ܒܝ ܫܰܬܐ ܕܰܐܠܦܐ ܫ̰ܰܥܡܐ ܘܫܰܘܥܝ ܐܰܢ ܢܰܥܝܡܶܐ ܥܷܡܪܰܝܶܐ ܒܷܬ݂ܷܪ ܡܶܐ ܐܰܪܒܰܥ ܐܷܫܢܶܐ ܐܶܕܝ ܒܳܕܷܢܘܰܐ ܒܘ ܦܶܪܳܔܐ ܕܘ ܬܰܠܰܘܷܙܝܳܢ. ܐܘܥܕܐ ܟܳܡܷܪ؛ ܢܰܚܷܬ ܗܘܠ ܐܰܪܒܥܐ ܝܰܪܚܶܐ ܘܟܳܡܷܪ ܚܰܐ ܡܰܐ ܡܒܰܚܢܳܢܶܐ ܐܰܡܶܪܝܟܳܝܶܐ. ܐܰܒ ܒܘܚܳܢܶܐ ܕܟܳܡܝܣܳܡܝ ܟܳܡܰܚܘܷܢܠܰܢ ܐܘ ܢܰܥܝܡܐ ܥܷܡܪܶܗ ܡܷܩܩܰܐ ܕܢܰܥܷܡܝܐ ܕܒܳܕܶܗ ܕܷܡܦܰܪܷܔ ܬܰܠܰܘܷܙܝܳܢ ܐܘ ܕܡܷܫܬܰܥܶܐ ܒܘ ܬܰܠܝܦܢ ܐܰܘ ܒܡܶܕܳܢܶܐ ܚܪܶܢܶܐ ܟ݂ܘܕ ܗܰܢܝ ܒܘ ܙܰܒܢܐ ܕܒܷܬ݂ܷܪ ܙܬܷ ܟܳܘܶܐ ܡܰܣܪܐ ܐܰܦ݁ܦܶ݁ܐ. ܐܰܢ ܐܳܣܰܘܳܬ݂ܶܐ ܟܷܡܡܝܠܰܢ ܡܷܩܩܰܐ ܕܐܘ ܢܰܥܝܡܐ ܕܠܐ ܥܳܒܷܪ ܟ݂ܰܝـܝܦܐ ܐܘ ܬܶܟܢܳܠܳܙ̰ܝ ܠܰܚ ܚܰܝܶܕ݂ܶܗ ܛܰܘܝܐ ܐܶܠܶܗ.
ܐܝܢܰܩܠܰܐ ܕܷܒܥܝܢܰܐ ܕܦܷܗܡܝܢܰܐ ܐܘ ܡܘܚܐ، ܓܠܳܙܰܡ ܒܝ ܩܰܡܰܝܬܐ ܚܰܝܪܝܢܰܐ ܥܰܠ ܐܘ ܫܷܟܷܠ ܕܘ ܡܘܚܐ ܘܰܐܝܕܰܪܒܐ ܟܳܫܳܓܷ݂ܠ. ܐܘ ܢܰܥܝܡܐ ܐܝܢܰܩܠܰܐ ܕܟܳܘܶܐ ܗܘܠ ܕܥܷܡܪܶܗ ܟܳܡܳܛܶܐ ܠܰܬܠܰܬ݂ ܐܷܫܢܶܐ ܬܠܳܬ݂ܳܐ ܩܰܬܰܬ ܟܳܝܳܪܰܘ. ܗܰܢܐ ܟܳܡܰܚܘܶܐ ܠܰܢ ܠܘ ܫܘܫܳܛܐ ܕܘ ܡܘܚܐ ܐܰܬ ܬܠܰܬ݂ ܐܷܫܢܶܐ ܩܰܡܳܝܶܐ ܓ݂ܰܠܰܒܶܐ ܡܘܗܝܡܢܶܐ ܠܘ ܢܰܥܝܡܐ. ܥܰܡ ܗܰܢܝ ܟܘܠܠܶܗ ܐܘ ܡܶܕܶܐ ܕܟܳܝܳܠܷܦ ܗܰܘܢܰܢ ܟܘܠܶܗ ܡܰܣܪܳܝܐ ܒܢܳܪܰܠܶܓ݂ ܕܟܷܡܝܠܶܗ. ܟܝܒܰܢ ܡܷܬܦܰܟܪܝܢܰܐ ܐܰܢ ܢܳܪܰܠܶܓ݂ ܟ݂ܘܕ ܚܘܛܶܐ ܕܐܝ ܙܰܩܳܪܝܬ݂ܐ، ܡܷܩܩܰܐ ܕܡܶܕܳܢܶܐ ܡܫܰܚܷܠܦܶܐ ܕܚܳܙܝܢܰܐ ܐܘ ܕܥܰܝܫܝܢܰܐ ܐܰܚ ܚܘܛܰܢܝ ܙܷܬ ܟܳܡܝܬܰܨܪܝ ܒܷܚܕ݂ܳܕ݂ܶܐ. ܐܰܕܝܳܡܰܐ ܟܝܬܐ ܪܷܢܝܐ ܒܰܝܢܰܐ ܐܳܣܰܘܳܬ݂ܐ ܕܟܷܡܡܝ ܥܰܠ ܕܘ ܢܰܥܝܡܐ ܡܶܐ ܥܘܡܪܐ ܢܰܥܝܡܐ ܟܳܒܳܕܶܐ ܒܰܐ ܡܶܕܳܢܶܐ ܕܐܘ ܬܶܟܢܳܠܳܙ̰ܝ ܟܳܚܳܙܶܐ ܡܶܕܳܢܶܐ ܓ݂ܰܠܰܒܶܐ ܓܰܘܢܶܐ ܓ݂ܰܠܰܒܶܐ ܐܰܚ ܚܘܛܶܐ ܕܐܘ ܢܳܪܳܢ ܟܳܡܝܬܰܨܪܝ ܓ݂ܰܠܰܒܶܐ ܒܷܚܕ݂ܳܕ݂ܶܐ ܘܗܰܢܐ ܟܳܘܶܐ ܒܷܬ݂ܷܪ ܫܷܟܷܠ ܕܟܶܘܐ ܒܘ ܗܰܘܢܐ ܥܰܠ ܕܠܐ ܟܳܩܳܕܷܪ ܡܰܩܷܡ ܐܘ ܗܰܘܢܐ ܐܘ ܡܶܕܰܢܐ ܟܘܠܶܗ ܒܘ ܥܷܡܪܰܘܐ. ܐܰܒ ܒܰܒܳܢܶܐ ܐܰܘ ܐܰܢ ܐܶܡܳܬ݂ܶܐ ܡܶܐ ܥܷܡܪܐ ܢܰܥܝܡܐ ܟܳܒܷܢ ܐܰܬ ܬܰܠܰܦܳܢܶܐ ܠܰܢ ܢܰܥܝܡܶܐ ܕܝܷܠܦܝ ܐܰܓ ܓܰܘܢܶܐ ܐܰܘ ܐܘ ܒܢܳܝܐ ܐܰܘ ܕܷܡܦܰܪܔܝ ܬܶܫܬܥܶܢܝܶܐ ܐܶܠܐ ܠܐ ܟܳܡܷܬܦܰܟܪܝ ܕܗܰܢܐ ܬܶܟܝܘܐ ܕܘ ܢܰܥܝܡܐ ܝܐ. ܟܳܠܳܙܰܡ ܕܷܕ݂ܥܝܢܰܐ ܐܘ ܗܰܘܢܐ ܕܐܘ ܢܰܥܝܡܐ ܠܰܬܝܐ ܚܰܕ݂ܝܪܐ ܕܩܳܕܷܪ ܡܰܩܷܡ ܐܰܡ ܡܶܕܳܢܶܐ ܟܘܠܠܶܐ ܕܟܝܬܐ ܒܘ ܬܰܠܰܦܳܢ ܐܰܘ ܒܘ ܬܰܠܰܘܷܙܝܳܢ ܥܰܠ ܕܓ݂ܰܠܰܒܶܐ ܚܝܨܶܐ ܘܝܰܩܘܪܶܢܶܐ ܠܗܰܘܢܶܐ ܕܚܰܐ ܢܰܥܝܡܐ ܕܚܰܬ݂ܐ ܟܳܡܝܫܰܘܫܷܛ. ܒܰܢ ܢܰܥܝܡܶܐ ܕܟ݂ܰܝـܝܦܐ ܕܷܒܕܰܠܠܶܗ ܒܘ ܬܶܟܢܳܠܳܙ̰ܝ ܟܳܡܰܚܘܶܐ ܩܷܛܪܶܐ ܕܝ ܫܰܢܬ݂ܐ ܐܰܘ ܢܷܩܨܰܢܝـܝܶܐ ܕܝ ܕܷܩܩܰܐ. ܚܕ݂ܳܐ ܡܰܐ ܚܰܪܰܟܰܬ ܕܐܘ ܢܳܫܐ ܕܟܷܬܝܐ ܒܗܰܘܢܐ ܕܟܳܩܳܕܷܪ ܚܳܙܶܐ ܘܡܷܬܦܰܟܷܪ ܒܟܘܠ ܡܶܕܶܐ ܕܚܶܕ݂ܳܪܶܗ. ܟ݂ܘܕ ܚܰܐ ܒܠܰܠܝܐ ܐܝܢܰܩܠܰܐ ܕܪܘܚܶܗ ܡܗܰܠܷܟ݂ ܒܫܘܩܐ ܕܟܷܬܝܐ ܥܰܬܘܡܐ ܕܳܐܬ݂ܶܐ ܩܳܠܶܗ ܕܪܰܓ݂ܠܶܗ ܕܢܳܫܶܐ ܡܶܐ ܒܷܬ݂ܪܶܗ ܕܡܷܬܦܰܟܷܪ ܕܟܝܬܐ ܕܗܳܘܶܐ ܡܶܕܶܐ ܕܬܰܗܠܘܟܰܐ ܡܰܘܟ݂ܰܐ ܐܘ ܗܰܘܢܐ ܟܳܒܶܐ ܕܷܩܰܐ ܕܐܘ ܦܬܰܟܰܪ ܘܕܝ ܚܝܰܪܬܐ ܠܝ ܕܘܟܬ݂ܰܝܐ. ܐܘ ܢܫܐ ܐܶܕܝ ܟܳܡܷܬܦܰܟܷܪ ܘܟܳܫܳܦܷܥ ܠܘ ܢܛܳܪܐ ܕܪܘܚܶܐ ܡܝ ܬܰܗܠܘܟܰܝܐ. ܒܝ ܩܰܛܝܢܬ݂ܐ ܕܗܰܘܟ݂ܰܐ ܗܰܘܢܶܗ ܕܘ ܢܳܫܐ ܟܳܘܶܐ ܦܬܝܚܐ ܘܚܝܨܐ ܙܷܬ ܡܰܢ ܢܰܩܠܰܬ ܚܪܶܢܶܐ ܢܳܪܡܰܠ ܕܘ ܝܰܘܡܐ. ܒܘ ܫܷܟܷܠܰܢܐ ܐܝܢܰܩܠܰܐ ܕܘ ܗܰܘܢܐ ܗܶܫ ܒܥܷܡܪܐ ܢܰܥܝܡܐ ܟܳܚܳܙܶܐ ܐܰܡ ܡܶܕܳܢܶܐ ܕܘ ܬܰܠܰܘܷܙܝܢ ܟܳܬܷ݂ܠܶܢܶܗ ܝܰܩܘܪܶܐ ܟܳܒܶܐ ܕܷܩܩܰܐ ܓ݂ܰܠܰܒܶܐ ܠܘ ܢܳܫܐ ܡܩܰܒܷܠ ܕܘ ܡܶܕܰܘܐ ܕܟܳܚܳܙܶܐ ܟ݂ܘܕ ܟܷܬܝܐ ܬܰܗܠܘܟܰܐ ܐܝܢܰܩܠܰܐ ܕܓ݂ܰܠܰܒܶܐ ܟܳܡܝܣܷܡ ܐܘ ܡܶܕܰܢܐ ܒܘ ܢܳܫܐ ܟܳܡܝܬܰܨܶܪ ܗܰܘܢܶܗ ܕܘ ܢܳܫܐ ܒܫܷܟܷܠ ܗܝܦ݁ܢܬܝܟ ܒܘ ܡܶܕܰܘܐ. ܟܷܡܡܝ ܐܰ ܐܳܣܰܘܳܬ݂ܐ ܐܝܢܰܩܠܰܐ ܕܓ݂ܰܠܰܒܶܐ ܟܳܘܶܐ ܐܘ ܡܶܕܰܢܐ ܒܘ ܗܰܘܢܐ ܐܘ ܢܰܥܝܡܐ ܒܷܬ݂ܷܪ ܡܶܐ ܙܰܒܢܐ ܒܰܣ ܟܳܩܳܕܷܪ ܕܗܰܘܢܶܗ ܣܳܝܷܡ ܕܷܩܩܰܐ ܥܰܠ ܚܕ݂ܐ ܢܘܩܙܐ ܐܰܘ ܥܰܠ ܡܶܕܳܢܶܐ ܕܚܶܕ݂ܳܪܶܗ. ܚܰܐ ܢܰܥܝܡܐ ܕܥܷܡܪܶܗ ܐܰܪܒܥܐ ܝܰܪܚܶܐ ܐܝܢܰܩܠܰܐ ܕܟܳܚܳܝܷܪ ܒܝ ܐܶܡܐ ܕܟܳܓܘܚܟܐ ܐܰܘ ܒܝ ܓܝܰܫܬܐ ܕܒܝ ܠܰܫܶܐ ܕܘ ܢܰܥܝܡܶܕ݂ܰܐ ܐܰܘ ܒܬܰܫܦܝܥܐ ܕܙܰܒܢܐ ܒܫܷܟܷܠܰܬ ܡܫܰܚܷܠܦܶܐ ܥܰܡ ܐܘ ܢܰܥܝܡܶܕ݂ܰܐ ܐܘ ܡܶܕܰܢܐ ܕܟܳܣܰܝܡܐ ܐܝ ܐܶܡܐ ܐܘ ܗܰܘܢܐ ܟܳܚܳܙܶܐ ܘܟܳܝܳܠܷܦ ܘܟܳܡܫܰܘܫܷܛ ܪܘܚܶܐ، ܡܰܘܟ݂ܰܐ ܠܰܝܒܶܐ ܬܰܠܰܘܷܙܝܢ ܕܩܳܕܷܪ ܡܳܠܷܦ ܚܰܐ ܢܰܥܝܡܐ ܒܚܘܠܡܳܢܐ ܙܷܬ ܡܝ ܐܶܡܐ. ܐܘ ܢܳܫܐ ܒܘ ܙܰܒܢܐ ܟܳܡܫܰܘܫܷܛ ܪܘܚܶܗ ܒܘ ܫܷܟܷܠܰܢܐ ܟܳܩܳܕܷܪ ܕܦܳܝܷܫ ܒܰܚ ܚܰܝܶܐ ܒܘ ܙܰܒܢܐ ܕܒܷܬܷ݂ܪ. ܐܘ ܬܶܟܢܳܠܳܙ̰ܝ ܟܳܩܳܛܷܥ ܐܘ ܢܰܥܝܡܐ ܡܘ ܫܘܫܳܛܰܢܐ ܕܟܳܠܳܙܰܡܠܶܝܐ ܥܰܠ ܕܠܐ ܟܳܘܶܠܶܗ ܐܶܣܳܪܶܐ ܥܰܡ ܠܰܪܘܰܠ ܐܶܠܐ ܒܰܣ ܥܰܡ ܡܶܕܳܢܶܐ ܕܘ ܬܶܟܢܳܠܳܙ̰ܝ. ܒܘ ܦܷܪܥܐ ܕܘ ܫܘܫܳܛܐ ܕܰܢ ܢܰܥܝܡܶܐ ܕܳܟ݂ܬܪ ܔܶܢܝ ܪܰܕܶܣܟܝ ܟܳܣܰܝܡܐ ܒܘܚܳܢܶܐ ܥܰܠ ܐܰܢ ܐܶܡܳܬ݂ܐ ܐܘ ܐܰܒ ܒܰܒܳܢܶܐ ܕܓ݂ܰܠܰܒܶܐ ܟܳܡܰܫܰܦܥܝ ܙܰܒܢܐ ܒܰܐ ܡܶܕܳܢܶܐ ܕܘ ܬܶܟܢܳܠܳܙ̰ܝ ܡܷܢ ܟܳܘܶܐ ܥܰܡ ܐܰܢ ܢܰܥܝܡܰܬ݂ܬ݂ܶܗ. ܕܳܟ݂ܬܪ ܪܰܕܶܣܟܝ ܟܷܡܡܳܐ ܐܘ ܢܰܥܝܡܐ ܐܝ ܦܳܬ݂ܐ ܒܝ ܦܬ݂ܐ ܕܟܳܘܶܐ ܓ݂ܰܠܰܒܶܐ ܒܚܘܠܡܳܢܐ ܟܳܝܳܠܷܦ ܐܝ ܐܝܕ݂ܰܥܬ݂ܐ، ܐܘ ܠܝܫܳܢܐ، ܐܰܪ ܪܶܓ݂ܫܶܕ݂ܶܐ، ܐܰܪ ܪܶܓ݂ܫܶܐ ܕܰܐܢ ܢܳܫܶܐ ܕܘ ܡܩܰܒܷܠ، ܕܗܳܘܶܐ ܡܪܐ ܠܰܪ ܪܶܓ݂ܫܶܕ݂ܶܐ، ܟܘܠ ܡܶܕܶܐ ܕܟܷܬܝܐ ܛܰܘܐ ܐܰܘ ܚܰܪܒܐ ܕܝܳܠܰܦܠܶܗ. ܐܰܡ ܡܶܕܳܢܰܢܝ ܟܘܠܠܶܗ ܟܳܘܷܢ ܐܝܢܰܩܠܰܐ ܕܐܝ ܐܶܡܐ ܟܳܡܷܪܘܐ ܐܘ ܢܰܥܝܡܶܕ݂ܰܐ ܘܠܐ ܐܘ ܬܶܟܢܳܠܳܙ̰ܝ. ܐܝܢܰܩܠܰܐ ܕܠܐ ܟܳܘܶܐ ܡܰܗܘܐ ܫܩܳܠܐ ܥܰܡ ܐܘ ܢܰܥܝܡܐ ܟܳܦܳܝܷܫ ܢܳܩܘܣܐ ܡܶܐ ܓ݂ܰܠܰܒܶܐ ܡܶܕܳܢܶܐ ܡܰܢܝ. ܘܕܝܣܰܐ ܟܷܡܡܐ ܪܰܕܷܣܟܝ ܐܝܢܰܩܠܰܐ ܕܘ ܢܰܥܝܡܐ ܟܳܚܳܙܶܐ ܐܘ ܒܰܒܐ ܐܰܘ ܐܝ ܐܶܡܐ ܟܳܡܰܫܰܦܥܝ ܐܘ ܙܰܒܢܰܬ݂ܶܐ ܟܘܠܶܗ ܒܘ ܬܰܠܰܦܳܢ ܟܳܡܷܬܦܰܟܷܪ ܕܳܐܢܐ ܟܳܥܘܔܙܝ ܡܝܢܝ ܡܰܘܟ݂ܰܐ ܠܐ ܚܰܪܷܘܶܐ ܡܶܢܝ ܘܗܰܢܐ ܟܳܘܶܐ ܡܶܕܶܐ ܦ݁ܣܝܩܳܠܳܙ̰ܝܟ ܥܰܡ ܐܘ ܢܰܥܝܡܐ. ܟܷܡܳܠܰܢ ܐܝ ܕܳܟ݂ܬܪ ܡܷܩܩܰܐ ܕܘ ܢܰܥܝܡܐ ܒܥܷܡܪܐ ܪܰܒܐ ܒܳܕܶܐ ܒܘ ܬܰܠܰܦܳܢ ܘܚܳܝܷܪ ܒܘ ܬܰܠܰܘܷܙܝܢ ܐܘ ܢܰܥܝܡܰܘܐ ܗܰܘܟ݂ܰܐ ܟܳܘܶܐ ܒܚܘܠܡܳܢܐ ܗܰܘܢܶܐ ܟܳܘܶܐ ܦܬܝܚܐ ܡܰܘܟ݂ܰܐ ܓ݂ܠܳܙܰܡ ܠܳܒܝܢܰܐ ܐܰܬ ܬܰܠܰܦܘܢܶܐ ܠܰܢ ܢܰܥܝܡܶܐ ܕܟܳܠܷܢ ܕܠܐ ܒܳܟܷ݂ܢ ܘܕܠܐ ܡܰܥܰܔܙܝܠܰܢ. ܓܠܳܙܷܡ ܒܘ ܡܰܡܠܐ ܒܰܬ ܬܶܫܬܶܥܷܢܝܶܐ ܘܒܬܰܫܦܝܥܐ ܕܙܰܒܢܐ ܒܰܣܝܡܐ ܡܷܪܘܝܢܰܐ ܐܰܢ ܢܰܥܝܡܶܕ݂ܰܢ ܕܠܐ ܡܶܐ ܡܶܕܶܐ ܢܰܥܝܡܐ ܟܳܡܰܚܰܪܘܝܢܰܐ ܐܰܚ ܚܰܝܶܐ ܕܘ ܢܰܥܝܡܰܘܐ ܟܘܠܶܗ. ܟܳܠܳܙܰܡ ܕܦܷܗܡܝܢܰܐ ܐܘ ܢܰܥܝܡܐ ܡܷܢ ܟܳܒܰܥܠܶܗ ܡܷܢ ܟܳܠܳܙܰܡܠܶܗ ܘܡܷܢܝܐ ܛܰܘܐ ܐܶܠܶܐ ܕܣܰܝܡܝܢܰܐ.
ܡܝܕܐ ܐܝܟ ܟܬ݂ܰܘܬܐ ܡܝ ܕܰܦܐ ܕܳܟܬܪ ܐܝܦܶܟ ܐܪܓܘܬ.
ܒܢܝܡܝܢ ܬܪܐ 692 ܡܶܠܐ