ܟܝܬܐ ܐܝܩܰܪܬ݂ܐ ܪܰܒܬ݂ܐ ܒܡܝܕܷܢ ܟܷܡܡܝܠܰܐ ܒܶܐ ܐܘܣܷܦ. ܡܘ ܝܰܘܡܐ ܕܝܰܘܡܶܐ ܡܳܪܶܐ ܕܩܰܛܥܶܐ ܢܶܐ ܘܟܷܬܬܶܐ ܓ݂ܰܠܰܒܶܐ ܥܶܙܶܐ ܘܥܘܳܢܶܐ. ܡܶܩܷܡ ܡܘ ܣܰܝܦܐ ܒܘ ܒܰܝܬܰܢܐ ܟܷܬܘܰܐ ܚܰܐ ܐܷܫܡܶܗ ܐܝܫܷܥ ܟܷܬܘܰܝܠܶܗ ܐܰܚܘܢܐ ܕܢܰܥܷܡ ܡܝܢܶܗ ܕܷܫܡܶܗ ܐܰܠܝܰܣ ܥܷܡܪܶܗ ܚܰܡܫܰܥܣܰܪ ܐܷܫܢܶܘܰܐ. ܒܰܝ ܝܰܘܡܶܐ ܕܘ ܣܰܬ݂ܘܐ ܗܳܘܶܘܰܐ ܩܘܪܐ ܓ݂ܰܠܰܒܶܐ ܩܰܫܝܐ ܐܘ ܥܰܡܐ ܓܳܪܰܫܘܰܐ ܓ݂ܰܠܰܒܶܐ ܥܰܣܩܘܬ݂ܐ. ܗܰܢܐ ܐܝܫܷܥ ܡܳܦܰܩܠܶܗ ܐܘ ܩܰܛܥܐ ܕܰܐ ܥܘܳܢܶܐ ܠܘ ܛܘܪܐ ܕܩܘܪܛܝ ܟܰܠܰܡܰܬ ܘܡܶܕܳܢܶܐ. ܐܰܙܙܶܝܐ ܒܘ ܩܘܪܰܐ ܘܡܒܶܠܶܗ ܐܘ ܩܰܛܥܐ ܠܕܘܟܬ݂ܐ ܕܟܷܡܡܝܠܰܗ ܘܰܠܝܬܟܰܢܶܐ. ܒܷܬ݂ܷܪ ܒܷܟܡܐ ܝܰܘܡܶܐ ܐܰܢ ܢܳܫܶܐ ܕܘ ܒܰܝܬܐ ܡܷܪܪܶܗ ܠܰܠܝܰܣ ܙܘܟ݂ ܡܒܰܠ ܒܝ ܬܘܪܶܐ ܡܘܟܠܐ ܠܰܐܚܘܢܳܟ݂ ܗܰܢܝ ܟܡܐ ܝܰܘܡܶܐ ܟܰܠܶܗ ܠܪܘܚܶܐ ܒܘ ܛܘܪܐ، ܘܚܘܪ ܐܘ ܕܘܪܘܡܶܕ݂ܶܐ ܡܷܢܝܐ. ܟܝܬܐ ܒܝ ܩܪܝܬ݂ܐ ܐܝܩܰܪܬ݂ܐ ܚܪܶܬܐ ܟܷܡܡܝܠܰܗ ܒܶܐ ܐܰܩܐ ܗܰܢܝ ܣܬܶܐ ܟܷܬܘܰܠܠܶܗ ܐܰܒܪܐ ܥܷܡܪܶܗ ܐܷܫܬܰܥܣܰܪ ܐܷܫܢܶܐ ܘܷܐܫܡܶܗ ܬܰܢܐ ܣܬܶܐ ܐܰܠܝܰܣ ܘܰܐ، ܐܰܬܪܶܐ ܐܰܠܝܰܣܰܢܝ ܓ݂ܰܠܰܒܶܐ ܚܰܘܪܳܢܶܐ ܛܰܘܶܘܰܝܢܶܐ. ܐܰܙܙܶܐ ܐܰܠܝܰܣ ܐܘ ܐܰܚܘܢܐ ܕܐܝܫܷܥ ܡܷܪܠܶܗ ܠܰܠܝܰܣ ܒܶܐ ܐܰܩܐ ܬܘܟ݂ ܐܰܥܡܝ ܙܰܢ ܠܘ ܛܘܪܐ ܡܷܒܠܝܢܰܐ ܡܘܟܠܐ ܠܰܐܚܘܢܝ ܘܚܳܙܝܢܰܐ ܡܷܢܝܐ ܐܘ ܕܘܪܘܡܶܕ݂ܶܗ. ܡܷܪܠܶܠܶܗ ܐܰܠܝܰܣ ܒܘ ܩܘܪܰܢܐ، ܒܘ ܬܰܠܓܰܢܐ ܐܰܝܕܰܪܒܐ ܟܝܒܰܢ ܙܰܢܐ ܗܘܠ ܬܰܡܐ ܕܡܰܨܝܬܷ݂ܬ ܐܰܥܠܝ ܛܪܰܝ ܠܐ ܐܷܙܰܢܐ. ܟܳܡܰܪܠܶܗ ܐܰܠܝܰܣ؛ ܠܐ ܙܰܝܥܷܬ ܕܚܳܙܶܢܐ ܕܩܰܦܝܠܷܬ ܡܘ ܩܘܪܐ ܓܡܰܚܰܬܢܘܟ݂ ܥܰܠ ܚܰܨܝ ܘܓܡܰܝܬܶܢܘܟ݂ ܠܘ ܒܰܝܬܐ. ܐܰܠܝܰܣ ܠܰܒܷܥ ܬܳܘܷܪ ܐܘ ܚܰܘܪܐ ܐܳܡܷܪ ܗܰܠܰܟ݂ ܐܷܙܙܰܢܐ. ܘܢܰܦܝܩܝ ܠܘ ܕܰܪܒܐ ܟܷܬܘܰܠܠܶܗ ܒܪܰܓ݂ܠܰܝܶܗ ܫ̰ܰܪܳܟ݂ܰܬ ܘܥܰܠ ܚܰܨܰܝܝܶܗ ܡܰܚܬܝܘܰܐ ܡܶܕܶܐ ܐܷܡܷܢܘܰܢܶܐ ܐܰܩ ܩܘܬܟܰܬ ܡܰܝܬܷܢܘܰܢܶܐ ܡܶܐ ܣܘܪܝܰܐ ܠܘ ܣܰܬ݂ܘܐ ܕܠܐ ܩܳܪܰܫܶܗ ܥܰܠ ܕܫܰܚܘܢܶܘܰܝܢܶܗ. ܠܰܦ ܥܰܣܪܝـܝܶܐ ܡܰܛܷܢ ܓܰܒ ܐܘ ܐܰܚܘܢܐ ܐܝܫܷܥ ܗܘܘܰܠܠܶܗ ܐܘ ܡܘܟܠܐ ܝܰܬܝܘܝ ܓܰܒܶܗ ܐܷܫܡܐ ܡܫܰܚܰܢܢܶܗ ܒܰܓ ܓܷܡܪܶܐ ܕܡܰܩܷܬ݂ܘܰܝܠܶܗ. ܐܝܢܰܩܠܰܐ ܕܰܐܒܝܥܝ ܩܰܝܡܝ ܡܷܪܠܶܗ ܐܝܫܷܥ ܠܰܝܟܐ ܓܷܙܳܟ݂ܘ ܐܘ ܝܰܘܡܐ ܥܰܬܷܡ، ܩܘܪܐ ܘܬܰܠܓܳܝܐ ܦܝܰܫܘ ܓܰܒܝ ܕܡܰܟ݂ܘ ܒܝ ܡܥܰܪܬ݂ܐ ܫܰܚܷܢܬܐ ܘܒܰܣܷܡܬܝܐ. ܡܷܪܪܶܗ ܠܐ؛ ܓܕܘܥܪܝܢܰܐ ܠܘ ܒܰܝܬܐ ܛܰܘܝܐ. ܣܷܡܠܶܗ ܘܠܐ ܣܷܡܠܶܗ ܠܐ ܩܰܕܷܪ ܐܰܥܠܰܝـܝܶܗ ܐܝܫܷܥ. ܘܢܰܦܝܩܝ ܕܕܘܥܪܝ ܠܝ ܩܪܝܬ݂ܐ. ܐܝ ܗܰܘܰܐ ܡܥܰܪܬܰܡܘܰܝܠܰܐ ܘܐܘ ܬܰܠܓܐ ܚܷܨܘܰܝܠܶܗ ܘܟܷܬܘܰܐ ܗܰܘܰܐ ܓ݂ܰܠܰܒܶܐ. ܐܝܢܰܩܠܰܐ ܕܷܡܗܰܠܟ݂ܝܘܰܐ ܡܰܛܷܢ ܠܕܘܟܬ݂ܐ ܕܟܷܡܡܝܠܰܐ ܒܰܪܰܟܶܐ ܕܘܟܬܐ ܕܟܝܒܰܐ ܩܰܒܪܶܐ ܥܰܬܝܩܶܐ ܘܪܰܒܶܐ ܓ݂ܰܠܰܒܶܐ، ܐܝܢܰܩܠܰܐ ܕܷܚܙܰܠܠܶܗ ܐܰܕ ܕܰܘܡܶܐ ܐܰܕ݂ܝܥܝ ܕܦܰܘܕܐ ܡܗܰܠܰܟ݂ܶܐ ܡܶܐ ܬܰܡܐ ܢܰܩܠܰܐ ܚܪܶܬܐ ܗܘܘܶܐ ܦܳܬ݂ܰܝـܝܶܗ ܠܰܦ ܐܝ ܩܪܝܬ݂ܐ. ܡܗܰܠܰܟ݂ܟ݂ܶܗ ܒܘ ܕܰܪܒܐ ܕܰܟ ܟܰܪܡܶܐ ܕܟܷܡܡܷܢܶܗ ܙܘܪܰܐ ܣܳܪ. ܐܷܫܡܐ ܒܷܫܡܐ ܒܕܰܠܠܶܗ ܕܓܘܠܕ݂ܝ ܒܝ ܩܰܡܰܝܬܐ ܐܰܠܝܰܣ ܒܶܐ ܐܰܩܐ ܢܰܦܷܠ ܡܘ ܩܘܪܐ ܐܘ ܚܰܘܪܐ ܡܰܚܰܬܠܶܗ ܥܰܠ ܚܰܨܶܐ ܗܘܠ ܠܝ ܕܘܟܬ݂ܐ ܕܩܰܕܷܪ ܐܶܕܝ ܐܰܬܪܶܐ ܢܰܦܝܠܝ ܒܘ ܕܰܪܒܐ ܡܶܩܷܡ ܡܶܕ ܡܳܛܷܢ ܠܝ ܩܪܝܬ݂ܐ ܓܰܠܝܕ݂ܝ ܘܡܰܝـܝܬ݂ܝ ܬܰܡܐ. ܐܰܡ ܡܳܪܰܬ݂ܬ݂ܶܗ ܕܘ ܒܰܝܬܐ ܡܷܬܦܰܟܪܝܘܰܐ ܕܦܰܝـܝܫܝ ܒܘ ܛܘܪܐ ܓܰܒ ܐܝܫܷܥ. ܒܷܬ݂ܷܪ ܬܪܶܐ ܬܠܳܬ݂ܐ ܝܰܘܡܶܐ ܕܰܥܷܪ ܐܝܫܷܥ ܠܘ ܒܰܝܬܐ، ܐܡ ܡܳܪܰܬ݂ܬܶܗ ܡܫܰܝܰـܠܠܶܗ ܥܰܠ ܐܰܢ ܐܰܠܝܰܣܰܬ ܡܷܪܠܰܠܶܗ ܐܘ ܝܰܘܡܐ ܕܡܰܝܬܰܠܠܶܗ ܐܘ ܡܘܟܠܐ ܕܰܥܝܪܝ ܡܶܐ ܓܰܒܝ ܕܳܐܬܷ݂ܢ ܠܘ ܒܰܝܬܐ ܡܰܐ ܠܰܬ݂ܷܢ؟ ܐܷܡܡܝ ܠܐ، ܐܶܕܝ ܦܰܗܝܡܝ ܕܰܐܬ݂ܝ ܡܶܕܶܐ ܠܪܝܫܰܝܶܗ. ܐܘ ܬܰܠܓܐ ܗܶܫ ܡܳܚܶܘܰܐ ܡܰܘܟ݂ܰܐ ܠܐ ܩܘܕܪܝܘܰܐ ܕܢܷܦܩܝ ܠܘ ܟܪܳܟ݂ܐ ܐܰܥܠܰܝـܝܶܗ. ܒܷܬ݂ܷܪ ܒܚܰܡܫܰܥܣܰܪ ܝܰܘܡܶܐ ܐܘ ܬܰܠܓܐ ܒܕܶܘܰܝܠܶܗ ܕܦܳܫܷܪ ܚܰܐ ܓܰܒܪܐ ܚܷܕܷܠܳܝܐ ܡܝ ܩܪܝܬ݂ܐ ܕܚܶܕܷܠ ܐܰܬ݂ܳܝܐ ܠܡܝܕܷܢ ܕܙܳܘܷܢ ܙܰܕ ܚܙܶܠܶܗ ܒܰܝܢ ܐܘ ܬܰܠܓܐ ܟܰܠܷܢܢܶܗ ܔܘܠܶܐ ܐܝܢܰܩܠܰܐ ܕܷܛܘܶܠܶܗ ܐܰܥܠܰܝـܝܶܗ ܚܙܶܠܶܗ ܟܰܠܷܢܢܶܗ ܐܰܫ ܫܠܰܕܰܬ ܓܰܠܝܕ݂ܶܐ ܒܰܝܢ ܐܘ ܬܰܠܓܐ. ܐܰܬ݂ܝ ܡܷܪܠܶܗ ܠܰܡ ܡܷܕܗܳܝܶܐ ܟܝܬܐ ܬܪܶܐ ܫܠܰܕܰܬ ܒܘ ܕܰܪܒܐ ܕܰܟ ܟܰܪܡܶܐ ܠܰܬܟ݂ܘ ܢܳܫܶܐ ܡܣܰܟܪܶܐ. ܐܝܢܰܩܠܰܝܐ ܐܰܕ݂ܝܥܝ ܕܰܐ ܐܰܠܝܰܣܰܬ ܢܶܐ. ܐܰܙܙܷܢ ܡܰܝܬܰܠܠܶܗ ܐܰܫ ܫܠܰܕܰܬ ܥܰܠ ܕܒܰܝܢ ܐܘ ܬܰܠܓܳܘܰܝܢܶܗ ܓܰܠܝܕ݂ܶܘܰܝܢܶܐ ܠܐ ܔܰܪܷܠܠܶܗ ܡܶܕܶܐ ܟ݂ܘܕ ܟܷܬܝܐ ܦܰܝـܝܫܝܘܰܐ. ܗܘܠ ܐܰܕܝܳܡܰܐ ܟܝܬܐ ܒܘ ܕܰܪܒܐ ܒܝ ܕܘܟܬ݂ܐ ܕܡܰܝـܝܬ݂ܝ ܐܝ ܡܰܩܬܰܠܶܗ ܕܰܐ ܐܰܠܝܰܣܰܬ ܕܡܝܕܷ݂ܥ ܐܝ ܕܘܟܬ݂ܐ ܕܓܰܠܝܕ݂ܝ ܐܶܒܰܗ. ܡܰܚܟܶܠܶܗ ܚܳܠܐ ܚܰܢܢܐ ܐܘܢܶܫ ܐܘ ܒܪܰܙܝ ܕܰܐܠܝܰܣ ܐܘ ܡܚܰܣܝܐ ܕܓܰܠܷܕ݂ ܩܰܫܐ ܥܰܒܕܷܠܠܰܗ ܡܷܕ݂ܝܳܝܐ ܐܝܕ݂ܝܥܳܝܐ ܠܟܘܠ ܐܰܒܪܐ ܣܘܪܝܳܝܐ ܕܡܷܕ݂ܝܰܕ݂ ܐܘ ܐܰܬ݂ܪܐ ܕܰܐ ܣܘܪܝܳܝܶܐ ܘܰܐ. ܐܰܕܝܳܡܰܐ ܣܬܶܐ ܟܳܡܷܚܫܳܘܐ ܐܰܪܷܫܟܝܬܐ ܕܰܐ ܣܘܪܝܳܝܶܐ ܕܟܷܬܢܶܐ ܒܛܘܪܥܰܒܕܝܢ. ܡܰܐ ܙܰܒܢܶܐ ܩܰܡܳܝܶܐ ܟܷܬܘܰܐ ܐܷܒܰܗ ܡܶܐ ܟܘܠ ܫܷܟܷܠ ܣܷܢܥܰܬ ܓ݂ܰܠܰܒܶܐ، ܘܕܘܟܬ݂ܐ ܕܝ ܬܷܔܰܪܰܘܰܐ ܡܰܘܟ݂ܰܐ ܟܝܒܰܘܰܐ ܢܳܫܶܐ ܬܰܓܳܪܶܐ ܥܰܬܝܪܶܐ. ܡܶܩܷܡ ܡܘ ܣܰܝܦܐ ܟܷܬܘܰܐ ܐܝܩܰܪܬ݂ܐ ܒܡܷܕ݂ܝܰܕ ܐܷܡܷܢܘܰܢܢܶܗ ܐܰܗ ܗܷܪܡܷܙܳܝܶܐ. ܗܰܬ݂ܶܐ ܐܝܩܰܪܬ݂ܐ ܓ݂ܰܠܰܒܶܐ ܪܰܒܬ݂ܳܘܰܐ ܥܰܬܝܪܶܘܰܝܢܶܗ ܟܷܬܘܰܠܠܶܗ ܫܰܓ݂ܳܠܶܐ ܓ݂ܰܠܰܒܶܐ ܓܰܒܰܝܶܗ. ܟܷܬܘܰܠܠܶܗ ܚܰܐ ܫܰܓ݂ܳܠܐ ܓܰܒܰܝܶܗ ܐܷܫܡܶܐ ܥܰܒܕܷܠܰܗ ܡܶܐ ܒܳܬܶܐ ܐܝ ܩܪܝܬ݂ܳܐ ܘܰܐ. ܗܰܢܐ ܓܰܒܪܐ ܚܝܨܐ ܘܫܰܓ݂ܳܠܳܘܰܐ، ܘܟܷܬܘܰܝܠܶܗ ܚܰܘܪܐ ܩܰܪܝܘܐ ܓ݂ܰܠܰܒܶܐ ܒܒܷܣܳܪܝܢܐ ܐܝ ܩܪܝܬ݂ܐ. ܐܝ ܐܝܩܰܪܬ݂ܐ ܕܒܶܐ ܗܷܪܡܷܙ ܫܘܓ݂ܠܝܘܰܐ ܥܰܡ ܐܰܦ݁ ܦ݁ܪܳܬܶܣܬܰܢܬܳܝܶܐ ܓ݂ܰܠܰܒܶܐ ܘܟܷܬܘܰܠܠܶܗ ܡܰܗܘܐ ܫܩܳܠܐ ܥܰܡ ܐܰܡ ܡܝܣܝܳܢܰܪ ܕܳܐܬܷ݂ܢܘܰܐ ܡܰܕ ܕܰܘܠܰܬ ܕܠܰܪܘܰܠ ܠܡܷܕ݂ܝܰܕ݂ ܘܠܝ ܦܢܝܬ݂ܐ ܕܛܘܪܥܰܒܕܝܢ. ܐܘ ܪܝܫܐ ܕܝ ܐܝܩܰܪܬ݂ܐ ܓܰܠܠܶܐ ܗܷܪܡܷܙܘܰܐ ܒܚܰܐ ܡܰܝ ܝܰܘܡܶܐ ܩܪܶܠܶܗ ܠܘ ܫܰܓ݂ܳܠܶܕ݂ܶܗ ܥܰܒܕܷܠܠܰܐ ܡܷܪܠܶܠܶܗ ܙܘܟ݂ ܓܰܒ ܐܘ ܚܰܘܪܰܘܐ ܕܝܕ݂ܘܟ݂ ܕܟܷܬܝܐ ܒܒܷܣܳܪܝܢܐ ܡܰܪܠܶܗ ܟܷܒܥܝܢܰܐ ܕܡܰܥܰܡܪܝܢܰܐ ܩܳܠܶܙ̰ ܐܰܡܶܪܝܩܰܢܝ ܒܒܷܣܳܪܝܢܐ ܙ̰ܒܳܝ ܕܘ ܝܘܠܦܳܢܐ ܐܰܠܳܗܳܝܐ ܘܰܐܢ ܢܳܫܶܐ ܕܦܷܗܡܝ ܐܘ ܟܬ݂ܳܘܐ ܩܰܕܝܫܐ ܘܡܰܩܝܡܷܢܶܐ ܐܰܒܢܶܐ ܡܫܝـܚܳـܝܶܐ ܟܰܫܝܪܶܐ ܠܠܰܩܷܕܰܡ. ܥܰܒܕܷܠܠܰܐ ܣܬܶܐ ܫܰܡܷܥ ܠܘ ܡܳܪܶܕ݂ܶܐ ܘܪܰܘܷܟ݂ ܥܰܠ ܐܘ ܒܰܓ݂ܠܐ ܕܷܙܶܝܐ ܠܒܷܣܳܪܝܢܐ، ܐܝܢܰܩܠܰܐ ܕܡܰܛܝ ܠܝ ܩܪܝܬ݂ܐ ܡܣܰܘܝܐ ܐܰܙܙܶܝܐ ܠܘ ܒܰܝܬܐ ܕܘ ܚܰܘܪܐ، ܐܘ ܙܰܒܢܐ ܪܰܒܷܥܘܰܐ ܐܘ ܥܰܡܐ ܫܰܓ݂ܳܠܐ ܒܰܝܢ ܐܰܟ ܟܰܪܡܶܐ ܒܘ ܟܣܳܚܐ ܒܘ ܕܘܳܪܐ. ܘܒܰܝ ܝܰܘܡܳܬ݂ܶܐ ܕܨܰܘܡܐ ܪܰܒܳܘܰܐ. ܥܰܒܕܷܠܠܰܐ ܕܷܩܠܶܗ ܐܘ ܬܰܪܥܐ ܐܝ ܐܰܬܬ݂ܐ ܦܬܷܚܠܰܗ ܡܫܰܝܶܠܶܗ ܥܰܠ ܐܘ ܚܰܘܪܐ ܐܝ ܐܰܬܬ݂ܐ ܡܷܪܠܰܠܶܗ ܟܰܠܶܝܐ ܒܰܝܢ ܐܰܟ ܟܰܪܡܶܐ ܫܰܓ݂ܳܠܳܝܐ ܬܘܟ݂ ܥܒܰܪ ܝܬܰܘ ܗܘܠ ܕܳܐܬ݂ܶܐ. ܥܰܒܷܪ ܠܰܘܓ݂ܘܠ ܝܰܬܷܘ، ܐܝ ܦ݁ܝܪܶܐ ܡܫܰܝܶܠܰܠܶܗ ܡܷܪܠܰܗ ܡܘ ܕܰܪܒܐ ܐܰܬ݂ܳܝܳܗܷܬ ܟܷܬܝܐ ܟܰܦܝܢܷܬ ܡܷܢ ܡܘܟܠܐ ܣܰܝܡܰܠܘܟ݂ ܕܘܟ݂ܠܷܬ؟ ܗܝـܝܶܐ ܣܬܶܐ ܡܷܪܠܶܠܰܗ ܗܰܡܰܐ ܣܷܡܠܝ ܐܷܫܡܐ ܒܷܪܓ݂ܷܠ ܘܨܦܶܪܐ ܕܳܐܟ݂ܰܠܢܐ. ܐܰܢ ܢܰܥܝܡܶܐ ܕܘ ܒܰܝܬܐ ܝܰܬܝܘܶܘܰܝܢܶܐ ܒܝ ܩܘܪܢܝܬ݂ܐ ܡܦܰܪܔܝܘܰܐ ܐܰܥܠܶܗ ܐܝܢܰܩܠܰܐ ܕܟܳܟܷ݂ܠ ܐܘ ܒܷܪܓ݂ܷܠ ܨܦܶܪܐ ܡܝܕܰܘܡܪܝܘܰܐ ܘܷܐܡܝܘܰܐ ܠܷܚܕ݂ܳܕ݂ܶܐ. ܗܰܢܐ ܓܰܒܪܐ ܣܘܪܝܳܝܐ ܟܳܡܷܔܓܷ݂ܠ ܣܘܪܝܳܝܐ ܟ݂ܘܕ ܐܰܚܢܰܐ، ܐܰܝܕܰܪܒܐ ܟܳܟܷ݂ܠ ܒܘ ܨܰܘܡܰܢܐ ܒܷܪܓܷ݂ܠ ܨܦܶܪܐ؟ ܠܐ ܟܳܙܳܝܷܥ ܡܰܐܠܳܗܐ ܕܝܳܩܷܕ ܒܝ ܓܝܗܰܢܐ. ܐܘ ܐܰܚܘܢܐ ܡܰܕܥܰܪܘܰܐ ܥܰܠ ܐܘ ܢܰܥܝܡܐ ܐܳܡܰܪܘܰܐ ܡܰܝܟܐ ܟܘܕ݂ܥܷܬ ܡܫܝـܚܳـܝܳܐ ܝܐ؟ ܟܝܬܐ ܓ݂ܰܠܰܒܶܐ ܓܰܒܪܶܐ ܕܠܰܬܢܶܐ ܣܘܪܝܳܝܶܐ ܕܟܳܡܷܔܓ݂ܳܠܝ ܣܘܪܝܳܝܐ. ܥܰܒܕܷܠܠܰܐ ܫܳܡܰܥܘܰܐ ܐܰܡ ܡܶܕܳܢܶܐ ܕܰܢ ܢܰܥܝܡܶܐ ܕܟܷܡܡܝ ܐܶܠܐ ܠܳܐ ܐܳܡܰܪܘܰܐ ܡܶܕܶܐ. ܗܘܠ ܕܗܰܘܝ ܥܰܣܪܝـܝܶܐ ܥܰܒܕܷܠܠܰܐ ܐܰܟ݂ܝܠܶܗ ܘܕܰܡܷܟ݂ܠܶܗ ܫܰܘܛܐ ܘܬ݂ܢܝܚ، ܡܶܕ ܡܥܰܪܬܰܡܠܰܗ ܐܝ ܗܰܘܰܐ ܐܰܬ݂ܝ ܡܳܪܶܗ ܕܘ ܒܰܝܬܐ ܡܢܰܫܰܩܶܐ ܚܕ݂ܳܕ݂ܶܐ ܘܝܰܬܝܘܝ ܡܷܪܠܶܠܶܗ ܡܳܪܶܗ ܕܘ ܒܰܝܬܐ ܟ݂ܶܪܝܐ ܐܝܢܫܰܠܠܰܗ ܒܘ ܙܰܒܢܰܢܐ ܕܘ ܫܘܓ݂ܠܐ ܪܰܘܝܟܷ݂ܬ ܥܰܠ ܐܘ ܒܰܓ݂ܠܐ ܘܰܐܬܷ݂ܬ ܗܘܠ ܠܰܪܟܶܐ. ܡܷܪܠܶܠܶܗ ܥܰܒܕܷܠܠܰܐ؛ ܐܘ ܡܳܪܶܕ݂ܝ ܓܰܠܶܐ ܗܷܪܡܷܙ ܡܫܰܕܰܪܠܶܠܝ ܠܓܰܒܘܟ݂ ܡܷܪܠܶܗ؛ ܡܰܪܠܶܗ ܕܰܐ ܣܝܪܝܢܳܝܶܐ ܕܳܒܷܢ ܕܰܪܒܐ ܟܷܒܥܝܢܰܐ ܕܡܰܥܰܡܪܝܢܰܐ ܩܳܠܶܙ̰ ܐܰܡܶܪܝܩܰܢܝ ܗܰܪܟܶܐ ܒܝ ܩܪܝܬ݂ܐ. ܡܷܪܠܶܠܶܗ ܡܳܪܶܗ ܕܘ ܒܰܝܬܐ؛ ܒܰܫܪܪܐ ܥܰܒܕܷܠܠܰܐ ܓ݂ܰܠܰܒܶܐ ܒܰܣܝܡܐ ܟܷܡܷܬ ܐܶܠܐ ܐܳܢܐ ܬܰܢܶܐ ܠܰܝܒܝ ܕܳܡܰܪܢܐ ܐܶ، ܐܰܘ ܠܐ، ܘܥܰܠ ܡܶܕܶܐ ܗܰܘܟ݂ܰܐ ܓܠܳܙܰܡ ܡܷܔܓܷ݂ܠܢܐ ܥܰܡ ܐܘ ܐܰܓ݂ܰܐ ܗܝܝܶܗ ܒܶܐ ܡܷܢ ܓܕܳܡܰܪ ܗܰܘܟ݂ܰܐ ܟܝܒܘܟ݂ ܡܰܕܰܥܪܷܬ ܟ݂ܰܒܪܐ ܠܓܰܠܶܐ ܗܷܪܡܷܙ. ܟܷܬܘܰܐ ܐܰܓ݂ܰܐ ܒܒܷܣܳܪܝܢܐ ܐܷܡܷܢܘܰܢܶܐ ܒܶܐ ܓܰܘܪܐ. ܐܰܙܙܶܝܐ ܓܰܒܶܐ ܡܷܪܠܶܠܶܗ ܐܝ ܡܰܣܰܠܶܐ. ܐܘ ܐܰܓ݂ܰܐ ܡܷܪܠܶܠܶܗ ܓܡܰܠܬܰܡܢܐ ܐܘ ܕܝܘܰܢ ܥܰܠܡܷܢ ܕܪܳܕܷ݂ܢ ܕܝ ܩܪܝܬ݂ܐ ܗܰܘܟ݂ܰܐ ܓܣܰܝܡܝܢܰܐ. ܗܰܘܝ ܝܰܘܡܐ ܕܒܷܬ݂ܷܪ ܥܰܣܪܝـܝܶܐ ܐܘ ܐܰܓ݂ܰܐ ܡܰܠܷܡܠܶܗ ܐܰܪ ܪܝܫܳܢܶܐ ܕܰܒ ܒܳܬܶܐ ܟܘܠܠܶܗ ܓܰܒ ܪܘܚܶܐ ܘܝܰܬܝܘܝ، ܡܷܪܠܶܗ ܐܘ ܐܰܓ݂ܰܐ ܠܥܰܒܕܷܠܠܰܗ؛ ܩܷܡ ܠܘ ܦܷܠܓܐ ܡܷܔܓ݂ܰܠ ܘܡܰܚܟܝ ܡܷܢܝܐ ܐܘ ܕܰܪܕܶܕ݂ܘܟ݂. ܩܰܝܷܡ ܥܰܒܕܷܠܠܰܗ ܘܒܕܶܠܶܗ ܕܡܰܚܟܶܐ ܠܰܣ ܣܪܝܢܳܝܶܐ ܐܝ ܨܒܘܬ݂ܐ ܟ݂ܘܕ ܟܷܬܝܐ ܘܡܷܪܠܰܠܶܗ ܟܷܒܥܝܢܰܐ ܕܡܰܥܰܡܪܝܢܰܐ ܡܰܟܬܰܒ ܗܰܪܟܶܐ ܕܰܐ ܐܰܡܶܪܝܟܰܢ ܠܘ ܡܝܣܝܳܢ ܘܠܝ ܥܠܰܝܡܘܬ݂ܐ ܘܠܘ ܙܰܒܢܐ ܕܳܐܬ݂ܶܐ. ܚܰܐ ܡܰܐ ܣܳܘܶܐ ܩܰܝܷܡ ܡܷܪܠܶܗ ܒܪܰܙܝ ܗܰܬ ܡܰܪܠܰܢ ܟܰܪܝܐ ܘܚܰܠܝܐ ܡܷܢ ܟܷܒܥܘܬܘ ܕܡܷܠܦܘܬܘ ܠܰܢ ܒܘ ܡܰܟܬܰܒܰܢܐ ܕܟܷܒܥܘܬܘ ܦܷܬܚܘܬܘ ܠܶܗ ܓܰܒܰܢ ܡܷܢ ܓܣܰܝܡܘܬܘ ܠܰܢ. ܥܰܒܕܷܠܠܰܗ ܣܬܶܐ ܡܚܰܠܰܩܠܶܗ ܐܝܕ݂ܶܗ ܠܟܷܣܬܶܗ ܘܡܳܦܰܩܠܶܗ ܐܶܘܰܢܓܰܠܝܘܢ ܢܰܥܝܡܐ ܘܡܰܚܘܶܠܶܗ ܠܰܣܪܝܢܳܝܶܐ ܘܡܷܪܠܰܠܶܗ ܒܘ ܡܰܟܬܰܒܰܢܐ ܓܡܷܠܦܝܢܰܐ ܐܘ ܐܶܘܰܢܓܰܠܝܘܢ ܘܓܡܷܠܦܝܢܰܐ ܐܝ ܡܫܝܚܳܝܘܬ݂ܐ ܘܓܦܷܗܡܘܬܘ ܡܫܝܚܐ ܛܰܘܘܐ ܡܷܢ ܐܰܒܷܥ ܐܳܡܰܪ ܠܰܢ ܘܟܬܳܘܰܠܟ݂ܘ ܡܰܗܘܐ ܫܩܳܠܐ ܥܰܡ ܐܰܕ ܕܰܘܠܰܬ ܕܠܰܪܘܰܠ ܘܓܝܷܠܦܘܬܘ ܠܶܫܳܢܶܐ ܡܫܰܚܷܠܦܶܐ. ܐܝܢܰܩܠܰܐ ܕܷܡܟܰܡܶܠܶܗ؛ ܟܘܠܠܶܗ ܚܷܪܪܶܗ ܒܷܚܕ݂ܳܕ݂ܶܐ ܘܒܕܰܠܠܶܗ ܒܘ ܓܰܚܟ݂ܐ، ܫܰܘܛܐ ܗܰܘܟ݂ܰܐ ܓܰܚܝܟ݂ܝ ܒܷܬܷ݂ܪ ܩܰܝܷܡ ܐܘ ܣܳܘܰܘܐ ܡܷܪܠܶܠܶܗ؛ ܒܰܝܬܶܗ ܕܒܰܒܘܟ݂ ܗܳܘܶܘܰܐ ܟܷܬܠܰܢ ܐܰܚܢܰܐ ܐܰܣ ܣܪܝܢܳܝܶܐ ܒܡܰܪ ܕܳܕܐ ܐܶܘܰܢܓܰܠܝܘܢ ܐܰܪܒܥܐ ܙܠܰܡܰܬ ܠܐ ܟܳܩܘܕܪܝ ܕܛܘܥܢܝܠܶܗ ܟܳܟܳܠܷܬ ܡܝܢܰܢ ܛܳܪܝܢܰܐ ܐܘ ܟܬ݂ܳܘܰܘܐ ܟܘܠܶܗ ܘܐܳܬ݂ܝܢܰܐ ܒܷܬ݂ܪܶܗ ܕܘ ܐܶܘܶܢܓܰܠܝܘܢܰܢܐ ܕܠܰܝܒܶܐ ܣܝܛܐ ܕܟܷܬܝܐ ܐܰܥܡܘܟ݂. ܗܰܬ ܟܳܣܰܝܡܷܬ ܚܰܢܰܟ ܕܝܕ݂ܘܟ ܐܶܒܰܢ ܠܐ ܟܘܕ݂ܥܷܬ ܗܰܪܟܶܐ ܒܷܣܳܪܝܢܳܝܐ ܪܝܫܶܐ ܕܘ ܕܝܢܳܝܐ. ܩܰܝܡܝ ܐܰܓ ܓܰܘܪܶܐ ܟܘܠܠܶܗ ܘܡܰܚܰܬܶܗ ܐܰܥܠܶܗ ܒܘ ܡܰܚܝܐ ܗܘܠ ܕܢܰܦܷܠ ܕܠܐ ܪܘܚܐ. ܐܘ ܐܰܓ݂ܰܐ ܡܷܪܠܶܗ ܠܷܬܪܶܐ ܡܰܐ ܓܰܘܪܶܐ؛ ܗܰܢܐ ܡܳܣܶܪܘܠܶܗ ܡܶܐ ܪܰܓ݂ܠܳܬ݂ܶܗ ܘܡܰܢܚܶܬܘܠܶܗ ܠܘ ܓܘܒܐ ܗܘܠ ܕܳܐܬ݂ܶܐ ܗܰܘܢܶܗ ܠܝ ܕܘܟܬ݂ܐ ܕܳܐܕܷ݂ܥ ܠܰܝܟܐ ܐܰܬ݂ܝ ܘܢܰܩܠܰܗ ܚܪܶܬܐ ܒܰܣ ܡܩܰܕܷܡ ܠܰܕܷܟܳܬ݂ܰܢܝ. ܣܷܡܡܶܗ ܟ݂ܘܕ ܡܷܪܠܶܗ ܐܘ ܐܰܓ݂ܰܐ ܘܡܰܢܚܰܬܬܶܗ ܠܘ ܓܘܒܐ. ܐܝܢܰܩܠܰܐ ܕܗܰܘܝ ܨܰܦܪܰܝܬܐ ܐܘ ܥܡܐ ܕܝ ܩܪܝܬ݂ܐ ܙܷܢ ܘܐܳܬܷ݂ܢܘܰܐ ܚܶܕ݂ܳܪܶܗ ܡܩܰܫܡܪܝܘܰܐ ܐܶܒܶܗ. ܐܰܢ ܢܰܥܝܡܶܐ ܕܘ ܒܰܝܬܰܐ ܘܐ ܕܦܰܝܷܫܘܰܐ ܐܶܒܶܗ ܐܳܬܷ݂ܢܘܰܐ ܐܷܡܡܝܘܰܐ ܐܘ ܚܰܐ ܕܳܐܟܷ݂ܠ ܒܘ ܨܰܘܡܐ ܐܘ ܣܦܶܪܐ ܗܰܘܟ݂ܰܐ ܓܔܳܪܶܠܶܗ ܕܶܐ ܟܠܰܝ. ܬܠܳܬ݂ܐ ܝܰܘܡܶܐ ܗܰܘܟ݂ܰܐ ܛܪܰܠܠܶܗ ܡܰܣܪܐ ܛܳܠܰܒܘܰܐ ܫܷܒܩܳܢܐ ܝܳܡܶܘܰܐ ܕܢܰܩܠܰܗ ܚܪܶܬܐ ܒܰܣ ܟܳܬ݂ܶܐ ܠܝ ܩܪܝܬ݂ܐ ܒܷܬܷ݂ܪܟܶܐ ܓܪܷܫܫܶܗ ܡܘ ܓܘܒܐ ܘܡܷܪܠܶܗ ܙܘܟ݂ ܘܠܘ ܥܰܦܪܐ ܕܒܷܣܳܪܝܢܐ ܠܐ ܡܩܰܕܡܘܬܘ ܠܐ ܗܰܬܘ ܘܠܐ ܐܰܢ ܐܰܡܶܪܝܟܳܝܶܐ. ܐܰܢ ܢܰܩܠܰܐ ܓܰܠܠܶܐ ܗܷܪܡܷܙ ܒܗܶܝܶܔܰܢ ܪܰܒܐ ܟܳܟܳܠܶܗ ܠܥܰܒܕܷܠܠܰܗ ܟܳܡܷܬܦܰܟܷܪ ܗܰܢܝ ܟܡܐ ܝܰܘܡܶܐ ܬܰܡܳܝܐ ܟܳܡܰܚܘܶܐ ܟܘܠ ܡܶܕܶܐ ܓ݂ܰܠܰܒܶܐ ܛܰܘܐ ܟܷܡܗܰܠܷܟ݂ ܓܰܪܰܟ ܟܳܚܰܝܪܝ ܕܘܟܬ݂ܐ ܠܘ ܡܰܟܬܰܒ ܕܗܰܝܟܐ ܟܝܒܶܗ ܥܳܡܷܪ. ܐܝܢܰܩܠܰܐ ܕܰܐܬ݂ܝ ܥܰܒܕܷܠܠܰܗ ܠܘ ܒܰܝܬܐ ܚܙܶܠܶܗ ܐܰܒ ܒܪܝܢܰܬ ܐܰܔ ܔܷܪܚܳܬ݂ܶܐ ܒܦܳܬ݂ܶܗ ܡܷܪܠܶܠܶܗ؛ ܥܰܒܕܷܠܠܰܗ ܡܷܢ ܗܰܘܝ ܗܰܘܟ݂ܰܐ ܠܐ ܡܰܩܒܰܠܠܶܗ ܕܡܰܥܰܡܪܝܢܰܐ ܒܶܬ݂ ܨܶܦܪܐ ܬܰܡܐ. ܐܘ ܦܰܩܝܪܐ ܕܥܰܒܕܷܠܠܰܗ ܡܰܝܬܶܠܶܗ ܐܰܡ ܡܷܚܘܳܬ݂ܶܗ ܥܰܠ ܒܳܠܶܗ ܡܷܪܠܶܗ ܠܓܰܠܶܗ ܗܷܪܡܷܙ؛ ܪܰܒܝ ܡܷܬܝܰܩܰܢ ܐܘ ܚܐ ܕܟܝܬܐ ܥܰܩܷܠ ܒܩܰܪܥܶܗ ܘܟܳܪܳܚܷܡ ܪܘܚܶܐ ܛܪܐ ܠܐ ܡܩܰܕܷܡ ܠܝ ܩܪܝܬ݂ܰܝܐ ܐܶܠܐ ܗܰܬ ܕܷܒܥܷܬ ܙܘܟ݂ ܡܔܰܪܰܒ ܪܘܚܘܟ݂ ܐܳܢܐ ܢܰܩܠܰܐ ܚܪܶܬܐ ܐܝ ܩܝܰܡܬܐ ܕܩܰܝܡܐ ܒܘ ܕܰܪܒܐ ܕܒܷܣܳܪܝܢܐ ܗܰܘ ܟܳܫܳܦܰ݁ܥ ܢܐ. ܒܷܬ݂ܷܪ ܡܶܐ ܙܰܒܢܐ ܗܰܢܐ ܥܰܒܕܷܠܠܰܗ ܢܰܦܷܩ ܡܶܐ ܓܰܒ ܓܰܠܠܶܐ ܗܷܪܡܷܙ ܘܐܰܙܙܶܝܐ ܠܒܳܬܶܐ ܠܝ ܩܪܝܬ݂ܐ ܕܰܐ ܒܰܒܳܢܶܐ ܘܒܷܬ݂ܷܪ ܡܶܐ ܙܰܒܢܐ ܣܝܡ ܘܗܰܘܝ ܩܰܫܐ ܕܰܐ ܣܘܪܝܳܝܶܐ. ܘܒܘ ܙܰܒܢܐ ܕܘ ܣܰܝܦܐ ܩܫܝܥܐ ܐܝ ܐܝܩܰܪܬ݂ܐ ܕܒܶܐ ܗܷܪܡܷܙ ܟ݂ܘܕ ܟܷܬܝܐ ܠܰܐܕܝܳܡܰܐ ܠܐ ܡܰܛܝ ܢܳܫܶܐ ܡܷܢܢܶܗ. ܘܥܰܒܕܷܠܠܰܗ ܐܝܢܰܩܠܰܐ ܕܗܰܘܝܘܰܐ ܩܰܫܳܐ ܣܬܶܐ ܐܝ ܙܘܥܬ݂ܐ ܕܰܣ ܣܪܝܢܳܝܶܐ ܦܰܝܫܳܘܰܐ ܒܠܶܒܶܗ ܥܰܠ ܕܠܐ ܛܰܥܝܘܰܐ ܐܰܡ ܡܷܚܘܳܬ݂ܰܢܷܟ. ܡܰܚܟܝܳܠܶܗ ܩܰܫܝܫܐ ܡܝܟܰܐܝܠ ܬܳܪܐ ܡܷܕܗܳܝܐ. ܒܢܝܡܝܢ ܬܪܐ 1328 ܡ̈ܠܐ.

Mäsälat karye