܝܳܝܶܐ، ܓ݂ܰܠܰܒܶܐ ܩܰܫܝܶܐ ܢܶܐ ܒܘ ܕܝܢܐ. ܘܠܷܓܡܰܩܰܒܠܝ ܘܠܐ ܟܳܡܬܰܚܡܠܝ ܕܰܣ ܣܘܪܝܳܝܶܐ ܗܳܘܰܠܠܶܗ ܡܰܠ ܘܡܷܠܟ ܙܷܬܬܷܪ ܡܷܢܢܶܗ. ܟܳܚܷܣܡܝ ܐܰܦ݁ܦ݁ܶܗ. ܡܰܘܟ݂ܰܐ ܢܰܩܩܰܘܰܬ ܐܰܪ ܪܝܫܳܢܶܐ ܟܳܡܰܩܝܡܝ ܐܘ ܥܰܡܐ ܡܩܰܒܷܠ ܕܰܣ ܣܘܪܝܳܝܶܐ. ܕܝܠܳܢܳܐܝܬ݂ ܢܰܩܠܰܘܰܬ ܕܟܳܚܘܪܘܝ ܐܰܢ ܐܶܣܳܪܶܐ ܕܬܘܪܟܝܝܰܐ ܒܝ ܦ݁ܳܘܠܝܛܝܩܰܐ ܥܰܡ ܐܰܕ ܕܰܘܠܰܬ ܡܫܝܚܳܝܶܐ܆ ܐܘ ܥܰܡܐ ܕܝ ܕܘܟܬ݂ܐ ܟܳܗܳܔܰܡ ܥܰܠ ܐܰܣ ܣܘܪܝܳܝܶܐ. ܐܘ ܡܶܕܰܢܐ ܣܬܶܐ ܟܳܡܰܙܷܥ ܐܘ ܥܰܡܐ. ܡܰܬ݂ܠܐ؛ ܐܝܢܰܩܠܰܐ ܕܣܝܡ ܟܰܪܝܟܰܬܘܪ ܕܷܡܚܰܡܰܕ ܒܘ ܕܶܢܝܡܰܪܟ؛ ܐܰܛ ܛܰܝܶܐ ܡܗܰܠܰܟ݂ܟ݂ܶܗ ܡܶܐ ܐܶܤܬܷܠ ܠܡܷܕ݂ܝܰܕ݂. ܗܘܠ ܩܷܡ ܐܰܕ ܕܘܟܰܢܶܐ ܕܰܣ ܣܘܪܝܳܝܶܐ. ܘܰܐܦ݁ ܦ݁ܠܝܣ ܢܷܛܪܝܘܰܐ ܐܰܕ ܕܘܟܰܢܶܐ ܕܰܣ ܣܘܪܝܳܝܶܐ ܡܩܰܒܷܠ ܕܰܛ ܛܰܝܶܐ. ܘܗܘܠ ܠܰܕܝܰܘܡܰܐ ܒܘ ܥܶܕ݂ܐ ܢܰܥܝܡܐ ܘܒܪܝܫܰܐ ܕܫܰܬܐ ܟܳܡܥܰܠܩܝ ܟܬ݂ܰܘܝܳܬ݂ܶܐ ܘܨܷܪܬܳܬ݂ܶܐ ܒܰܫ ܫܘܩܳܢܶܐ ܕܡܷܕ݂ܝܰܕ݂ ܘܕܰܐܣܬܷܠ. ܟܳܟܘܬ݂ܘܝ ܐܰܥܠܰܝܝܶܗ ܟܷܐܡܡܝ؛ ܠܐ ܡܥܰܝܕ݂ܝܬܘ ܐܘ ܥܶܕ݂ܐ ܕܰܣ ܣܘܪܝܳܝܶܐ ܘܪܝܫܶܐ ܕܝ ܫܰܬܰܬ݂ܬ݂ܳܗ. ܐܘ ܚܰܐ ܕܷܡܥܰܝܰܕ݂ ܟܳܘܶܐ ܟ݂ܳܬ݂ܰܝܝܶܗ. ܠܳܟܘܕ݂ܥܝ ܕܐܰܣ ܣܘܪܝܳܝܶܐ ܟܳܥܰܝܫܝ ܒܬܘܪܟܝܝܰܐ ܘܠܰܬܬܶܗ ܐܰܣܝܪܘܬ݂ܐ ܥܰܡ ܐܰܕ ܕܰܘܠܰܬ ܕܰܐܘܪܘܦ݁ܰܐ.
ܐܘ ܚܰܪܒ ܕܷܒܕܶܠܶܗ ܒܰܝܢ ܠܝ ܕܰܘܠܰܐ ܘܠܰܟ ܟܘܪܕ ܣܬܶܐ ܓ݂ܰܠܰܒܶܐ ܡܰܕܷ݂ܪܠܶܗ ܠܘ ܥܰܡܐ ܣܘܪܝܳܝܐ ܒܛܘܪܥܰܒܕܝܢ. ܐܘ ܚܰܪܒܰܢܐ ܕܟܳܡܕܰܘܰܡ ܗܰܢܝ ܐܰܪܒܥܝ ܐܷܫܢܶܐ ܒܝ ܦܢܝܬ݂ܐ ܕܟܳܥܰܝܫܝ ܐܰܣ ܣܘܪܝܳܝܶܐ، ܚܰܐ ܡܰܣ ܣܰܒܰܒܶܐ ܕܝ ܓܳܠܘܬ݂ܐ ܝܐ. ܗܷܢ ܡܰܟ ܟܘܪܕܳܝܶܐ ܠܰܫܰܢ ܕܡܰܝܕܝ ܐܰܩ ܩܷܪܝܰܘܳܬ݂ܶܐ ܕܰܣ ܣܘܪܝܳܝܶܐ ܘܰܐܡ ܡܷܠܟܰܬ݂ܬ݂ܶܗ؛ ܒܐܝܕ݂ܰܥܬܐ ܡܰܫܟܷܢܘܰܐ ܥܰܠ ܐܰܣ ܣܘܪܝܳܝܶܐ ܘܷܐܡܡܝ ܘܰܐ؛ ܐܰܣ ܣܘܪܝܳܝܶܐ ܚܰܘܪܶܗ ܕܰܟ ܟܘܪܕܳܝܶܐ ܢܶܐ. ܥܰܡ ܚܒܳܠ ܗܷܢ ܡܰܣ ܣܘܪܝܳܝܶܐ ܕܠܐ ܡܰܪܦܰܠܠܶܗ ܐܰܩ ܩܷܪܝܰܘܳܬ݂ܰܬ݂ܶܗ ܩܛܝܠܝ. ܒܘ ܙܰܒܢܐ ܕܘ ܚܰܪܒܰܢܐ ܕܒܰܝܢ ܠܰܟ ܟܘܪܕܳܝܶܐ ܘܠܝ ܕܰܘܠܰܐ ܕܬܘܪܟܝܝܰܐ܆ ܩܛܝܠܝ ܠܰܦ ܚܰܡܫܝ ܣܘܪܝܳܝܶܐ ܕܠܰܬܢܶܗ ܗܘܠ ܠܰܕܝܰܘܡܰܐ ܐܝܕ݂ܝܥܶܐ ܐܰܩ ܩܰܛܳܠܰܬ݂ܬ݂ܶܗ. ܡܰܘܟ݂ܰܐ ܝܰܘܡܐ ܒܝܰܘܡܐ ܐܰܚ ܚܰܝܶܐ ܕܰܣ ܣܘܪܝܳܝܶܐ ܘܐܘ ܦܝܳܫܰܬ݂ܬ݂ܶܗ ܗܳܘܷܢܘܰܐ ܥܰܣܩܶܐ ܒܛܘܪܥܰܒܕܝܢ ܐܘ ܐܰܬ݂ܪܐ ܕܰܐܢ ܐܰܒܳܗܳܬ݂ܰܬ݂ܶܗ.
ܠܓܳܪܰܢ ܕܰܩ ܩܳܢܘܢܶܐ ܕܠܳܙܰܢ܆ ܕܟܷܬܝܐ ܐܝ ܐܰܘܝܘܬ݂ܐ ܕܒܰܝܢ ܬܘܪܟܝܝܰܐ ܠܰܐܘܪܘܦ݁ܰܐ؛ ܐܰܣ ܣܘܪܝܳܝܶܐ ܣܬܶܐ ܟ݂ܘܕ ܐܰܥ ܥܰܡܶܐ ܩܰܠܝܠܶܐ ܚܪܶܢܶܐ ܕܬܘܪܟܝܝܰܐ ܟܷܬܬܶܗ ܚܰܩܩܰܬ. ܐܶܠܐ ܗܘܠ ܠܰܐܕܝܰܘܡܰܐ ܠܷܟܡܝܬܰܗܘܷܢܢܶܗ ܐܰܚ ܚܰܩ ܩܰܬ݂ܬ݂ܶܗ. ܠܐ ܕܘ ܝܘܠܦܳܢܐ ܘܠܐ ܕܐܝ ܥܡܰܪܰܐ ܕܰܥ ܥܝܬܳܬ݂ܶܐ ܘܠܐ ܕܰܒ ܒܶܝܬ݂ܟܪܝܗܶܐ. ܡܰܙ ܙܰܒܢܶܐ ܩܰܡܳܝܶܐ ܕܝ ܔܘܡܗܘܪܝܝܶܐ܆ ܐܰܣ ܣܘܪܝܳܝܶܐ ܠܐ ܟܳܩܳܝܰܬ݂ܬ݂ܶܗ ܬܷܫܡܷܫܬܐ ܒܰܕ ܕܰܪܓ݂ܶܐ ܥܶܠܳܝܶܐ ܕܝ ܕܰܘܠܰܐ. ܘܟܳܠܳܩܷܢ ܒܥܰܣܩܳܬ݂ܶܐ ܓ݂ܰܠܰܒܶܐ ܒܰܕ ܕܰܐܝܪܰܬ ܪܘܫܡܳܝܶܐ ܕܝ ܕܰܘܠܰܐ. ܘܠܐ ܟܳܩܘܕܪܝ ܕܦܷܬܚܷܢܢܶܗ ܡܰܕܪܫܳܬ݂ܶܐ ܕܘ ܝܘܠܦܳܢܐ. ܐܝ ܡܰܕܪܰܫܬܐ ܚܰܪܰܝܬܐ ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܬܡܳܢܶܐ ܘܥܷܣܪܝ ܣܟ݂ܝܪܐ ܒܡܰܪܕܶܐ. ܡܘ ܙܰܒܢܰܘܐ ܗܘܠ ܠܘܥܕܐ ܡܰܕܪܰܫܬܐ ܕܪܘܫܡܳܐܝܬ݂ ܟܳܡܷܠܦܐ ܠܶܫܳܢܐ ܣܘܪܝܳܝܐ ܠܰܬܘܰܐ ܒܬܘܪܟܝܝܰܐ. ܡܶܩܷܡ ܬܠܰܬ݂ ܐܷܫܢܶܐ ܒܷܬ݂ܷܪ ܡܶܐ ܕܐܝ ܡܰܚܟܰܡܰܐ ܗܘܠܰܐ ܩܰܪܰܪ؛ ܐܰܣ ܣܘܪܝܳܝܶܐ ܕܟܷܬܢܶܐ ܒܷܐܤܛܰܢܒܷܠ ܦܬܷܚܚܶܗ ܡܰܕܪܰܫܬܐ ܕܓܰܢܰܬ݂ ܫܰܒܪܶܐ. ܒܘ ܒܶܝܬ݂ܨܰܘܒܐ ܕܰܐܪܬܘܟܠܘ ܕܟܷܬܝܐ ܒܡܰܪܕܶܐ ܣܬܶܐ ܟܝܬܐ ܦܶܪܥܐ ܕܘ ܠܶܫܳܢܐ ܣܘܪܝܳܝܐ. ܐܶܠܐ ܟܘܠ ܝܳܠܘܦܐ ܠܰܝܒܶܗ ܕܩܳܪܶܐ ܬܰܡܐ. ܐܰܝܢܰܐ ܕܟܳܡܟܰܡܰܠ ܝܘܠܦܳܢܐ ܥܶܠܳܝܐ ܒܰܒ ܒܶܝܬ݂ܨܘܰܒܶܐ ܟܳܩܳܕܰܪ ܕܩܳܪܶܐ ܒܘ ܒܶܝܬ݂ܨܰܘܒܐ. ܗܰܘܟ݂ܰܐ ܐܰܣ ܣܘܪܝܳܝܶܐ ܟܳܡܰܚܝܣܝ ܒܪܘܚܰܝܝܶܗ ܕܠܷܓܡܷܪܚܳܡܝ ܡܘ ܥܰܡܐ ܛܰܝܳܝܐ ܘܡܝ ܕܰܘܠܰܐ ܕܬܘܪܟܝܝܰܐ ܥܰܠ ܕܟܷܬܢܶܗ ܡܫܝܚܳܝܶܐ. ܡܰܬ݂ܠܐ؛ ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܫܘܰܥ ܘܬܷܫܥܝ؛ ܐܘ ܘܰܐܠܝ ܕܡܰܪܕܶܐ ܡܫܰܕܰܪܠܶܗ ܟܬ݂ܰܘܬܐ ܪܘܫܡܰܝܬܐ ܠܰܕ ܕܰܝܪܶܐ ܕܟܝܬܐ ܐܰܦ݁ܦ݁ܶܗ ܝܳܠܘܦܶܐ ܣܘܪܝܳܝܶܐ. ܕܟܳܩܳܪܷܢ ܝܘܠܦܳܢܐ ܪܘܚܳܢܳܝܐ ܠܰܫܰܢ ܕܗܳܘܷܢ ܟܳܗܢܶܐ ܐܰܘ ܡܰܠܦܳܢܶܐ. ܟܳܐܡܰܪ: ܟܳܠܳܙܰܡ ܕܡܷܣܟ݂ܳܪܝ ܐܰܡ ܡܰܕܪܰܫܝܳܬ݂ܶܐ ܘܠܐ ܡܰܩܪܷܢ ܠܶܫܳܢܐ ܣܘܪܝܳܝܐ ܘܝܘܠܦܳܢܐ ܪܘܚܳܢܳܝܐ. ܡܰܘܟ݂ܰܐ ܐܰܣ ܣܘܪܝܳܝܶܐ ܟܳܡܷܬܝܰܩܢܝ ܕܟܘܠܢܰܩܩܰܐ ܐܝ ܕܰܘܠܰܐ ܟܳܡܥܰܘܢܐ ܠܰܛ ܛܰܝܶܐ ܙܷܬܬܷܪ ܡܷܢܢܶܗ ܘܠܐ ܟܳܚܰܝܪܐ ܐܰܦ݁ܦ݁ܶܗ ܒܥܰܝܢܐ ܕܝ ܟܝܢܘܬ݂ܐ.
ܐܝܢܰܩܠܰܐ ܕܰܥ ܥܠܰܝܡܶܐ ܘܐܰܝ ܝܳܠܘܦܶܐ ܟܳܚܳܙܷܢ ܐܰܥ ܥܰܣܩܳܬ݂ܰܢܝ ܟܷܐܡܡܝ؛ ܡܷܩܩܰܐ ܕܩܳܪܝܢܰܐ ܘܕܝܘܠܦܝܢܰܐ ܣܬܶܐ، ܗܰܪܟܶܐ ܠܳܟܳܛܳܪܷܢ ܕܥܳܠܝܢܰܐ ܘܣܘܠܩܝܢܰܐ ܠܕܰܪܓ݂ܶܐ ܥܶܠܳܝܶܐ. ܥܰܠ ܗܰܬ݂ܶܐ ܣܰܒܪܐ ܒܘ ܝܘܠܦܳܢܐ ܘܒܝ ܟܝܢܘܬ݂ܐ ܕܐܘ ܐܰܬ݂ܪܐ ܠܷܟܦܳܝܰܫܫܶܗ. ܟܳܫܷܡܥܝ ܣܬܶܐ ܐܰܥ ܥܰܣܩܳܬ݂ܶܐ ܕܷܓܪܷܫܫܶܗ ܘܰܐܡ ܡܰܚܘܳܬ݂ܶܐ ܕܰܐܟܷ݂ܠܠܶܗ ܐܰܒ ܒܳܒܳܢܰܬ݂ܬ݂ܶܗ ܒܝ ܦܳܠܚܘܬ݂ܐ ܝܰܢܝ ܒܝ ܥܰܣܟܰܪܝܝܶܐ. ܥܰܠ ܕܟܷܬܘܰܝܢܶܐ ܣܘܪܝܳܝܶܐ. ܡܰܘܟ݂ܰܐ ܡܶܩܷܡ ܕܳܐܬ݂ܶܐ ܐܘ ܙܰܒܢܐ ܕܐܝ ܥܰܣܟܰܪܝܝܰܬ݂ܬ݂ܶܗ ܐܰܥ ܥܠܰܝܡܶܐ ܟܷܒܥܝ ܕܥܘܪܩܝ ܘܢܷܦܩܝ ܡܘ ܐܰܬ݂ܪܐ.
ܐܝܢܰܩܠܰܐ ܕܟܘܬ݂ܘܝܢܰܐ ܐܰܣ ܣܰܒܰܒܰܢܝ ܒܷܬ݂ܪܶܗ ܚܕ݂ܳܕ݂ܶܐ؛ ܟܳܦܷܗܡܝܢܰܐ ܛܰܘܛܷܪ ܩܰܝ ܐܘ ܥܰܡܐ ܣܘܪܝܳܝܐ ܥܰܪܷܩ ܘܡܰܟ݂ܠܶܠܶܗ ܐܘ ܐܰܬ݂ܪܐ. ܒܷܬ݂ܷܪ ܡܶܐ ܕܰܐܙܙܷܢ ܠܰܐܘܪܘܦ݁ܰܐ܆ ܐܰܚ ܚܰܩܩܰܬ ܕܩܰܐܷܝܬ݂ܬ݂ܶܗ ܬܰܡܐ ܚܘܠܡܳܘܰܝܢܶܗ ܠܰܫܰܢܰܝܝܶܗ. ܡܰܬ݂ܠܐ؛ ܟܳܡܰܩܪܷܢ ܐܘ ܠܶܫܳܢܐ ܣܘܪܝܳܝܐ ܒܰܡ ܡܰܟܶܬܷܦ݁ ܕܝ ܕܰܘܠܰܐ ܘܒܰܒ ܒܶܝܬ݂ܨܰܘܒܶܐ. ܦܬܷܚܚܶܗ ܪܰܕܝܶܐ ܘܬܶܠܰܦܷܙܝܳܢܶܐ ܒܘ ܠܶܫܳܢܐ ܣܘܪܝܳܝܐ. ܛܒܷܥܥܶܗ ܘܦܪܷܣܣܶܗ ܡܓ݂ܰܠܶܐ ܘܟܬ݂ܳܘܶܐ ܕܠܐ ܡܷܢܝܳܢܐ. ܡܰܥܡܰܪܪܶܗ ܘܫܩܷܠܠܶܗ ܕܰܝܪܶܐ ܘܥܝܬܳܬ݂ܶܐ ܒܟܘܠ ܕܘܟܬ݂ܐ ܕܝܰܬܝܘܝ. ܥܰܒܝܪܝ ܠܘ ܦܰ݁ܪܠܰܡܰܢܛܐ ܘܦܠܷܚܚܶܗ ܠܘ ܥܰܡܐ ܒܝ ܦܳ݁ܠܝܛܝܩܰܐ. ܗܰܘܷܠܠܶܗ ܓܘܕܶܐ ܕܘ ܦܘܛܒܳܠ ܕܟܳܡܷܫܬܰܥܷܢ ܒܰܠ ܠܝܓܰܬ ܥܶܠܳܝܶܐ. ܗܰܘܟ݂ܰܐ ܠܐ ܡܰܫܷܟܟܶܗ ܒܦܘܪܫܳܢܐ ܝܰܐ ܣܬܶܐ ܒܙܷܠܡܝܝܶܗ ܕܣܝܡܐ ܡܩܰܒܷܠ ܕܷܐܬ݂ܬ݂ܶܗ.
ܐܰܕܝܰܘܡܰܐ ܦܰܐܝܷܫ ܡܷܢܝܳܢܐ ܢܳܩܘܨܐ ܕܣܘܪܝܳܝܶܐ ܒܛܘܪܥܰܒܕܝܢ ܕܠܰܐܙܙܷܢ ܠܰܐܘܪܘܦ݁ܰܐ. ܟܳܠܳܙܰܡ ܕܷܐܕ݂ܥܝܢܰܐ ܗܰܢܝ ܕܦܰܐܝܫܝ ܣܬܶܐ ܒܝ ܛܰܝܒܘܬ݂ܐ ܕܰܐܠܳܗܐ ܘܒܰܨܠܰܘܳܬ݂ܶܐ ܕܰܩ ܩܰܕܝܫܶܐ ܘܒܝ ܪܝܫܳܢܘܬ݂ܐ ܕܘ ܚܰܣܝܐ ܕܛܘܪܥܰܒܕܝܢ ܐܝ ܡܥܰܠܝܘܬ݂ܐ ܕܡܳܪܝ ܛܝܡܳܬ݂ܶܐܘܳܣ ܫܡܘܐܝܶܠ ܐܰܩܛܰܫ، ܩܰܕܝܪܝ ܕܦܰܝܫܝ ܒܡܷܕ݂ܝܰܕ݂ ܘܒܰܩ ܩܷܪܝܰܘܳܬ݂ܶܐ. ܐܝܕ݂ܰܐ ܕܐܘ ܚܰܣܝܐ ܘܰܐܩ ܩܰܫܶܐ ܕܥܘܪܩܝܘܰܐ، ܐܰܕܝܰܘܡܰܐ ܣܘܪܝܳܝܶܐ ܠܷܓܦܳܝܰܫܘܰܐ ܒܛܘܪܥܰܒܕܝܢ. ܘܓܢܷܦܠܳܘܰܐ ܒܐܝܕ݂ܶܗ ܕܰܢ ܢܘܟ݂ܪܳܝܶܐ. ܐܘ ܚܰܣܝܐ ܡܰܟܠܶܘܰܐ ܐܰܟ ܟܳܗܢܶܐ ܕܰܩ ܩܷܪܝܰܘܳܬ݂ܶܐ ܘܕܡܷܕ݂ܝܰܕ݂ ܕܠܐ ܛܳܪܷܢ ܡܘ ܥܰܡܰܬ݂ܬ݂ܶܗ. ܘܟܳܪܰܟ݂ܘܰܐ ܒܰܩ ܩܷܪܝܰܘܳܬ݂ܶܐ ܘܳܐܒܶܘܰܐ ܔܰܣܰܪܰܐ ܘܡܳܪܰܐܠ ܠܘ ܥܰܡܐ ܕܠܐ ܡܰܪܦܷܢ ܐܰܩ ܩܷܪܝܰܘܳܬ݂ܶܐ ܘܷܐܙܙܷܢ ܠܰܐܘܪܘܦ݁ܰܐ. ܐܶܠܐ ܥܰܡ ܚܒܳܠ ܗܰܡ ܗܷܢ ܡܰܩ ܩܰܫܶܐ ܗܰܡ ܣܬܐ ܐܘ ܥܰܡܐ ܠܐ ܡܰܨܷܬ݂ܬ݂ܶܗ ܥܰܠ ܐܘ ܚܰܣܝܐ ܘܰܐܙܙܷܢ. ܐܘܥܕܐ ܟܘܠܠܶܗ ܐܰܣ ܣܘܪܝܳܝܶܐ ܛܘܪܥܰܒܕܝܢܳܝܶܐ ܡܰܢܕܰܡܡܶܗ ܥܰܠ ܐܘ ܡܰܙܠܐ. ܘܟܳܡܷܬܝܰܩܢܝ ܘܟܷܐܡܡܝ؛ ܗܰܟܟܰܐ ܕܐܘ ܚܰܣܝܐ ܣܬܶܐ ܥܳܪܰܩܘܰܐ ܘܡܰܪܦܶܘܰܐ ܛܘܪܥܰܒܕܝܢ؛ ܛܘܪܥܰܒܕܝܢ ܓܟ݂ܘܠܝܳܘܰܐ ܒܢܰܩܠܐ ܚܕ݂ܳܐ ܡܰܣ ܣܘܪܝܳܝܶܐ.
ܡܠܦܢܐ ܫܟܪܝ ܐܩܛܫ 1410 ܡ̈ܠܐ.